မီႉၶႃႇ 6

ထႃႇဝရႃႉၽြႃးႁဵတ်းဢမူႉၶတ်းၵၼ်တင်းၵူၼ်းမဵဝ်းဢီႉသရေႇလႃႉ

1ဢွၼ်ၵၼ်ထွမ်ႇငိၼ်း ဢမိင်ႉထႃႇဝရႃႉၽြႃးတႃႉ။ မႂ်းလုၵ်ႉလႄႈ ထူပ်းတြႃးၵၼ် တင်းလွႆလူင်တင်းလၢႆလႄႈ ႁႂ်ႈလွႆဢွၼ်ႇတင်းလၢႆ ဢွၼ်ၵၼ်ငိၼ်းၵႂၢမ်းမႂ်းသေ။- 2လွႆတင်းလၢႆ ၶဝ်ဢိူၺ်း၊ မၢၵ်ႇႁိၼ်မၢၵ်ႇၽႃ ဢၼ်ပဵၼ်ငဝ်ႈႁၢၵ်ႈလိၼ်မိူင်း ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်း ဢမူႉတၢင်းဢၼ်ထႃႇဝရႃႉၽြႃး ထူပ်းတြႃးၼႆႉတႃႉ။ ထႃႇဝရႃႉၽြႃးမီးတီႈဢၼ် လီထူပ်းတြႃးၵၼ်တင်း ၵူၼ်းမဵဝ်းမၼ်းၸဝ်ႈတင်းလၢႆလႄႈ မၼ်းၸဝ်ႈ တၵ်းလၢတ်ႈၵၼ်ထဵင်ၵၼ်တင်း မဵဝ်းဢီႉသရေႇလႃႉဢေႃႈ။- 3ၵူၼ်းၵဝ်တင်းလၢႆ ၶဝ်ဢိူၺ်း၊ ၵဝ်ယၢမ်ႈႁဵတ်းၵႃႈသင် တီႈမႂ်းယဝ်ႉ။ ၵဝ်ယၢမ်ႈၼိၵ်ႈၸၢၵ်ႈငႅၼ်းသႄးမႂ်း ၸိူဝ်ႉၼင်ႇႁိုဝ်ယဝ်ႉ။ ၶၢမ်ႇသၢၵ်ႈသေႇ ယူႇၽၢႆႇၼိုင်ႈတင်းၵဝ်တႃႉ။- 4ၵဝ်ၼုၵ်ႈဢဝ်မႂ်း ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉမႃးလႄႈ ထုတ်ႇဢဝ်မႂ်း ဢွၵ်ႇသေၵႃႈၼႂ်း တီႈဢၼ်ၶၢမ်ႇႁဵတ်းၶႃႈၼၼ်ႉ မႃးယဝ်ႉယဝ်ႉ။ ၵဝ်ဢဝ်မူဝ်းသေႇ၊ ဢႃႇရုၼ်ႇ တင်းမီႉရီႉဢၢမ်ႇၸိူဝ်းၼၼ်ႉ ပွႆႇၸႂ်ႉဢွၼ်ႁူဝ်မႂ်းယဝ်ႉယဝ်ႉ။- 5ၵူၼ်းၵဝ်တင်းလၢႆ ၶဝ်ဢိူၺ်း၊ ၶုၵ်းၸႂ်လႆႈ ၶႆႈၸႂ်ထူပ်းလွင်ႈတၢင်းဢၼ်ပႃႇလၵ်ႈ၊ ၶုၼ်လူင်မေႃႇၽႃႉ တိူင်ႇပၢင်ႇ လၢတ်ႈၸႃၵၼ်ၼၼ်ႉ ဢိၵ်ႇတင်းၵႂၢမ်းဢၼ်ပႃႇလၢမ်ႇ လုၵ်ႈၸၢႆးပေႃးရႃႉ ၶိုၼ်းလၢတ်ႈတီႈမၼ်းၼၼ်ႉ တင်းလွင်ႈတၢင်းဢၼ် ပဵၼ်မႃးၼႂ်း ၸူဝ်ႈဢၼ်ဢဝ်ၵႃႈတီႈ ၸႃႉၸဵမ်ဝဵင်းသိတ်ႇတိမ်ႇ တေႃႇထိုင်ႁွတ်ႈဝဵင်းၵီႉလႃႉၵႃႇလႃႉၼၼ်ႉ ႁႂ်ႈသူလႆႈႁူႉၸႅင်ႈ တၢင်းဢၼ်သိုဝ်ႈတေႃႇ ထႃႇဝရႃႉၽြႃးၸိူဝ်းၼၼ်ႉတႃႉ။

6ၵဝ်တၵ်းလႆႈပႃးဢဝ် ၵႃႈသင်သေလႄႈ သုတ်ႉၸပ်းသုတ်ႉၸူး ၵႃႈတီႈၽၢႆႇၼႃႈ ထႃႇဝရႃႉၽြႃးလႄႈ ၶုပ်ႉမူပ်ႇၵူဝ်းၵႂၢႆႇ ၵႃႈတီႈၽၢႆႇၼႃႈ ၽြႃးဢၼ်သုင်ၼႃႇသေပိူၼ်ႈၼၼ်ႉ။ တၵ်းလႆႈပႃးဢဝ်ယိတ်ႈ ဢၼ်တုတ်ႇၽႆး ဢိၵ်ႇတင်းဝူဝ်းဢွၼ်ႇ ဢၼ်ၶွပ်ႈၶူပ်ႇတင်းလၢႆ သေလႄႈ သုတ်ႉၸပ်းသုတ်ႉၸူးၵႃႈတီႈၽၢႆႇၼႃႈ မၼ်းၸဝ်ႈႁိုဝ်။- 7ထႃႇဝရႃႉၽြႃး တၵ်းထုၵ်ႇၸႂ်ၵျိူၵ်ႈၸႂ် သူဝ်းပေႃႈပဵၼ်ႁဵင်ပဵၼ်ႁဵင် ဢိၵ်ႇတင်းႁွင်ႈၵႄးၼမ်ႉမၼ်း ပဵၼ်မိုၼ်ႇပဵၼ်မိုၼ်ႇၼၼ်ႉႁိုဝ်။ ၵဝ်တၵ်းလႆႈဢဝ် လုၵ်ႈၸၢႆးတူၼ်ႈၵဝ် ပုၵ်ႈၸေႃႇ ပုၼ်ႈဢၼ်ၵဝ် ပူၼ်ႉလိူဝ်ၼၼ်ႉလႄႈ ဢဝ်မၢၵ်ႇတွင်ႉၵဝ်ပုၵ်ႈၸေႃႇ ပုၼ်ႈဢပႅတ်ႈၸႂ်ဝီႉၺိၺ်ႇၵဝ်ၼၼ်ႉႁိုဝ်။- 8ၵူၼ်းဢိူၺ်း၊ မၼ်းၸဝ်ႈၼႄပျႃး လွင်ႈတၢင်းဢၼ်လီဢၼ်ငၢမ်းတီႈမႂ်းယဝ်ႉယဝ်ႉ။ ၼွၵ်ႈသေတၢင်းဢၼ်ႁဵတ်းၸွမ်းၼင်ႇတြႃး၊ တၢင်းဢၼ်ထုၵ်ႇၸႂ်ၵျိူၵ်ႈၸႂ်ၵရူႉၼႃႇ၊ တၢင်းဢၼ်မီးၸႂ် ဢၼ်ၶျႃးတႅမ်ႇသေလႄႈ ၵႂႃႇမႃးယူႇၵႃႈတီႈၽၢႆႇၼႃႈ ၽြႃးပဵၼ်ၸဝ်ႈမႂ်းၼၼ်ႉ၊ ထႃႇဝရႃႉၽြႃး ယင်းယွၼ်းဢဝ်ၵႃႈသင်လူးၵွၼ်ႇ။

ဢပႅတ်ႈမဵဝ်းဢီႉသရေႇလႃႉလႄႈတၢင်းဢၼ်ပၼ်တၢမ်ႇ

9ၼုၵ်ႈၵပၢတ်ႈထႃႇဝရႃႉၽြႃး သႅၼ်ႇႁွင်ႉၸူးၵႃႈတီႈဝဵင်းယူႇလႄႈ ၵေႃႉဢၼ်မီးပိင်ႇၺႃႇၼၼ်ႉ တၵ်းရူဝ်ႇသေႇၵူဝ်ယမ် ၼႃႇမႃႉၸိုဝ်ႈသဵင်မၼ်းၸဝ်ႈဢေႃႈ။ ဢွၼ်ၵၼ်ထွမ်ႇငိၼ်းၶွၼ်ႉဝၢႆ ဢၼ်သင်ႇသွၼ်သုင်းမႃႉၼၼ်ႉ ဢိၵ်ႇတင်းလွင်ႈဢၼ်ၽူႈလႂ် ဢဝ်မၼ်းၸီႇယၢင်ႇၼၼ်ႉတႃႉ။- 10ၵႃႈၼႂ်းႁိူၼ်းၶဝ်ၸိူဝ်းဢၼ်ဢမ်ႇတြႃးၼၼ်ႉ ယင်းမီးဢုၵ်ႉၸႃႇၸေးၸိမ်ႇဢၼ်ဢမ်ႇတြႃး ဢိၵ်ႇတင်းၵွၵ်းတူင်ဢၼ်လဵၵ်ႉဢၼ်ဢွၼ်ႇ ဢၼ်လီႁင်ႈဢဵတ်ႇသဵတ်ႇၼၼ်ႉလူးၵွၼ်ႇႁိုဝ်။- 11ၵဝ်မီးယႃႇၸူႇဢၼ်ဢမ်ႇတြႃး ဢိၵ်ႇတင်း ထူင်ဢၼ်သႂ်ႇလုၵ်ႈ ၶၼ်ဢၼ်ၵူတ်ႉဢၼ်လိင်ႇၸိူဝ်းၼၼ်ႉယူႇသေလႄႈ တၵ်းပဵၼ်ၵေႃႉဢၼ်မူတ်းသႂ်လႆႈႁိုဝ်။- 12သထေးၵူၼ်းဝဵင်းၸိူဝ်းၼၼ်ႉ ၸၢင်ႈႁဵတ်းဢႃႉထမ်ႇမႃႉလႄႈ ၶဝ်ၸိူဝ်းဢၼ် ယူႇၵႃႈၼႂ်းဝဵင်းၼၼ်ႉ ၸၢင်ႈသုင်းသွင်ႇမူႉသႃႇယူႇသေလႄႈ လိၼ်ႉဢၼ်မီး ၵႃႈၼႂ်းသူပ်းၶဝ်ၼၼ်ႉ ၸၢင်ႈပႅတ်ႉၸၢင်ႈလႅၼ်ဢေႃႈ။- 13ပိူဝ်ႈၼႆၸင်ႇ၊ ၵဝ်တၵ်းပၼ်တၢမ်ႇ ဢၼ်ၸဵပ်းဢၼ်သႅပ်ႇ ၼႃႇလူင်လၢင်တီႈမႂ်း ႁႂ်ႈမႂ်းလႆႈၶၢမ်ႇတၢင်းဢၼ် ပႄႇၽဵဝ်ႈပႅတ်ႈ ၵွပ်ႈပိူဝ်ႈဢပႅတ်ႈမႂ်းဢေႃႈ။- 14မႂ်းၵိၼ်လႄႈ ဢမ်ႇလႆႈဢိမ်ႇလႆႈတဵမ်။ တၢင်းဢၼ်ၶျႃးမႂ်းတူၵ်း တီႈတႅမ်ႇၼၼ်ႉ တၵ်းလႆႈမီးၵႃႈၼႂ်းမႂ်းဢေႃႈ။ မႂ်းဢဝ်ၵႂႃႇလႄႈ ဢမ်ႇလႆႈ ၵႄႇသႄႇဢဝ်လွတ်ႈ။ လွင်ႈတၢင်းဢၼ်မႂ်းၵႄႇသႄႇဢဝ်လွတ်ႈၼၼ်ႉၵေႃႈ ၵဝ်တၵ်းဢဝ်ဢၢပ်ႈပၼ် တီႈၽေးလၢပ်ႇၽေးလႅဝ်းဢေႃႈ။- 15မႂ်းဝၢၼ်ႇၸိူဝ်ႉဝၢၼ်ႇၽၼ်းလႄႈ ဢမ်ႇလႆႈပၢတ်ႇဢဝ်ထိူဝ်ဢဝ်။ မႂ်းယဵပ်ႇၼူတ်ႈမၢၵ်ႇသၢၼ်ႇလုၼ်ႇလႄႈ ဢမ်ႇလႆႈဢဝ်ၼမ်ႉမၼ်းၼၼ်ႉ လုပ်ႈတႃးတူဝ်မႂ်း။ မႂ်းယဵပ်ႇၼူတ်ႈမၢၵ်ႇၸပိတ်ႈလႄႈ ဢမ်ႇလႆႈသူတ်ႉၵိၼ်ၼမ်ႉၸပိတ်ႈၼၼ်ႉ။- 16လွင်ႈမၼ်းၸမ်ႉ မႂ်းၸၢင်ႈပႂ်ႉၵမ် ပႂ်ႉၸွမ်းထုင်းၽိင်ႈတၢင်းဢၼ် ၶုၼ်ဢေႃးမရီႉ ၸီႇယၢင်ႇဝႆႉၸိူဝ်းၼၼ်ႉ ဢိၵ်ႇတင်းတၢင်းၵမ်တၢင်းၵျၢင်ႉဢၼ်မဵဝ်းၶုၼ်ဢႃႇႁပ်ႉ ၵမ်ၵျၢင်ႉ ၵႃႈမီးၼၼ်ႉလႄႈ ၸွမ်းၵႂႃႇၵႃႈၼႂ်း သဵၼ်ႈတၢင်းဢၼ်ၶဝ်တိုၵ်းယူင်းၸူဝ်းဢဝ်ၸိူဝ်းၼၼ်ႉဢေႃႈ။ ပိူဝ်ႈၼႆလႄႈ ၵဝ်တၵ်းႁႂ်ႈ မႂ်းပဵၼ်တီႈဢၼ်သဵတ်ႇၵူၼ်းယဵၼ်ၵူၼ်းလႄႈ ႁႂ်ႈၵူၼ်းဝဵင်းၸိူဝ်းၼၼ်ႉ ပဵၼ်တီႈဢၼ်ႁဵတ်းသဵင်သီႉသီႉသေႃႉသေႃႉတေႃႇသေလႄႈ၊ မႂ်းတၵ်းလႆႈၶၢမ်ႇတၢင်းဢၼ် ၵူၼ်းၵဝ်တင်းလၢႆ သႄႉသွမ်းဢေႃႈ။

Currently Selected:

မီႉၶႃႇ 6: CBMS

Highlight

Copy