ႁူဝ်းသေႇ 10
10
1မဵဝ်းဢီႉသရေႇလႃႉ ပဵၼ်တူၼ်ႈ ၶိူဝ်းမၢၵ်ႇၸပိတ်ႈ ဢၼ်ၽိူဝ်ၼႃၽိူဝ်ပူင်းလႄႈ မၢၵ်ႇမၢၵ်ႇၼမ်ၼႃႇဢေႃႈ။ ၸွမ်းၵႃႈၼင်ႇဢၼ် မၢၵ်ႇမၼ်းယႂ်ႇၽႄႈ ၼမ်ၵိုၼ်းၼၼ်ႉသေလႄႈ မၼ်းႁႂ်ႈယိတ်ႈပလၢင်ႇမၼ်း ယႂ်ႇၽႄႈၼမ်ၵိုၼ်းၼႃႇဢေႃႈ။ ၸွမ်းၵႃႈၼင်ႇဢၼ် မိူင်းမၼ်းလီၼၼ်ႉသေလႄႈ ၶဝ်ႁဵတ်းသဝ် တီႈၵူဝ်းၵႂၢႆႇ ဢၼ်လီဢၼ်ငၢမ်းၼၼ်ႉယဝ်ႉလူင်ပႄႇ။- 2ၶဝ်မီးၸႂ်သွင်ငၢမ်ႈဢေႃႈ။ ၶဝ်တၵ်းလႆႈၶၢမ်ႇတၢမ်ႇဢပႅတ်ႈ ၵမ်းလဵဝ်ဢေႃႈ။ မၼ်းၸဝ်ႈတၵ်းၵိူၼ်ႇယိတ်ႈပလၢင်ႇၶဝ်တူၵ်းပႅတ်ႈလႄႈ ယႃႉရုၵ်ႈထူႉသၢင်းထူႉၶဝ်ပႅတ်ႈဢေႃႈ။- 3တေႃႈလဵဝ်ၼႆႉ ၶဝ်တၵ်းလႆႈလၢတ်ႈလႄႈဝႃႈ၊ ၵွပ်ႈပိူဝ်ႈဢၼ်ႁဝ်းဢမ်ႇၵူဝ်ႁႄ ထႃႇဝရႃႉၽြႃးလႄႈ ႁဝ်းဢမ်ႇမီးၶုၼ်ႁေႃၶမ်းသေၵေႃႈ မၼ်းတၵ်းႁဵတ်းၸိူဝ်ႉၼင်ႇႁိုဝ်ပုၼ်ႈႁဝ်းလႆႈ၊ ဝႃႈၼင်ႇၼႆဢေႃႈ။- 4ၶဝ်ၸၢင်ႈဢွၼ်ၵၼ်ၵိၼ်ႇဝႃႈ ၵႂၢမ်းဢၼ်လၢႆလၢႆ ဢမ်ႇပွင်ႇၵႃႈသင်ယူႇ၊ ႁဵတ်းမိၵ်ႉသႃႇႁႃယႃႉ တၢင်းဢၼ်ထုၵ်ႇၵၼ်ယူႇသေလႄႈ လၢတ်ႈၵႂၢမ်းမူႉသႃႇၵူၺ်းဢေႃႈ။ ပိူဝ်ႈၼႆလႄႈ တၢင်းဢၼ်ၸီႇယၢင်ႇတြႃးၼၼ်ႉ တၵ်းလႆႈဢွၵ်ႇမႃးမိူၼ်ၸိူဝ်ႉၼင်ႇ တူၼ်ႈယႃႈၶူမ် ၵႃႈတီႈတိူၵ်ႇၼႃးၼၼ်ႉဢေႃႈ။- 5ၵူၼ်းဝဵင်းသမႃႇရီႉၸိူဝ်းၼၼ်ႉ တၵ်းဢွၼ်ၵၼ်ၵူဝ်ႁႄပုၼ်ႈဝူဝ်းဢွၼ်ႇပႄႇသဝဵၼ်ႇၸိူဝ်းၼၼ်ႉဢေႃႈ။ တၵႃႇမၼ်းတင်းလၢႆ တၵ်းႁႆႈႁွင်ႉပွင်ႉၶၢင်းလႄႈ ယိတ်ႈပရေႃးႁဵၵ်ႈမၼ်း တင်းလၢႆ တၵ်းဢွၼ်ၵၼ်သၼ်ႇသၼ်ႇဝႆဝႆ ပုၼ်ႈမုၼ်ၽုင်းမၼ်းၼၼ်ႉဢေႃႈ။ လွင်ႈမၼ်းၸမ်ႉ မုၼ်ၽုင်းမၼ်းၼၼ်ႉ ႁၢႆလၢႆၵႂႃႇယဝ်ႉ။- 6မၼ်းတၵ်းလႆႈၶၢမ်ႇတၢင်းဢၼ်ဢဝ်ၵႂႃႇ ၵႃႈတီႈမိူင်းဢႃႇသူႉရီႉလႄႈ သၢၵ်ႈၵၢပ်ႈတီႈၶုၼ်ႁေႃၶမ်း ဢၼ်ၸၢင်ႈတွပ်ႇၸၢင်ႈထဵင်ၼၼ်ႉဢေႃႈ။ ဢေႇၽရိမ်ႇၼၼ်ႉ သရေႇတၵ်းလူႉလႄႈ ဢီႉသရေႇလႃႉၼၼ်ႉ တၵ်းလႆႈဢူၵ်းလႆႈဢၢႆ ၵွပ်ႈပိူဝ်ႈတၢင်းၵျၢမ်ႇတၢင်းပွင်တူဝ်ၸဝ်ႈၵဝ်ႇၼၼ်ႉဢေႃႈ။- 7သမႃႇရီႉၸမ်ႉ၊ ၶုၼ်ႁေႃၶမ်းမၼ်း လႆႈလူႉၵႂႃႇလႄႈ ပဵၼ်ၸိူဝ်ႉၼင်ႇပူၵ်ႇၼမ်ႉ ၵႃႈၼိူဝ်ၼႃႈၼမ်ႉ ၼၼ်ႉဢေႃႈ။- 8ထႃႇၼႃႉတီႈသုင်ဝဵင်းဢႃႇဝိၼ်ႇ တီႈဢၼ်ဢီႉသရေႇလႃႉ ၽိတ်းပိူင်ႈၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ် ၵိူၼ်ႇတူၵ်းပႅတ်ႈလႄႈ တူၼ်ႈၼၢမ်ၵူႈၸိူဝ်ႉၵူႈပိူင် ႁူမ်ႇသုမ်ႇယိတ်ႈပလၢင်ႇ ၶဝ်ၸိူဝ်းၼၼ်ႉဢေႃႈ။ ၶဝ်ၼၼ်ႉတၵ်းလႆႈဢွၼ်ၵၼ် ႁွင်ႉၸူးတီႈလွႆတင်းလၢႆ လႄႈဝႃႈ၊ ဢွၼ်ၵၼ်ႁူမ်ႇသုမ်ႇႁဝ်းသေၵမ်း၊ တီႈၵုင်းတင်းလၢႆလႄႈဝႃႈ၊ ဢွၼ်ၵၼ်တူၵ်းသႂ်ႇ ၵႃႈၼိူဝ်ႁဝ်းသေၵမ်း၊ ဝႃႈၼင်ႇၼႆဢေႃႈ။
ထႃႇဝရႃႉၽြႃးတႅပ်းတတ်းတြႃးၵႃႈၼိူဝ်ၵူၼ်းမဵဝ်းဢီႉသရေႇလႃႉ
9 ဢီႉသရေႇလႃႉဢိူၺ်း၊ မႂ်းမီးဢပႅတ်ႈ ၸဵမ်မိူဝ်ႈၸူဝ်ႈပၢၼ်ဝဵင်းၵီႉပႃႉၼၼ်ႉယဝ်ႉ။ ၶဝ်ဢွၼ်ၵၼ်ၸုၵ်းၵိုတ်းယူႇ ၵႃႈတီႈဝဵင်းၼၼ်ႉဢေႃႈ။- 10ၵူၺ်းၵႃႈ တၢင်းဢၼ်တိုၵ်းၵၼ် တင်းၶဝ်ၸိူဝ်းဢၼ် ႁဵတ်းႁၢႆႉႁဵတ်းမိူၵ်ႈၼၼ်ႉ ၵႃႈတီႈဝဵင်းၵီႉပႃႉၼၼ်ႉ တၵ်းၶိုတ်းထိုင်ၶဝ်ဢမ်ႇၸႂ်ႈႁိုဝ်။ ၵဝ်တၵ်းၸွမ်းၼင်ႇ ဢလူဝ်ႇၵဝ်သေလႄႈ သင်ႇသွၼ်သုင်းမႃႉၶဝ်ဢေႃႈ။ မိူဝ်ႈဢၼ်ၶဝ် မီးတၢင်းဢၼ်မတ်ႉၽုၵ်ႇဝႆႉယူႇ ၵွပ်ႈပိူဝ်ႈဢပႅတ်ႈၶဝ်သွင်ပႃးၼၼ်ႉၸိုင်၊ မဵဝ်းၵူၼ်းတင်းလၢႆ တၵ်းလႆႈ ၸူႉၵၼ်တုမ်ၵၼ်ယူႇၽၢႆႇၼိုင်ႈတင်းၶဝ်ဢေႃႈ။- 11ဢေႇၽရိမ်ႇၼၼ်ႉ ပဵၼ်ဝူဝ်းမႄႈသိုဝ်ႇဢၼ်ပိုၵ်ႉယဝ်ႉ သွၼ်ယဝ်ႉလႄႈ မီးဢလူဝ်ႇ ၶႂ်ႈယဵပ်ႇၶဝ်ႈသေၵေႃႈ၊ ၵဝ်တၵ်းလုပ်ႈၸွမ်း ၽႃၸွမ်းႁိမ်းၶေႃးမၼ်း ဢၼ်ႁၢင်ႈလီၼၼ်ႉလႄႈ ဢဝ်ၵေႃႉဢၼ်ၶီႇတၢင်ႇသႂ်ႇၵႃႈၼိူဝ်ဢေႇၽရိမ်ႇဢေႃႈ။ ယူႉတႃႉၼၼ်ႉ တၵ်းလႆႈထႆယူႇလႄႈ ယႃႇၵုပ်ႈၵေႃႈ တၵ်းလႆႈ ၽႃႇၵွၼ်ႈလိၼ် ၽၢၼ်ႈလိၼ်ယူႇဢေႃႈ။- 12ဢွၼ်ၵၼ်ဝၢၼ်ႇပိုၼ်ၸိူဝ်ႉၽၼ်း တၢင်းဢၼ်သိုဝ်ႈတေႃႇ ပုၼ်ႈတူဝ်ၸဝ်ႈၵဝ်ႇလႄႈ ပၢတ်ႇဢဝ် မၢၵ်ႇဢဝ်ႁူင်းၵရူႉၼႃႇတႃႉ။ ဢွၼ်ၵၼ်ထႆၼႃး တီႈဢၼ်ဢမ်ႇပႆႇတွၼ်ႉႁဵတ်း ၼၼ်ႉတႃႉ။ ၶိင်ႇဢၼ်တၵ်းလႆႈႁႃဢဝ် ထႃႇဝရႃႉၽြႃး တေႃႇထိုင်ႁွတ်ႈ မၼ်းၸဝ်ႈမႃးလႄႈ ႁႂ်ႈၽူၼ်တၢင်းဢၼ်သိုဝ်ႈတေႃႇ တူၵ်းသႂ်ႇၵႃႈၼိူဝ်သူၼၼ်ႉ ႁွတ်ႈထိုင်ယဝ်ႉ။- 13သူလႆႈထႆၼႃး တူႉၸရိူၵ်ႈယဝ်ႉ။ သူလႆႈပၢတ်ႇဢဝ်ၶဝ်ႈ ဢပႅတ်ႈယဝ်ႉ။ သူလႆႈၵိၼ်မၢၵ်ႇၵိၼ်ႁူင်းမူႉသႃႇယဝ်ႉ။ လွင်ႈမၼ်းၸမ်ႉ မႂ်းၸၢင်ႈဢိင်ပိုင်ႈ တၢင်းဢၼ်မႂ်းၵမ်ၵျၢင်ႉသၢင်ႈႁဵတ်း ဢိၵ်ႇတင်းၵူၼ်းသိုၵ်းမႂ်း ဢၼ်ၼမ်ၼႃႇၼၼ်ႉယဝ်ႉ။- 14ပိူဝ်ႈၼႆလႄႈ ၵူၼ်းမႂ်းၸိူဝ်းၼၼ်ႉ တၵ်းဢွၼ်ၵၼ်တူင်ႉတိုၼ်ႇ ဢူၼ်ဢဵၼ်မေႃးမႄးလႄႈ တိူၵ်ႈတီႈတိုၵ်းသိုၵ်းမႂ်းၵႃႈမီးၼၼ်ႉ တၵ်းလူႉလႅဝ်မိူၼ်ၸိူဝ်ႉၼင်ႇဢၼ်ၶုၼ်သႃႇလမၼ်ႇယႃႉၽဵဝ်ႈဝဵင်းပေႇသပေႇလႃႉပႅတ်ႈ ၼႂ်းမိူဝ်ႈဢၼ် တိုၵ်းသိုၵ်းၼၼ်ႉဢေႃႈ။ မႄႈဢိၵ်ႇလူၺ်ႈၵၼ်တင်း လုၵ်ႈမၼ်းလၢင်းမၼ်းၸိူဝ်းၼၼ်ႉ လႆႈၶၢမ်ႇတၢင်းဢၼ် ဢဝ်သွင်ႉသႂ်ႇၽတ်ႉသႂ်ႇ ၵႃႈၼိူဝ်လိၼ်ဢေႃႈ။- 15ၼင်ႇၼၼ်လႄႈ တၵ်းလႆႈႁဵတ်းတီႈသူ ၵႃႈတီႈဝဵင်းပေႇသလႃႉ ၵွပ်ႈပိူဝ်ႈဢပႅတ်ႈ တူႉၸရိူၵ်ႈသူ ဢၼ်ယႂ်ႇၼႃႇလူင်လၢင် ၼၼ်ႉဢေႃႈ။ ၶိင်ႇၵၢင်ၼႂ် ၶုၼ်ႁေႃၶမ်း ဢီႉသရေႇလႃႉတၵ်းလႆႈၶၢမ်ႇတၢင်းဢၼ် ယႃႉၽဵဝ်ႈပႅတ်ႈ မူတ်းမူတ်းသဵင်ႈသဵင်ႈဢေႃႈ။
Currently Selected:
ႁူဝ်းသေႇ 10: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
