မၢတ်ႈထႄႇ 26
26
လွင်ႈၵျၢမ်ႇပွင်ဢဝ်ၸဝ်ႈယေႇသူႉတၢႆ
(တူၺ်း၊ မႃႇ 14:1-2။ လူႉ 22:1-2။ ယူဝ်း 11:45-53)
1 ယေႇသူႉႁေႃးလၢတ်ႈတေႇသၼႃႇၼၼ်ႉတင်းသဵင်ႈတင်းမူတ်းသေယဝ်ႉ၊ လၢတ်ႈတီႈတပႄးၸဝ်ႈတင်းလၢႆလႄႈဝႃႈ၊- 2သူႁူႉလွင်ႈဢၼ် ပေႃးပူၼ်ႉသေသွင်ဝၼ်းယဝ်ႉၸိုင်၊ ဝၼ်းပွႆးပႃႉသၶႃႇတၵ်းႁွတ်ႈမႃးၼၼ်ႉယူႇဢေႃႈ။ မိူဝ်ႈၼၼ်ႉ လုၵ်ႈၵူၼ်းတၵ်းၶၢမ်ႇတၢင်းဢၼ်ဢၢပ်ႈ ႁႂ်ႈလႆႈၶၢမ်ႇတၢင်းဢၼ်ဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈဢေႃႈ၊ ဝႃႈၼင်ႇၼႆဢေႃႈ။
3မိူဝ်ႈၼၼ်ႉ ယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ ၸူႉၵၼ်တုမ်ၵၼ်ၵႃႈၼႂ်းတလၢင်း ဢၼ်မီးၵႄႈႁိူၼ်းၶုၼ်ယိတ်ႈပရေႃးႁဵၵ်ႈ ဢၼ်လႆႈႁွင်ႉႁဵၵ်ႈၸိုဝ်ႈ ၵႃႇယၽႃႉၼၼ်ႉယဝ်ႉၸင်ႇ၊- 4တိူင်ႇပၢင်ႇၵၼ် ႁႂ်ႈလႆႈႁဵတ်းတင်းပရီႉယႄႇ တီႉဢဝ်ယေႇသူႉသေလႄႈ ဢဝ်တၢႆဢေႃႈ။- 5ၼႂ်းဝႃႈၼၼ်သေၵေႃႈ ၶဝ်ၼၼ်ႉလၢတ်ႈၵၼ်လႄႈဝႃႈ၊ ၵူဝ်ၵူၼ်းတင်းလၢႆတၵ်းတူင်ႉတၵ်းတိုၼ်ႇလႄႈ၊ ၼႂ်းဝၼ်းပွႆးၼႆႉၸိုင် ယႃႇပေၽူမ်ႈႁဵတ်းလူးၵွၼ်ႇ၊ ဝႃႈၼင်ႇၼႆဢေႃႈ။
ဢဝ်ၼမ်ႉမၼ်းႁွမ်သွၼ်းလေႃႇၸဝ်ႈယေႇသူႉ
(တူၺ်း၊ မႃႇ 14:3-9။ ယူဝ်း 12:1-8)
6ၼႂ်းမိူဝ်ႈဢၼ်ယေႇသူႉ မီးယူႇၼႂ်းဝၢၼ်ႈပေႇထၼီႉ တီႈႁိူၼ်းၵူၼ်းတုတ်ႈဢၼ်လႆႈၸိုဝ်ႈ သီႉမုၼ်ႇၼၼ်ႉယူႇၼၼ်ႉၸိုင်၊- 7မႄႈယိင်းၵေႃႉၼိုင်ႈ ဢဝ်တဝ်ႈၼမ်ႉမၼ်းႁွမ်လုၵ်ႈၼိုင်ႈ ဢၼ်ပဵၼ်မၢၵ်ႇႁိၼ်ၽိူၵ်ႇ ဢၼ်ထိူၵ်ႈၵႃႈယႂ်ႇၼႃႇၼၼ်ႉ မႃးတီႈမၼ်းၸဝ်ႈလႄႈ ဢဝ်ထွၵ်ႇသႂ်ႇၵႃႈၼိူဝ်ႁူဝ်မၼ်းၸဝ်ႈၼႂ်းမိူဝ်ႈဢၼ်မၼ်းၸဝ်ႈဢိင်ယူႇၵႃႈႁိမ်း ၶူင်ႇတီႈၵိၼ်ၼၼ်ႉဢေႃႈ။- 8တပႄးၸဝ်ႈတင်းလၢႆႁၼ်သေယဝ်ႉ၊ ၸႂ်မႆႈၶႆႈၸႃႉၼႃႇလူင်လၢင်လႄႈလၢတ်ႈဝႃႈ၊ ႁဵတ်းႁိုဝ်လႄႈ ႁႂ်ႈသုမ်းပႅတ်ႈလၢႆလၢႆၼင်ႇႁိုဝ်။- 9ၼမ်ႉမၼ်းႁွမ်ၼႆႉ ထုၵ်ႇလီၶၢႆဢဝ်တင်းၵႃႈမၼ်းၶၼ်မၼ်းဢၼ်ယႂ်ႇၼႃႇသေလႄႈ ပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်တင်းလၢႆၼၼ်ႉဢေႃႈ၊ ဝႃႈၼင်ႇၼႆဢေႃႈ။- 10ယေႇသူႉႁူႉႁၼ်သေယဝ်ႉ၊ လၢတ်ႈလႄႈဝႃႈ ႁဵတ်းသင်လႄႈသူယႃႉယူၵ်ႉမႄႈယိင်းၼႆႉၼင်ႇႁိုဝ်။ မၼ်းႁဵတ်းလွင်ႈတၢင်းဢၼ်လီဢၼ်ငၢမ်းတီႈၵဝ်ယဝ်ႉ။- 11ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉ မီးယူႇတီႈသူတႃႇသေႇဢေႃႈ။ ၵဝ်ၸမ်ႉ၊ မီးယူႇတီႈသူတႃႇသေႇဢမ်ႇၸႂ်ႈ။- 12လွင်ႈဢၼ်မၼ်းထွၵ်ႇၼမ်ႉမၼ်းႁွမ်သႂ်ႇၵႃႈၼိူဝ်တူဝ်ၵဝ်ၼႆႉၸမ်ႉ၊ မၼ်းႁဵတ်းႁႂ်ႈလႆႈမႄးႁႅၼ်းဝႆႉ ပုၼ်ႈဢၼ်တၵ်းသၢင်းၵျူဝ်ႇၵဝ်ၼၼ်ႉဢေႃႈ။- 13ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵႃႈတီႈဢၼ်ႁေႃးလၢတ်ႈတြႃးသတၢင်းသိူဝ်းပျေႃႇ ၵႃႈၼိူဝ်လိၼ်မိူင်း ၵူႈတီႈၵူႈလႅၼ်ၼၼ်ႉ၊ တၵ်းလႆႈမွၵ်ႇလၢတ်ႈလွင်ႈဢၼ်မၼ်းႁဵတ်းၼႆႉ ပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်းမၼ်းဢေႃႈ၊ ဝႃႈၼင်ႇၼႆဢေႃႈ။
ယူႉတႃႉဢီႉသၵႃႇရေႇဢုတ်ႈၶၢႆၸဝ်ႈယေႇသူႉ
(တူၺ်း၊ မႃႇ 14:10-11။ လူႉ 22:3-6)
14မိူဝ်ႈၼၼ်ႉ ဢၼ်ပဵၼ်ၼႂ်းသိပ်းသွင်ပႃး ဢၼ်လႆႈႁွင်ႉႁဵၵ်ႈၸိုဝ်ႈ ယူႉတႃႉဢီႉသၵႃႇရေႇဢုတ်ႈၵေႃႉၼိုင်ႈၼၼ်ႉ ၵႂႃႇၵႃႈတီႈယိတ်ႈပရေႃးႁဵၵ်ႈလူင်တင်းလၢႆသေလႄႈ၊- 15လဝ်ႊလၢတ်ႈလႄႈဝႃႈ၊ ပေႃးၵဝ်ၶႃႈဢဝ်မၼ်းၸဝ်ႈဢၢပ်ႈပၼ်ၼႂ်းမိုဝ်းသူၸဝ်ႈၸိုင်၊ သူၸဝ်ႈတၵ်းပၼ်ၵႃႈႁိုဝ်ၶႃႈ၊ ဝႃႈၼင်ႇၼႆသေယဝ်ႉ၊ ၶဝ်ၼၼ်ႉၸင်ႈႁိဝ်ႈပၼ်ငိုၼ်းသၢမ်သိပ်းၵျၢပ်ႈဢေႃႈ။- 16ၸႃႉၸဵမ်မိူဝ်ႈၼၼ်ႉလႄႈ၊ မၼ်းႁႃၶိင်ႇၵႃႇလႃႉ ဢၼ်ထုၵ်ႇႁႂ်ႈလႆႈဢဝ်မၼ်းၸဝ်ႈဢၢပ်ႈယူႇဢေႃႈ။
ၸဝ်ႈယေႇသူႉၵိၼ်ပွႆးပႃႉသၶႃႇတင်းတပႄးၸဝ်ႈ
(တူၺ်း၊ မႃႇ 14:12-21။ လူႉ 22:7-14၊21-23။ ယူဝ်း 13:21-30)
17ဝၼ်းပထမႃႉ ပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉ၊ တပႄးၸဝ်ႈတင်းလၢႆ သုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈလဝ်ႊထၢမ်လႄႈဝႃႈ၊ ၸဝ်ႈႁဝ်းမီးဢလူဝ်ႇၶႂ်ႈႁႂ်ႈႁဝ်းၶႃႈမႄးႁႅၼ်းဝႆႉ ပုၼ်ႈဢၼ်ၸဝ်ႈႁဝ်း တၵ်းလႆႈၵိၼ်ပွႆး ပႃႉသၶႃႇၼၼ်ႉ ၵႃႈတီႈလႂ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 18မၼ်းၸဝ်ႈၵေႃႈလၢတ်ႈလႄႈဝႃႈ ၵႂႃႇၵႃႈၼႂ်းဝဵင်းၸူးၵႃႈတီႈႁိူၼ်းၵေႃႉၼိုင်ႈလႄႈ လၢတ်ႈတီႈၵေႃႉၼၼ်ႉလႄႈဝႃႈ သြႃႇသင်ႇလၢတ်ႈလႄႈဝႃႈ၊ ၶိင်ႇၵဝ်ၸမ်မႃးယဝ်ႉ။ ၵဝ်ဢိၵ်ႇတင်း တပႄးၵဝ်တင်းလၢႆ တၵ်းၶၢမ်ႇပွႆးပႃႉသၶႃႇ ၵႃႈတီႈၼႂ်းႁိူၼ်းမႂ်းၼႆႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 19တပႄးၸဝ်ႈၸိူဝ်းၼၼ်ႉ ႁဵတ်းၸွမ်းၼင်ႇဢၼ်မၼ်းၸဝ်ႈၸီႇယၢင်ႇၼၼ်ႉလႄႈ မႄးႁႅၼ်းပွႆးပႃႉသၶႃႇဝႆႉဢေႃႈ။
20မိူဝ်ႈဢၼ်ႁွတ်ႈထိုင်ၶိင်ႇႁူဝ်ၶမ်ႈၸိုင်၊ မၼ်းၸဝ်ႈဢိၵ်ႇတင်းတပႄးၸဝ်ႈသိပ်းသွင်ပႃး ဢိင်ယူႇၵႃႈႁိမ်းၶူင်ႇတီႈၵိၼ်ဢေႃႈ။- 21ၼႂ်းမိူဝ်ႈဢၼ်ၶဝ်ယင်းတိုၵ်ႉၵိၼ်ယူႇၼၼ်ႉၸိုင်၊ မၼ်းၸဝ်ႈလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၼႂ်းသူၼႆႉၵေႃႉၼိုင်ႈ တၵ်းဢဝ်ၵဝ်ဢၢပ်ႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 22ၶဝ်ၼၼ်ႉ ၸႂ်လဵၵ်ႉၸႂ်ဢူၼ်ႈၼႃႇလူင်လၢင်လႄႈ ႁင်းၽႂ်ႁင်းမၼ်း လဝ်ႊထၢမ်လႄႈဝႃႈ၊ ၸဝ်ႈႁဝ်း၊ ပဵၼ်ၵဝ်ၶႃႈ ၶႃႈႁိုဝ်။ ဝႃႈၼင်ႇၼႆဢေႃႈ။- 23မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ ၵေႃႉဢၼ်ဢဝ်မိုဝ်းၸူၵ်းၵႃႈၼႂ်းဝၢၼ်ႇႁူမ်ႈၵၼ်တင်းၵဝ်ၼၼ်ႉ တၵ်းဢဝ်ၵဝ်ဢၢပ်ႈဢေႃႈ။- 24လုၵ်ႈၵူၼ်း တၵ်းလႆႈၵႂႃႇၵႃႈၼင်ႇဢၼ်မႃးၼႂ်းၵျၢမ်းလိၵ်ႈၼၼ်ႉဢေႃႈ။- 25ၼႂ်းဝႃႈၼၼ်သေၵေႃႈ ၵေႃႉဢၼ်ဢဝ်လုၵ်ႈၵူၼ်းဢၢပ်ႈၼၼ်ႉ မီးဢႃႉမင်ႇၵလႃႇဢေႃႈ။ ပေႃးၵေႃႉၼၼ်ႉ ဢမ်ႇလႆႈၶၢမ်ႇတၢင်းဢၼ်ၵိူတ်ႇလဵင်ႉမႃးၸိုင်၊ ယဵင်ႈၶႅၼ်းတၵ်းလီဢေႃႈ၊ ဝႃႈၼင်ႇၼႆဢေႃႈ။ ယူႉတႃႉဢီႉသၵႃႇရေႇဢုတ်ႈ ဢၼ်တၵ်းဢဝ်မၼ်းၸဝ်ႈဢၢပ်ႈၼၼ်ႉၵေႃႈ လဝ်ႊထၢမ်လႄႈဝႃႈ၊ ၸဝ်ႈႁဝ်း ပဵၼ်ၵဝ်ၶႃႈ ၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈလၢတ်ႈလႄႈဝႃႈ၊ မႅၼ်ႈၼင်ႇဢၼ်မႂ်းလၢတ်ႈၼႆႉယဝ်ႉ၊ ဝႃႈၼင်ႇၼႆဢေႃႈ။
တၢင်းဢၼ်ၵိၼ်ပွႆးၸဝ်ႈ
(တူၺ်း၊ မႃႇ 14:22-26။ လူႉ 22:14-20။ 1 ၵေႃး 11:23-25)
26ၼႂ်းမိူဝ်ႈဢၼ်ၶဝ်ယင်းတိုၵ်ႉၵိၼ်ယူႇၼၼ်ႉၸိုင်၊ ယေႇသူႉဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇ၊ ဝိတ်းၶဝ်ႈမုၼ်းပၼ်တီႈတပႄးၸဝ်ႈတင်းလၢႆလႄႈဝႃႈ၊ ၶဝ်ႈမုၼ်းၼႆႉၸမ်ႉ၊ ပဵၼ်တူဝ်ၵဝ်ဢေႃႈ။ ဢွၼ်ၵၼ်ဢဝ်လႄႈၵိၼ်တႃႉ၊ ဝႃႈၼင်ႇၼႆဢေႃႈ။- 27ၵွၵ်းၵေႃႈ မၼ်းၸဝ်ႈဢဝ်လႄႈယွင်ႈယေႃးၵျေးၸူးၸဝ်ႈယဝ်ႉၸင်ႇ၊ ပၼ်တီႈၶဝ်ၼၼ်ႉလႄႈဝႃႈ၊ သူၵႃႈမီးတင်းသဵင်ႈတင်းလူင်ဢွၼ်ၵၼ်ၵိၼ်တႃႉ။- 28ၵွၵ်းၼႆႉၸမ်ႉ၊ ပဵၼ်လိူတ်ႈၵဝ်ဢၼ်ၸၢပ်ႈသႅင်ႇၵၼ်တင်းပတီႉၺိၺ်ႇတြႃးဢၼ်မႂ်ႇလႄႈ သွၼ်းလေႃႇပုၼ်ႈလွင်ႈၼင်ႇႁိုဝ် တၵ်းလႆႈပွႆႇလွတ်ႈဢပႅတ်ႈၵူၼ်းၼမ်ၼႃႇဢေႃႈ။- 29ၵဝ်ဝႃႈတီႈသူၸမ်ႉ၊ ၵဝ်တၵ်းဢမ်ႇၵိၼ်ၼမ်ႉမၢၵ်ႇၸပိတ်ႈၼႆႉ ၸႃႉၸဵမ်တေႃႈလဵဝ်ၼႆႉလႄႈ တေႃႇထိုင်ႁွတ်ႈဝၼ်းဢၼ်ၵဝ်တၵ်းၵိၼ်မဵဝ်းဢၼ်မႂ်ႇလူၺ်ႈၵၼ်တင်းသူ ၼႂ်းမိူင်းပေႃႈၵဝ်ပုၼ်ႉဢေႃႈ၊ ဝႃႈၼင်ႇၼႆဢေႃႈ။- 30လိုၼ်းၼၼ်ႉ ၶဝ်ႁဵတ်းၵႂၢမ်းယဝ်ႉၸင်ႇ၊ ဢွၵ်ႇၵႂႃႇၸူးၵႃႈတီႈလွႆသၢၼ်ႇလုၼ်ႇပုၼ်ႉသေဢေႃႈ။
ၸဝ်ႈယေႇသူႉႁေႃးလွင်ႈပေႇတရူႉတေထဵင်ပႅတ်ႈ
(တူၺ်း၊ မႃႇ 14:27-31။ လူႉ 22:31-34။ ယူဝ်း 13:36-38)
31မိူဝ်ႈၼၼ်ႉ ယေႇသူႉလၢတ်ႈလႄႈဝႃႈ၊ ၼႂ်းၶိုၼ်းၼႆႉ၊ သူၵႃႈမီးတင်းသဵင်ႈတင်းလူင် ၸႂ်တၵ်းလူႉၵွပ်ႈပိူဝ်ႈၵဝ်ဢေႃႈ။ လွင်ႈဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈၸမ်ႉ၊ ၵဝ်တၵ်းပေႃႉယႅၼ်ႉၵေႃႉဢၼ်လဵင်ႉဢၼ်ထိင်းသူဝ်းၼၼ်ႉတၢႆလႄႈ သူဝ်းတင်းလၢႆၼၼ်ႉ တၵ်းလႆႈၽၢတ်ႇၽႄၵၼ်ဢေႃႈ၊ ဝႃႈၼႆ၊ မီးမႃးၼင်ႇၼႆဢေႃႈ။- 32ၼႂ်းဝႃႈၼၼ်သေၵေႃႈ ၵဝ်လုၵ်ႉၶိုၼ်းယဝ်ႉၸင်ႇ၊ တၵ်းၵႂႃႇၵႃႈတီႈမိူင်း ၵႃႇလီႉလႄးပုၼ်ႉ ဢွၼ်တၢင်းသူဢေႃႈ၊ ဝႃႈၼင်ႇၼႆဢေႃႈ။- 33ပေႇတရူႉၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ ၵွပ်ႈပိူဝ်ႈၸဝ်ႈႁဝ်းလႄႈ ပိၵ်ႉသမ်ႉၶဝ်ၸိူဝ်းၼႆႉတင်းသဵင်ႈတင်းလူင် ၸႂ်တၵ်းလူႉသေၵေႃႈ၊ ၵဝ်ၶႃႈၸႂ်တၵ်းဢမ်ႇလူႉသေဢိတ်းၶႃႈ၊ ဝႃႈၼင်ႇၼႆဢေႃႈ။- 34ယေႇသူႉၵေႃႈလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၼႂ်းၶိုၼ်းၼႆႉၸူဝ်ႈဢၼ်ၵႆႇဢမ်ႇပႆႇၶၼ်ၼၼ်ႉၸိုင် မႂ်းတၵ်းထဵင်ပႅတ်ႈၵဝ် ထူၼ်ႈထိုင်သၢမ်ပွၵ်ႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 35ပေႇတရူႉၵေႃႈ လဝ်ႊလၢတ်ႈလႄႈဝႃႈ၊ ပိၵ်ႉသမ်ႉၵဝ်ၶႃႈလႆႈတၢႆလူၺ်ႈၵၼ်တင်းၸဝ်ႈႁဝ်းသေၵေႃႈ၊ ၵဝ်ၶႃႈတၵ်းဢမ်ႇထဵင်ပႅတ်ႈၸဝ်ႈႁဝ်းၶႃႈ၊ ဝႃႈၼင်ႇၼႆဢေႃႈ။ တပႄးၸဝ်ႈတင်းသဵင်ႈတင်းလူင်ၵေႃႈ၊ လဝ်ႊလၢတ်ႈမိူၼ်မိူၼ်ၵၼ်ဢေႃႈ။
ၸဝ်ႈယေႇသူႉသူးတွင်းၼႂ်းသူၼ်ၵေႇသႃႉသေႇမၼီႉ
(တူၺ်း၊ မႃႇ 14:32-42။ လူႉ 22:39-46)
36 ယေႇသူႉ ဢိၵ်ႇတင်းၶဝ်ၼၼ်ႉ ႁွတ်ႈထိုင်ၵႃႈတီႈဢၼ်လႆႈႁွင်ႉႁဵၵ်ႈ ၵေႇသႃႉသေႇမၼီႉၼၼ်ႉယဝ်ႉၸင်ႇ၊ လၢတ်ႈတီႈတပႄးၸဝ်ႈတင်းလၢႆလႄႈဝႃႈ၊ ၼႂ်းမိူဝ်ႈဢၼ်ၵဝ်ၵႂႃႇၵႃႈတီႈပုၼ်ႉလႄႈ သူးတွင်းယူႇၼၼ်ႉၸိုင်၊ ၼင်ႈယူႇၵႃႈတီႈၼႆႈတႃႉ၊ ဝႃႈၼင်ႇၼႆသေယဝ်ႉ၊- 37ႁွင်ႉဢဝ်ပေႇတရူႉ တင်းလုၵ်ႈၸေႇပေႇတႄး သွင်ၵေႃႉၵႂႃႇလႄႈ မၼ်းၸဝ်ႈႁွတ်ႈထိုင်တၢင်းဢၼ်မႆႈၸႂ်ၶီၸႂ်၊ တၢင်းဢၼ်ယၢပ်ႇၸႂ်ၵိၼ်းၸႂ်ၼႃႇလူင်လၢင်ဢေႃႈ။- 38မိူဝ်ႈၼၼ်ႉ မၼ်းၸဝ်ႈၵေႃႈလၢတ်ႈတီႈၶဝ်လႄႈဝႃႈ၊ ၵဝ်ၼႆႉႁူဝ်ၸႂ်လဵၵ်ႉၼႃႇ ထၼ်ႈပေႃးၸမ်တၵ်းတၢႆဢေႃႈ၊ ယူႇၵႃႈတီႈၼႆႈလႄႈပႂ်ႉထႃႈယူႇလူၺ်ႈၵၼ်တင်းၵဝ်တႃႉ၊ ဝႃႈၼင်ႇၼႆဢေႃႈ။- 39မၼ်းၸဝ်ႈပူၼ်ႉသေၵႃႈတီႈၼၼ်ႈ ဢိတ်းဢွၼ်ႇၼိုင်ႈသေယဝ်ႉ၊ ၶုပ်ႉမူပ်ႇလႄႈသူးတွင်းဝႃႈ၊ ဢူဝ်းပေႃႈၵဝ်ၶႃႈ၊ ပေႃးၵွၵ်းဢၼ်ၼႆႉပိူင်ႈသေၵဝ်ၶႃႈလႆႈၸိုင်၊ ႁႂ်ႈပိူင်ႈသေၵမ်းတီႈၶႃႈ၊ ၼႂ်းဝႃႈၼၼ်သေၵေႃႈ ယႃႇႁႂ်ႈပဵၼ်ၵႃႈၼင်ႇဢလူဝ်ႇၵဝ်ၶႃႈမီးသေၵမ်းတီႈၶႃႈ၊ ႁႂ်ႈပဵၼ်ၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးသေၵမ်းတီႈၶႃႈ၊ ဝႃႈၼင်ႇၼႆဢေႃႈ။- 40မၼ်းၸဝ်ႈၶိုၼ်းမႃးၵႃႈတီႈတပႄးၸဝ်ႈၸိူဝ်းၼၼ်ႉလႄႈ ထူပ်းႁၼ်ၶဝ်ၼွၼ်းလပ်းယူႇသေယဝ်ႉ၊ လၢတ်ႈတီႈပေႇတရူႉလႄႈဝႃႈ၊ ၼင်ႇႁိုဝ်တၵ်းလႆႈပႂ်ႉယူႇလူၺ်ႈၵၼ်တင်းၵဝ်သေၼႃႇရီႇၼိုင်ႈၵူၺ်းၸိုင်၊ သူဢမ်ႇတၢတ်ႈၼိူင်ႇလႆႈႁိုဝ်။- 41လွင်ႈၼင်ႇႁိုဝ်တၵ်းဢမ်ႇလႆႈၶၢမ်ႇတၢင်းဢၼ်ၸၢမ်းတူၺ်းယႃႉယူၵ်ႉၸိုင်၊ သူးတွင်းလႄႈပႂ်ႉထႃႈယူႇတႃႉ။ ပိၵ်ႉသမ်ႉၸႂ်ဝီႉၺိၺ်ႇမီးတင်းၸေႇတၼႃႇသေၵေႃႈ တူဝ်ၸမ်ႉ၊ ဢမ်ႇမီးႁႅင်း၊ ဝႃႈၼင်ႇၼႆယဝ်ႉၸင်ႇ၊- 42သမ်ႉၵႂႃႇထႅင်ႈၵမ်းၼိုင်ႈလႄႈသူးတွင်းလႄႈဝႃႈ၊ ဢူဝ်းပေႃႈၵဝ်ၶႃႈ၊ ပေႃးၵဝ်ၶႃႈဢမ်ႇၵိၼ်၊ ပေႃးၵွၵ်းၼႆႉဢမ်ႇပိူင်ႈသေၵဝ်ၶႃႈလႆႈၸိုင်၊ ႁႂ်ႈပဵၼ်ၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးသေၵမ်းတီႈၶႃႈ၊ ဝႃႈၼင်ႇၼႆဢေႃႈ။- 43လိုၼ်းၼၼ်ႉ မၼ်းၸဝ်ႈသမ်ႉၶိုၼ်းမႃး ၵႃႈတီႈဢၼ်ၶဝ်မီးၼၼ်ႉလႄႈ ထူပ်းႁၼ်ၶဝ်ၼွၼ်းလပ်းယူႇ ၵွပ်ႈပိူဝ်ႈဢၼ်မၢၵ်ႇတႃၶဝ် ၼၵ်းၼႃႇလူင်လၢင်ၼၼ်ႉသေယဝ်ႉ၊- 44ပႅတ်ႈဝႆႉၶဝ်လႄႈ သမ်ႉၵႂႃႇထႅင်ႈယဝ်ႉၸင်ႇ၊ ပွၵ်ႈတႃႉတီႉယႃႉၼႆႉၵေႃႈ သူးတွင်းၵႃႈၼင်ႇၵႂၢမ်းဢၼ်ဝႃႈ ၵမ်းဢွၼ်တၢင်းၼၼ်ႉဢေႃႈ။- 45လိုၼ်းၼၼ်ႉ မၼ်းၸဝ်ႈသမ်ႉၶိုၼ်းမႃးတီႈဢၼ် တပႄးၸဝ်ႈတင်းလၢႆ မီးၼၼ်ႉလႄႈလၢတ်ႈဝႃႈ၊ မိူဝ်ႈလဵဝ်ၼႆႉ၊ သူၼွၼ်းလပ်းလႄႈယူႇၼိမ်ၼိမ်တႃႉ။ တူၺ်းလူး၊ ၶိင်ႇၼႃႇရီႇၸမ်မႃးယဝ်ႉလႄႈ လုၵ်ႈၵူၼ်းတၵ်းလႆႈၶၢမ်ႇတၢင်းဢၼ် ဢၢပ်ႈၼႂ်းမိုဝ်းၵူၼ်းႁၢႆႉတင်းလၢႆဢေႃႈ။- 46ဢွၼ်ၵၼ်လုၵ်ႉတႃႉ။ ၵႂႃႇတႃႉႁဝ်း။ ၵေႃႉဢၼ်ဢဝ်ၵဝ်ဢၢပ်ႈၼၼ်ႉႁွတ်ႈမႃးယဝ်ႉ၊ ဝႃႈၼင်ႇၼႆဢေႃႈ။
လွင်ႈပိူၼ်ႈတီႉဢဝ်ၸဝ်ႈယေႇသူႉ
(တူၺ်း၊ မႃႇ 14:43-50။ လူႉ 22:47-53။ ယူဝ်း 18:3-12)
47ၼႂ်းမိူဝ်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼႆယူႇၼၼ်ႉၸိုင်၊ ယူႉတႃႉဢီႉသၵႃႇရေႇဢုတ်ႈ၊ ဢၼ်ပႃးၼႂ်းသိပ်းသွင်ပႃးၼၼ်ႉ မႃးဢေႃႈ။ ၵူၼ်းဢၼ်ၸူႉဢၼ်တုမ် ဢၼ်ယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ ပွႆႇၸႂ်ႉမႃးၸိူဝ်းၼၼ်ႉၵေႃႈ ၸွမ်းမၼ်းမႃးလႄႈ ပႃးတင်းၶွၼ်ႉတင်းလၢပ်ႇယူႇဢေႃႈ။- 48ၵေႃႉဢၼ်ဢဝ်မၼ်းၸဝ်ႈဢၢပ်ႈၼၼ်ႉ ႁဵတ်းတီႈမၢတ်ႈတီႈတွင်းဝႆႉတီႈၶဝ်လႄႈဝႃႈ၊ ၵေႃႉဢၼ်ၵဝ်ၼူမ်ၼၼ်ႉ ပဵၼ်မၼ်းဢေႃႈ။ တီႉဢဝ်မၼ်းတႃႉ၊ ဝႃႈၼႆ၊ ၵႃႈၼင်ႇဢၼ်ဝႃႈၼၼ်ႉ၊- 49သုတ်ႉၸပ်းသုတ်ႉၸူးတီႈယေႇသူႉ ၵမ်းလဵဝ်လႄႈဝႃႈ၊ ၸဝ်ႈႁဝ်း၊ ႁႂ်ႈမီးမင်ႇၵလႃႇသေၵမ်းၶႃႈ၊ ဝႃႈၼင်ႇၼႆသေလႄႈ ၼူမ်မၼ်းၸဝ်ႈဢေႃႈ။- 50ယေႇသူႉၵေႃႈထၢမ်လႄႈဝႃႈ၊ ပီႈၼွင်ႉဢိူၺ်း၊ ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈမႃး၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉမႃးလႄႈယိပ်းၵမ်တီႉဢဝ်မၼ်းၸဝ်ႈဢေႃႈ။
51မိူဝ်ႈၼၼ်ႉ ၵူၼ်းဢၼ်ပႃးလူၺ်ႈၵၼ်တင်းယေႇသူႉ ၵေႃႉၼိုင်ႈၼၼ်ႉ ယိုၼ်ႈမိုဝ်းလႄႈ ထွတ်ႇဢဝ်လၢပ်ႇမၼ်းဢွၵ်ႇယဝ်ႉၸင်ႇ၊ ၽၼ်းၶႃႈယိတ်ႈပရေႃးႁဵၵ်ႈၵေႃႉၼိုင်ႈလႄႈ ဝၢၼ်ႁူမၼ်းၶၢတ်ႇၵႂႃႇဢေႃႈ။- 52ယေႇသူႉၵေႃႈလၢတ်ႈလႄႈဝႃႈ၊ ဢဝ်လၢပ်ႇမႂ်းၼၼ်ႉ ၶိုၼ်းဝႆႉၼႂ်းတီႈမၼ်းသေ။ ၶဝ်ၸိူဝ်းဢၼ်ယိပ်းၵမ်လၢပ်ႇၵႃႈမီးတင်းသဵင်ႈတင်းလူင် တၵ်းႁွတ်ႈထိုင်တၢင်းလူႉတၢင်းလႅဝ်လူၺ်ႈလၢပ်ႇဢေႃႈ။- 53မႂ်းထၢင်ႇၵဝ်ဢမ်ႇတၢတ်ႈၼိူင်ႇလႆႈလွင်ႈဢၼ်ယွၼ်းဢဝ်တီႈပေႃႈၵဝ်လႄႈ မၼ်းၸဝ်ႈတၵ်းပွႆႇၸႂ်ႉတမၢၼ်ႇၵၢင်ႁၢဝ်သိပ်းသွင်တပ်ႉဢမ်ႇၵႃး မႃးၵႃႈတီႈၵဝ်မိူဝ်ႈလဵဝ်ၼႆႉယူႇၼၼ်ႉႁိုဝ်။- 54ပေႃးပဵၼ်ၸိူဝ်ႉၼင်ႇၼၼ်ၸိုင်၊ တီႈဢၼ်ၵျၢမ်းလိၵ်ႈမီးမႃးလႄႈဝႃႈ၊ လွင်ႈတၢင်းၸိူဝ်းၼႆႉ တၵ်းလႆႈပဵၼ်ဢေႃႈ၊ ဝႃႈၼင်ႇၼႆၼၼ်ႉ တၵ်းပျေႉၸုမ်ႇၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။- 55ၼႂ်းၶိင်ႇၼႃႇရီႇၼၼ်ႉ၊ ယေႇသူႉလၢတ်ႈတီႈၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉလႄႈဝႃႈ၊ သူပႃးဢဝ်တင်းလၢပ်ႇတင်းၶွၼ်ႉသေလႄႈ မႃးႁႂ်ႈလႆႈတီႉဢဝ်ၵဝ် မိူၼ်ၸိူဝ်ႉၼင်ႇဢၼ် တီႉဢဝ်ၸူၼ်ၼၼ်ႉလူင်ပႄႇ။ မိူဝ်ႈဢၼ်ၵဝ်ယူႇလူၺ်ႈၵၼ်တင်းသူၵူႈဝၼ်းလႄႈ သင်ႇသွၼ်ပၼ်ၵႃႈၼႂ်းပိၵ်ႈမၢၼ်ႇၸဝ်ႈယူႇၼၼ်ႉၸိုင် သူဢမ်ႇတီႉဢဝ်ၵဝ်။- 56လွင်ႈတၢင်းၸိူဝ်းၼႆႉၸမ်ႉ၊ ၼင်ႇႁိုဝ်ၵျၢမ်းလိၵ်ႈဢၼႃႇၵၢတ်ႈတီႉၼၼ်ႉ တၵ်းပျေႉၸုမ်ႇၸိုင် ၸင်ႇပဵၼ်ဢေႃႈ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉတပႄးၸဝ်ႈတင်းသဵင်ႈတင်းလူင်ပႅတ်ႈဝႆႉမၼ်းၸဝ်ႈသေလႄႈ ဢွၼ်ၵၼ်လႅၼ်ႈပၢႆႈဢေႃႈ။
ၸဝ်ႈယေႇသူႉၶၢမ်ႇတၢင်းၸႅတ်ႈထၢမ်ၽၢႆႇၼႃႈၶုၼ်လုမ်း
(တူၺ်း၊ မႃႇ 14:53-56။ လူႉ 22:54-55၊63-71။ ယူဝ်း 18:13-14၊19-24)
57ၶဝ်ၸိူဝ်းဢၼ် တီႉၵမ်ဢဝ်မၼ်းၸဝ်ႈတင်းလၢႆၼၼ်ႉ ဢဝ်ၵႂႃႇသူင်ႇ ၵႃႈတီႈၶုၼ်ယိတ်ႈပရေႃးႁဵၵ်ႈၵႃႇယၽႃႉ၊ တီႈဢၼ်ၵူၼ်းထုတ်ႇၵျၢမ်း ဢိၵ်ႇတင်း ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ ၸူႉၵၼ်တုမ်ၵၼ်ၼၼ်ႉဢေႃႈ။- 58ပေႇတရူႉၵေႃႈ ယူႇၵႆၵႆၸွမ်းမၼ်းၸဝ်ႈၵႂႃႇ ထိုင်ႁွတ်ႈတီႈတလၢင်းဢၼ်မီးၵႄႈႁိူၼ်းၶုၼ်ယိတ်ႈပရေႃးႁဵၵ်ႈၼၼ်ႉလႄႈ ၶဝ်ႈၵႃႈၼႂ်းယဝ်ႉၸင်ႇ၊ ၼင်ႈယူႇလူၺ်ႈၵၼ်တင်းလုၵ်ႈဢွၼ်ႇၶုၼ်တင်းလၢႆ ႁႂ်ႈလႆႈႁူႉႁၼ်တီႈသုတ်းတီႈၵွႆဢမူႉၼၼ်ႉဢေႃႈ။
59ယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းၶုၼ်တီႈလုမ်းလူင်ၼၼ်ႉ ႁႃသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈ ႁႂ်ႈလႆႈဢဝ်ယေႇသူႉတၢႆသေၵေႃႈ ဢမ်ႇထူပ်းဢမ်ႇလႆႈ။- 60ပိၵ်ႉသမ်ႉၶဝ်ၸိူဝ်းဢၼ်ၶၢမ်ႇသၢၵ်ႈသေႇ ဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉမႃးၼမ်ၼႃႇသေၵေႃႈ၊ ဢမ်ႇထူပ်းဢမ်ႇလႆႈသၢၵ်ႈသေႇ။ လိုၼ်းၼၼ်ႉ ၵူၼ်းဢၼ်ၶၢမ်ႇသၢၵ်ႈသေႇ ဢၼ်ဢမ်ႇၸိုဝ်ႈဢမ်ႇၸႂ်ႈသွင်ၵေႃႉ မႃးသေလႄႈလၢတ်ႈဝႃႈ၊- 61ၵေႃႉၼႆႉလၢတ်ႈလႄႈဝႃႈ၊ ၵဝ်ယႃႉပႅတ်ႈပိၵ်ႈမၢၼ်ႇၽြႃးပဵၼ်ၸဝ်ႈသေလႄႈ ၼႂ်းသၢမ်ဝၼ်းၶိုၼ်းမႄးႁဵတ်းလႆႈယူႇဢေႃႈ၊ ဝႃႈၼင်ႇၼႆၶႃႈယဝ်ႉ၊ ဝႃႈၼင်ႇၼႆဢေႃႈ။- 62ၶုၼ်ယိတ်ႈပရေႃးႁဵၵ်ႈ လုၵ်ႉၸုၵ်းယူႇသေလႄႈ ထၢမ်တီႈမၼ်းၸဝ်ႈလႄႈဝႃႈ၊ မႂ်းဢမ်ႇၶိုၼ်းလၢတ်ႈၵႃႈသင်သေဢိတ်းႁိုဝ်။ ၶဝ်ၼႆႉယူႇၽၢႆႇၼိုင်ႈတင်းမႂ်းသေလႄႈ ၶၢမ်ႇသၢၵ်ႈသေႇၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်၊- 63ယေႇသူႉယူႇတဵတ်ႇတဵတ်ႇယူႇဢေႃႈ။ ၶုၼ်ယိတ်ႈပရေႃးႁဵၵ်ႈၵေႃႈထၢမ်လႄႈဝႃႈ၊ ၼင်ႇႁိုဝ်မႂ်းတၵ်းလႆႈလၢတ်ႈ လွင်ႈဢၼ်မႂ်းပဵၼ်ၸဝ်ႈၶရိၸ်ႈ လုၵ်ႈၽြႃးပဵၼ်ၸဝ်ႈၸႂ်ႈႁိုဝ်။ ဢမ်ႇၸႂ်ႈႁိုဝ်ၼၼ်ႉ တီႈႁဝ်းၸိုင်၊ ၵဝ်တိူင်ႇၽြႃးပဵၼ်ၸဝ်ႈဢၼ် ဢသၢၵ်ႈလိပ်းယူႇၼၼ်ႉယူႇဢေႃႈ၊ ဝႃႈၼင်ႇၼႆဢေႃႈ။- 64ယေႇသူႉၵေႃႈ လၢတ်ႈလႄႈဝႃႈ၊ ပဵၼ်ၵႃႈၼင်ႇဢၼ်မႂ်းဝႃႈၼႆႉယဝ်ႉ။ ၵူၺ်းၵႃႈ ၵဝ်ဝႃႈတီႈသူၸမ်ႉ၊ မိူဝ်းၼႃႈထႃႈလိုၼ်းသူၼႆႉ တၵ်းလႆႈႁၼ်လုၵ်ႈၵူၼ်း ၼင်ႈယူႇၵႃႈတီႈၽၢႆႇၶႂႃတၼ်းၶူဝ်းၸဝ်ႈသေလႄႈ မႃးၵႃႈၼိူဝ်မွၵ်ႇၵုမ်ႈပုၼ်ႉဢေႃႈ၊ ဝႃႈၼင်ႇၼႆဢေႃႈ။- 65မိူဝ်ႈၼၼ်ႉ ၶုၼ်ယိတ်ႈပရေႃးႁဵၵ်ႈ ၸၵ်ႉသိၵ်ႇၶူဝ်းၼုင်ႈ တူဝ်ၸဝ်ႈၵဝ်ႇသေလႄႈလၢတ်ႈဝႃႈ၊ ၵေႃႉၼႆႉလၢတ်ႈပူၼ်ႉလၢတ်ႈလိူဝ်ၽြႃးပဵၼ်ၸဝ်ႈယဝ်ႉ။ ႁဝ်းတၵ်းလူဝ်ႇသၢၵ်ႈသေႇဢၼ်လႂ်ထႅင်ႈလူးၵွၼ်ႇ။ သူလႆႈငိၼ်းၵႂၢမ်းဢၼ် လၢတ်ႈပူၼ်ႉလၢတ်ႈလိူဝ်ၽြႃးပဵၼ်ၸဝ်ႈၼႆႉယဝ်ႉ။- 66သူထၢင်ႇၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉၵေႃႈ ၶိုၼ်းလၢတ်ႈလႄႈဝႃႈ၊ ၵေႃႉၼႆႉထိူၵ်ႈၶၢမ်ႇတၢင်းတၢႆယဝ်ႉ၊ ဝႃႈၼင်ႇၼႆလႄႈ ၽွမ်ႉၵၼ်ၸီႇယၢင်ႇဢေႃႈ။- 67မိူဝ်ႈၼၼ်ႉ ၶဝ်ထူမ်ႇၼမ်ႉလၢႆးသႂ်ႇၼႃႈမၼ်းၸဝ်ႈဢေႃႈ။ ဢဝ်တႃမိုဝ်းတမ်သႂ်ႇမၼ်းၸဝ်ႈဢေႃႈ။ ၵမ်ႈၽွင်ႈၵေႃႈ ဢဝ်ၶွၼ်ႉပေႃႉယႅၼ်ႉလႄႈဝႃႈ၊- 68ၸဝ်ႈၶရိၸ်ႈတီႈၶႃႈဢိူၺ်း၊ ၶႅၼ်းတေႃႈႁဵတ်းပရေႃးၽႅတ်ႈသေလႄႈ ႁေႃးလၢတ်ႈလွင်ႈဢၼ်ၽူႈလႂ်ပေႃႉယႅၼ်ႉၸဝ်ႈႁဝ်းၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။
ပေႇတရူႉထဵင်ပႅတ်ႈၸဝ်ႈယေႇသူႉ
(တူၺ်း၊ မႃႇ 14:66-72။ လူႉ 22:56-62။ ယူဝ်း 18:15-18၊25-27)
69ၼႂ်းမိူဝ်ႈဢၼ်ပေႇတရူႉ ၼင်ႈယူႇၵႃႈၼွၵ်ႈၼႂ်းတလၢင်းဢၼ်မီးၵႄႈႁိူၼ်းၼၼ်ႉယူႇၼၼ်ႉၸိုင်၊ မႄႈယိင်းဢၼ်ပဵၼ်ၵူၼ်းၸႂ်ႉၵူၼ်းသွႆၵေႃႉၼိုင်ႈ မႃးတီႈမၼ်းလႄႈဝႃႈ၊ မႂ်းၼႆႉၵေႃႈလႆႈယူႇလူၺ်ႈၵၼ်တင်းယေႇသူႉ ၵူၼ်းမိူင်းၵႃႇလီႉလႄးၼၼ်ႉယဝ်ႉဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊- 70မၼ်းၵေႃႈထဵင်ပႅတ်ႈၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်လႄႈဝႃႈ၊ ၵဝ်ဢမ်ႇႁူႉလွင်ႈဢၼ်မႂ်းလၢတ်ႈၼႆႉ၊ ဝႃႈၼင်ႇၼႆဢေႃႈ။- 71လိုၼ်းၼၼ်ႉ မၼ်းဢွၵ်ႇၵႂႃႇၸူးၵႃႈတီႈၽၵ်းတူတလၢင်းႁိူၼ်းၼၼ်ႉယဝ်ႉၸင်ႇ၊ မႄႈယိင်းတၢင်ႇၵေႃႉႁၼ်မၼ်းလႄႈ လၢတ်ႈတီႈၶဝ်ၸိူဝ်းဢၼ်မီးတီႈၼၼ်ႈလႄႈဝႃႈ၊ ၵေႃႉၼႆႉလႆႈယူႇလူၺ်ႈၵၼ်တင်းယေႇသူႉ၊ ၵူၼ်းဝဵင်းၼႃႇၸရႅတ်ႈၼၼ်ႉယဝ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 72မၼ်းၵေႃႈ သမ်ႉထဵင်ပႅတ်ႈလႄႈ ၵိၼ်ႇလၢတ်ႈလႄႈဝႃႈ၊ ၵဝ်ဢမ်ႇႁူႉၵေႃႉၼၼ်ႉ၊ ဝႃႈၼင်ႇၼႆဢေႃႈ။- 73လိုၼ်းၼၼ်ႉဢမ်ႇပေႃးႁိုင်၊ ၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းၼၼ်ႈမႃးတီႈပေႇတရူႉလႄႈဝႃႈ၊ ၸႂ်ႈတႄႉ။ မႂ်းၼႆႉ ၶဝ်ႈပႃးၼႂ်းၶဝ်ၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ ၵႂၢမ်းမႂ်းႁႂ်ႈပိူၼ်ႈႁူႉလွင်ႈမႂ်းယူႇဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 74မၼ်းၵေႃႈတိူင်ႇလႄႈၵိၼ်ႇလၢတ်ႈဝႃႈ၊ ၵဝ်ဢမ်ႇႁူႉၵေႃႉၼၼ်ႉ၊ ဝႃႈၼင်ႇၼႆယဝ်ႉၸင်ႇ၊ ၵႆႇၶၼ်ၵမ်းလဵဝ်ဢေႃႈ။- 75ပေႇတရူႉၶုၵ်းၸႂ်လႆႈၶႆႈၸႂ်ထူပ်းၵႂၢမ်းဢၼ်ယေႇသူႉလၢတ်ႈဝႆႉလႄႈဝႃႈ၊ ၸူဝ်ႈဢၼ်ၵႆႇဢမ်ႇပႆႇၶၼ်ၼၼ်ႉၸိုင်၊ မႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈ၊ ဝႃႈၼင်ႇၼႆၼၼ်ႉသေယဝ်ႉ၊ ဢွၵ်ႇၵႂႃႇၵႃႈၼွၵ်ႈလႄႈ ႁွင်ႉႁႆႈၼႃႇလူင်လၢင်ဢေႃႈ။
Currently Selected:
မၢတ်ႈထႄႇ 26: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship