Gálatas 3

Jesucristod̶e ijãad̶ai panuud̶éburu Dachi Akõre Jauri irsibibadau

1Ãbarã Galacia druad̶ebenarã, ¡machi kʉ̃risiaswãe nureerã! ¿Kaiba machi setaa kũruasii chi biawãra bed̶ea ida b̶ud̶amera? Daiba machimaa joma chi Jesucristo cruzd̶e biu b̶uad̶a ʉ̃rʉbena jaradeabachid̶au. 2Mʉʉba nau machimaa id̶iiruu: Dachi Akõre Jauri irsibisid̶aud̶e ¿machiba chi Moisesba b̶ʉd̶a wau panasid̶aka? Maebʉrã ¿chi bed̶ea Jesús ʉ̃rʉbena ũriped̶aad̶a ijãasid̶aka? 3¡Machi biawãra kʉ̃risiaswãe nuree! Cristod̶e ijãasid̶aud̶e naed̶e Dachi Akõre Jaurid̶eeba biꞌia nibasid̶au. ¿Jãabae ara machiba wau panuud̶eeba chi jipa nuree baara panad̶aika?#3:3 Ara machiba wau panuud̶eeba. Griego bed̶ead̶e naka b̶ʉ kub̶uu: nau kakuad̶eeba. Chi nureemaarã, mau jara b̶uu dachi mukĩra chi kakua tõoi. 4Machi biꞌiwãe panad̶a Cristo kakua ¿bari makaska? ¡Mʉʉmaarã, machi bari ãrea biꞌiwãe panad̶aabasii! 5Dachi Akõreba ichi Jauri machimaa deasii awara, ẽbẽrarãba ne poyaa waud̶akau machi tãed̶e wau b̶uu. ¿Chi Moisesba b̶ʉd̶a machiba wau panasiid̶eeba maka wau b̶uka? ¿Maka wauwẽka chi bed̶ea bia Cristo ʉ̃rʉbena ũrid̶aped̶a ijãasid̶aud̶eeba?

6Abraham ʉ̃rʉbena kʉ̃risiásturu. «Abrahamba Dachi Akõred̶e ijãasii. Maud̶eeba Dachi Akõreba ichi nebʉraswãe nii unusii».#3:6 Dachi Akõreba ichi nebʉraswãe nii. Mau versiculod̶e jara b̶uu Dachi Akõre ichi jipa nuree baara b̶usii. Cristod̶e ijãa panasid̶aud̶eeba Galaciad̶ebena judiowãerã ijãabadaurãba Dachi Akõre Jauri poyaa irsibid̶ai panasii, chi judiorã kĩra. Génesis 15:6. 7Mauba kuitaad̶ai panuu chi biawãra Dachi Akõred̶e ijãabadaurã, Abraham warrarãbʉ. 8Nabẽraed̶e Dachi Akõre bed̶ead̶e b̶ʉ kub̶uu judiowãerãba Dachi Akõred̶e ijãaped̶aad̶a basirã ichiba ãchi ichid̶irã jipa nureerã baara b̶ui basii. Maud̶eeba nabẽraed̶e Dachi Akõreba Abrahammaa chi bed̶ea bia berreasii. Ichiba naka jarasii: «Bichi kakua mʉʉba nau iujãad̶e duanuu puuru joma karibai».#Génesis 12:3. 9Maud̶eeba chi Abrahamba ijãad̶a kĩra ijãa nuree Dachi Akõreba joma aid̶ai Abraham aid̶ad̶a kĩra.

10Chi Moisesba b̶ʉd̶a wau panuud̶eeba chi Dachi Akõred̶e jipa nuree baara paneed̶ai kʉ̃risia nuree, nebʉra barau a b̶uu. Mau Moisesba b̶ʉd̶ad̶e naka b̶ʉ kub̶uu: «Nau Moisesba b̶ʉd̶a joma wauwẽa nii Dachi Akõreba nebʉra barau ai».#Deuteronomio 27:26. 11Biawãra dachiba biꞌia kuitaa panuu Moisesba b̶ʉd̶a wau b̶uud̶eeba Dachi Akõreba ab̶a bid̶a chi ichid̶irã jipa nuree baara b̶ui.#Salmos 143:2; Romanos 3:20. Dachi Akõre bed̶ead̶e naka b̶ʉ kub̶uu: «Chi jipa nii, Dachi Akõred̶e ijãa niid̶eeba chokae nibai».#Habacuc 2:4.

12Maamina chi Dachi Akõred̶e ijãa b̶uu chi Moisesba b̶ʉd̶a waui b̶uu audeara ãyaa b̶uu. Maumaarã ichi ʉ̃rʉbena naka b̶ʉ kub̶uu: «Chi Moisesba b̶ʉd̶a wau b̶uu, mauba nibai».#Levítico 18:5.

13Moisesba b̶ʉd̶a kĩra wau panuwãed̶eeba, nebʉra barau ai. Maud̶ebena Jesucristoba dachi karibasii. Ichi Dachi Akõreba dachi kakua nebʉra baraabisii. Moisesba b̶ʉd̶ad̶e naka b̶ʉ kub̶uu: «Ab̶a bakurud̶e jira b̶eed̶a Dachi Akõreba mau nebʉra barau ai».#3:13 Bakurud̶e. Griego bed̶ead̶e bakuru aaruud̶e cruz sid̶a jara b̶uu. Deuteronomio 21:23. 14Makasii Dachi Akõreba Jesucristod̶eeba judiowãerã sid̶a karibamera ichiba naed̶e Abrahammaa karibai ad̶a kĩra.#Génesis 12:3. Dachiba Jesucristo ijãa panuud̶eeba Dachi Akõreba ichi Jauri deai jarad̶a irsibisid̶au.#Isaías 44:3; Hageo 2:5.

Dachi Akõreba Abrahammaa bed̶ea dead̶a

15Ãbarã, dachi ẽbẽrarãba ne waubadau kĩra berrearuu: ẽbẽraba waabena ome bed̶ea dead̶a kartad̶e b̶uped̶a ichi trʉ̃ mau kartad̶e b̶ʉʉruubʉrã ab̶au bid̶a mau bed̶ea b̶ʉd̶a poyaa ãyaa b̶ud̶aabai, maud̶e kʉ̃risia awara poyaa ed̶a b̶ʉd̶aabai. 16Ara mau kĩra Dachi Akõreba Abrahammaa, maud̶e chi ichid̶ebena neei b̶uumaa jarasii mauba jomaurã karibai.#Génesis 22:18. Dachi Akõre bed̶ead̶e b̶ʉwẽa b̶uu «Abrahamd̶ebena imid̶ai ẽbẽrarã» ãrea ẽbẽrarã jara b̶uu kĩra. Maumaarã b̶ʉ kub̶uu Dachi Akõreba Abrahamd̶ebena neei b̶uumaa maka jarasii ab̶au ʉ̃rʉbenáturu berrea b̶uud̶eeba. Mau Cristobʉ. 17Mʉʉba naka jara b̶uu: Dachi Akõreba Abraham ome bed̶ea deasii.#3:17 Griego bed̶ead̶e chi b̶ee kartad̶e naka b̶ʉ kub̶uu: Cristod̶eeba Dachi Akõre Abraham ome bed̶ea deasii. 430 año basiid̶e Moisesmaa ichiba jarad̶a b̶ʉbisii. Maamina ichiba Abraham ome naed̶e bed̶ea dead̶a mau Moisesba b̶ʉd̶a ãyaa b̶uubasii. Ãyaa b̶ud̶a basirã ichiba karibai ad̶a waubai basii. 18Moisesba b̶ʉd̶a wau panuu baita ichiba dachi karibaaruubʉrã, ichiba karibai ad̶a kĩra karibawẽe. Maamina Dachi Akõreba Abraham karibai asiid̶eeba ichi sõbiad̶eeba karibasii.

19Makarã ¿Dachi Akõreba sakãe Moisesmaa chi ichiba b̶ʉd̶a b̶ʉbisma? Maka wausii ẽbẽrarãba kachirua waubadau kuitaad̶amera. Ẽbẽrarã mau Moisesba b̶ʉsiid̶eeba panasid̶au ab̶a Abrahamd̶ebena neei b̶uad̶a neeruud̶aa, ichid̶eeba Dachi Akõreba karibai asiid̶eeba. Dachi Akõreba Moisesmaa mau ichiba b̶ʉd̶a angelerãd̶eeba deasii. Mau dead̶akare Moisesba ẽbẽrarãmaa deasii. 20Maamina Dachi Akõreba Abrahammaa karibai asiid̶e ab̶a bid̶a mau bed̶ea jarad̶e bʉibasii, maumaarã ara ichiaburu Abrahammaa maka jarasii.

21Maka b̶uubʉrã Dachi Akõreba Moisesmaa ichi bed̶ea b̶ʉbisiid̶e ¿ichiba Abraham ome bed̶ea dead̶a ida b̶uska? ¡Makawãema! Moisesba b̶ʉd̶aba dachi poyaa chokae panad̶ai basirã, mau b̶ʉd̶a wau panuud̶eeburu Dachi Akõreba dachi chi jipa nuree baara duanui basii. 22Maamina Dachi Akõre bed̶ead̶e b̶ʉ kub̶uu kachiruaba jomaurã jʉ̃a uru b̶uu. Maka Jesucristoba ichi Akõreba jarad̶a wausiid̶eeba, chi ichid̶e ijãaduurãba mau Dachi Akõreba deai jarad̶a adaud̶ai.

23Cristod̶e ijãad̶ai naed̶e dachi Moisesba b̶ʉd̶a juad̶e panasid̶au. Maud̶ebena poyaa awara wãd̶aabasii ab̶a Dachi Akõreba Cristo kuitaabiiruud̶aa. 24Biawãra Moisesba b̶ʉd̶aba dachi nu ua b̶uasii ab̶a Cristod̶e ijãaduud̶aa. Cristo neesiid̶e ichid̶e ijãa panuu kakua Dachi Akõreba dachi chi jipa nuree baara duanubarii. 25Maamina id̶ibae dachiba Cristod̶e ijãa panuud̶eeba Moisesba b̶ʉd̶aba nu ua b̶uakau. 26Jesucristo ijãa panuud̶eeba joma machi Dachi Akõre warrarãbʉ. 27Machi boro easid̶aud̶e Cristo kĩra paneesid̶au unubisid̶au.#3:27 Cristo kĩra paneesid̶au. Griego bed̶ead̶e naka b̶ʉ kub̶uu: Cristod̶e paru wid̶i kĩra jʉ̃ paneesid̶au. 28Mau jara b̶uu judio griego ome arab̶aud̶e panuu, chibari baita bari trajabarii chi chibariswãe nii ome arab̶aud̶e panuu, maud̶e mukĩra wẽra ome arab̶aud̶e panuu. Joma machi ẽbẽra ab̶a nii kĩra nureebʉ, Jesucristo ome ãbua nureed̶eeba. 29Machi Cristod̶ed̶eeba biawãra Abraham warrarãbʉ. Mauba Dachi Akõreba machi karibasii ichiba Abrahammaa dachi karibai asiid̶eeba.

Currently Selected:

Gálatas 3: cmi

Highlight

Copy

Compare