Hechos 25

Pablo Festo daad̶e b̶uad̶a

1Festo mau druad̶aa neeped̶a chi mechiu bai baita, ewari õbea baaruud̶e, Cesarea puurud̶ebena Jerusalend̶aa wãsii.#25:1 Mau Festo Judead̶ebena jaradea ua b̶uabarii basii año 60d̶ebena ab̶a 62d̶aa. 2Aria paare mechiurã maud̶e judiorã mechiurãba Festomaa Pablo jideasid̶au. 3Chi chuburia id̶isid̶au Pablo Jerusalend̶aa adoebimera. Maka jarasid̶au Pablo od̶e bead̶ai kʉ̃risia panuud̶eeba. 4Maamina Festoba panausii:

—Pablo Cesarea puurud̶e jʉ̃a b̶uu. Mʉ kãꞌãabariwãed̶e araa wãi. 5Maud̶eeba machi chi mechiu nuree mʉ ome Cesarea puurud̶aa wãd̶ai panuu. Mau ẽbẽraba barikia kachirua waud̶a basirã, ariaburu machiba jarad̶ai panuu.

6Festo Jerusalend̶e 8 maebʉrã 10 ewari b̶uasii. Maabae Cesarea puurud̶aa wãsii. Norema chi juez ded̶e akʉ b̶eeped̶a Pablo adoebisii. 7Pablo adoesid̶aud̶e judiorã Jerusalend̶ebena neeped̶aad̶aba ichi ad̶u jũrasid̶au. Maud̶e ichi jideasid̶au maamina poyaa kuitaabiad̶aabasii chi ãchiba jara panuu biawãra b̶uu. 8Maud̶e Pabloba panausii:

—Mʉʉba ab̶a bid̶a kachirua wauwẽa b̶uu. Moisesba b̶ʉd̶a ida b̶uwẽa b̶uu, Dachi Akõre de mechiu kachiruabiwẽa b̶uu maud̶e Romad̶ebena chi aude mechiu nii sid̶a ida b̶uwẽa b̶uu.

9Maamina Festo judiorã ome biꞌia b̶eei kʉ̃ria b̶uud̶eeba Pablomaa id̶isii:

—¿Bichi Jerusalend̶aa wãi kʉ̃ria b̶uka mʉʉba jamaria bichi nebʉra ichiamera?

10Maud̶e Pabloba panausii:

—Mʉ nama Romad̶ebena chi aude mechiu niiba b̶ud̶a juez daad̶e b̶uu. Namaburu bichiba mʉ nebʉra ichiai b̶uu. Bichiba ãrea kuitaa b̶uu mʉʉba judiorã kachirua wauwẽa b̶uu. 11Mʉʉba kachirua waud̶a basirã, bichiba mʉ beai basii. Maamina naarã ẽbẽrarãba mʉ jidea panuu biawãrawãed̶eeba, ab̶au bid̶a mʉ ãchi juad̶e b̶uubai b̶uu. Maud̶eeba mʉʉba kʉ̃ria b̶uu Romad̶ebena chi aude mechiuba mʉ nebʉra ichiamera.

12Maud̶e Festo chi ichimaa kʉ̃risia deabadaurã ome berreaped̶a Pablomaa jarasii:

—Bichiba kʉ̃ria b̶uu Romad̶ebena chi aude mechiuba bichi nebʉra ichiai. Maka b̶uubʉrã, ichimaa bʉi.

Festo Agripa ome berread̶a

13Mau maad̶akare judiorã rey Agripa ichi neekau Berenice ome Cesarea puurud̶aa Festo ichiad̶e wãsid̶au.#25:13 Agripa. Mau ẽbẽra Herodes Agripa chi Nabena warr basii. Hechos 12:1-23. Berenice. Mau wẽra Festo wẽra Drusila neekau basii. Hechos 24:24. 14Ãchi aria panuu ãrea basiid̶eeba Festoba Agripamaa Pablo ʉ̃rʉbena naka jarasii:

—Felixba ab̶a jʉ̃a b̶uu b̶ʉid̶a nama b̶uu. 15Mʉ Jerusalend̶aa wã b̶uasiid̶e paare mechiurãba maud̶e judiorã mechiurãba mau ẽbẽra jidead̶aped̶a jarasid̶au ichi beamera. 16Mʉʉba ãchimaa jarasii ab̶a bid̶a chi ichi jidea nuree daad̶e ara ichi kakua poyaa berreawẽebʉrã, romad̶ebenarãba ichi waabena juad̶e dead̶akau.

17»Maud̶eeba judiorã namaa need̶aped̶a, esed̶auwẽa norema mʉ juez ded̶e akʉ b̶eeped̶a mau ẽbẽra adoebisii. 18Maamina chi ichi jidea panuuba jarad̶aabasii ichiba kachirua wausii mʉʉba kʉ̃risia b̶uad̶a kĩra. 19Maumaarã ichi jidea panasid̶au ãchiba ijãa panuu awara jaradea b̶uu kakua maud̶e ẽbẽra Jesús abadau kakua. Mau biusmina Pabloba jara b̶uu chokae b̶uu. 20Mʉʉba kuitaawẽa b̶uasii jãu nebʉra ʉ̃rʉbena id̶ii baita. Maud̶eeba mʉʉba Pablomaa id̶isii Jerusalend̶aa wãi kʉ̃ria b̶uu kuitaai ariad̶ebenarãba ichi nebʉra ichiad̶amera. 21Maamina ichiba kʉ̃ria b̶uasii Romad̶ebena chi aude mechiu niiba ichi nebʉra ichiamera. Maud̶eeba mʉʉba ichi nama jʉ̃abisii ab̶a chi maumaa bʉiruud̶aa.

22Maud̶e Agripaba Festomaa jarasii:

—Mʉʉba mau ẽbẽra bed̶ea ũri kʉ̃ria b̶uu.

Festoba jarasii:

—Nu bichiba mau ũrii.

Pablo Agripa daad̶e berread̶a

23Norema Agripa Berenice ome chi juez ded̶e ed̶a wãsid̶aud̶e paru bia jʉ̃ panasid̶au. Maud̶e kokoroarã mechiurã maud̶e puurud̶ebena chi mechiurã ed̶a wãurisid̶au. Maabae Festoba Pablo eneebisii. 24Festoba jarasii:

—Rey Agripa maud̶e joma ẽbẽrarã nama dai ome ãbua panuu, cha b̶uu ẽbẽra machi daad̶e b̶uu joma judiorãba Jerusalend̶e maud̶e nau Cesarea puurud̶e bid̶a mau jidea panuu. Ãchiba mʉʉmaa b̶ia jara panasid̶au ichi beamera. 25Maamina mʉʉmaarã ne ab̶a bid̶a kachirua wauwẽa b̶uu jãu bead̶ai baita. Maud̶e ichiba id̶isii Romad̶ebena chi aude mechiuba ichi nebʉra ichiamera. Maud̶eeba mʉʉba jãu Romad̶aa bʉii baita b̶uu. 26-27Maamina mʉʉba biawãra kuitaawẽe kãare b̶ʉi ichi nebʉra ʉ̃rʉbena, chi aude mechiuba mau kuitaamera. Maud̶eeba ichi machi daad̶e eneebisii. Judiorã rey Agripa, mʉʉba kʉ̃ria b̶uu bichiaburu biꞌia ũrii. Maka machiba ichimaa ãrea id̶id̶aped̶a mʉʉba dachi aude mechiu baita ichiba kachirua waud̶a poyaa kartad̶e b̶ʉi.

Currently Selected:

Hechos 25: cmi

Highlight

Compare

Copy