Hechos 24

Pablo Félix daad̶e berread̶a

1Ewari jua ab̶a bad̶akare paare mechiu Ananias chi nuree judiorã chõrarã baara Cesarea puurud̶e neesid̶au. Chi aid̶a berreabarii Tértulo adoesid̶au, mauba Félix daad̶e chi Pablo jideamera. 2Felixba Pablo eneesid̶aud̶e mau Tertuloba Pablo jidea kob̶eesii. Naka jarasii:

—Chi mechiu Félix, bichi dai mechiu b̶eed̶a ewarid̶ebena nau druad̶e ãrea baaruu jirukaraayuwãe panuu. Maud̶e bichi kʉ̃risia kuitaa niid̶eeba ne ãrea wau b̶uu dai biꞌia duanad̶amera. 3Bichiba wau b̶uu kakua dai duanuumaacha daiba ne jomad̶e bichíturu kid̶ibai abadau. 4Maamina waa ãrea jaraamaaba, michuburia id̶iiruu bichi sõbia niid̶eeba, dai bed̶ea ũrimera.

5Daiba kuitaa panuu nau ẽbẽraba nebʉra wau b̶uabarii. Ichiba joma nau druad̶e judiorã kĩrubika b̶uabiabarii. Ichi nazarenod̶ebenarã chi jaradea ua b̶uabariibʉ. 6Mau awara Dachi Akõre de mechiud̶e chi daiba waud̶aabai panuu, mau ichiba waui kʉ̃riasii. Maud̶eeba daiba ichi jidausid̶au. [Moisesba b̶ʉd̶ad̶e jara b̶uu kĩra kastikad̶ai basii. 7Maamina kokoroarã mechiu Lisiasba ichiba kĩrud̶eeba dai juakaa ẽeb̶ari adausii. 8Mau awara jarasii chi mau ẽbẽra jidea panuu bichimaa need̶ai panuu.]#24:6-8 Griego bed̶ead̶e chi b̶ee kartad̶e bed̶ea corcheted̶e panuu wãꞌãe. Bichiba ichimaa ãrea id̶iiruu kuitaai joma daiba jara panuu biawãra b̶uu.

9Judiorã aria panuu bid̶a joma mau bed̶ea biawãra asid̶au.

10Maabae chi mechiuba juaba Pablomaa jarasii berreamera. Ara makʉd̶e Pabloba jarasii:

—Mʉʉba kuitaa b̶uu bichi año ãrea nau druad̶ebena juez nii. Maud̶eeba mʉ ara mʉ ʉ̃rʉbena kĩrajʉʉ berrearuu. 1112 ewari basii mʉ Jerusalend̶aa wã b̶uad̶a Dachi Akõremaa biꞌia berreai baita. Bichiba barikiamaa id̶iiruu kuitaai mau biawãra b̶uu. 12Cha mʉ kachirua jara panuuba mʉ unud̶aabasii waabena ome kĩru berrea nub̶uu maebʉrã ẽbẽrarã kĩrubika b̶uu. Dachi Akõre de mechiud̶e, judiorã araa ãbua imibadau ded̶e, ne ab̶a bid̶a puurud̶e bid̶a mʉʉba maka wau b̶uu unud̶aabasii. 13Nau ẽbẽrarãba poyaa kuitaabid̶awẽa ãchiba jara panuu biawãra b̶uu. 14Maamina mʉʉba bichimaa naka jaraaruu: mʉʉba Dachi Akõre nabẽraed̶ebenarãd̶e ijãa b̶uu. Mʉ chi O Wid̶i abadaud̶ebenabʉ. Ãchiba mau O Wid̶i seta b̶uu#24:14 Seta b̶uu. Kajuma bed̶ead̶e b̶ʉ kub̶uu: secta. abadau, maamina mʉʉba Moisesba b̶ʉd̶a maud̶e Dachi Akõre baita berreabadaurãba b̶ʉped̶aad̶a joma ijãa b̶uu. 15Chi naarã judiorãba esed̶au panuu chi jipa nuree maud̶e chi jipawãe nuree biuped̶aad̶a Dachi Akõreba joma chokae jiradubiai. Mʉa bid̶a mau esed̶au b̶uu. 16Maud̶eeba mʉʉba ne joma waubarii Dachi Akõre daad̶e maud̶e ẽbẽrarã daad̶e jipa nibai baita.

17»Mʉ Jerusalend̶ebena ãyaa wãd̶a año ãrea bad̶akare, waya araa neesii, chi mʉ puurud̶ebenarã chi nejarr barauwãe nureemaa chi nejarra deai baita maud̶e Dachi Akõremaa ãnimara baa deai baita. 18Maka b̶uud̶e chi Dachi Akõre daad̶e biꞌia panad̶ai baita mʉʉba joma wausiid̶e, Dachi Akõre de mechiud̶e chi Asiad̶ebena judiorãba mʉ unusid̶au. Maamina ẽbẽrarã ãrea wãꞌãe basii maud̶e ẽbẽrarã kĩrubikad̶ai sid̶a wãꞌãe basii. 19Chi mʉ unuped̶aad̶aba mʉ jidead̶ai kʉ̃ria panuubʉrã, maarã bichi daad̶e need̶ai panuu. 20Makawẽebʉrã cha panuurãba jarad̶ai panuu kãare kachirua unusid̶au chi mechiurã daad̶e mʉ adoesid̶aud̶e. 21Ab̶aburu poyaa jarad̶ai mʉʉba naka jĩwa jarasii: “Id̶i machiba mʉ kachirua jara panuu chi biud̶arã chokae jiradud̶ai ijãa b̶uu kakua”.#Hechos 23:6.

22Felixba chi O Wid̶i ʉ̃rʉbena ãrea kuitaa b̶uasiid̶eeba Pablo nebʉra ichiai ida b̶ud̶auped̶a, naka jarasii:

—Kokoroarã mechiu Lisias neeruud̶e mʉʉba machi nebʉra ichiai.

23Maabae ichiba kokoroarã chi jaradea ua b̶uabariimaa Pablo nubisii, maamina jarasii chi Pabloba wau kʉ̃ria b̶uu ida waubimera. Maud̶e ida b̶usii Pablo kõpaerorãba ichi aid̶ad̶e need̶amera.

24Mau maad̶akare Félix chi wẽra Drusila ome waya neesii. Mau wẽra judio basii.#24:24 Mau Drusila Herodes Agripa Nabena kau basii. Chi ãba Agripa ara mau Ome abachid̶au basii. Hechos 25:13. Maud̶e Felixba Pablo iusii ichiba Jesucristod̶e ijãad̶ai ʉ̃rʉbena berrea b̶uu ũrii baita. 25Maka b̶uud̶e Pabloba dachi jipa nibai ʉ̃rʉbena, kakua jipa uru b̶uai ʉ̃rʉbena maud̶e Dachi Akõreba nebʉra kastikai ewari neei ʉ̃rʉbena berreasii. Felixba mau ʉ̃rʉbena ũrisiid̶e wapeaped̶a naka jarasii: «Jãabae wãse. Mʉ bari b̶uud̶e waya bichi iui».

26Felixba kʉ̃risia b̶uasii Pabloba ichimaa chi nejarra deai ewa bʉimera. Maud̶eeba akabichia Pablo iubachii mau ome berreai baita. 27Maka b̶uu año ome wãyaasii. Mau maad̶akare Félix neei bad̶a june neesii chi mechiu b̶uai baita. Mau Porcio Festo abadau. Maamina mauba judiorã ome biꞌia b̶uai kʉ̃ria b̶uasiid̶eeba, Pablo jʉ̃a b̶ʉisii.

Currently Selected:

Hechos 24: cmi

Highlight

Compare

Copy