Hechos 16

Timoteo Pablo baara nibad̶a

1Maud̶e Pablo Derbe puurud̶e neeped̶a Listra puurud̶aa wãsii.#16:1 Pablo Bernabé ome naed̶e mau puuru omed̶aa wã panasii. Hechos 14:6-23. Aria Jesusd̶e ijãa nii Timoteo abadau b̶uasii. Timoteo nawe judio basii; Jesusd̶e ijãa nibasii. Ichi akõre griego basii. 2Ãbarã Listrad̶ebenaba maud̶e Iconio puurud̶ebenaba mau Timoteo ʉ̃rʉbena biꞌia jarabachid̶au. 3Maud̶e Pabloba Timoteo adoe kʉ̃ria b̶uasii. Maamina jomaurãba kuitaa panasid̶au Timoteo akõre griego basii. Maud̶eeba Pabloba Timoteo chi kakua tõosii judiorã mau druad̶e nureeba ichi ʉ̃rʉbena kachirua kʉ̃risiarãad̶amera. Maabáeburu wãsid̶au. 4Ãchi wãaduu puurucha jarasid̶au Jesusba bʉid̶arãba maud̶e ijãabadaurã nubadaurã Jerusalend̶e nureeba kartad̶e b̶uped̶aad̶a ãbarãba maka wau panad̶amera.#Hechos 15:23-29. 5Maka ãbarãba Dachi Mechiud̶e biꞌia ijãasid̶au maud̶e ewaricha ãrea maucha imisid̶au.

Pabloba Macedoniad̶ebena ẽbẽra unud̶a

6Pablo ichi ome nibad̶a sid̶a Frigia druad̶e maud̶e Galacia druad̶e nibasid̶au Dachi Akõre Jauriba chi bed̶ea Jesús ʉ̃rʉbena Asia druad̶e ida jarabiad̶aabasiid̶eeba. 7Misia drua kaita neesid̶aud̶e Bitinia druad̶aa wãd̶ai kʉ̃risiasid̶au, maamina Jesús Jauriba ida kabiabasii.#16:7 Jesús Jauri. Griego bed̶ead̶e chi b̶ee kartad̶e b̶ʉ kub̶uu: Dachi Akõre Jauri maebʉrã ab̶aburu Jauri. 8Maud̶eeba Misia druad̶e mard̶e wãd̶aped̶a Troas puurud̶aa neesid̶au. 9Ẽsabud̶aa Dachi Akõreba Pablo daumaa unubisii ẽbẽra Macedonia druad̶ebena ʉkʉ nub̶uu. Mau ẽbẽraba Pablomaa naka chi chuburia id̶isii: «Macedoniad̶aa dai aid̶ad̶e neese». 10Pabloba mau unusiid̶eeba daiba kuitaasid̶au Dachi Akõreba dai iukua b̶uasii chi bed̶ea bia Jesús ʉ̃rʉbena Macedoniad̶ebenarãmaa jarad̶amera. Ara makʉd̶e wãd̶ai baita paneesid̶au.

11Troas puurud̶ebena jipa wãd̶aped̶a Samotracia islad̶e neesid̶au. Norema Neápolis puurud̶e neesid̶au. 12Arabena Filiposd̶aa wãsid̶au. Mau drua Macedoniad̶ebena puuru mechiu basii. Mau puurud̶e Romad̶ebenarã ãrea panabachid̶au. Aria ewari b̶aꞌãra panasid̶au. 13Bari panabadau ewarid̶e dai puuru awara wãd̶aped̶a doed̶aa wãsid̶au. Kʉ̃risiasid̶au aria judiorãba Dachi Akõremaa ʉtaa id̶ibadau. Wãaduud̶e wẽrarã ãbua panuu unusid̶au. Jeed̶a akʉ paneed̶aped̶a daiba ãchimaa berreasid̶au. 14Mau wẽrarãd̶ebena ab̶a Lidia abachid̶au. Mau Tiatira puurud̶ebena basii. Paru pupuchia b̶ee nedobʉibachii. Mau judiowãe wẽraba Dachi Akõre wapeadee b̶uasii. Dachi Mechiuba ichi sõ wausiid̶eeba Pabloba berrea b̶uu Lidiaba kauwa ũriped̶a ijãasii. 15Lidia maud̶e joma ichi ded̶ebenarã boro easid̶aud̶e daimaa chi chuburia id̶isii ichi ded̶e paneed̶amera. Naka jarasii:

—Machimaa mʉʉba biawãra Dachi Mechiud̶e ijãasiibʉrã, mʉ ded̶e panad̶e nésturu.

Maka dai ichi ded̶e paneebiasii.

Pablo maud̶e Silas jʉ̃aped̶aad̶a

16Ewari ab̶ad̶e Dachi Akõremaa ʉtaa id̶ibadaumaa wãaduud̶e daiba chi bari trajabarii ãwera jai kachirua uru b̶uu unusid̶au. Mau chi ãweraba chi jai kachiruad̶eeba ne jarabachii kãare sãai b̶uu. Maud̶eeba ichi chibarirãba ãrea chi nejarra adaubachid̶au. 17Mau ãwera dai kaad̶e b̶ia wãbachii:

—Dachi Akõre Mechiuba nau ẽbẽrarã bʉikasii jaradead̶amera saka Dachi Akõreba chi ẽbẽrarã ichiba kastikai bad̶a karibabarii.

18Ichiba ewari ãrea maka jĩwa b̶ia nibasiid̶eeba Pablo waa ũri kʉ̃riabasii. Ichimaa ichiaped̶a chi jai kachiruamaa jarasii:

—Mʉʉba Jesucristo trʉ̃d̶eeba bichimaa jaraaruu: nau ãwerad̶ebena ãyaa wãse.

Ara makʉd̶e chi jai kachirua wãsii.

19Maud̶e chi ãwera chibarirãba kuitaasid̶au ichid̶eeba waa chi nejarra adaud̶aabai. Maud̶eeba Pablo maud̶e Silasba jidaud̶aped̶a puurud̶ebena karrarãmaa adoesid̶au. 20Chi jaradea ua b̶uabadaurã daad̶e nub̶ud̶aped̶a jarasid̶au:

—Cha panuu judiorãba dachi puuru kĩrubikabia panuu. 21Chi dachi romad̶ebenarãba waud̶akau jãarãba mau jaradea panuu.

22Maud̶e joma chi aria panuuba Pablo maud̶e Silas orra adoesid̶au. Maka panuud̶e chi jaradea ua b̶uabadaurãba ãchi paru ẽetabid̶aped̶a bakuruba ubisid̶au.#2 Corintios 11:25. 23Ãrea ud̶aped̶a jʉ̃a kub̶usid̶au. Chi jʉ̃a duanuu nubariimaa jarasid̶au ãrea numera. 24Ara makʉd̶e chi jʉ̃a duanuu nubariiba Pablo maud̶e Silas jʉ̃abadau ded̶e waa ed̶a id̶u b̶uud̶e ãchi jʉ̃rʉ sepod̶e kaatʉ nub̶usii.

25Ẽsabud̶e ẽsa baaruud̶e Pabloba maud̶e Silasba Dachi Akõremaa ʉtaa id̶i panasid̶au maud̶e ichimaa kari panasid̶au. Mau waabena jʉ̃a duanuurãba ũri panasid̶au. 26Maka b̶uud̶e ioromia ãrea wãsii. Mauba chi jʉ̃abadau de jʉ̃rʉ ãrea urisii. Ara maud̶e chi poraa ewakuasii. Joma chi jʉ̃a duanuu kaenaba jʉ̃a duanad̶a ena wãurisid̶au. 27Maud̶e chi jʉ̃a duanuu nubarii ʉ̃rʉmasii. Chi poraa ewa poe unusiid̶e kʉ̃risiasii chi jʉ̃a duanad̶a joma jĩichoasid̶au. Maud̶eeba ichi espada erta adausii ichi du ab̶a biui baita. 28Maamina Pabloba jĩwa jarasii:

—Bichi du ab̶a biurã́se. Dai joma nama panuu.

29Maabae chi jʉ̃a b̶ee nubariiba ʉ̃d̶aa koabarii adoebiped̶a Pablo maud̶e Silas panuumaa isa ed̶aa wãsii. Wapeaba uri kub̶uuba ãchi jʉ̃rʉ kaita õdarrd̶eeba kob̶eesii. 30Maabae ãchi awara adoeped̶a id̶isii:

—Mʉʉba ¿kãare sãaima Dachi Akõreba mʉ karibamera?

31Ãchiba panausid̶au:

—Bichiba maud̶e bichi ded̶ebenarãba Dachi Mechiu Jesucristo ijãaduubʉrã, ichiba machi karibai.

32Maabae Dachi Mechiu bed̶ea ichimaa maud̶e joma ichi ded̶ebenarãmaa jarasid̶au. 33Ara mau ẽsabud̶e chi jʉ̃a duanuu nubariiba ãchi chi tõoped̶aad̶a jeraasii. Mau maad̶akare ichi maud̶e joma ichi ded̶ebenarã boro easid̶au. 34Pablo maud̶e Silas ichi deed̶aa adoeped̶a kobiasii. Dachi Akõred̶e ijãasid̶aud̶eeba ichi maud̶e chi ichi ded̶ebenarã ãrea kĩrajʉʉsid̶au.

35Norema chi jaradea ua b̶uabadaurãba chi jʉ̃a b̶ee nubariimaa naka jarad̶e bʉisid̶au: «Pablo maud̶e Silas awara bʉikase».

36Maabae chi jʉ̃a b̶ee nubariiba Pablomaa jarasii:

—Chi jaradea ua b̶uabadaurãba jarabʉisid̶au, mʉʉba machi awara wãbiamera. Maud̶eeba namabena jirukaraayuwãe wã́sturu.

37Maamina Pabloba chi karrarãmaa jarasii:

—Dai romad̶ebenarãmina, dai nebʉra biꞌia ichiad̶awẽa, jomaurã daad̶e pebiad̶aped̶a jʉ̃asid̶au. Mau ¿dai awara mirubia bʉikad̶ai kʉ̃ria panuka? ¡Makawãema! ¡Ara ãchi neebiásturu, dai namabena adoed̶amera!

38Chi jʉ̃abadau de nubadaurãba Pabloba jarad̶a chi jaradea ua b̶uabadaurãmaa jarad̶e wãsid̶au. Pablo maud̶e Silas romad̶ebenarã nuree ũrisid̶aud̶e wapeasid̶au. 39Ara makʉd̶e ãchimaa wãd̶aped̶a chi chuburia id̶isid̶au ãchiba wauped̶aad̶a kʉde b̶eerãad̶amera. Maabae chi jʉ̃abadau ded̶ebena adoed̶aped̶a, chi chuburia id̶isid̶au puurud̶ebena ãyaa wãd̶amera. 40Pablo maud̶e Silas chi jʉ̃abadau ded̶ebena wãd̶aped̶a Lidia deemaa wãsid̶au. Aria chi ãbarã unusid̶aud̶e, berreasid̶au Dachi Mechiud̶e biꞌia ijãad̶amera. Maabáeburu wãsid̶au.

Currently Selected:

Hechos 16: cmi

Highlight

Compare

Copy