ငဝ်ႈၵမ်ႇၽႃႇ 48

ယႃႇၵုပ်ႈပၼ်တၢင်းလီဢေႇၽရိမ်ႇတင်းမၼႃႇသေႇ

1လိုၼ်းၼၼ်ႉၵူၼ်းၵေႃႉၼိုင်ႈမွၵ်ႇလၢတ်ႈတီႈယူဝ်းသႅပ်ႈလႄႈဝႃႈ၊ တူၺ်းၶႃႈလူး၊ ပေႃႈၸဝ်ႈႁဝ်းမီးတၢင်းၶႆႈတၢင်းပဵၼ်ယူႇၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းပႃးဢဝ်မၼႃႇသေႇတင်းဢေႇၽရိမ်ႇ လုၵ်ႈၸၢႆးမၼ်းသွင်ၵေႃႉလႄႈၵႂႃႇဢေႃႈ။- 2ၵူၼ်းၵေႃႉၼိုင်ႈမွၵ်ႇလၢတ်ႈတီႈယႃႇၵုပ်ႈလႄႈဝႃႈ၊ တူၺ်းၶႃႈလူး၊ လုၵ်ႈၸၢႆးၸဝ်ႈႁဝ်းယူဝ်းသႅပ်ႈၼၼ်ႉမႃးၸူးတီႈၸဝ်ႈႁဝ်းဢေႃႈ၊ ဝႃႈၼင်ႇၼႆသေယဝ်ႉ၊ ဢီႉသရေႇလႃႉဢဝ်ႁႅင်းလႄႈလုၵ်ႉၼင်ႈယူႇၵႃႈၼိူဝ်တီႈၼွၼ်းမၼ်းဢေႃႈ။- 3မိူဝ်ႈၼၼ်ႉယႃႇၵုပ်ႈလၢတ်ႈတီႈယူဝ်းသႅပ်ႈလႄႈဝႃႈ၊ ၽြႃးပဵၼ်ၸဝ်ႈ၊ ၸဝ်ႈဢၼၼ်ႇတႃႉတၼ်းၶူဝ်းပေႃႇမႃးတီႈၵဝ်ၵႃႈတီႈဝဵင်းလူႉၸႃႉ မိူင်းၶႃႇၼၢၼ်ႇပုၼ်ႉလႄႈ ပၼ်တၢင်းလီတီႈၵဝ်လႄႈဝႃႈ၊- 4ၵဝ်တၵ်းႁႂ်ႈမႂ်းၵိူတ်ႇလဵင်ႉလုၵ်ႈလဵင်ႉလၢင်းလႄႈယႂ်ႇၽႄႈၼမ်ၵိုၼ်းမႃးဢေႃႈ။ တၵ်းႁႂ်ႈမႂ်းပဵၼ် ၵူၼ်းမဵဝ်းၼမ်ၼႃႇဢေႃႈ။ ၵဝ်တၵ်းပၼ်မိူင်းၼႆႉတီႈၸိူဝ်ႉၶိူဝ်းမႂ်းလိုၼ်းမႂ်းၼၼ်ႉ ႁႂ်ႈၶဝ်လႆႈပိူင်ႇယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆဢေႃႈ။- 5တေႃႈလဵဝ်ၼႆႉ လုၵ်ႈၸၢႆးဢၼ်မႂ်းလႆႈၼႂ်းမိူင်းဢေႇၵိပ်ႉတူႉဝႆႉ ၸူဝ်ႈဢၼ်ၵဝ်ဢမ်ႇပႆႇႁွတ်ႈမႃးၵႃႈတီႈမိူင်းဢေႇၵိပ်ႉတူႉၼႆႉ သွင်ၵေႃႉၼၼ်ႉ တၵ်းလႆႈပဵၼ်လုၵ်ႈၸၢႆးၵဝ်ဢေႃႈ။ ဢေႇၽရိမ်ႇတင်းမၼႃႇသေႇၼၼ်ႉ တၵ်းလႆႈပဵၼ်လုၵ်ႈၸၢႆးၵဝ် မိူၼ်ၸိူဝ်ႉၼင်ႇရူႉပိၼ်ႇ တင်းသီႉမုၼ်ႇၸိူဝ်းၼၼ်ႉဢေႃႈ။- 6လုၵ်ႈၸၢႆးဢၼ်မႂ်းတၵ်းလႆႈၵမ်းလိုၼ်းၼၼ်ႉ တၵ်းလႆႈပဵၼ်လုၵ်ႈၸၢႆးမႂ်းလႄႈ ၶၢမ်ႇတၢင်းဢၼ်ႁွင်ႉႁဵၵ်ႈၸွမ်းၸိုဝ်ႈသဵင်ပီႈၸၢႆးၶဝ်ၼႂ်းလွင်ႈတၢင်းဢၼ်ၶဝ်ၶၢမ်ႇဢမူၺ်ႇၼၼ်ႉဢေႃႈ။- 7မိူဝ်ႈၵႃႇလႃႉယၢမ်းဢၼ်ၵဝ်ၼႆႉ လုၵ်ႉသေၵႃႈတီႈပႃႇတမ်ႇမႃးၼၼ်ႉ၊ ရႃႇၶေႇလႃႉတၢႆၵႃႈတီႈႁိမ်းၵဝ်ၵႃႈတီႈမိူင်းၶႃႇၼၢၼ်ႇ ၵႃႈၼႂ်းသဵၼ်ႈတၢင်း မိူဝ်ႈဢၼ်လူဝ်ႇထႅင်ႈဢိတ်းၼိုင်ႈ တၵ်းႁွတ်ႈထိုင်ဝဵင်းဢေႇၽရတ်ႉၼၼ်ႉဢေႃႈ။ ၵဝ်သၢင်းၵျူဝ်ႇမၼ်းၵႃႈတီႈၼၼ်ႈ ၵႃႈႁိမ်းသဵၼ်ႈတၢင်းဢၼ်ၵႂႃႇၸူးၵႃႈတီႈဝဵင်းဢေႇၽရတ်ႉဢၼ်လႆႈၸိုဝ်ႈ ပႅတ်ႉလႁႅမ်ႇၼၼ်ႉဢေႃႈ။

8ၵမ်းၼၼ်ႉ ဢီႉသရေႇလႃႉ လူတူၺ်းလုၵ်ႈၸၢႆးယူဝ်းသႅပ်ႈၸိူဝ်းၼၼ်ႉသေလႄႈထၢမ်ဝႃႈ၊ ၶဝ်ၼႆႉၸမ်ႉ၊ ပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊- 9ယူဝ်းသႅပ်ႈၵေႃႈလၢတ်ႈတီႈပေႃႈမၼ်းလႄႈဝႃႈ၊ ပဵၼ်လုၵ်ႈၸၢႆးၵဝ်ၶႃႈဢၼ်ၽြႃးပဵၼ်ၸဝ်ႈဢဵတ်းလူပၼ်တီႈၵဝ်ၶႃႈ ၵႃႈၼႂ်းတီႈၼႆႈၼၼ်ႉၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းၵေႃႈလၢတ်ႈလႄႈဝႃႈ၊ ဢဝ်ၶဝ်မႃးၸူးတီႈၵဝ်တႃႉ။ ၵဝ်တၵ်းပၼ်တၢင်းလီတီႈၶဝ်ဢေႃႈ၊ ဝႃႈၼင်ႇၼႆဢေႃႈ။- 10မၢၵ်ႇတႃ ဢီႉသရေႇလႃႉၼၼ်ႉမူဝ်းၵႂႃႇထၼ်ႈပေႃးမၼ်းဢမ်ႇႁၼ်လႆႈ ၵွပ်ႈပိူဝ်ႈဢၼ်ဢသၢၵ်ႈမၼ်းယႂ်ႇၼႃႇၼၼ်ႉလႄႈ ယူဝ်းသႅပ်ႈ ဢဝ်လုၵ်ႈၸၢႆးၸိူဝ်းၼၼ်ႉ သုတ်ႉၸူးမၼ်းၸမ်ၸမ်သေယဝ်ႉ၊ မၼ်းၸုပ်ႇၼူမ်ၶဝ်လႄႈ ၵွတ်ႇဢုမ်ႈၶဝ်ဢေႃႈ။- 11ဢီႉသရေႇလႃႉၵေႃႈလၢတ်ႈတီႈယူဝ်းသႅပ်ႈလႄႈဝႃႈ၊ ၵဝ်ဢမ်ႇထၢင်ႇၵဝ်တၵ်းလႆႈႁၼ်ၼႃႈမႂ်းယဝ်ႉ။ ၵူၺ်းၵႃႈ တေႃႈလဵဝ်ၼႆႉ ၸိူဝ်ႉၶိူဝ်းမႂ်းၵေႃႈ ၽြႃးပဵၼ်ၸဝ်ႈၼႄပျႃးတီႈၵဝ်ယဝ်ႉ၊ ဝႃႈၼင်ႇၼႆဢေႃႈ။- 12ယူဝ်းသႅပ်ႈၵေႃႈဢဝ်သွင်ၶႃၼၼ်ႉဢွၵ်ႇသေၵႃႈတီႈၼႂ်းၵႄႈႁူဝ်ၶဝ်ႇမၼ်းလႄႈ ၵူမ်ႈၵွမ်းႁူဝ်ၵႃႈၼိူဝ်လိၼ်ယူႇဢေႃႈ။- 13ၵမ်းၼၼ်ႉ ယူဝ်းသႅပ်ႈ ဢဝ်သွင်ၶႃၼၼ်ႉလႄႈ ဢဝ်မိုဝ်းၶွၼ်ၶႂႃမၼ်းယိပ်းဢဝ်ဢေႇၽရိမ်ႇပၼ်တီႈၽၢႆႇၶွၼ်သၢႆႉဢီႉသရေႇလႃႉ၊ ဢဝ်မိုဝ်းၶွၼ်သၢႆႉမၼ်းယိပ်းဢဝ်မၼႃႇသေႇ ပၼ်တီႈၽၢႆႇၶွၼ်ၶႂႃဢီႉသရေႇလႃႉလႄႈ ဢဝ်သုတ်ႉၸူးၸမ်ၸမ်ဢေႃႈ။- 14ဢီႉသရေႇလႃႉၼၼ်ႉယိုၼ်ႈမိုဝ်းၶွၼ်ၶႂႃမၼ်းလႄႈ တၢင်ႇသႂ်ႇၵႃႈၼိူဝ်ႁူဝ်ဢေႇၽရိမ်ႇၵေႃႉဢၼ်ဢသၢၵ်ႈလဵၵ်ႉၼၼ်ႉသေယဝ်ႉ၊ ဢဝ်မိုဝ်းၶွၼ်သၢႆႉမၼ်း တၢင်ႇသႂ်ႇၵႃႈၼိူဝ်ႁူဝ်မၼႃႇသေႇဢေႃႈ။ လွင်ႈမၼ်းၸမ်ႉ ပိၵ်ႉသမ်ႉမၼႃႇသေႇပဵၼ်လုၵ်ႈတူၼ်ႈသေၵေႃႈ၊ ဢီႉသရေႇလႃႉ မီးတင်းတၢင်းဢၼ်ႁူႉတူဝ်ၸဝ်ႈၵဝ်ႇယူႇသေလႄႈ ဝႆႉမိုဝ်းမၼ်းဢေႃႈ။- 15မၼ်းၵေႃႈပၼ်တၢင်းလီတီႈယူဝ်းသႅပ်ႈလႄႈလၢတ်ႈဝႃႈ၊ ႁႂ်ႈၽြႃးပဵၼ်ၸဝ်ႈဢၼ်ပေႃႈၵဝ်ဢႃႇပြႃႇႁၢမ်ႇတင်းဢီႉၸၢၵ်ႈ ၵႂႃႇမႃးယူႇ ၵႃႈတီႈၽၢႆႇၼႃႈမၼ်းၸဝ်ႈ၊ ၽြႃးပဵၼ်ၸဝ်ႈဢၼ်လဵင်ႉလူၵဝ် ၸူဝ်ႈဢသၢၵ်ႈတေႃႇထိုင်ႁွတ်ႈဝၼ်းမိူဝ်ႈၼႆႉ ဢၼ်ဝႃႈ၊- 16တမၢၼ်ႇၵၢင်ႁၢဝ်ဢၼ်ၵႄႇၶျွတ်ႈဢဝ်ၵဝ်သေၵႃႈၼႂ်း ဢၼ်ဢမ်ႇလီဢမ်ႇငၢမ်းတင်းသဵင်ႈတင်းလူင်ၼၼ်ႉ ပၼ်တၢင်းလီတီႈလုၵ်ႈဢွၼ်ႇၸိူဝ်းၼႆႉသေၵမ်းလူၺ်ႈ။ ႁႂ်ႈဢဝ်တင်းၼႃႇမႃႉၸိုဝ်ႈသဵင်ၵဝ်ဢိၵ်ႇတင်း ၼႃႇမႃႉၸိုဝ်ႈသဵင်ပေႃႈၵဝ်ဢႃႇပြႃႇႁၢမ်ႇ တင်းဢီႉၸၢၵ်ႈၸိူဝ်းၼၼ်ႉ ထၢပ်ႈထႅင်ႈလႄႈ ႁွင်ႉႁဵၵ်ႈသွင်ၶႃၼႆႉသေၵမ်းလူၺ်ႈ။ ႁႂ်ႈၶဝ်ယႂ်ႇၽႄႈၼမ်ၵိုၼ်းမႃး ၵႃႈၼိူဝ်လိၼ်မိူင်းၼႆႉသေၵမ်းလူၺ်ႈ၊ ဝႃႈၼင်ႇၼႆဢေႃႈ။

17 ယူဝ်းသႅပ်ႈၼၼ်ႉႁၼ်ပေႃႈမၼ်း ဢဝ်မိုဝ်းၶွၼ်ၶႂႃတၢင်ႇသႂ်ႇၵႃႈၼိူဝ်ႁူဝ်ဢေႇၽရိမ်ႇၼၼ်ႉသေယဝ်ႉ၊ ဢမ်ႇၶိုတ်းၸႂ်ပဵင်းၸႂ်လႄႈယုၵ်ႉဢဝ်မိုဝ်းပေႃႈမၼ်းၼၼ်ႉသေၵႃႈၼိူဝ်ႁူဝ်ဢေႇၽရိမ်ႇ ႁႂ်ႈလႆႈၶၢႆႉၵႂႃႇတၢင်ႇသႂ်ႇၵႃႈၼိူဝ်ႁူဝ်မၼႃႇသေႇၼၼ်ႉဢေႃႈ။- 18ယူဝ်းသႅပ်ႈလၢတ်ႈတီႈပေႃႈမၼ်းလႄႈဝႃႈ၊ ဢမ်ႇၸႂ်ႈၶႃႈပေႃႈဢိူၺ်း၊ ၵေႃႉၼႆႉပဵၼ်လုၵ်ႈတူၼ်ႈၶႃႈဢေႃႈ။ ဢဝ်မိုဝ်းၶွၼ်ၶႂႃပေႃႈႁဝ်းတၢင်ႇသႂ်ႇၵႃႈၼိူဝ်ႁူဝ်မၼ်းသေၵမ်း၊ ဝႃႈၼင်ႇၼႆဢေႃႈ။- 19ပေႃႈမၼ်းၼၼ်ႉထဵင်ပႅတ်ႈလႄႈဝႃႈ၊ ၵဝ်ႁူႉယူႇဢေႃႈ၊ လုၵ်ႈၸၢႆးၵဝ်ဢိူၺ်း၊ ၵဝ်ႁူႉယူႇဢေႃႈ။ မၼ်းတၵ်းပဵၼ်မုၵ်ႉၵူၼ်းၸိူဝ်းၵူၼ်းလႄႈယႂ်ႇမျၢတ်ႈၼႃႇဢေႃႈ။ ၵူၺ်းၵႃႈ ၼွင်ႉၸၢႆးမၼ်းယဵင်ႈၶႅၼ်းတၵ်းယႂ်ႇမျၢတ်ႈၼႃႇသေမၼ်းဢေႃႈ။ ၸိူဝ်ႉၶိူဝ်းမၼ်းၵေႃႈတၵ်းလႆႈပဵၼ်ၵူၼ်းမဵဝ်းၼမ်ၼႃႇဢေႃႈ၊ ဝႃႈၼင်ႇၼႆဢေႃႈ။- 20လႆႈသမ်ႉ ၼႂ်းဝၼ်းၼၼ်ႉမၼ်းပၼ်တၢင်းလီတီႈၶဝ်လႄႈဝႃႈ၊ ၼႂ်းမႂ်းၼႆႉ ၵူၼ်းဢီႉသရေႇလႃႉတင်းလၢႆ တၵ်းပၼ်တၢင်းလီလႄႈ လၢတ်ႈဝႃႈ၊ ႁႂ်ႈၽြႃးပဵၼ်ၸဝ်ႈ ႁႂ်ႈမႂ်းပဵၼ်ၸိူဝ်ႉၼင်ႇဢေႇၽရိမ်ႇဢိၵ်ႇတင်း ၸိူဝ်ႉၼင်ႇမၼႃႇသေႇၼၼ်ႉသေၵမ်းလူၺ်ႈ၊ ဝႃႈၼင်ႇၼႆဢေႃႈ၊ ဝႃႈၼင်ႇၼႆသေယဝ်ႉ၊ ၶျႃးပၼ်ဢေႇၽရိမ်ႇဢွၼ်တၢင်း မၼႃႇသေႇ ၸိူဝ်ႉၼင်ႇၼၼ်ဢေႃႈ။- 21ဢီႉသရေႇလႃႉၵေႃႈလၢတ်ႈတီႈယူဝ်းသႅပ်ႈလႄႈဝႃႈ၊ ၵဝ်တၵ်းတၢႆယဝ်ႉဢေႃႈ။ ၵူၺ်းၵႃႈ ၽြႃးပဵၼ်ၸဝ်ႈတၵ်းမီးယူႇလူၺ်ႈၵၼ်တင်းမႂ်းလႄႈ သမ်ႉဢဝ်မႂ်းႁႂ်ႈၶိုၼ်းမိူဝ်းၵႂႃႇၸူး ၵႃႈတီႈမိူင်းတီႈဢၼ်ပူႇမွၼ်ႇမႂ်းယူႇၼၼ်ႉဢေႃႈ။- 22လိူဝ်သေၼၼ်ႉ၊ ၵဝ်ဢဝ်ပုၼ်ႈတႃႇဢၼ်ၵဝ်ပၼ်တီႈမႂ်း ယဵင်ႈၶႅၼ်းလိူဝ်တွၼ်းၼႃႇသေၵဝ်ပၼ်တီႈ ပီႈဢၢႆႈမႂ်းၸိူဝ်းၼၼ်ႉ ဢၼ်ၵဝ်ဢဝ်တင်းလၢပ်ႇၵဝ်ၵၢင်ႇၵဝ်ၼုၵ်ႈဢဝ်ၵႃႈၼႂ်းမိုဝ်းၵူၼ်း ဢႃႇမေႃးရီႉၸိူဝ်းၼၼ်ႉ ပၼ်တီႈမႂ်းဢေႃႈ၊ ဝႃႈၼင်ႇၼႆဢေႃႈ။

Currently Selected:

ငဝ်ႈၵမ်ႇၽႃႇ 48: CBMS

Highlight

Compare

Copy