Hechos 20

Pablo Macedonia druad̶aa maud̶e Greciad̶aa wãd̶a

1Maka kĩrubika duanuu apiisid̶aud̶e Pabloba chi Jesusd̶e ijãa nuree iukuaped̶a ãchi ome berreasii Dachi Mechiud̶e biꞌia ijãad̶amera. Maabae wãaruu aped̶a Macedonia druad̶aa wãsii.#20:1 Griego bed̶ead̶e chi nuree kartad̶e b̶ʉ kub̶uu: ãchi bʉrʉped̶a. 2Joma mau druad̶e nibasiid̶e ãbarã aid̶abachii Dachi Mechiud̶e biꞌia ijãad̶amera.#20:2 Pablo año ab̶a ẽsa Macedonia druad̶e b̶uasii. Maud̶e Pabloba Karta Ome Corinto abadau b̶ʉsii. Maabae Grecia druad̶e neesii. 3Aria jed̶ako õbea b̶uasii. Pablo Siria druad̶aa jãbad̶e wãi baita kub̶ud̶e kuitaasii judiorãba ichi kachirua waud̶ai baita bed̶ea deasid̶au. Maud̶eeba Macedonia druad̶aa wãsii. 4Ichi baara naarã Asia druad̶aa wãsid̶au: Berea puurud̶ebena Pirro warr Sópater, Tesalónica puurud̶ebena Segundo maud̶e Aristarco, Derbe puurud̶ebena Gayo, Asia druad̶ebena Tíquico maud̶e Trófimo maud̶e Timoteo.#20:4 Asia druad̶aa. Griego bed̶ead̶e chi b̶ee kartad̶e mau wãꞌãe. 5Mau ãbarã dai naa wãd̶aped̶a Troas puurud̶e esed̶au panasid̶au. 6Pan ẽesãabibariiwãe kobadau ewari basiid̶e dai Filipos puurud̶ebena jãbad̶e wãsid̶au. Ewari jua ab̶ad̶e ãchi ome Troas puurud̶e unusid̶au. Aria 7 ewari paneesid̶au.

Troas puurud̶e duanad̶a

7Maabae nabena ewari misad̶e Jesusd̶e ijãabadaurã ome araa ãbua panasid̶aud̶e pan b̶ʉad̶aped̶a kosid̶au.#20:7 Pan b̶ʉad̶aped̶a kosid̶au. Chi nureemaarã, mau chi Jesús kĩrabad̶ai baita kobadau jara b̶uu. Maud̶e Pabloba jaradea b̶uasii. Norema wãi b̶uud̶eeba ẽsabud̶e ẽsab̶aare baaruud̶aa berrea b̶uasii. 8De jã ʉtʉbenad̶e araa ãbua duanasid̶au maud̶e ʉ̃d̶aa koabadaurã ãrea ʉ̃d̶aa nub̶uasii. 9Maud̶e kũudrãa Eutico abadau poraa kaebeu boroa ichiabadaumare akʉ b̶uasii. Pablo ãrea berreamaa b̶uud̶eeba mau kũudrãa dapokeaba kãi nub̶eeped̶a, de jã ʉtʉ õbead̶ebena b̶aesii. Jiradubid̶e wãsid̶aud̶e biu nub̶uu unusid̶au. 10Pablo ed̶aa neeped̶a chi kũudrãa ʉ̃rʉ õdarrd̶eeba kob̶eeped̶a bʉrʉsii. Maabae jarasii:

—Perarã́sturu. Nau chokae b̶uma.

11Pablo waya ded̶e ed̶a wãped̶a pan b̶ʉaped̶a, kosii. Maabae wabid̶a berrea b̶uud̶e ewarisiid̶e wãsii. 12Chi kũudrãa deed̶aa chokae adoesid̶au. Maud̶eeba jomaurã kĩrajʉʉ duaneesid̶au.

Troas puurud̶ebena Mileto puurud̶aa wãped̶aad̶a

13Pablo Asón puurud̶aa od̶e wãi kʉ̃riasii. Maamina dai jãbad̶e naa wãbiasii. Aria ichi ataui asii. Dai ara makʉd̶e wãsid̶au. 14Aso puurud̶e Pablo ome unusid̶aud̶e jãbad̶e atausii. Maabae Mitilene puurud̶aa wãsid̶au. 15Arabena wãd̶aped̶a, norema Quío isla kĩraare wãsid̶au. Mau norema Samos puurud̶e neesid̶au. Maabae Trogiliod̶aa wãd̶aped̶a Mileto puurud̶e neesid̶au.#20:15 Trogiliod̶aa wãd̶aped̶a. Griego bed̶ead̶e ãrea kartad̶e mau wãꞌãe. 16Pablo Asia druad̶e ãrea b̶uamaaba, Éfeso puurud̶aa wãyaa wãsii. Ichi isa Jerusalend̶aa neei kʉ̃ria b̶uasii, makasirã poyaa neei, Pentecostés ewarid̶e aria b̶uai baita.

Pabloba ãbarã Efesod̶ebenarãmaa berread̶a

17Mileto puurud̶e b̶uud̶e Pabloba Efesod̶ebena ijãabadaurã nubadaurã iubiasii. 18Ichimaa neesid̶aud̶e Pabloba jarasii: «Machiba kuitaa panuu mʉ nau Asia druad̶e neesiid̶eed̶ebena saka machi tãed̶e nibabachii. 19Mʉʉba chi Dachi Akõreba waubi b̶uu wau b̶uasiid̶e chi aude mechiu nibai kʉ̃riabasii. B̶esed̶e jẽa b̶uabachii, judiorãba mʉ kachirua wau kʉ̃ria panasiid̶eeba. 20Maamina mʉʉba jomaurã daad̶e maud̶e machi decha machi aid̶ai baita jaradea b̶uabachii. Chi machi baita aude bibuara b̶uu jaradea b̶uabachii. 21Judiorãmaa maud̶e judiowãerãmaa mʉʉba jarasii kachirua waubadau ida b̶ud̶aped̶a Dachi Akõremaa need̶amera maud̶e Dachi Mechiu Jesucristod̶e ijãad̶amera.

22»Jãabae Dachi Akõre Jauriba mʉ Jerusalend̶aa wãbi b̶uud̶eeba araa wãi.#20:22 Dachi Akõre Jauriba mʉ Jerusalend̶aa wãbi b̶uud̶eeba. Griego bed̶ead̶e nau sid̶a jara b̶uu «mʉ jaurid̶e wãi b̶uu kuitaa b̶uud̶eeba». Maamina mʉʉba adua b̶uu aria mʉ kãare sãai. 23Ab̶aburu kuitaa b̶uu Dachi Akõre Jauriba mʉʉmaa kuitaabi b̶uu puurucha mʉ ãrea biꞌiwãe b̶uai maud̶e jʉ̃a b̶uai. 24Maamina mʉʉba mau ʉ̃rʉbena kʉ̃risiakau, mʉ biꞌia b̶uai jʉrʉwẽed̶eeba. Ab̶aburu chi Dachi Mechiu Jesusba mʉʉmaa waubi b̶uu mau joma wau kʉ̃ria b̶uu.#20:24 Chi b̶ee kartad̶e griego bed̶ead̶e b̶ʉ kub̶uu: chi mʉ isa piraaruud̶e, kĩrajʉʉ ara bai. Mauburu chi bed̶ea bia Dachi Akõreba ichi sõbiad̶eeba kariba b̶uu ʉ̃rʉbena mʉʉba jara b̶uai.

25»Dachi Akõreba ichid̶irã ichi juad̶e ua b̶uai ʉ̃rʉbena mʉʉba machimaa jara b̶uabachii. Maamina jãabae kuitaa b̶uu machiba mʉ waa unud̶aabai. 26-27Mʉʉba wapeaweã Dachi Akõreba machi baita wau kʉ̃ria b̶uu joma arakʉd̶e jara b̶uabachii. Maud̶eeba id̶i mʉʉba jaraaruu: ab̶a karibawẽebʉrã, mʉ nebʉra wãꞌãe nii.

28»Dachi Akõreba ichi Warr oad̶eeba ẽbẽrarã ichi baita nedosii.#20:28 Dachi Akõreba ichi Warr oad̶eeba. Griego bed̶ead̶e chi b̶ee kartad̶e b̶ʉ kub̶uu: Dachi Mechiuba ara ichi oad̶eeba. Dachi Akõre Jauriba machi b̶usii ãbarã nu panad̶amera. Maud̶eeba ara machi du ab̶a ãrea kauwa panásturu maud̶e Dachi Akõred̶e ijãabadaurã joma nu panásturu. 29Mʉʉba kuitaa b̶uu mʉ wãsiid̶e ẽbẽra kachiruarã usa kachirua kĩra machi tãed̶e need̶ai ãbarã ãyaa wãbiad̶ai baita. 30Ara machid̶ebenarã bid̶a setaa jaradead̶ai Jesusd̶e ijãabadaurã ãyaa wãd̶amera. 31Maud̶eeba kauwa panásturu. Kĩrabásturu mʉʉba año õbea ãyadaa maud̶e ẽsabud̶e jẽa b̶uuba machicha chi setaa jaradeabadaurã ʉ̃rʉbena kauwa nuread̶ai jara b̶uasii.

32»Jãabae ãbarã, mʉʉba machi Dachi Akõre juad̶e b̶uuruu. Ichi sõbiad̶eeba dachi kariba b̶uu ʉ̃rʉbena bed̶ea kĩrabásturu. Mau bed̶ead̶eeba machi poyaa aude biꞌia ijãad̶ai. Ichiba deai jarad̶a ichi sõbiad̶eeba machiba adaud̶ai maud̶e joma chi ichi baita biꞌia b̶ud̶arãba mau adaud̶ai.

33»Mʉʉba waabena chi nejarra, nee, maebʉrã paru ara mʉ baita kʉ̃riabasii. 34Machiba ãrea kuitaa panuu ara mʉ juaba trajasii mʉʉba uru b̶uai b̶uu adaui baita maud̶e mʉ baara nibabadaurãmaa deai baita. 35Joma mʉʉba wausiid̶eeba machimaa kuitaabiasii ãrea traja panuud̶eeba chi nejarr barauwãe ked̶ee aid̶ad̶ai panuu. Kĩrabad̶ai panuu Dachi Mechiu Jesusba naka jarasii: “Bibuara b̶uu ab̶aumaa deai, chi mau adaui bad̶amaarã”».

36Maka jarasiid̶e Pablo õdarrd̶e kob̶eeped̶a joma ãchi baara Dachi Akõremaa ʉtaa id̶isid̶au. 37Maabae biꞌia wãbid̶ai baita joma ãrea jẽa panuuba Pablo bʉrʉd̶aped̶a ĩyaasid̶au. 38Ãrea kĩra nomaasid̶au waa unud̶aabai asiid̶eeba. Maabae ichi jãbad̶aa dead̶e wãsid̶au.

Currently Selected:

Hechos 20: cmi

Highlight

Compare

Copy