မၢတ်ႈထႄႇ 23

ၸဝ်ႈယေႇသူႉပၼ်သတီႉႁႂ်ႈဝႄႈပိူင်ႈၽႃႇရီႉသႄး

(တူၺ်း၊ မႃႇ 12:38-39။ လူႉ 11:43-46။ လူႉ 20:45-46)

1မိူဝ်ႈၼၼ်ႉ ယေႇသူႉၵေႃႈ ႁေႃးလၢတ်ႈတီႈၵူၼ်းဢၼ်ၸူႉဢၼ်တုမ် ဢိၵ်ႇတင်းတပႄးၸဝ်ႈတင်းလၢႆလႄႈဝႃႈၸမ်ႉ၊- 2ၵူၼ်းထုတ်ႇၵျၢမ်း ဢိၵ်ႇတင်းၽႃႇရီႉသႄးတင်းလၢႆ ၼင်ႈၵႃႈၼိူဝ်ပလၢင်ႇ တီႈၼင်ႈမူဝ်းသေႇၼၼ်ႉဢေႃႈ။- 3ပိူဝ်ႈၼႆလႄႈ ၸွမ်းၵႃႈဢၼ်ၶဝ်ၸီႇယၢင်ႇတင်းသဵင်ႈတင်းလူင်ၼၼ်ႉလႄႈ ၵမ်ၵျၢင်ႉတႃႉ။ ယႃႇပေၵမ်ပေၵျၢင်ႉ ၸိူဝ်ႉၼင်ႇတၢင်းၵမ်တၢင်းၵျၢင်ႉၶဝ်ၼၼ်ႉ။ လွင်ႈမၼ်းၸမ်ႉ ပိၵ်ႉသမ်ႉၶဝ်ၸီႇယၢင်ႇဝႆႉသေၵေႃႈ၊ တူဝ်ၶဝ်ဢမ်ႇၵမ်ဢမ်ႇၵျၢင်ႉ။- 4ၶဝ်ၸၢင်ႈမတ်ႉၶၢတ်ႈၶူဝ်းဢၼ်ၼၵ်းၼႃႇလႄႈ ႁၢပ်ႇယၢပ်ႇတင်းလၢႆၼၼ်ႉသေလႄႈ ဢဝ်တၢင်ႇသႂ်ႇၵႃႈၼိူဝ်ႁူဝ်မႃႇပိူၼ်ႈတၢင်ႇၵေႃႉဢေႃႈ။ တူဝ်ၶဝ်ၸမ်ႉ ဢမ်ႇၶႂ်ႈဢဝ်တင်းၼိဝ်ႉမိုဝ်းၶၢႆႉ။- 5ၶဝ်ၼၼ်ႉႁဵတ်းႁႂ်ႈလွင်ႈတၢင်းၵႃႈဢၼ်ၶဝ်ႁဵတ်း တင်းသဵင်ႈတင်းလူင်ၼၼ်ႉ ထၢင်ႇသႃးၵႃႈတီႈၽၢႆႇၼႃႈပိူၼ်ႈဢေႃႈ။ ၸၢင်ႈႁဵတ်းႁႂ်ႈလၢၵ်ႈၽွႆႉတင်းလၢႆၵႂၢင်ႈလႄႈ ႁႂ်ႈပူႈၶူဝ်းတင်းလၢႆယႂ်ႇဢေႃႈ။- 6ၸၢင်ႈထုၵ်ႇၸႂ်ၵျိူၵ်ႈၸႂ်တီႈဢိင်ဢၼ်လီဢၼ်မျၢတ်ႈသေပိူၼ်ႈၵႃႈၼႂ်းပၢင်ပွႆး တီႈၼင်ႈဢၼ်သုင်သေပိူၼ်ႈ ၵႃႈၼႂ်းၸရွပ်ႈႁေႃးတြႃးလႂ်၊- 7တၢင်းဢၼ်ပိူၼ်ႈႁဵတ်း ရူဝ်ႇသေႇၵူဝ်ယမ်လႄႈ တၵ်ႉလၢတ်ႈၵႃႈၼႂ်းၵၢတ်ႇလႂ်၊ တၢင်းဢၼ်ပိူၼ်ႈႁွင်ႉၶဝ်လႄႈဝႃႈ၊ ၸဝ်ႈႁဝ်း၊ ၸဝ်ႈႁဝ်း၊ ဝႃႈၼင်ႇၼႆလႂ်ၸိူဝ်းၼၼ်ႉဢေႃႈ။

8သူၼႆႉၸမ်ႉ၊ ယႃႇပေၶၢမ်ႇတၢင်းဢၼ်ပိူၼ်ႈႁွင်ႉဝႃႈ ၸဝ်ႈႁဝ်း။ လွင်ႈမၼ်းၸမ်ႉ ၸဝ်ႈၶရိၸ်ႈ ဢၼ်ဢွၼ်ႁူဝ်သူ မီးပႃးလဵဝ်ၵူၺ်းဢေႃႈ။ သူတင်းသဵင်ႈတင်းလူင်ပဵၼ်ပီႈၼွင်ႉၵၼ်ဢေႃႈ။- 9ၵႃႈၼိူဝ်လိၼ်မိူင်းၼႆႉ ယႃႇပေႁွင်ႉၽူႈလႂ်သေၵေႃႉသေၵူၼ်းဝႃႈ ပေႃႈ။ လွင်ႈမၼ်းၸမ်ႉ ပေႃႈသူမီးၵႃႈၼိူဝ်မိူင်းၵၢင်ႁၢဝ်ပုၼ်ႉပႃးလဵဝ်ၵူၺ်းဢေႃႈ။- 10ယႃႇပေၶၢမ်ႇတၢင်းဢၼ်ပိူၼ်ႈႁွင်ႉဝႃႈ ၵူၼ်းဢွၼ်ႁူဝ်ပိူၼ်ႈ။ ဢၼ်ပဵၼ်ဢွၼ်ႁူဝ်သူ မီးၸဝ်ႈၶရိၸ်ႈပႃးလဵဝ်ၵူၺ်းဢေႃႈ။- 11ၼႂ်းသူၵေႃႉဢၼ် ၶႂ်ႈပဵၼ်ဢၼ်ယႂ်ႇသေပိူၼ်ႈၼၼ်ႉ တၵ်းလႆႈပဵၼ်ၵူၼ်းၸႂ်ႉၵူၼ်းသွႆသူဢေႃႈ။- 12ၽူႈလႂ်သေဢမ်ႇဝႃႈ၊ ၵေႃႉဢၼ်ယုၵ်ႉယွင်ႈတူဝ်ၸဝ်ႈၵဝ်ႇၼၼ်ႉ၊ ၵေႃႉၼၼ်ႉ တၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇဢေႃႈ။ ၽူႈလႂ်သေဢမ်ႇဝႃႈ ၵေႃႉဢၼ်ၶျႃးတႅမ်ႇတူဝ်ၸဝ်ႈၵဝ်ႇၼၼ်ႉ၊ ၵေႃႉၼၼ်ႉ တၵ်းလႆႈၶၢမ်ႇတၢင်းဢၼ်ယုၵ်ႉယွင်ႈဢေႃႈ။

မီးဢႃႉမင်ႇၵလႃႇတီႈၵူၼ်းၸၢင်ႈထိမ်ႇၸၢင်ႈမႅပ်း

(တူၺ်း၊ မႃႇ 12:40။ လူႉ 11:39-42၊44၊52။ လူႉ 20:47)

13-14ၵူၼ်းထုတ်ႇၵျၢမ်း ဢိၵ်ႇတင်းၽႃႇရီႉသႄး ဢၼ်ၸၢင်ႈထိမ်ႇၸၢင်ႈမႅပ်းၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူဢိုတ်းဝႆႉမိူင်းၵၢင်ႁၢဝ်ၸဝ်ႈၼၼ်ႉ ၵႃႈတီႈၽၢႆႇၼႃႈၵူၼ်းတင်းလၢႆသေလႄႈ တူဝ်သူၵေႃႈ ဢမ်ႇၶဝ်ႈ။ တီႈၶဝ်ၸိူဝ်းဢၼ်ၶႂ်ႈၶဝ်ႈၼၼ်ႉၵေႃႈ သူႁႄႉသူၶႅၼ်ဝႆႉဢေႃႈ။- 15ၵူၼ်းထုတ်ႇၵျၢမ်း ဢိၵ်ႇတင်းၽႃႇရီႉသႄး ဢၼ်ၸၢင်ႈထိမ်ႇၸၢင်ႈမႅပ်းၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူၵႂႃႇလႄႇၵႂႃႇလဵပ်ႈ ၵႃႈတီႈတၢင်းလွႆတၢင်းၼမ်ႉ ႁႂ်ႈၵူၼ်းၵေႃႉၼိုင်ႈ လႆႈၶဝ်ႈၼႂ်းၽႃႇသႃႇလႄႈ ၵေႃႉဢၼ်ၶဝ်ႈၼႂ်းၽႃႇသႃႇယဝ်ႉၼၼ်ႉၵေႃႈ၊ သူႁႂ်ႈပဵၼ်ၵူၼ်းမိူင်းငရၢႆးၼႃႇသေ တူဝ်ၸဝ်ႈၵဝ်ႇသွင်ပုၼ်ႈဢေႃႈ။

16ၵူၼ်းတႃမွတ်ႇဢၼ်ၼႄတၢင်းၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ သူဝႃႈ၊ ၽူႈလႂ်သေဢမ်ႇဝႃႈ၊ ပေႃးဢဝ်ပိၵ်ႈမၢၼ်ႇၸဝ်ႈၵိၼ်ႇဝႃႈၸိုင်၊ ဢမ်ႇပဵၼ်ၵႃႈသင်။ ၵူၺ်းၵႃႈ ၽူႈလႂ်သေဢမ်ႇဝႃႈ၊ ပေႃးဢဝ်ၶမ်းႁိူၼ်းပိၵ်ႈမၢၼ်ႇၸဝ်ႈၵိၼ်ႇဝႃႈၸိုင် ပဵၼ်ယူႇဢေႃႈ၊ ဝႃႈၼင်ႇၼႆဢေႃႈ။- 17ၵူၼ်းမိူၵ်ႈၵူၼ်းတႃမွတ်ႇတင်းလၢႆၶဝ်ဢိူၺ်း၊ ၶိူင်ႈပိူင်ဢၼ်လႂ် ယဵင်ႈၶႅၼ်းမျၢတ်ႈၼႃႇ။ ၶမ်းၼၼ်ႉမျၢတ်ႈႁိုဝ်။ ႁိူၼ်းပိၵ်ႈမၢၼ်ႇၸဝ်ႈ ဢၼ်ႁႂ်ႈၶမ်းမူတ်းၸၢင်ႇၼၼ်ႉမျၢတ်ႈႁိုဝ်။- 18ၼႄးၼိုင်ႈၸမ်ႉ၊ သူဝႃႈ၊ ၽူႈလႂ်သေဢမ်ႇဝႃႈ၊ ပေႃးဢဝ်ယိတ်ႈပလၢင်ႇလႄႈ ၵိၼ်ႇဝႃႈၸိုင်၊ ဢမ်ႇပဵၼ်ၵႃႈသင်။ ၵူၺ်းၵႃႈ ၽူႈလႂ်သေဢမ်ႇဝႃႈ၊ ပေႃးဢဝ်တင်းပုၵ်ႈၸေႃႇ ဢၼ်မီးၵႃႈၼိူဝ်ယိတ်ႈပလၢင်ႇၼၼ်ႉ ၵိၼ်ႇဝႃႈၸိုင်၊ ပဵၼ်ယူႇဢေႃႈ၊ ဝႃႈၼင်ႇၼႆဢေႃႈ။- 19ၵူၼ်းမိူၵ်ႈၵူၼ်းတႃမွတ်ႇၶဝ်ဢိူၺ်း၊ ၶိူင်ႈပိူင်ဢၼ်လႂ်ယဵင်ႈၶႅၼ်းမျၢတ်ႈ။ တၢင်းပုၵ်ႈၸေႃႇၼၼ်ႉ မျၢတ်ႈႁိုဝ်။ ယိတ်ႈပလၢင်ႇ ဢၼ်ႁႂ်ႈတင်းပုၵ်ႈၸေႃႇ မူတ်းၸၢင်ႇၼၼ်ႉ မျၢတ်ႈႁိုဝ်။

20ပိူဝ်ႈၼႆၸင်ႇ၊ ၵေႃႉဢၼ်ဢဝ်ယိတ်ႈပလၢင်ႇၵိၼ်ႇဝႃႈၼၼ်ႉ ဢဝ်ၸႃႉၸဵမ် ယိတ်ႈပလၢင်ႇ ဢိၵ်ႇတင်းၵႃႈဢၼ်မီးၵႃႈၼိူဝ်ယိတ်ႈပလၢင်ႇ တင်းသဵင်ႈတင်းလူင်ၼၼ်ႉၵိၼ်ႇဝႃႈဢေႃႈ။- 21ၵေႃႉဢၼ်ဢဝ်ႁိူၼ်းပိၵ်ႈမၢၼ်ႇၸဝ်ႈၵိၼ်ႇဝႃႈၼၼ်ႉ ဢဝ်ၸႃႉၸဵမ်ႁိူၼ်းပိၵ်ႈမၢၼ်ႇၸဝ်ႈ ဢိၵ်ႇတင်းၵေႃႉဢၼ်ၵိင်းဝၢပ်ႈယူႇၵႃႈၼႂ်းႁိူၼ်းပိၵ်ႈမၢၼ်ႇၸဝ်ႈၼၼ်ႉ ၵိၼ်ႇဝႃႈဢေႃႈ။- 22ၵေႃႉဢၼ်ဢဝ်မိူင်းၵၢင်ႁၢဝ်ၵိၼ်ႇဝႃႈၼၼ်ႉ ဢဝ်ၸႃႉၸဵမ်ပလၢင်ႇၽြႃးပဵၼ်ၸဝ်ႈ ဢိၵ်ႇတင်းၵေႃႉဢၼ်ၼင်ႈယူႇၵႃႈၼိူဝ်ပလၢင်ႇၼၼ်ႉ ၵိၼ်ႇဝႃႈဢေႃႈ။

23ၵူၼ်းထုတ်ႇၵျၢမ်း ဢိၵ်ႇတင်းၽႃႇရီႉသႄး ဢၼ်ၸၢင်ႈထိမ်ႇၸၢင်ႈမႅပ်းၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ ပိၵ်ႉသမ်ႉသူလူႇတၢၼ်း ဢိမ်ၶိမ်း၊ ၸမုတ်ႉ၊ ၸီႇယႃႇ သိပ်းပုၼ်ႈပုၼ်ႈၼိုင်ႈ ယူႇသေၵေႃႈ သူဝႆႉၵိုတ်းပႅတ်ႈ လွင်ႈတၢင်းဢၼ်ၼၵ်းၵႃႈၼႂ်းပိင်းၺၢပ်ႈတြႃးဢၼ်ဝႃႈ တၢင်းဢၼ်ၸီႇယၢင်ႇ ၸွမ်းၼင်ႇတြႃး၊ တၢင်းဢၼ်ဢဵတ်းလူပိူၼ်ႈ၊ တၢင်းဢၼ်ပႂ်ႉသဵတ်ႈၸႃႇ ၸိူဝ်းၼႆႉဢေႃႈ။ တၵ်းလႆႈၵမ်ၵျၢင်ႉလွင်ႈတၢင်းၸိူဝ်းၼႆႉဢေႃႈ လွင်ႈတၢင်းဢၼ်ဝႃႈဝႆႉဢွၼ်တၢင်းၸိူဝ်းၼၼ်ႉၵေႃႈ ဢမ်ႇလႆႈဝႆႉၵိုတ်း။

24ၵူၼ်းတႃမွတ်ႇဢၼ်ၼႄတၢင်းၶဝ်ဢိူၺ်း၊ သူၸႅတ်ႈၼမ်ႉ ဢဝ်မႅင်းလဵတ်းဢွၼ်ႇ ဢွၵ်ႇပႅတ်ႈသေလႄႈ ဢိုၼ်ၵိၼ်ၵလႃးဢုၵ်ႉဢေႃႈ။

25ၵူၼ်းထုတ်ႇၵျၢမ်း ဢိၵ်ႇတင်းၽႃႇရီႉသႄး ဢၼ်ၸၢင်ႈထိမ်ႇၸၢင်ႈမႅပ်းၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူသုၵ်ႈလၢင်ႉၵွၵ်း ဢိၵ်ႇတင်းလၢင်ႇပၢၼ်းတင်းလၢႆၽၢႆႇတၢင်းၼွၵ်ႈမၼ်းဢေႃႈ။ ၽၢႆႇတၢင်းၼႂ်းမၼ်းၸမ်ႉ၊ မီးတဵမ်ဝႆႉတင်း တၢင်းဢၼ်ႁိမ်ဢဝ် ဢိၵ်ႇတင်းတၢင်းဢၼ်ႁၢႆႉမိူၵ်ႈယူႇဢေႃႈ။- 26ၽႃႇရီႉသႄး ဢၼ်တႃမွတ်ႇၼႆႉဢိူၺ်း၊ သုၵ်ႈလၢင်ႉၵွၵ်း ဢိၵ်ႇတင်း လၢင်ႇပၢၼ်းၼၼ်ႉ ၽၢႆႇတၢင်းၼႂ်းမၼ်းဢွၼ်တၢင်းတႃႉ။ ပေႃးႁဵတ်းၸိူဝ်ႉၼင်ႇၼၼ်ႉၸိုင် ၽၢႆႇတၢင်းၼွၵ်ႈမၼ်းတၵ်းမူတ်းသႂ်ဢေႃႈ။

27ၵူၼ်းထုတ်ႇၵျၢမ်း ဢိၵ်ႇတင်းၽႃႇရီႉသႄး ဢၼ်ၸၢင်ႈထိမ်ႇၸၢင်ႈမႅပ်းၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူမိူၼ်ၸိူဝ်ႉၼင်ႇ သၢင်းၶႅင်းဢၼ်တႃး ဢၼ်ၽိူၵ်ႇဢၼ်ၶၢဝ်ၼၼ်ႉဢေႃႈ။ ၽၢႆႇတၢင်းၼွၵ်ႈမၼ်းၸမ်ႉ၊ ႁၢင်ႈလီဢေႃႈ။ ၽၢႆႇတၢင်းၼႂ်းမၼ်းၸမ်ႉ၊ မီးတဵမ်ဝႆႉ တင်းလုပ်ႇၵူၼ်းတၢႆ ဢိၵ်ႇတင်း ဢၼ်ဝူၺ်ႇဢၼ်ႁင်ႈ ၵူႈၸိူဝ်ႉၵူႈပိူင်ဢေႃႈ။- 28မိူၼ်ၼင်ႇၼၼ်ႉ၊ သူမိူၼ်ၼင်ႇႁၢင်ႈသိုဝ်ႈတေႃႇၽၢႆႇတၢင်းၼွၵ်ႈၵႃႈတီႈၽၢႆႇၼႃႈပိူၼ်ႈဢေႃႈ။ ၽၢႆႇတၢင်းၼႂ်းၸမ်ႉ၊ မီးတဵမ်ဝႆႉတင်းတၢင်းဢၼ် ၸၢင်ႈထိမ်ႇၸၢင်ႈမႅပ်း ဢိၵ်ႇတင်း တၢင်းၵမ်တၢင်းၵျၢင်ႉဢၼ်ဢမ်ႇတြႃးဢေႃႈ။

ဢပႅတ်ႈတၢမ်ႇဢၼ်ၶဝ်လႆႈၶၢမ်ႇ

(တူၺ်း၊ လူႉ 11:47-51)

29ၵူၼ်းထုတ်ႇၵျၢမ်း ဢိၵ်ႇတင်းၽႃႇရီႉသႄး ဢၼ်ၸၢင်ႈထိမ်ႇၸၢင်ႈမႅပ်းၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူမႄးတႄႇမႄးႁဵတ်း ပႃႇႁဵဝ်ႈပရေႃးၽႅတ်ႈတင်းလၢႆလႄႈ ႁၢင်ႈၶိူင်ႈသၢင်းၶႅင်း ၵူၼ်းဢၼ်သိုဝ်ႈတေႃႇ ၸိူဝ်းၼၼ်ႉဝႆႉသေယဝ်ႉ၊ လၢတ်ႈလႄႈဝႃႈ၊- 30သင်ႁဝ်းမီးၼႂ်းၸူဝ်ႈပူႇပၢၼ်ပေႃႈႁဝ်းၼၼ်ႉၸိုင်၊ ႁဝ်းဢမ်ႇပဵၼ်ၶဝ်ၸိူဝ်းဢၼ်ႁပ်ႉတုင်းဢဝ်လွင်ႈတၢင်းဢၼ် ထွၵ်ႇလိူတ်ႈပရေႃးၽႅတ်ႈလူၺ်ႈၵၼ်တင်းၶဝ်ယဝ်ႉ၊ ဝႃႈၼင်ႇၼႆဢေႃႈ။- 31ပေႃးပဵၼ်ၸိူဝ်ႉၼင်ႇၼႆၸိုင် သူပဵၼ်ၸိူဝ်ႉၶိူဝ်း ၶဝ်ၸိူဝ်းဢၼ်ဢဝ်ပရေႃးၽႅတ်ႈတင်းလၢႆ တၢႆၼၼ်ႉဝႃႈၼႆ၊ တူဝ်သူၶၢမ်ႇသၢၵ်ႈသေႇတူဝ်သူယူႇဢေႃႈ။- 32ပိူဝ်ႈၼႆလႄႈ ႁႂ်ႈပမႃႇၼႃႉ တၢင်းၵမ်တၢင်းၵျၢင်ႉပူႇပေႃႈသူ ဢၼ်ဢမ်ႇပႆႇထူၼ်ႈပႆႇတဵမ်ၼၼ်ႉ ထူၼ်ႈတဵမ်တႃႉ။

33ၶိူဝ်းငူးႁၢႆႉၶဝ်ဢိူၺ်း၊ သူတၵ်းၵၢင်းလွတ်ႈတင်းဢပႅတ်ႈငရၢႆးၼၼ်ႉလႆႈ ၸိူဝ်ႉၼင်ႇႁိုဝ်။

34ပိူဝ်ႈဢၼ်မီးၼင်ႇၼႆလႄႈ တူၺ်းလူး၊ ၵဝ်ပွႆႇၸႂ်ႉပရေႃးၽႅတ်ႈ ဢိၵ်ႇတင်းပိင်ႇၺႃႇသီႉ တင်းၵူၼ်းထုတ်ႇၵျၢမ်းတင်းလၢႆ မႃးတီႈသူဢေႃႈ။ ၼႂ်းၶဝ်ၼၼ်ႉ သူတၵ်းဢဝ်ၵမ်ႈၽွင်ႈတၢႆလႄႈ တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈဢေႃႈ။ တၵ်းဢဝ်ၵမ်ႈၽွင်ႈ ပေႃႉယႅၼ်ႉၵႃႈၼႂ်းၸရွပ်ႈႁေႃးတြႃးတင်းလၢႆလႄႈ တၵ်းၼိၵ်ႈၸၢၵ်ႈငႅၼ်းသႄး ႁေႃႈဢွၵ်ႇပႅတ်ႈသေၵႃႈတီႈဝဵင်းၼိုင်ႈယဝ်ႉဝဵင်းၼိုင်ႈဢေႃႈ။- 35ပိူဝ်ႈၼႆလႄႈ လိူတ်ႈၵူၼ်းဢၼ်သိုဝ်ႈတေႃႇ ၵႃႈဢၼ်ထွၵ်ႇပႅတ်ႈယဝ်ႉၵႃႈၼိူဝ်လိၼ်မိူင်းတင်းသဵင်ႈတင်းလူင်ဢၼ်ဝႃႈ ၸႃႉၸဵမ်လိူတ်ႈ ဢႃႇပေႇလႃႉ ဢၼ်သိုဝ်ႈတေႃႇၼၼ်ႉ တေႃႇထိုင်ႁွတ်ႈ လိူတ်ႈၸႃႇၶရီႉ လုၵ်ႈၸၢႆးပႃႇရၵီႉ ဢၼ်သူဢဝ်တၢႆ ၼႂ်းၵႄႈဝူင်ႈၵၢင်ႁိူၼ်းပိၵ်ႈမၢၼ်ႇၸဝ်ႈ တင်းယိတ်ႈပလၢင်ႇၼၼ်ႉ တၵ်းႁွတ်ႈၽႅဝ် ၵႃႈၼိူဝ်ႁူဝ်သူဢေႃႈ။- 36ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉ တၵ်းႁွတ်ႈၽႅဝ် ၵႃႈၼိူဝ်ၵူၼ်းတင်းလၢႆ ဢၼ်မီးယူႇတေႃႈလဵဝ်ၸိူဝ်းၼႆႉဢေႃႈ။

ၸဝ်ႈယေႇသူႉႁၵ်ႉဝဵင်းယေႇရူႉသလႅမ်ႇ

(တူၺ်း၊ လူႉ 13:34-35)

37ဢူဝ်း ဝဵင်းယေႇရူႉသလႅမ်ႇ၊ ဝဵင်းယေႇရူႉသလႅမ်ႇ၊ ဢၼ်ဢဝ်ပရေႃးၽႅတ်ႈတင်းလၢႆတၢႆလႄႈ ဢဝ်မၢၵ်ႇႁိၼ်ထိမ်ႈၶဝ်ၸိူဝ်းဢၼ် ပွႆႇၸႂ်ႉမႃးၵႃႈတီႈမႂ်းတင်းလၢႆၼၼ်ႉၼႆႉဢိူၺ်း၊ ၸိူဝ်ႉၼင်ႇဢၼ်ၵႆႇမႄႈ ႁႂ်ႈလုၵ်ႈဢွၼ်ႇမၼ်းၸူႉၵၼ်တုမ်ၵၼ်တႂ်ႈပိၵ်ႇမၼ်းၼၼ်ႉ ၵဝ်မီးဢလူဝ်ႇၶႂ်ႈႁႂ်ႈလုၵ်ႈဢွၼ်ႇမႂ်းလႆႈၸူႉၵၼ်တုမ်ၵၼ်ယူႇ ဢမ်ႇႁူႉလၢႆၽဝ်ႇလၢႆပွၵ်ႈယဝ်ႉ။ မႂ်းၸမ်ႉ၊ ဢမ်ႇမီးဢလူဝ်ႇ။- 38တူၺ်းလူး၊ ႁိူၼ်းသူၼၼ်ႉ ၵိုတ်းဝႆႉတီႈသူလႄႈ ပဵၼ်တီႈဢၼ်ၽိတ်ႇၵူၼ်းငႅဝ်ၵူၼ်းဢေႃႈ။- 39ၵဝ်ဝႃႈတီႈသူၸမ်ႉ၊ တေႃႇထိုင်ႁွတ်ႈၸူဝ်ႈဢၼ်သူဢမ်ႇပႆႇလၢတ်ႈလႄႈဝႃႈ၊ ႁႂ်ႈၵေႃႉဢၼ်ပႃးတင်းဢၶႂၢင်ႉ ထႃႇဝရႃႉၽြႃးမႃးၼၼ်ႉ မီးမင်ႇၵလႃႇသေၵမ်းလူၺ်ႈ၊ ဝႃႈၼင်ႇၼႆၼၼ်ႉၸိုင်၊ ၸႃႉၸဵမ်တေႃႈလဵဝ်ၼႆႉ သူတၵ်းဢမ်ႇလႆႈႁၼ်ၼႃႈၵဝ်၊ ဝႃႈၼင်ႇၼႆဢေႃႈ။

Currently Selected:

မၢတ်ႈထႄႇ 23: CBMS

Highlight

Copy