Gálatas 4

Dachi Akõre warrarãbʉ

1Mau awara naka jara b̶uu: warrba ichi akõred̶e joma adaui b̶umina kaebe niid̶eed̶e chibari baita bari trajabarii kĩra nii. 2Chi kaebe nii warr ichi nubadaurã juad̶e b̶uu, maud̶e ichi akõred̶e adaui b̶uu chi nureerãba nubadau ab̶a chi akõreba jarad̶a ewarid̶aa. 3Ara mau kĩra Cristod̶e ijãad̶ai naed̶e dachi warraed̶ebena kĩra nureasii. Mau ewarid̶e dachiba nau iujãad̶ebena jauri mechiurã ijãa panasid̶au, chibari baita bari trajabarii kĩra. 4Maamina Dachi Akõreba jarad̶a ewari neesiid̶e ichi Warr nau iujãad̶aa bʉisii. Mau Warr wẽraba adausii maud̶e Moisesba b̶ʉd̶a waui b̶uasii. 5Dachi Akõreba ichi bʉisii dachi mau Moisesba b̶ʉd̶a juad̶e nuread̶a karibaped̶a, ichi warrarã babiai baita. 6Machi Dachi Akõre warrarãd̶eeba ichi Warr Jauri bʉisii machi sõd̶e b̶uamera. Ichi Jauri dachi sõd̶e b̶uuba «¡Mʉ Chacha!» abarii kuitaad̶amera dachi Ichi warrarãbʉ. 7Maud̶eeba jãabae machi chibari baita bari trajabadaurãwãema, maumaarã Dachi Akõre warrarãbʉ. Dachi Akõre warrarãd̶eeba ichi warrarã baita uru b̶uu adaud̶ai.#4:7 Adaud̶ai. Griego bed̶ead̶e chi b̶ee kartad̶e b̶ʉ kub̶uu: Cristod̶ebena adaud̶ai.

Pablo ãbarã kakua kʉ̃risia baraa b̶uad̶a

8Naed̶e machiba Dachi Akõre adua panasid̶aud̶e chi biawãra Dachi Akõrewãerã ijãa panasid̶au ãchi baita bari trajabadaurã kĩra. 9Maamina jãabae machiba Dachi Akõre unubadau. Mʉʉba arakʉd̶e jaraaruubʉrã, Dachi Akõreba machi unubarii. Maka ¿sakãe nau iujãad̶ebena jauri mechiurã waya ijãad̶ai kʉ̃ria panuma, chibari baita bari trajabadaurã kĩra? Mauba machi aid̶akau. 10Barikiu bari panabadau ewari, jed̶akod̶e maud̶e añod̶e waubadau Dachi Akõreba biꞌia unumera. 11Maud̶eeba mʉʉba kʉ̃risia b̶uu mʉ bari machimaa jaradeasii.

12Ãbarã, mʉ machi judiowãe kĩra b̶uai baita, Moisesba b̶ʉd̶a ida b̶usii. Maud̶eeba mʉʉba machimaa chi chuburia id̶iiruu mʉ kĩra mau Moisesba b̶ʉd̶ad̶e panarãad̶amera. Naed̶e machiba mʉʉmaa kachirua waud̶aabasii, maumaarã biꞌia wausid̶au. 13Kuitaa panuu mʉʉba machimaa chi bed̶ea bia Cristo ʉ̃rʉbena naa jarad̶e wãsiid̶e, mʉ ẽpermo b̶uasiid̶eeba machimaa jaradea b̶eesii. 14Ẽpermo b̶uasmina machiba mʉ ida b̶ud̶aabasii maud̶e duabʉid̶aabasii.#4:14 Chi nureeba kʉ̃risiabadau Pablo ẽpermo b̶uad̶aba Galacia druad̶ebenarã ãrea biꞌiwãe panabiasii. Maumaarã biꞌia irsibisid̶au Dachi Akõred̶e ángel irsibiiduu kĩra, Jesucristo irsibiiduu kĩra. 15¿Sakasma chi machi kĩrajʉʉ naed̶e uru panad̶a? Mʉʉba biawãra jaraaruu machiba poyaa wauped̶aad̶a basirã ara machi dau noetad̶ai basii mʉʉmaa dead̶ai baita. 16Mʉʉba biawãra jara b̶uud̶eeba ¿mʉ machi kĩramaa baika?

17Machi tãed̶e chi biꞌia jaradead̶akaurãba ne joma wau panuu machiba ãchi bed̶ea ijãad̶amera. Maamina ãchiba maka waud̶akau machi aid̶ad̶ai baita. Machi daid̶ebena ãyaa adoe kʉ̃ria panuu sõd̶eeba ãchi baara panad̶amera. 18Biawãra biꞌia b̶uu ewaricha kʉ̃risia biꞌia sõd̶eeba ijãa panad̶ai. Maamina maka panad̶aabai panuu mʉ machi ome b̶uud̶éburu. Maumaarã mʉ wãꞌãed̶e bid̶a ijãad̶ai panuu. 19Ãbarã, machi mʉ warrarã kĩra nuree. Mʉ waya machi baita ãrea biꞌiwãe b̶uu wẽra warr adauruud̶e puꞌuabarii kĩra. Mʉ maka ãrea biꞌiwãe b̶uai ab̶a machi Cristo kĩra paneeduud̶aa. 20¡Mʉ ʉ̃raud̶aa machi baara b̶uad̶a basirã kuitaai basii saka berreai b̶uu! Mʉʉba biawãra adua b̶uu machi ʉ̃rʉbena saka kʉ̃risiai.

Sara maud̶e Agar ʉ̃rʉbena

21Chi Moisesba b̶ʉd̶a juad̶e panad̶ai kʉ̃ria panuuba mʉʉmaa panáusturu: ¿Moisesba b̶ʉd̶ad̶e b̶ʉ kub̶uu adua panuka? 22Naka b̶ʉ kub̶uu: Abrahamba warr ome uru b̶uasii. Ab̶a chibari baita bari trajabarii Agarba warr adausii.#Génesis 16:1-16. Chi ab̶a chibariswãe nii Saraba warr adausii.#Génesis 21:1-3. 23Chi chibari baita bari trajabariiba warr adausii Abrahamba maka kʉ̃riasiid̶eeba. Maamina chi chibariswãe nii wẽraba warr adaud̶a Dachi Akõreba deai jarad̶a basii.

24Mauba dachimaa naka ãrea kʉ̃risiabia b̶uu: Dachi Akõreba bed̶ea dead̶a ome panuu. Mau bed̶ea dead̶a ome panuu Sara maud̶e Agar kĩra panuu. Dachi Akõreba bed̶ea dead̶a ab̶a Sinaí ead̶e deasii. Mau bed̶ea dead̶a chi chibari baita bari trajabarii Agar kĩra b̶uu, chi mau bed̶ea dead̶a ijãa nuree chibari baita bari trajabadaurã kĩra nureed̶eeba. 25Chi Sinaí ea Arabia druad̶e b̶uu Agar kĩra b̶uu, chi mau ead̶e dead̶a Moisesba b̶ʉd̶ad̶e ijãa nuree, chibari baita bari trajabadaurã kĩra nureed̶eeba. Maud̶e chi nau iujãad̶ebena Jerusalén puuru Agar kĩra nii, mau puurud̶ebenarã chibari baita bari trajabadaurã kĩra nureed̶eeba. 26Maamina chi bajãad̶ebena Jerusalén puuru Sara kĩra b̶uu, mau puurud̶ebenarã chibari baita bari trajabadaurã kĩra nureewãed̶eeba. Maka nuree Moisesba b̶ʉd̶ad̶e ijãawẽa nureed̶eeba. Dachi mamabenad̶eeba Sara warrarã kĩra nuree. 27Dachi Akõre bed̶ead̶e naka b̶ʉ kub̶uu:

«Wẽra warr deakau, kĩrajʉʉse. Warr adauruuba chi puꞌua unukau, ãrea kĩrajʉʉ b̶iáse.

Wẽra mukĩraba amaad̶aba warrarã aude uru b̶uai, wẽraba mukĩra uru b̶uad̶a audeara».#Isaías 54:1.

28Isaac chi naweba adausii Dachi Akõreba Abrahammaa maka jarasiid̶eeba. Ãbarã, Isaac kĩra, dachi Dachi Akõre warrarã paneesid̶au ichiba maka jarasiid̶eeba. 29Abraham ewarid̶e, Ismael chi naweba adausii, barikia warr kĩra. Isaac chi naweba adausii Dachi Akõre Jauri poyaabariid̶eeba. Ismaelba kachirua waubachii Isaacmaa. Id̶ibae bid̶a Moisesba b̶ʉd̶ad̶e nureerãba Cristod̶e ijãa nureemaa kachirua waubadau. 30Maamina Dachi Akõre bed̶ead̶e naka b̶ʉ kub̶uu: «Chi chibari baita bari trajabarii wẽra maud̶e ichi warr sid̶a duabʉise. Chi chibari baita bari trajabarii wẽra warrba ichi akõreba uru b̶uu poyaa adaubai. Maumaarã chi chibariswãe nii wẽra warrba mau adaui».#Génesis 21:10.

31Maud̶eeba ãbarã, dachi chi chibari baita bari trajabarii warrarã kĩra nureewãe. Maumaarã chi chibariswãe nuree warrarã kĩra nuree.

Currently Selected:

Gálatas 4: cmi

Highlight

Copy

Compare