Acts 3

Петра нохты хŏйат тўмтака верԓәԓы

1Петра пӑ Иоанн Турәм Хота йӑрәтйаӈмет#3:1 йӑртйаӈмет щос - щит мўӈ щирэвән хӑтәԓ хуԓмет щос; пойәкщәты щосән йӑха шушсәӈән.

2Сэма питәм тэԓән уԓты нохты хŏйат ӑԓ аԓтԓыса пӑ кашәӈ хӑтәԓ Турәм Хот, Хŏрамәӈа айәԓтты, ов ԉэпа опсыԓыса. Турәм Хота ԓŏӈты хŏйатәт эԓты меԓащ вохты урәӈән.

3Ԓўв, Петра пӑ Иоанн Турәм Хот ов йэԓпийән кащаԓәмаԓ кемән, ԓын эԓтайән меԓащ вохәс.

4Петра Иоанн пиԓән, ԓўв пеԓайәԓ тŏрԓы ватман, йастәс: «Мин пеԓайэмән ӑӈкәрма».

5Щӑԓта ԓўв ԓын пеԓайән хŏрат ӑӈкәрмәс, ԓын эԓтайән мŏԓты йоша пайәтты нумәсәс.

6Туп Петра йастәс: «Щел ŏх пӑ сорԋи ма ӑт тӑйԓәм; мўй тӑйԓәм, щит нӑӈен мӑԓәм: Назарет эԓты уԓты Иисус Христос нэм хўватән ԓойа пӑ шушиԓыйа».

7Щӑԓта, ԓўвеԓ йӑм пеләк йошәԓ эԓты катәԓман, нŏх ԓощәԓтәсԓы; пӑ ищи мŏхты ԓўв кўр пушәхԓаԓ пӑ шаншŏхԓаԓ такамәсәт,

8Пӑ, нŏх ԓойәпман, ԓойәс пӑ шушиԓыты питәс, пӑ ԓын пиԓанән Турәм Хота ԓŏӈәс, шушиԓыман пӑ наврәтԓыман пӑ Турәм ишәкман.

9Щӑԓта аратәԓ мир ԓўвеԓ шушиԓыман пӑ Турәм ишәкман ватсәԓы;

10Пӑ ԓўвеԓ уйәтсэԓ, тӑм щит ус, хŏй Турәм Хот Хŏрамәӈ ов ԉэпән меԓащ вохты урәӈән опсәс; щӑԓта ԓўв тўмтака йўвмаԓ пӑтыйән, хŏйатәт шек пӑԓтәмәсәт пӑ пакнысысәт.

Петра Турәм Хотән по̆тәртты вер

11Пӑ тўмтака йўвәм нохәм ху Петра пӑ Иоанн эԓты пўӈԓа ӑт мӑныԓыйәԓ, щишән мир хŏԓ, шек пакәнман, ԓын хŏщайән Соломон хот йата хухәԓсәт.

12Петра щит шийаԓәмаԓ кемән мир пеԓа йастәс: «Израиль йох! Мўй тӑми эԓты пакәнԓәты, мўй мўӈ пеԓайэв ватԓәты, ищи мӑтты ки мин йурԓәмәнән мўй пӑ йӑмԓәмәнән щиты версэмән, ԓўв шушиԓыйәԓ?

13Авраам пӑ Исаак пӑ Иаков Турәм, мўӈ ащиԓув Турәм, Ԓўв Иисус Пŏхәԓ вŏԓаӈ щирәԓ этәԓтәсԓы, Хŏй нын веԓты мӑсԓән пӑ Хŏй эԓты, Пилат хуԓәтман, пўӈԓа ўратсәты, хун щитэн Ԓўвеԓ хŏԓт эсәԓты ўтщисԓы.

14Туп нын Йэмәӈ пӑ Вещкат Ŏт эԓты пўӈԓа ўратсәты пӑ хŏйат веԓты хорахщи нынана хŏԓт эсәԓты ўратсәты,

15Уԓәпса Куща пӑ веԓсәԓән. Тӑми, Турәмән пӑрмаԓ эԓты нŏх ԓыԓӈатса, мўй хŏща мўӈ вантәм ŏтәта уԓԓув.

16Пӑ Иисус нэм хўватән эвәԓты урәӈән, Ԓўв нэмәԓән тӑмен такапса, хŏй пеԓа нын ватԓәты пӑ ԓўвеԓ уйәтԓәԓән. Пӑ Иисус эԓты уԓты эвәԓты щир, хŏԓ нын ватман, тўмтака йиты вер верәс.

17Пӑ хŏты, ма уйәтԓэм, хӑнам йохәт, нын пӑ куща йохԓән иты, ӑт уйәтман, тӑм версәԓән;

18Турәм пӑ хŏты Ԓўв хŏԓыйэ Турәм айкеԓ туты хŏйатԓаԓ уӈәԓән Христос шукащты вер йастәс, щиты пӑ щи версәԓы.

19Щиӈәԋща, кӑрэкԓән эԓты шӑнша керԓаты пӑ Турәм пеԓа ӑӈкәрматы, нын кӑрэкԓән нŏх ат ушисайәт,

20йӑԓпиԓәты пŏрайәт Турәм Куща эԓты ат йŏхәтԓәт, пӑ нынана йўкантәм Иисус Христос Ԓўв ат китәԓ.

21Туп Иисуса опәԉән хӑщты мосәԓ, щи пŏра унты хун Турәм иса хŏԓ йӑԓпитԓәԓы, щи пŏра эԓты Турәм хŏԓ Ԓўв йэмәӈ Турәм айкеԓ туты хŏйатԓаԓ уӈәԓән хўвән йастыԓыйәс.

22Моисей ащиԓува ӑт йастыԓыйәс: 'Нын хӑнам йохԓән кўт эԓты Турәм Куща нын Турмән, ма итэма, Турәм айкеԓ туты хŏйат нŏх этәԓтәԓ; Ԓўвеԓа мўй хŏща иса хуԓәнтаты, мўй Ԓўв нынана пŏтәртты питәԓ;

23Щӑԓта кашәӈ ŏт, хŏй Турәм айкеԓ туты хŏйата ӑт хуԓтмәԓ, щит мир кўт эԓты пӑратԓа'.

24Щит эԓты пӑ хŏԓ Турәм айкеԓ туты хŏйатәт пŏтәртысәт, Самуил эԓты ўйман пӑ щитәт, хŏй ԓўв йўпеԓән ус, ищиты тӑм хӑтԓәт аԉсәт.

25Нын – Турәм айкеԓ туты хŏйатәт пӑ йастантәм вер пŏхәт, Турәм нын ащиԓәна йастантәм вер хӑйиԓыйәс, Авраама пŏтәртман: 'Пӑ нӑӈ ԋаврэмен сӑхат мўв ԓŏватән уԓты мир йӑмән мӑԓа'.

26Турәм, Ԓўв Иисус Пŏхәԓ ԓыԓӈатмаԓ кемән, оԓӈа нын хŏщайәна Ԓўвеԓ китсәԓы, нынана йӑм мӑты урәӈән пӑ кашәӈ ŏтән нын ԉикәӈ верԓән эԓты шӑшән керәтты урәӈән».

Currently Selected:

Acts 3: ХБ

Highlight

Copy