Gálatas 6

Chiya aid̶ásturu

1Ãbarã, machid̶ebena ab̶a mia aduad̶e kachiruad̶e b̶aeruubʉrã, machi chi Dachi Akõre Jaurid̶eeba nureerãba, waabenarã audeara biꞌia nuree kʉ̃risiad̶akaud̶eeba, aid̶ad̶ai panuu mau waya jipa nibamera. Maamina kauwa panásturu machi sid̶a ara mau kĩra kachiruad̶e b̶aerãad̶amera. 2Nebʉrad̶e panuud̶e chiya aid̶ásturu. Maka Cristoba waubi b̶uu machiba joma waud̶ai. 3Chi mechiuwãe b̶uuba ichi chi mechiu nii kʉ̃risia b̶uubʉrã, ara ichi du ab̶a setaa kũrua b̶uu. 4Ab̶auba wau b̶uu ichiad̶ai bad̶amaarã dachiba wau panuu ichiad̶ai panuu, jipa wau panuu kuitaad̶ai. Maka ara dachiba wau panuu kakua kĩrajʉʉ panad̶ai. 5Dachicha waud̶ai panuu joma jipa waud̶ai panuu.

6Chi bed̶ea ũri b̶uuba ichi ne bia uru b̶uud̶ebena deai b̶uu#6:6 Ichi ne bia uru b̶uud̶ebena deai b̶uu. Mau jara b̶uu chi nejarra, chiko, paru dead̶ai panuu chi Dachi Akõre bed̶ea jaradeabariimaa., chi Dachi Akõre bed̶ea jaradeabariimaa.

7Ara machi du ab̶a setaa kũruarã́sturu. Ab̶au bid̶a Dachi Akõre poyaa setaa kũruabai. Kĩrabásturu: chi ne uu b̶uuba ichiba uud̶a kĩra junai. 8Maud̶eeba nau kakuaba kachirua wau kʉ̃ria b̶uu ab̶auba wau b̶uubʉrã, Dachi Akõreba mau ẽbẽra ichiai.#6:8 Dachi Akõreba mau ẽbẽra ichiai. Griego bed̶ead̶e naka b̶ʉ kub̶uu: dachi biubadau chaui. Maamina Dachi Akõre Jauriba kʉ̃ria b̶uu ab̶auba wau b̶uubʉrã, Dachi Akõreba mau ẽbẽra ewaricha ichi ome chokae b̶ui. 9Maud̶eeba kakua ãkaad̶awẽa ne biꞌia wau panásturu. Kakua ãkaad̶awẽa panuubʉrã, Dachi Akõreba b̶ud̶a ewarid̶e dachiba biꞌia adaud̶ai. 10Maud̶eeba dachiba poyaaduucha, jomaurã biꞌia aid̶ad̶ai panuu. Chi Jesusd̶e ijãabadaurã maka aude aid̶ad̶ai panuu.

Pabloba nau kartad̶e aanama b̶ʉd̶a

11Ichiásturu, ara mʉ juaba letra mechiud̶eeba nau karta b̶ʉmaa b̶uu. 12Chi machi mukĩra chi kakua tõobi kʉ̃ria nureerãba maka waubadau, judiorãba biꞌia unud̶amera maud̶e ãchiba Cristo cruzd̶e biud̶a ʉ̃rʉbena jaradea panuu kakua ãchi kachirua waurãad̶amera. 13Chi mukĩra chi kakua tõoped̶aad̶arãba Moisesba b̶ʉd̶a joma waud̶akau. Maamina maarãba machi mukĩra chi kakua tõobiad̶ai kʉ̃ria panuu, ara ãchi ʉ̃rʉbena biꞌia berread̶ai baita. 14Maamina mʉ maka niiwãema. Ara mʉ ʉ̃rʉbena ab̶a bid̶a biꞌia berreawẽma. Maumaarã ab̶aburu Dachi Mechiu Jesucristo cruzd̶e biud̶a ʉ̃rʉbena biꞌia berreai. Cristo cruzd̶e biusiid̶eeba chi nau iujãad̶ebenarãba biꞌia unubadau, mʉʉmaarã mau joma biusii. Maud̶e chi nau iujãad̶e nureemaarã, mʉ biusii. 15Dachi Akõreba mukĩra chi kakua tõo b̶uai maebʉrã mukĩra chi kakua tõowẽa b̶uai biꞌia unuwẽa b̶uu. Ichiba ẽbẽra wid̶i waud̶a biꞌia unu b̶uu. 16Mʉʉba kʉ̃ria b̶uu joma chi mʉʉba jara b̶uu kĩra ijãa nuree Dachi Akõreba kĩra chuburia b̶uai maud̶e jirukaraayuwãe b̶uabiai. Maarã ẽbẽrarã Dachi Akõred̶erãbʉ.#6:16 Maarã ẽbẽrarã Dachi Akõred̶erãbʉ. Griego bed̶ead̶e naka b̶ʉ kub̶uu: maarã Dachi Akõre Israeld̶ebenarãbʉ. Mau jara b̶uu joma chi Dachi Akõred̶e ijãabadaurã, judiorã maud̶e judiowãerã.

17Jesús ʉ̃rʉbena jaradea b̶uu kakua, ẽbẽrarãba mʉ kachirua wausid̶au. Mau mʉ kakuad̶e tõokuaped̶aad̶aba somia uru b̶uu. Mauba mʉ ichid̶e b̶uu unu b̶uu. Maud̶eeba id̶iid̶eeba mʉʉba kʉ̃riawẽma ab̶auba waa nebʉra baraabi b̶uai.

18Ãbarã, mʉʉba kʉ̃ria b̶uu Dachi Mechiu Jesucristoba ichi sõbiad̶eeba joma machi aid̶a b̶uai. Biꞌia b̶uu maka b̶uai.

Currently Selected:

Gálatas 6: cmi

Highlight

Copy

Compare