Hebreos 3

Moisés audeara Jesús mechiu nii

1Ãbarã, machi ẽbẽrarã Dachi Akõred̶erãd̶eeba maud̶e ichiba machi iukuasiid̶eeba, Jesucristo ʉ̃rʉbena ãrea biꞌia kauwa kʉ̃risiásturu. Dachiba biawãra ijãa panuu abadau, Ichi Dachi Akõreba bʉid̶a maud̶e Paare Mechiu. 2Dachi Akõreba waubid̶a Jesusba joma arakʉd̶e wausii Moisesba Dachi Akõre ded̶ebenarã ome waud̶a kĩra.#3:2 Dachi Akõre ded̶ebenarã ome. Griego bed̶ead̶e naka b̶ʉ kub̶uu: Dachi Akõre ded̶e. Números 12:7. 3Ẽbẽrarãba chi de biꞌia waubarii ʉ̃rʉbena ãrea berreabadau chi de audeara. Ara mau kĩra dachiba Moisés audeara Jesús ʉ̃rʉbena biꞌia berread̶ai panuu. 4Chi de waubarii barau. Maamina chi joma waud̶a Dachi Akõrebʉ. 5Moisés Dachi Akõre baita bari trajabariid̶eeba ẽbẽrarã Dachi Akõre ded̶ebenarã ome joma arakʉd̶e wausii. Ichiba kuitaabiasii Dachi Akõreba kaad̶ebena ewarid̶e kãare jarai b̶uu. 6Maamina Dachi Akõre warr Cristo baerã, mau ẽbẽrarã mechiubʉ. Ãchi ome joma arakʉd̶e wau b̶uu. Dachiba Cristod̶e ijãa panuubʉrã maud̶e ichid̶eeba adaud̶ai kĩrajʉʉ esed̶au panuubʉrã, ẽbẽrarã Dachi Akõred̶erãbʉ.#3:6 Griego bed̶ead̶e chi b̶ee kartad̶e nau sid̶a b̶ʉ kub̶uu: ab̶a nau ewari wãꞌãeruud̶aa.

Cristo ida b̶urã́sturu

7-8Maud̶eeba Dachi Akõre Jauriba naka jara b̶uu:

«Id̶i Dachi Akõre bed̶ea ũriiduud̶e machi sõ chaarearã́sturu machi nabẽrarã sõ chaareaped̶aad̶a kĩra.

Maarã drua sirua wãꞌãe b̶uud̶e duanasid̶aud̶e Dachi Akõreba jarad̶a ida b̶usid̶au ichiba kãare waui kuitaad̶ayua.

9Aria ichiba waud̶a 40 añosd̶aa unu panasmina ãchiba ijãad̶aabasii kãare wau b̶uu kuitaad̶ai baita.

10Maud̶eeba ãchi ome kĩruped̶a Dachi Akõreba naka jarasii:

“Jãarãba sõd̶eeba biawãra mʉ baara nibad̶akau. Mʉ o unud̶ai kʉ̃riad̶akau”.

11Maud̶e ichi kĩruped̶a biawãra naka jarasii: “Mʉʉba kʉrrjĩrubiaimaa jãarã wãd̶aabai”».#Salmos 95:7-11; Números 14:21-35.

12Ãbarã, kauwa panásturu. Sõ chaareaba machid̶ebena ab̶a bid̶a Dachi Akõred̶e ijãawẽa b̶uarã́se. Chi maka niiba Dachi Akõre chokae nii ida b̶ubarii. 13Wabid̶a ãyadaa b̶uud̶eed̶e ewaricha chiya aid̶a panásturu biꞌia ijãad̶ai baita. Maka ab̶a bid̶a kachiruaba setaa kũruaped̶a sõ chaarea nureabai. 14Dachiba ab̶aed̶eed̶e ijãaped̶aad̶ad̶eed̶ebena ab̶a biuduud̶aa Cristod̶e ijãa panuubʉrã, ichi ome dauchia jãadua panad̶ai. 15Naed̶e jara b̶uad̶a kĩra waya jaraaruu:

«Id̶i Dachi Akõre bed̶ea ũriiduud̶e machi sõ chaarearã́sturu machi nabẽrarã sõ chaareaped̶aad̶a kĩra».#Salmos 95:7-8.

16Dachi Akõre bed̶ea ũriped̶aad̶akare ¿kairã ãchi sõ chaareasid̶ama? ¿Joma Moisesba Egiptod̶ebena awara adaukuad̶a maka sõ chaareasid̶auwãeka? 17¿Dachi Akõre kairã ome 40 años kĩru b̶uasma? ¿Kachirua wauped̶aad̶arã ome kĩru b̶uaswãeka? ¿Maud̶eeba maarã drua sirua wãꞌãe b̶uud̶e kinisid̶auwãeka? 18¿Dachi Akõreba kairãmaa biawãrad̶eeba jarasma ichiba kʉrrjĩrubiaimaa wãd̶aabai? ¿Chi ichi bed̶ea ijãad̶awẽa nureerãmaa maka jaraswãeka? 19Maud̶eeba dachiba kuitaa panuu jãarãba ijãaped̶aad̶awãed̶eeba, Dachi Akõreba kʉrrjĩrubiaimaa poyaa wãd̶aabai.

Currently Selected:

Hebreos 3: cmi

Highlight

Copy

Compare