Hechos 22

1Pabloba jarasii: «Ãbarã maud̶e chõrarã, ũrísturu. Ara mʉ ʉ̃rʉbena jaraaruu».

2Ichi hebreo bed̶ead̶e berrea b̶uu ũriped̶aad̶ad̶eeba ãchi chũpea duaneesid̶au. Maud̶e Pabloba jarasii:

3«Mʉ judiobʉ. Cilicia druad̶e Tarso puurud̶e mʉ danaba mʉ adausii. Maamina mʉ nama Jerusalend̶e warisii. Jaradeabarii Gamalielba mʉʉmaa joma dachi nabẽraed̶ebenarã Moisesba b̶ʉd̶a ãrea jaradeasii.#Hechos 5:34-39. Mʉʉba Dachi Akõre ãrea ijãa b̶uabachii machiba ijãabadau kĩra. 4Mauba, mʉʉba chi O Wid̶i ijãa panuurã wãraa b̶uabachii. Mukĩrarã maud̶e wẽrarã jʉ̃a bʉikabiabachii. Maud̶e chi nuree beabiasii. 5Mau chi paare mechiuba maud̶e joma judio mechiurãba kuitaa panuu. Ãchiba mʉʉmaa karta deasid̶au judiorã Damasco puurud̶ebenarãba mʉʉba chi O Wid̶i ijãabadaurã jidaui b̶uu mau kuitaad̶amera. Maud̶e mʉ Damasco puurud̶aa wãsii ãchi nama Jerusalend̶aa eneeped̶a chi mechiurãba kastikad̶amera.

6»Maamina Damasco puurud̶e neeruud̶e ʉmada jipa baaruud̶e bajãad̶ebena mʉ ad̶u ãrea ʉ̃d̶aa puri chebiwãsii. 7Mʉ jeed̶a b̶aesiid̶e mimi ũrisii. Mauba mʉʉmaa jarasii: “Saulo, Saulo, ¿sakãe mʉ wãraa b̶uma?” 8Mʉʉba id̶isii: “Mʉ Mechiu, ¿bichi kaima?” Ichiba panausii: “Mʉ Jesús Nazaretd̶ebenabʉ, chi bichiba wãraa b̶uu”. 9Chi mʉ ome nibaped̶aad̶aba mau ʉ̃d̶aa ted̶echoaruu unusid̶aud̶e perasid̶au, maamina chi mʉ ome berrearuu ũrid̶aabasii.#22:9 Perasid̶au. Ãrea karta griego bed̶ead̶e mau bed̶ea wãꞌãe. 10Maud̶e mʉʉba id̶isii: “Mʉ Mechiu, ¿bichiba kãare kʉ̃ria b̶uma mʉʉba waui?” Dachi Mechiuba panausii: “Jiraduped̶a Damasco puurud̶aa wãse. Mʉʉba jamaria jarai kãare waui b̶uu”. 11Mau ʉ̃d̶aa ted̶echoaruuba mʉ dau pãriubisii. Maud̶eeba chi mʉ ome nibad̶aba mʉ juad̶e jidaud̶aped̶a Damasco puurud̶aa adoesid̶au.

12»Aria ẽbẽra Ananias abadau b̶uasii. Mau ẽbẽraba Dachi Akõre wapea b̶uud̶eeba Moisesba b̶ʉd̶ad̶e jara b̶uu kĩra waubachii. Maud̶eeba joma judiorã Damasco puurud̶ebenaba ichi ʉ̃rʉbena biꞌia berreasid̶au. 13Mau Ananiasba mʉ ichiad̶e neesiid̶e ara kaita wãped̶a jarasii: “Ãba Saulo, waya bichi dauba unuse”. Ara makʉd̶e mʉ dau aribiaped̶a ichi unusii. 14Maabae Ananiasba jarasii: “Dachi Akõre dachi nabẽraed̶ebena ome b̶uad̶aba bichi adoesii ichiba kʉ̃ria b̶uu kuitaamera, chi Jipa nii unumera maud̶e ichi berrearuu ũrimera. 15Joma bichiba unud̶a maud̶e ũrid̶a jomaurãmaa jarai. 16¡Waa esed̶ause! Jiraduped̶a bichi boro eabise. Ʉtaa id̶ise. Bichiba kachirua waud̶a ichiba joma perdonai”.

17-18»Mau maad̶akare mʉ waya Jerusalend̶aa neesii. Ewari ab̶a Dachi Akõre de mechiud̶aa wãped̶a ichimaa ʉtaa id̶i b̶uasii. Maud̶e Dachi Akõreba mʉ daumaa Dachi Mechiu unubisii. Ichiba mʉʉmaa jarasii: “Jerusalend̶ebena isa ãyaa wãse. Chi bichiba mʉ ʉ̃rʉbena jara b̶uu namabenarãba ijãad̶aabai”. 19Mʉʉba naka panausii: “Maamina, mʉ Mechiu, ãchiba ãrea kuitaa panuu naed̶e mʉ judiorã araa ãbua imibadau decha wãped̶a chi bichid̶e ijãa nuree jidauped̶a sĩbachii maud̶e jʉ̃a b̶ubachii. 20Bichi ʉ̃rʉbena berrea b̶uu kakua Esteban beasid̶aud̶e mʉ sid̶a aria b̶uasii. Mau beaduu mʉʉba biꞌia unusii. Mau awara ãchi paru anab̶ari jʉ̃badau mʉʉba nu b̶uasii”. 21Maamina Dachi Mechiuba mʉʉmaa jarasii: “Wãse. Mʉʉba bichi kaitawẽ judiowãerãmaa bʉii”».

Pablo kokoroarã mechiu juad̶e

22Pabloba jara b̶uu judiorãba chũpea ũri duanasid̶au. Maamina Dachi Mechiuba ichi judiowãerãmaa bʉii asiid̶e, b̶ia bara b̶eesid̶au:

«¡Jãu ẽbẽra nibaabai b̶uu! ¡Beásturu!»

23Maka b̶ia panuud̶e, chi ãchi paru anab̶ari jʉ̃badau ẽekuad̶aped̶a ioro jora ʉtaa jãrapesid̶au. 24Maud̶eeba kokoroa chi aude mechiuba jarasii Pablo kokoroarã duanabadau ded̶e ed̶a adoed̶aped̶a pebid̶amera. Maka waubisii Pabloba jaramera sakãe judiorã ichi ome kĩramaa panuu. 25Maamina ichi pebebad̶ai baita jʉ̃ʉduud̶e Pabloba kokoroarã jaradea ua b̶uabarii aria b̶uumaa jarasii:

—¿Machiba Romad̶ebena ab̶a pebebad̶ai panuka ichi nebʉra ichiad̶ai naed̶e?#22:25 Romad̶ebena leyd̶e b̶ʉ kub̶uasii, ẽbẽra Romad̶ebena poyaa sĩd̶aabai, ped̶aabai maebʉrã bead̶aabai, ichi nebʉra ichiad̶ai naed̶e.

26Mau ũrisiid̶e kokoroa chi aude mechiumaa wãped̶a jarasii:

—¿Bichiba kuitaa b̶uka kãare wauruu? Jãu ẽbẽra romad̶ebenabʉ.

27Maabae kokoroa chi aude mechiuba Pablomaa wãped̶a id̶isii:

—¿Biawãra bichi romad̶ebenaka?

Pabloba panausii:

—Maerã, mʉ romad̶ebenabʉ.

28Kokoroarã chi aude mechiuba jarasii:

—Mʉʉba chi nejarra ãrea deasii Romad̶ebena bai baita.

Pabloba jarasii:

—Mʉ danaba mʉ adausiid̶eed̶ebena romad̶ebenabʉ.

29Ara makʉd̶e chi Pablomaa id̶ikad̶ai baita panad̶aba ida b̶usid̶au. Kokoroarã chi aude mechiuba Pablo Romad̶ebena kuitaasiid̶e ãrea wapeasii Romad̶ebena pebebabii baita jʉ̃bisiid̶eeba.

Pablo judio chi mechiu nureerã daad̶e b̶uad̶a

30Norema kokoroa chi aude mechiuba wabid̶a kuitaa kʉ̃ria b̶uasii sakãe judiorãba Pablo jidea panasid̶au. Maud̶eeba ichi kaenaba jʉ̃ b̶uad̶a ena b̶usii.#22:30 Kaenaba jʉ̃ b̶uad̶a. Griego bed̶ead̶e chi b̶ee kartad̶e mau wãꞌãe. Maabae ichiba joma paare mechiurã maud̶e judiorã mechiurã araa ãbua imibiasii. Maud̶e Pablo adoeped̶a ãchi daad̶e b̶usii.

Currently Selected:

Hechos 22: cmi

Highlight

Compare

Copy