ငဝ်ႈၵမ်ႇၽႃႇ 50
50
1မိူဝ်ႈၼၼ်ႉ ယူဝ်းသႅပ်ႈၵူမ်ႈၶုမ်ႇၵႃႈၼိူဝ်ၼႃႈပေႃႈမၼ်းလႄႈႁွင်ႉႁႆႈယူႇ ၸုပ်ႇၼူမ်ယူႇဢေႃႈ။- 2ယူဝ်းသႅပ်ႈမီးဢမိင်ႉတီႈၶႃႈမၼ်းၵူၼ်းမၼ်း ဢၼ်ပဵၼ်မေႃယႃတင်းလၢႆ ႁႂ်ႈၶဝ်ဢဝ်တင်းမဵဝ်းၼၢမ်ႇသႃႇတင်းလၢႆ မႄးႁႅၼ်းတူဝ်တၢႆပေႃႈမၼ်းဝႆႉ ႁႂ်ႈဢမ်ႇလႆႈတူႇလႆႈၼဝ်ႈလႄႈ မေႃယႃၸိူဝ်းၼၼ်ႉ ဢဝ်တင်းမဵဝ်းၼၢမ်ႇသႃႇတင်းလၢႆ မႄးႁႅၼ်းဝႆႉႁႂ်ႈဢမ်ႇလႆႈတူႇလႆႈၼဝ်ႈဢေႃႈ။- 3ၸွမ်းၼင်ႇထုင်းၸၢမ်ႇ မိုဝ်ႉဝၼ်းဢၼ်ဢဝ်တင်းမဵဝ်းၼၢမ်ႇသႃႇ မႄးႁႅၼ်းတူဝ်တၢႆဝႆႉ ႁႂ်ႈဢမ်ႇလႆႈတူႇလႆႈၼဝ်ႈၼၼ်ႉထူၼ်ႈတဵမ်ယဝ်ႉၼၼ်ႉ၊ ထူၼ်ႈတဵမ်သီႇသိပ်းဝၼ်းပုၼ်ႈမၼ်းလႄႈ ၵူၼ်းဢေႇၵိပ်ႉတူႉတင်းလၢႆၼၼ်ႉ ဢွၼ်ၵၼ်ႁဵတ်းတၢင်းဢၼ်ထိုင်ၸႂ်ႁွင်ႉႁႆႈၵွပ်ႈပိူဝ်ႈမၼ်းၼၼ်ႉ ၸဵတ်းသိပ်းဝၼ်းတဵမ်တဵမ်ဢေႃႈ။
4မိူဝ်ႈဢၼ်ဝၼ်းဢၼ်ထိုင်ၸႂ်ႁွင်ႉႁႆႈၼၼ်ႉ ပူၼ်ႉၵႂႃႇယဝ်ႉၼၼ်ႉၸိုင်၊ ယူဝ်းသႅပ်ႈႁွင်ႉဢဝ်ၵူၼ်းၼႂ်းႁေႃၶမ်းၵမ်ႈၽွင်ႈလႄႈ လၢတ်ႈဝႃႈ၊ ပေႃးၵဝ်ၶႃႈလႆႈထူပ်းၵျေးၸူး သိုဝ်ႈၼႃႈတႂ်ႈတႃသူၸဝ်ႈၸိုင်၊ လဝ်ႊလၢတ်ႈထိုင်ႁူၶုၼ်ႁေႃၶမ်းၽႃႇရေႃးလႄႈဝႃႈ၊- 5ပေႃႈၶႃႈၸဝ်ႈႁႂ်ႈၶႃႈၸဝ်ႈတိူင်ႇဝႃႈဝႆႉလႄႈဝႃႈ၊ ၵဝ်တၵ်းတၢႆယဝ်ႉ။ မႂ်းတၵ်းလႆႈဢဝ်ၵဝ်သၢင်းၵျူဝ်ႇၵႃႈၼႂ်းၶုမ်ပႃႇႁဵဝ်ႈဢၼ်ၵဝ်လႆႈ ၶုတ်းဝႆႉယဝ်ႉပုၼ်ႈၵဝ် ၵႃႈတီႈမိူင်းၶႃႇၼၢၼ်ႇပုၼ်ႉဢေႃႈ၊ ဝႃႈၼင်ႇၼႆတီႈၶႃႈယဝ်ႉ။ ပိူဝ်ႈၼႆလႄႈ ၶႅၼ်းတေႃႈပၼ်ဢၶႂၢင်ႉ ႁႂ်ႈၶႃႈၸဝ်ႈလႆႈ ၶိုၼ်ႈၵႂႃႇလႄႈ သၢင်းၵျူဝ်ႇပေႃႈၶႃႈၸဝ်ႈသေယဝ်ႉ၊ သမ်ႉၶိုၼ်းလူင်းမႃးၵႃႈတီႈၼႆႈသေၵမ်းတီႈၶႃႈ၊ ဝႃႈၼင်ႇၼႆသေၵမ်း၊ ဝႃႈၼင်ႇၼႆဢေႃႈ။- 6ၶုၼ်ႁေႃၶမ်းၽႃႇရေႃးၵေႃႈ မီးဢမိင်ႉလႄႈဝႃႈ ၶိုၼ်ႈၵႂႃႇလႄႈသၢင်းၵျူဝ်ႇပေႃႈမႂ်း ၸွမ်းၵႃႈၼင်ႇဢၼ်ႁႂ်ႈမႂ်းတိူင်ႇဝႃႈဝႆႉၼၼ်ႉတႃႉ၊ ဝႃႈၼင်ႇၼႆဢေႃႈ။- 7ယူဝ်းသႅပ်ႈၶိုၼ်ႈၵႂႃႇႁႂ်ႈလႆႈသၢင်းၵျူဝ်ႇပေႃႈမၼ်းလႄႈ၊ ၶႃႈၵူၼ်းၶုၼ်ႁေႃၶမ်းၽႃႇရေႃး ဢၼ်ဝႃႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းႁေႃၶမ်းတင်းသဵင်ႈတင်းလူင် တင်းၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းမိူင်းဢေႇၵိပ်ႉတူႉတင်းသဵင်ႈတင်းလူင်၊- 8ဢိၵ်ႇတင်းၵူၼ်းႁိူၼ်းၵူၼ်းယေးယူဝ်းသႅပ်ႈ တင်းသဵင်ႈတင်းလူင်၊ ၵူၼ်းႁိူၼ်းၵူၼ်းယေးပီႈဢၢႆႈမၼ်း၊ တင်းၵူၼ်းႁိူၼ်းၵူၼ်းယေးပေႃႈမၼ်းတင်းလၢႆၼၼ်ႉ ဢွၼ်ၵၼ်ၸွမ်းၵႂႃႇ လူၺ်ႈၵၼ်တင်းမၼ်းဢေႃႈ။ ၶဝ်ႁႂ်ႈလုၵ်ႈဢွၼ်ႇၶဝ်တင်းၽုင်သူဝ်းၽုင်ဝူဝ်းၶဝ်ၵူၺ်း ၵိုတ်းၵျၢၼ်ႇယူႇ ၵႃႈၼႂ်းမိူင်းၵေႃးသိၼ်ႇၼၼ်ႉဢေႃႈ။- 9ၼင်ႇၼၼ်လႄႈ လေႃႉရထႃးလႂ်၊ ၵူၼ်းသိုၵ်းၶီႇမႃႉလႂ် ဢွၼ်ၵၼ်ၸွမ်းလူၺ်ႈၵၼ်တင်းယူဝ်းသႅပ်ႈၶိုၼ်ႈၵႂႃႇဢေႃႈ။ ပဵၼ်တပ်ႉပဵၼ်တႃႇ ဢၼ်ယႂ်ႇၵႂၢင်ႈၼမ်ၼႃႇလူင်လၢင်ဢေႃႈ။- 10ၶဝ်ႁွတ်ႈထိုင်ၵႃႈတီႈတလၢင်းယဵပ်ႇၶဝ်ႈဢႃႇတတ်ႉဢၼ်မီးယူႇၵႃႈတီႈၽၢႆႇပုၼ်ႉၼမ်ႉႁွင်ႈယေႃးတၢၼ်ႇၼၼ်ႉလႄႈ သမ်ႉဢွၼ်ၵၼ် ႁဵတ်းတၢင်းဢၼ်ပေႃႉဢူၵ်း ႁွင်ႉႁႆႈဢၼ်ယႂ်ႇၼႃႇဢေႃႈ။ ယူဝ်းသႅပ်ႈၼၼ်ႉ ၵွပ်ႈပိူဝ်ႈပေႃႈမၼ်းၼၼ်ႉလႄႈႁဵတ်းတၢင်းဢၼ်ထိုင်ၸႂ်ႁွင်ႉႁႆႈၸဵတ်းဝၼ်းတဵမ်တဵမ်ဢေႃႈ။- 11ၵူၼ်းၶႃႇၼၼီႉဢၼ်ပဵၼ်ၵူၼ်းမိူင်းၼၼ်ႉၸိူဝ်းၼၼ်ႉ ႁၼ်တၢင်းဢၼ်ထိုင်ၸႂ်ႁွင်ႉႁႆႈဢၼ်ႁဵတ်းၵႃႈတီႈတလၢင်းယဵပ်ႇၶဝ်ႈ ဢႃႇတတ်ႉၸိူဝ်ႉၼင်ႇၼၼ်ၼၼ်ႉလႄႈဝႃႈ၊ ပဵၼ်တၢင်းဢၼ်ထိုင်ၸႂ်ႁွင်ႉႁႆႈဢၼ်ယႂ်ႇၼႃႇၵႃႈတီႈၵူၼ်းဢေႇၵိပ်ႉတူႉတင်းလၢႆလူင်ပႄႇ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈ ၶဝ်ႁွင်ႉႁဵၵ်ႈတီႈဢၼ်မီးယူႇၽၢႆႇပုၼ်ႉၼမ်ႉႁွင်ႈယေႃးတၢၼ်ႇၼၼ်ႉၸိုဝ်ႈဢပေးလမီႉၸရိမ်ႇဢေႃႈ။- 12လုၵ်ႈၸၢႆးမၼ်းၸိူဝ်းၼၼ်ႉ ဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ပေႃႈၶဝ်သင်ႇလၢတ်ႈဝႆႉၼၼ်ႉဢေႃႈ။- 13လုၵ်ႈၸၢႆးမၼ်းၸိူဝ်းၼၼ်ႉ ဢွၼ်ၵၼ်ဢဝ်မၼ်းၵႂႃႇၵႃႈတီႈမိူင်းၶႃႇၼၢၼ်ႇလႄႈ သၢင်းၵျူဝ်ႇၵႃႈၼႂ်းႁူးလဝ်ဢၼ်မီးၵႃႈၼႂ်းတူင်ႈၼႃး မၵ်ႉပေႇလႃႉၽၢႆႇဝၼ်းဢွၵ်ႇမမ်ႇရေႇ ဢၼ်ဢႃႇပြႃႇႁၢမ်ႇသိုဝ်ႉဢဝ်ၵႃႈတီႈဢေႇၽရုၼ်ႇၵူၼ်းႁိတ်ႉတီႉ ပုၼ်ႈဢၼ်တၵ်းပဵၼ်ပႃႇႁဵဝ်ႈ ဢၼ်တူဝ်ၸဝ်ႈၵဝ်ႇတၵ်းပိူင်ႇၼၼ်ႉဢေႃႈ။- 14ယူဝ်းသႅပ်ႈသၢင်းၵျူဝ်ႇပေႃႈမၼ်းသေယဝ်ႉ၊ ပႃးဢဝ်ၸႃႉၸဵမ်ပီႈဢၢႆႈမၼ်းတင်းလၢႆလႄႈ ၶဝ်ၸိူဝ်းဢၼ်ၸွမ်းၶိုၼ်ႈၵႂႃႇလူၺ်ႈၵၼ်တင်းမၼ်း ႁႂ်ႈလႆႈသၢင်းၵျူဝ်ႇပေႃႈမၼ်းၸိူဝ်းၼၼ်ႉတင်းသဵင်ႈတင်းလူင် ၶိုၼ်းမိူဝ်းၵႂႃႇၵႃႈတီႈမိူင်းဢေႇၵိပ်ႉတူႉသေဢေႃႈ။
ယူဝ်းသႅပ်ႈပၼ်ႁႅင်းတီႈပီႈၼွင်ႉမၼ်း
15ပီႈၸၢႆးယူဝ်းသႅပ်ႈၸိူဝ်းၼၼ်ႉ ႁၼ်လွင်ႈဢၼ်ပေႃႈၶဝ်တၢႆယဝ်ႉၼၼ်ႉသေယဝ်ႉ၊ လၢတ်ႈလႄႈဝႃႈ၊ ယူဝ်းသႅပ်ႈတၵ်းၸင်းႁဝ်းလႄႈ တွပ်ႇတႅၼ်းပၼ် ၵႃႈဢၼ်ႁဝ်းႁဵတ်းႁုၵ်းႁဵတ်းႁၢႆႉဝႆႉတီႈမၼ်း မိူဝ်ႈဢွၼ်တၢင်းၼၼ်ႉႁိုဝ်ဢမ်ႇႁူႉ၊ ဝႃႈၼင်ႇၼႆလႄႈ၊- 16ပွႆႇၸႂ်ႉၵူၼ်းၵႂႃႇတီႈယူဝ်းသႅပ်ႈလႄႈ လဝ်ႊလၢတ်ႈလႄႈဝႃႈ၊ ပေႃႈၸဝ်ႈႁဝ်းၼၼ်ႉ သင်ႇလၢတ်ႈဝႆႉတီႈၶႃႈၸဝ်ႈတင်းလၢႆ ၸဵမ်မိူဝ်ႈဢၼ်မၼ်းဢမ်ႇပႆႇတၢႆၼၼ်ႉလႄႈဝႃႈ၊- 17သူတၵ်းလႆႈလဝ်ႊလၢတ်ႈတီႈယူဝ်းသႅပ်ႈ ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ပိူဝ်ႈဢၼ်ပီႈဢၢႆႈမႂ်းၸိူဝ်းၼၼ်ႉ လႆႈႁဵတ်းလွင်ႈတၢင်းဢၼ်ဢမ်ႇလီတီႈမႂ်းဝႆႉလႄႈ၊ ပွႆႇလွတ်ႈတၢင်းဢၼ်ၶဝ်ၽိတ်းပိူင်ႈမႂ်းဝႆႉၼၼ်ႉ ဢိၵ်ႇတင်းဢပႅတ်ႈၶဝ်သေၵမ်း၊ ဝႃႈၸိူဝ်ႉၼင်ႇၼႆဝႆႉတီႈၶႃႈလႄႈ၊ တေႃႈလဵဝ်ၼႆႉ ၶႅၼ်းတေႃႈပွႆႇလွတ်ႈတၢင်းဢၼ် ၶႃႈၽြႃးပဵၼ်ၸဝ်ႈပေႃႈၸဝ်ႈႁဝ်းၸိူဝ်းၼႆႉ ၽိတ်းပိူင်ႈၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။ မိူဝ်ႈဢၼ်ၶဝ်လဝ်ႊလၢတ်ႈၸိူဝ်ႉၼင်ႇၼၼ်ၼၼ်ႉၸိုင်၊ ယူဝ်းသႅပ်ႈၼမ်ႉတႃတူၵ်းယူႇဢေႃႈ။- 18ပီႈဢၢႆႈမၼ်းၸိူဝ်းၼၼ်ႉၵေႃႈ ဢွၼ်ၵၼ်ၵႂႃႇလႄႈၶုပ်ႉမူပ်ႇၵႃႈတီႈၽၢႆႇၼႃႈမၼ်းလႄႈ လဝ်ႊလၢတ်ႈလႄႈဝႃႈ၊ တူၺ်းတီႈၶႃႈလူး၊ ၶႃႈၸဝ်ႈၸိူဝ်းၼႆႉ ပဵၼ်ၶႃႈၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 19ယူဝ်းသႅပ်ႈၵေႃႈလၢတ်ႈတီႈၶဝ်လႄႈဝႃႈ၊ ယႃႇပေမႆႈၸႂ်။ ၵဝ်ၶႃႈပဵၼ်တၢင်တူဝ်ၽြႃးပဵၼ်ၸဝ်ႈႁိုဝ်။- 20ပိၵ်ႉသမ်ႉသူၵျၢမ်ႇပွင်တၵ်းႁဵတ်းႁုၵ်းႁဵတ်းႁၢႆႉတီႈၵဝ်ၶႃႈသေၵေႃႈ၊ ၽြႃးပဵၼ်ၸဝ်ႈၼၼ်ႉ ၵျၢမ်ႇပွင်တၵ်းႁဵတ်းၵျေးၸူး ႁႂ်ႈဢသၢၵ်ႈၵူၼ်းၼမ်ၼႃႇ လႆႈၵတ်းယဵၼ်ၶျၢမ်းသႃႇ ၵႃႈၼင်ႇဢၼ်ပဵၼ်ယဝ်ႉ ဝၼ်းမိူဝ်ႈၼႆႉၼၼ်ႉဢေႃႈ။- 21ပိူဝ်ႈၼႆလႄႈ ယႃႇပေမႆႈၸႂ်။ ၵဝ်ၶႃႈတၵ်းလဵင်ႉလူသူ၊ ဢိၵ်ႇတင်းလုၵ်ႈဢွၼ်ႇလၢင်းဢွၼ်ႇသူတင်းလၢႆဢေႃႈ၊ ဝႃႈၼင်ႇၼႆလႄႈ ႁႂ်ႈၶဝ်ပေႇၸႂ် ၼိမ်ၸႂ်မႃးလႄႈ လၢတ်ႈၵႂၢမ်းမႅတ်ႈတႃႇတေႃႇၶဝ်ဢေႃႈ။
တၢင်းတၢႆယူဝ်းသႅပ်ႈ
22ၼင်ႇၼၼ်လႄႈ ယူဝ်းသႅပ်ႈတင်းၵူၼ်းႁိူၼ်းၵူၼ်းယေးပေႃႈမၼ်းၸိူဝ်းၼၼ်ႉယူႇၵႃႈတီႈမိူင်းဢေႇၵိပ်ႉတူႉလႄႈ ယူဝ်းသႅပ်ႈ ၵေႃႈ ဢသၢၵ်ႈၶိုတ်းထိုင်ပၢၵ်ႇပၢႆသိပ်းပီႊဢေႃႈ။- 23ယူဝ်းသႅပ်ႈလႆႈႁၼ်လုၵ်ႈလၢင်းဢေႇၽရိမ်ႇဢေႃႈ။ လုၵ်ႈလၢင်းမႃႇၶီႉရႃႉဢၼ်ပဵၼ်လုၵ်ႈၸၢႆးမၼႃႇသေႇၼၼ်ႉၵေႃႈ လႆႈၵိူတ်ႇလဵင်ႉၵႃႈၼိူဝ်ႁူဝ်ၶဝ်ႇမၼ်းဢေႃႈ။
24 ယူဝ်းသႅပ်ႈၵေႃႈ လၢတ်ႈတီႈပီႈဢၢႆႈမၼ်းၸိူဝ်းၼၼ်ႉလႄႈဝႃႈ၊ ၵဝ်ၶႃႈတၵ်းတၢႆယဝ်ႉ။ ၽြႃးပဵၼ်ၸဝ်ႈတၵ်းမႃးလူမႃးတူၺ်းသူဢမၢၼ်ႇၶၼ်ပဵၼ်လႄႈ ဢဝ်သူဢွၵ်ႇသေၵႃႈၼႂ်းမိူင်းၼႆႉၵႂႃႇ ႁႂ်ႈႁွတ်ႈထိုင်ၵႃႈတီႈမိူင်းဢၼ်မၼ်းၸဝ်ႈတိူင်ႇဝႃႈဝႆႉ တီႈဢႃႇပြႃႇႁၢမ်ႇ၊ ဢီႉၸၢၵ်ႈ တင်းယႃႇၵုပ်ႈၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။- 25ၵမ်းၼၼ်ႉ ယူဝ်းသႅပ်ႈ၊ ႁႂ်ႈၵူၼ်းမဵဝ်းဢီႉသရေႇလႃႉတင်းလၢႆ ႁဵတ်းတၢင်းဢၼ်ၵိၼ်ႇဝႃႈလႄႈဝႃႈ၊ ၽြႃးပဵၼ်ၸဝ်ႈတၵ်းမႃးလူမႃးတူၺ်းသူဢမၢၼ်ႇၶၼ်ပဵၼ်ဢေႃႈ။ သူတၵ်းလႆႈဢဝ်လုပ်ႇဢဝ်လၢဝ်ႈၵဝ်ၶႃႈ ဢွၵ်ႇသေၵႃႈၼႂ်းမိူင်းၼႆႉ ၶိုၼ်းၶိုၼ်ႈၵႂႃႇဢေႃႈ၊ ဝႃႈၼင်ႇၼႆဢေႃႈ။- 26ၼင်ႇၼၼ်လႄႈ ယူဝ်းသႅပ်ႈဢသၢၵ်ႈလႆႈပၢၵ်ႇပၢႆသိပ်းပီႊလႄႈ တၢႆသေဢေႃႈ။ ၶဝ်ဢဝ်တင်းမဵဝ်းၼၢမ်ႇသႃႇတင်းလၢႆ မႄးႁႅၼ်းတူဝ်တၢႆမၼ်းဝႆႉ ႁႂ်ႈဢမ်ႇလႆႈတူႇလႆႈၼဝ်ႈသေယဝ်ႉ၊ ဢဝ်သႂ်ႇဝႆႉၵႃႈၼႂ်းၵွမ်ႇ ၵႃႈတီႈမိူင်းဢေႇၵိပ်ႉတူႉဢေႃႈ။
ၵျၢမ်းငဝ်ႈၵမ်ႇၽႃႇယဝ်ႉယဝ်ႉဢေႃႈ။
Currently Selected:
ငဝ်ႈၵမ်ႇၽႃႇ 50: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
