Efesios 1

Pabloba nau kartad̶e naa b̶ʉd̶a

1Mʉ Pablobʉ. Dachi Akõreba kʉ̃riasiid̶eeba mʉ Jesucristoba bʉid̶abʉ. Mʉʉba nau karta b̶ʉmaa b̶uu joma Dachi Akõred̶erã ẽbẽrarã Jesucristod̶e ijãa nuree Éfeso#1:1 Éfeso. Chi b̶ee kartad̶e ed̶a griego bed̶ead̶e mau bed̶ea wãꞌãe. puurud̶ebenarã baita. 2Mʉʉba kʉ̃ria b̶uu Dachi Bajãad̶ebena Akõreba maud̶e Dachi Mechiu Jesucristoba ãchi sõbiad̶eeba machi aid̶a panad̶ai maud̶e jirukaraayuwãe panabiad̶ai.

Dachi Akõreba chi bia joma dachi jauri baita dea b̶uu

3Dachi Mechiu Jesucristo Akõremaa biꞌia berread̶ai panuu. Cristo ome panuud̶eeba ichi Jaurid̶eeba chi bia joma dachimaa bajãad̶ebena dea b̶uu. 4-5Nau drua waui naed̶e Cristod̶eeba dachi jʉrʉ adausii ichi baita biꞌia nuread̶amera maud̶e ichi daad̶e jayoa kachiruaswãe nuread̶amera. Nabẽraed̶eed̶e Jesucristod̶eeba dachi ichi warrarã bad̶ai a kʉ̃risia b̶uasii. Maka wau kʉ̃ria b̶uasii dachi kʉ̃riakuasiid̶eeba. 6Ichi sõbia ãrea b̶uud̶eeba dachi karibasii ichiba kʉ̃ria b̶uu Warrd̶eeba. Mau baita ichimaa biꞌia berread̶ai panuu. 7Ichi Warr oa chesiid̶eeba Dachi Akõreba dachi kachiruad̶ebena karibasii. Ichi mechiu sõbiad̶eeba dachiba kachirua wauped̶aad̶a joma perdonasii. 8Ichi sõbiad̶eeba dachi ãrea aid̶aped̶a joma kʉ̃risia kuitaa maud̶e kʉ̃risia kauwa dachimaa deasii.#1:8 Ichi sõbiad̶eeba dachi ãrea aid̶aped̶a joma kʉ̃risia kuitaa maud̶e kʉ̃risia kauwa dachimaa deasii. Griego bed̶ead̶e mau chaarea b̶uu biꞌia ũrid̶amera. Nau sid̶a jara b̶uu: Ichi sõbiad̶eeba dachi ãrea aid̶asii joma kʉ̃risia kuitaa maud̶e kʉ̃risia kauwa niid̶eeba. 9Ichiba wau kʉ̃ria b̶uu naed̶e kuitaabiawẽa b̶uasii. Maamina dachimaa kuitaabiasii ichi sõbiad̶eeba maka kʉ̃ria b̶uasiid̶eeba. Ichiba Cristod̶eeba nabẽraed̶eed̶e waui kʉ̃risia b̶uad̶a 10ichiba b̶ud̶a ewarid̶e maka joma waui: mau ewarid̶e ne joma bajãad̶ebena maud̶e nau iujãad̶ebena Cristo juad̶e b̶ui.

11Dachi Akõreba ne joma ichiba wau kʉ̃ria b̶uu waubarii kĩra Cristod̶eeba dachi jʉrʉ adausii,#1:11 Cristod̶eeba dachi jʉrʉ adausii. Chi nureemaarã naka jara b̶uu: «Ichiba chi deai jara b̶uu adaud̶ai nuree ẽbẽrarã babiasii». nabẽraed̶eed̶e kʉ̃risia b̶uad̶a kĩra. 12Maka wausii dai judiorã chi naa Cristod̶e ijãaped̶aad̶arãba ichi biꞌia nii ʉ̃rʉbena biꞌia berread̶amera. 13Mau awara machi judiowãerã bid̶a chi biawãra bed̶ea ũrisid̶aud̶e, mau dachi karibai bed̶ea bia ijãasid̶au. Maka Cristod̶e ijãasid̶aud̶e Dachi Akõreba ichi Jauri machimaa deasii ichiba jarad̶a kĩra. Dauchaa b̶uu kĩra mauba kuitaabia b̶uu machi ichid̶irã. 14Dachi Akõre Jauri adauped̶aad̶ad̶eeba dachiba kuitaa panuu joma Dachi Akõreba deai jarad̶a biawãra adaud̶ai ichid̶irã joma biꞌia b̶ui ewarid̶e. Maud̶eeba ichi biꞌia nii ʉ̃rʉbena biꞌia berread̶ai panuu.

Pabloba Dachi Akõremaa ʉtaa id̶id̶a

15Maud̶eeba machiba Dachi Mechiu Jesusd̶e ijãa panuu maud̶e joma ẽbẽrarã Dachi Akõred̶erã kʉ̃ria panuu mʉʉba ũrisiid̶eed̶ebena, 16mʉʉba ewaricha machi baita Dachi Akõremaa ichíturu kid̶ibai abarii maud̶e machi ʉ̃rʉbena ʉtaa id̶ibarii. 17Mʉʉba Dachi Mechiu Jesucristo Akõremaa, chi Akõre biꞌia niimaa ʉtaa id̶ibarii ichi Jaurid̶eeba machimaa biꞌia kʉ̃risiabiamera maud̶e ichi ʉ̃rʉbena kuitaabiamera. Maka machiba ichi aude kuitaad̶ai. 18Maud̶e ʉtaa id̶ibarii Dachi Akõreba machi kʉ̃risia ewamera. Maka machiba kuitaad̶ai kãare ichid̶ebena adaud̶ai baita esed̶au panuu, mau adaud̶amera iusiid̶eeba. Maud̶e machiba kuitaad̶ai ichi ẽbẽrarãba adaud̶ai ãrea biꞌia b̶uu. 19Maud̶e mʉʉba ʉtaa id̶ibarii machiba kuitaad̶amera ichi poyaa jomaurã audeara poyaa b̶uu. Mau poyaabariid̶eeba ichiba dachi ichid̶e ijãa nuree kariba b̶uu. Ara mau poyaabarii mechia b̶uud̶eeba, 20Dachi Akõreba Cristo biu b̶uad̶a chokae jiradubiped̶a bajãad̶e ichi jua biare akʉ b̶eebisii. 21Dachi Akõreba ichi jomaurã mechiu b̶usii: jai kachirua karrarã audeara, bajãad̶ebena chi mechiu nuree audeara, chi poyaabadau audeara maud̶e chi aude jua chaarea nuree audeara. Nau ewarid̶e ichi jomaurã audeara chi mechiu nii maud̶e kaad̶ebena ewarid̶e bid̶a maka b̶uai. 22Dachi Akõreba ne joma Cristo juad̶e b̶usii maud̶e Cristo b̶usii ne jomad̶e ichi ẽbẽrarã Mechiu b̶uamera. 23Ẽbẽrarã Cristod̶erã ichi kakuabʉ. Ãchi ne jomad̶e ichid̶eeba panuu maud̶e ne joma ichid̶eeba b̶uu.

Currently Selected:

Efesios 1: cmi

Highlight

Copy

Compare