Gálatas 1

Nau kartad̶e Pabloba naa b̶ʉd̶a

1Mʉ Pablobʉ, Jesucristoba bʉid̶abʉ.#1:1 Jesucristoba bʉid̶abʉ. Kajuma bed̶ead̶e naka b̶ʉ kub̶uu: apóstol. Mau griego bed̶ead̶e jara b̶uu «bʉid̶a». Ẽbẽrarãba mʉ jʉrʉ adaud̶aabasii Jesucristoba bʉid̶a b̶uamera. Maumaarã Jesucristoba maud̶e ichi Akõreba, ichi biu b̶uad̶a chokae jiradubid̶aba mʉ maka b̶usid̶au. 2Mʉʉba nau karta b̶ʉʉruu ãbarã Galacia druad̶ebenarã baita. Joma ãbarã mʉ ome panuurãba kʉ̃ria panuu, 3Dachi Bajãad̶ebena Akõreba maud̶e Dachi Mechiu Jesucristo ãchi sõbiad̶eeba machi aid̶a panad̶ai maud̶e jirukaraayuwãe panabiad̶ai. 4Ara mau Jesucristoba ichi dachi kachirua kakua ida beabisii nau ewari kachiruad̶ebena karibai baita. Maka wausii Dachi Bajãad̶ebena Akõreba maka kʉ̃riasiid̶eeba. 5Ewaricha ichimaa biꞌia berread̶ai panuu. Biꞌia b̶uu maka b̶uai.#1:5 Biꞌia b̶uu maka b̶uai. Kajuma bed̶ead̶e b̶ʉ kub̶uu: amén.

Bed̶ea bia Cristo ʉ̃rʉbena ab̶aburu b̶uu

6Mʉ saka kʉ̃risiai adua b̶uu machiba kãꞌãabariwãed̶e Dachi Akõre ida b̶uped̶aad̶a. Ichiba machi iusii Cristo sõbiad̶eeba karibai baita, maamina machiba ãrea ũri panuu waabenarãba bed̶ea bia kĩra jara panuu. 7Biawãra, chi bed̶ea bia june wãꞌãe. Maamina chi nureerãba machimaa biꞌiwãe kʉ̃risiabiabadau, chi bed̶ea bia Cristo ʉ̃rʉbena ãyaa jaradea panuud̶eeba. 8Barikiuba chi bed̶ea bia Cristo ʉ̃rʉbena daiba machimaa jaradeaped̶aad̶a june ãyaa jaradearuubʉrã, Dachi Akõreba mau ewaricha kastikai; daiba maebʉrã ángel bid̶a june ãyaa jaradeaduubʉrã, dai sid̶a Dachi Akõreba ewaricha kastikai. 9Daiba naed̶e jaraped̶aad̶a mʉʉba waya jaraaruu: machiba chi bed̶ea bia Cristo ʉ̃rʉbena ijãaped̶aad̶a barikiuba june jaradearuubʉrã, Dachi Akõreba mau baribai.

10Maka jara b̶uud̶eeba mʉʉba jʉrʉwẽa b̶uu ẽbẽrarãba mʉ biꞌia unud̶amera, maumaarã kʉ̃ria b̶uu Dachi Akõréburu mʉ biꞌia unumera. Cristod̶e ijãai naed̶e mʉʉba jʉrʉ b̶uabachii ẽbẽrarãba mʉ biꞌia unud̶amera. Wabid̶a maka wau b̶uasirã, mʉ Cristo baita bari trajabarii b̶uabai basii.

Jesucristoba Pablo iud̶a

11Ãbarã, kuitásturu chi bed̶ea bia Cristo ʉ̃rʉbena mʉʉba machimaa jaradead̶a ẽbẽra kʉ̃risiad̶ebenawãe. 12Mau bed̶ea mʉʉba ab̶a ẽbẽrad̶ebena kuitaabasii. Ab̶a ẽbẽraba mʉʉmaa jaradeabasii. Maumaarã Jesucristoba mʉʉmaa kuitaabisii. 13Machiba ũrisid̶au mʉ saka nibasii judiorãba jaradeabadau joma wau b̶uasiid̶e. Machiba kuitaa panuu mʉʉba ẽbẽrarã Dachi Akõred̶erã ãrea kachirua waubachii. Joma perdonai kʉ̃ria b̶uasii. 14Judiorãba jaradeabadau mʉʉba biꞌia kuitaaruu basii mʉ ab̶aarakaurã audeara, dai nabẽraed̶ebenarãba waubachid̶au mʉʉba ãrea waubachiid̶eeba. 15Maamina mʉ naweba mʉ adaui naed̶e Dachi Akõreba mʉ jʉrʉ adausii. Ichi sõbiad̶eeba mʉ iusii ichi baita bari trajabarii b̶uamera. Ichiba kʉ̃risiad̶a kĩra 16ichi Warr mʉʉmaa kuitaabisii judiowãerãmaa mau ʉ̃rʉbena jaramera. Maud̶e mʉʉba ab̶aumaa bid̶a id̶iibasii saka waui b̶uu kuitaai baita. 17Maud̶e mʉ Jerusalend̶aa wãabasii chi mʉ naed̶e Jesucristoba bʉid̶arãmaa id̶ii baita. Maumaarã mʉ Arabia druad̶aa wãsii. Maad̶akare Damasco puurud̶aa waya wãsii.

18Año õbea bad̶akare mʉ Jerusalend̶aa wãsii Pedro unui baita. Aria 15 ewari mau ome b̶uasii. 19Pedro awara, Jesucristoba bʉid̶arãd̶ebena, Dachi Mechiu ãba Santiagóturu unusii.#1:19 Santiago ara mau «Jacob» abadau. Waabenarã mʉʉba unuubasii. 20Dachi Akõre daad̶e mʉʉba machimaa jaraaruu: mʉ ʉ̃rʉbena b̶ʉʉruu setawãe. 21Jerusalend̶aa wãsiid̶e mʉ Siria druad̶aa maud̶e Cilicia druad̶aa wãsii. 22Cristod̶e ijãabadaurã Judea druad̶ebenarãba mʉ unud̶akau basii. 23Ãchiba naka jaraadúturu ũribachid̶au: «Dachi kachirua waui baita wãraa b̶uad̶aba jãabae jaradea b̶uu jomaurãba Cristod̶e ijãad̶amera. Naed̶e mau ichiba joma wãꞌãebii kʉ̃ria b̶uasii». 24Maud̶eeba mʉ kakua ãchiba Dachi Akõremaa biꞌia berreasid̶au.

Currently Selected:

Gálatas 1: cmi

Highlight

Copy

Compare