ငဝ်ႈၵမ်ႇၽႃႇ 43
43
ပီႈဢၢႆႈယူဝ်းသႅပ်ႈၶဝ်ၶိုၼ်းၵႂႃႇမိူင်းဢေႇၵိပ်ႉတူႉပွၵ်ႈတီႈသွင်
1ၵႃႈတီႈမိူင်းၶႃႇၼၢၼ်ႇၼၼ်ႉ ၶဝ်ႈၵႃႈမၢၵ်ႇပႅင်းၼႃႇလူင်လၢင်လႄႈ၊- 2မိူဝ်ႈဢၼ်ၶဝ်ၵိၼ်ၶဝ်ႈၵျုင်ႇဢၼ်ၶဝ်ဢဝ်ၵႃႈတီႈမိူင်းဢေႇၵိပ်ႉတူႉမႃးၼၼ်ႉ သဵင်ႈယဝ်ႉၼၼ်ႉၸိုင်၊ ပေႃႈၶဝ်ၵေႃႈလၢတ်ႈ တီႈၶဝ်လႄႈဝႃႈ၊ သမ်ႉၵႂႃႇလႄႈ သိုဝ်ႉဢဝ်ပုၼ်ႈဢၼ်ႁဝ်းတၵ်းၵိၼ်မႃးထႅင်ႈသေဢိတ်းတႃႉ၊ ဝႃႈၼင်ႇၼႆဢေႃႈ။- 3ယူႉတႃႉၵေႃႈၶိုၼ်းလၢတ်ႈတီႈမၼ်းလႄႈဝႃႈ၊ ၵေႃႉၼၼ်ႉလွၵ်ႇငိုတ်ႈတီႈႁဝ်းၶႃႈၼႃႇလူင်လၢင်လႄႈ လၢတ်ႈလႄႈဝႃႈ၊ ပေႃးၼွင်ႉၸၢႆးသူ ဢမ်ႇပႃးလူၺ်ႈၵၼ်တင်းသူၸိုင်၊ သူဢမ်ႇလႆႈႁၼ်ၼႃႈၵဝ်ၵူၺ်ႉ၊ ဝႃႈၼင်ႇၼႆဝႆႉၶႃႈယဝ်ႉ။- 4ပေႃးပေႃႈႁဝ်း ပွႆႇၸႂ်ႉၼွင်ႉၸၢႆးႁဝ်းၶႃႈ ၵႂႃႇလူၺ်ႈၵၼ်တင်းႁဝ်းၶႃႈၸိုင်၊ ႁဝ်းၶႃႈတၵ်းလူင်းၵႂႃႇလႄႈ သိုဝ်ႉဢဝ်ပုၼ်ႈဢၼ်ပေႃႈႁဝ်း တၵ်းၵိၼ်မႃးၶႃႈဢေႃႈ။- 5ပေႃးပေႃႈႁဝ်းဢမ်ႇပွႆႇၸႂ်ႉမၼ်းၵႂႃႇၸိုင်၊ ႁဝ်းၶႃႈဢမ်ႇလူင်းၵႂႃႇၶႃႈၵူၺ်ႉ။ လွင်ႈမၼ်းၸမ်ႉ ၵေႃႉၼၼ်ႉလၢတ်ႈလႄႈဝႃႈ၊ ပေႃးၼွင်ႉၸၢႆးသူ ဢမ်ႇပႃးလူၺ်ႈၵၼ်တင်းသူၸိုင်၊ သူဢမ်ႇလႆႈႁၼ်ၼႃႈၵဝ်ၵူၺ်ႉ၊ ဝႃႈၼင်ႇၼႆဝႆႉၶႃႈယဝ်ႉ၊ ဝႃႈၼင်ႇၼႆဢေႃႈ။- 6ဢီႉသရေႇလႃႉၵေႃႈ၊ လၢတ်ႈလႄႈဝႃႈ၊ ႁဵတ်းႁိုဝ်လႄႈသူလၢတ်ႈလွင်ႈဢၼ်သူယင်းမီးၼွင်ႉၸၢႆးၼၼ်ႉတီႈၵေႃႉၼၼ်ႉလႄႈ ၼိၵ်ႈၸၢၵ်ႈငႅၼ်းသႄးၵဝ်ၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 7ၶဝ်ၵေႃႈၶိုၼ်းလၢတ်ႈလႄႈဝႃႈ၊ ၵေႃႉၼၼ်ႉၸႅတ်ႈထၢမ်လွင်ႈႁဝ်းၶႃႈ ဢိၵ်ႇတင်းလွင်ႈၸိူဝ်ႉၶိူဝ်းႁဝ်းၶႃႈၼႃႇလူင်လၢင်လႄႈဝႃႈ၊ ပေႃႈသူဢသၢၵ်ႈယင်းလိပ်းယူႇႁိုဝ်။ သူမီးၼွင်ႉၸၢႆးထႅင်ႈလူးၵွၼ်ႇႁိုဝ်။ ဝႃႈၼင်ႇၼႆသေယဝ်ႉ၊ ႁဝ်းၶႃႈလႆႈၶိုၼ်းလၢတ်ႈလႄႈ ၸွမ်းသၽေႃး ၵႂၢမ်းၼႆႉၶႃႈဢေႃႈ။ ႁဝ်းၶႃႈတၵ်းႁူႉလွင်ႈဢၼ်မၼ်းတၵ်းလၢတ်ႈလႄႈဝႃႈ၊ ပႃးဢဝ်ၼွင်ႉၸၢႆးသူလူင်းမႃးတႃႉ၊ ဝႃႈၼင်ႇၼႆၼၼ်ႉ လႆႈဢမၢၼ်ႇၶၼ်ပဵၼ်ၶႃႈႁိုဝ်။ ဝႃႈၼင်ႇၼႆဢေႃႈ။- 8ယူႉတႃႉၵေႃႈ သမ်ႉလၢတ်ႈတီႈပေႃႈမၼ်းဢီႉသရေႇလႃႉၼၼ်ႉထႅင်ႈလႄႈဝႃႈ၊ ပွႆႇၸႂ်ႉလုၵ်ႈဢွၼ်ႇၼႆႉ ၵႂႃႇလူၺ်ႈၵၼ်တင်းၵဝ်ၶႃႈသေၵမ်း။ ပေႃးႁဵတ်းၸိူဝ်ႉၼင်ႇၼၼ်၊ လွင်ႈၼင်ႇႁိုဝ်ၸႃႉၸဵမ်ပေႃႈႁဝ်းလႄႈ ႁဝ်းၶႃႈဢိၵ်ႇတင်းလုၵ်ႈဢွၼ်ႇႁဝ်းၶႃႈၸိူဝ်းၼႆႉ တၵ်းဢမ်ႇလႆႈတၢႆလႄႈ ဢသၢၵ်ႈတၵ်းလိပ်းယူႇၸိုင်၊ ႁဝ်းၶႃႈတၵ်းဢွၼ်ၵၼ်လုၵ်ႉလႄႈၵႂႃႇထႅင်ႈၶႃႈဢေႃႈ။- 9ၵဝ်ၶႃႈတၵ်းပဵၼ်ၵေႃႉဢၼ်ႁပ်ႉတုင်းဢဝ်မၼ်းၶႃႈဢေႃႈ။ ယွၼ်းဢဝ်မၼ်းၵႃႈၼႂ်းမိုဝ်းၵဝ်ၶႃႈသေၵမ်း။ ပေႃးၵဝ်ၶႃႈဢမ်ႇဢဝ်မၼ်းၶိုၼ်းမႃးလႄႈဢမ်ႇဢဝ်မၼ်းၶိုၼ်းဝႆႉၵႃႈတီႈၽၢႆႇၼႃႈပေႃႈႁဝ်းၸိုင်၊ ႁႂ်ႈၵဝ်ၶႃႈလႆႈၶၢမ်ႇဢပႅတ်ႈတီႈပေႃႈႁဝ်းယူႇတႃႇသေႇဢမ်ႇထၢတ်ႇသေၵမ်းလူၺ်ႈ။- 10သင်ႁဝ်းၶႃႈဢမ်ႇႁဵတ်းထိူင်းႁဵတ်းၼၢၼ်းယူႇထၢၼ်ႇၼႆႉၸိုင်၊ တၵ်းၶိုၼ်းႁွတ်ႈမႃးထူၼ်ႈထိုင်သွင်ပွၵ်ႈယဝ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။
11ပေႃႈၶဝ်ဢီႉသရေႇလႃႉၼၼ်ႉၵေႃႈလၢတ်ႈတီႈၶဝ်လႄႈဝႃႈ၊ ပေႃးပဵၼ်ၸိူဝ်ႉၼင်ႇၼႆၸိုင်၊ ႁဵတ်းၸိူဝ်ႉၼင်ႇၼႆတႃႉ။ ဢွၼ်ၵၼ်ဢဝ်လွင်ႈတၢင်းဢၼ်လီသေပိူၼ်ႈၵႃႈတီႈမိူင်းၶႃႇၼၢၼ်ႇၼႆႉ ဢၼ်ဝႃႈ ယၢင်ပႃႇလၸမ်ႇဢိတ်းၼိုင်ႈ၊ ၼမ်ႉၽိုင်ႈဢိတ်းၼိုင်ႈ၊ ၼၢမ်ႇသႃႇလႂ်၊ ယၢင်မူႉရၼ်ႇလႂ်၊ မၢၵ်ႇတူပ်းတင်းမၢၵ်ႇပႃႇတမ်ႇလႂ် သႂ်ႇၵႃႈၼႂ်းထူင်သူသေလႄႈ ၵႂႃႇႁႂ်ႈလႆႈႁဵတ်းလၢၵ်ႈသွင်ႇတီႈၵေႃႉၼၼ်ႉတႃႉ။- 12ၵႃႈၼႂ်းမိုဝ်းသူၵေႃႈ ပႃးဢဝ်ငိုၼ်းသွင်ပုၼ်ႈၵႂႃႇတႃႉ။ ငိုၼ်းဢၼ်ပႃးမႃးၼႂ်းထူင်သူၼၼ်ႉၵေႃႈ၊ သမ်ႉၶိုၼ်းပႃးဢဝ်ၵႃႈၼႂ်းမိုဝ်း သူၵႂႃႇလူးၵွၼ်ႇတႃႉ။ လွင်ႈတၢင်းၼႆႉၸၢင်ႈၶႄးပဵၼ် လွင်ႈတၢင်းဢၼ်ဢမ်ႇမီးသတီႉဢေႃႈ။- 13ၼွင်ႉၸၢႆးသူၵေႃႈ ဢဝ်လႄႈဢွၼ်ၵၼ်လူင်းၵႂႃႇၵႃႈတီႈၵေႃႉၼၼ်ႉတႃႉ။- 14လွင်ႈၼင်ႇႁိုဝ်ၵေႃႉၼၼ်ႉတၵ်းပွႆႇပီႈဢၢႆႈသူ ၵေႃႉၼၼ်ႉ ဢိၵ်ႇတင်းပိၼ်ႇယႃႇမိၼ်ႇမႃးၸိုင်၊ ၶႅၼ်းတေႃႈႁႂ်ႈၽြႃးပဵၼ်ၸဝ်ႈ၊ ၸဝ်ႈဢၼၼ်ႇတႃႉတၼ်းၶူဝ်းၼၼ်ႉဢဵတ်းလူပၼ်ဢၶႂၢင်ႉတၢင်းဢၼ်သူလႆႈထူပ်း ၵျေးၸူးသိုဝ်ႈၼႃႈတႂ်ႈတႃၵေႃႉၼၼ်ႉသေၵမ်းလူၺ်ႈ။ ၵူၺ်းၵႃႈ ပေႃးၵဝ်လႆႈၶၢမ်ႇတၢင်းဢၼ် လုၵ်ႈၸၢႆးၵဝ်တင်းလၢႆသုမ်းၸိုင်၊ ၵဝ်တၵ်းလႆႈၶၢမ်ႇယဝ်ႉ၊ ဝႃႈၼင်ႇၼႆလႄႈ၊- 15ၶဝ်ၼၼ်ႉၵေႃႈ၊ ဢွၼ်ၵၼ်ဢဝ်လၢၵ်ႈသွင်ႇၼၼ်ႉဢိၵ်ႇတင်းငိုၼ်းသွင်ပုၼ်ႈၵႃႈၼႂ်းမိုဝ်းၶဝ်တင်းပိၼ်ႇယႃႇမိၼ်ႇလုၵ်ႉသေယဝ်ႉ၊ လူင်းၵႂႃႇၵႃႈတီႈမိူင်းဢေႇၵိပ်ႉတူႉလႄႈ ၶဝ်ႈၸုၵ်းယူႇၵႃႈတီႈၽၢႆႇၼႃႈယူဝ်းသႅပ်ႈဢေႃႈ။
16မိူဝ်ႈဢၼ်ယူဝ်းသႅပ်ႈႁၼ်ပိၼ်ႇယႃႇမိၼ်ႇပႃးမႃးလူၺ်ႈၵၼ်တင်းၶဝ်ၼၼ်ႉၸိုင်၊ မၼ်းႁွင်ႉဢဝ်ၵူၼ်းဢုပ်ႉၵူၼ်းထိင်းႁိူၼ်း မၼ်းလႄႈလၢတ်ႈဝႃႈ၊ ႁွင်ႉဢဝ်ၵူၼ်းၸိူဝ်းၼႆႉၵႂႃႇၵႃႈတီႈႁိူၼ်းတႃႉ။ ဢဝ်တူဝ်သတ်းတၢႆလႄႈမႄးႁႅၼ်းပုၼ်ႈဢၼ်တၵ်းၵိၼ်ဝႆႉတႃႉ။ ၶိင်ႇၵၢင်ဝၼ်းတဵင်ႈၵူၼ်းၸိူဝ်းၼႆႉတၵ်းလႆႈၵိၼ်လူၺ်ႈၵၼ်တင်းၵဝ်ဢေႃႈ၊ ဝႃႈၼင်ႇၼႆသေယဝ်ႉ၊- 17ၵေႃႉၼၼ်ႉႁဵတ်းလႄႈႁွင်ႉဢဝ်ၵူၼ်းၸိူဝ်းၼၼ်ႉၵႂႃႇၵႃႈတီႈႁိူၼ်းယူဝ်းသႅပ်ႈဢေႃႈ။- 18ၵူၼ်းၸိူဝ်းၼၼ်ႉၵူဝ်ႁႄၵွပ်ႈပိူဝ်ႈဢၼ် ၶဝ်လႆႈၶၢမ်ႇတၢင်းဢၼ်ႁွင်ႉဢဝ်ၶဝ်ႈၵႂႃႇၵႃႈတီႈႁိူၼ်းယူဝ်းသႅပ်ႈၼၼ်ႉလႄႈဝႃႈ၊ ၵွပ်ႈပိူဝ်ႈငိုၼ်းဢၼ်ၶိုၼ်းသႂ်ႇပၼ် ၵႃႈၼႂ်းထူင်ႁဝ်းပွၵ်ႈဢွၼ်တၢင်းၼၼ်ႉလႄႈ ႁဝ်းလႆႈၶၢမ်ႇတၢင်းဢၼ်ႁွင်ႉဢဝ်ဝႆႉႁႂ်ႈမၼ်းလႆႈ လေႃႇၽၢင်ႈသႂ်ႇႁဝ်းလႄႈယႃႉယူၵ်ႉႁဝ်း ႁႂ်ႈႁဝ်းလႆႈၶၢမ်ႇႁဵတ်းၶႃႈလႄႈသိမ်းဢဝ်လီႈႁဝ်းၸိူဝ်းၼႆႉယဝ်ႉ၊ ဝႃႈၼင်ႇၼႆဢေႃႈ။
19ၶဝ်ၼၼ်ႉ ဢွၼ်ၵၼ်သုတ်ႉၸပ်းသုတ်ႉၸူးတီႈၵူၼ်းဢုပ်ႉၵူၼ်းထိင်းႁိူၼ်းယူဝ်းသႅပ်ႈၼၼ်ႉလႄႈ တၵ်ႉလၢတ်ႈမၼ်း ၵႃႈတီႈႁိမ်းၽၵ်းတူႁိူၼ်းၼၼ်ႉလႄႈဝႃႈ၊- 20ၸဝ်ႈႁဝ်း၊ ၵမ်းဢွၼ်တၢင်းၼၼ်ႉ၊ ႁဝ်းၶႃႈလူင်းမႃးႁႂ်ႈလႆႈသိုဝ်ႉဢဝ်တၢင်းၵိၼ်တၢင်းၶူပ်း ဢမၢၼ်ႇၶၼ်ပဵၼ်ၶႃႈဢေႃႈ။- 21မိူဝ်ႈဢၼ်ႁဝ်းၶႃႈၶိုၼ်းမိူဝ်းၵႂႃႇႁွတ်ႈထိုင်ၵႃႈတီႈပၢင်လိုဝ်ႈလႄႈၽုၺ်ႇထူင်ႁဝ်းၶႃႈၼၼ်ႉၸိုင်၊ ငိုၼ်းဢၼ်ၸၢပ်ႈသႅင်ႇၵၼ်တင်း ႁဝ်းၶႃႈႁင်းၽႂ်ႁင်းမၼ်းၼၼ်ႉ ယင်းဢမ်ႇယွမ်းသေဢိတ်းလႄႈ မီးယူႇၵႃႈတီႈပၢၵ်ႇထူင်ၶႃႈဢေႃႈ။ ငိုၼ်းၼၼ်ႉၸိုင်၊ ႁဝ်းၶႃႈသမ်ႉဢဝ်ၶိုၼ်း မႃးၶႃႈယဝ်ႉ။- 22ႁဝ်းၶႃႈသမ်ႉပႃးဢဝ်ငိုၼ်းတၢင်ႇဢၼ်မႃးႁႂ်ႈလႆႈသိုဝ်ႉဢဝ်တၢင်းၵိၼ်တၢင်းၶူပ်းၶႃႈဢေႃႈ။ ႁဝ်းၶႃႈဢမ်ႇႁူႉလွင်ႈဢၼ်ၽူႈလႂ် ဢဝ်ငိုၼ်းၼၼ်ႉသႂ်ႇဝႆႉၵႃႈၼႂ်းထူင်ႁဝ်းၶႃႈၼၼ်ႉၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 23ၵေႃႉၼၼ်ႉၵေႃႈလၢတ်ႈလႄႈဝႃႈ၊ ႁႂ်ႈမီးတၢင်းၼိမ်သေၵမ်းလူၺ်ႈ။ ယႃႇပေမႆႈၸႂ်ၶီၸႂ်။ ၽြႃးပဵၼ်ၸဝ်ႈသူ၊ ၽြႃးပဵၼ်ၸဝ်ႈပေႃႈသူၼၼ်ႉ ဢဵတ်းလူပၼ်ၽၼ်ႇတႃႇၼၼ်ႉ ၵႃႈၼႂ်းထူင်သူယဝ်ႉ။ ငိုၼ်းသူၼၼ်ႉၸိုင်၊ ၵဝ်လႆႈၶၢမ်ႇဢဝ်ယဝ်ႉယဝ်ႉ၊ ဝႃႈၼင်ႇၼႆသေယဝ်ႉ၊ ဢဝ်သီႉမုၼ်ႇဢွၵ်ႇလႄႈဢၢပ်ႈပၼ်တီႈၶဝ်ဢေႃႈ။- 24ၵေႃႉၼၼ်ႉဢဝ်ၶဝ်သႂၢင်းဝႆႉၵႃႈၼႂ်းႁိူၼ်းယူဝ်းသႅပ်ႈသေယဝ်ႉ၊ ပၼ်ၼမ်ႉတီႈၶဝ်လႄႈၶဝ်ၵေႃႈသုၵ်ႈတိၼ်ဢေႃႈ။ တီႈလီႈၶဝ်တင်းလၢႆၵေႃႈ ဢွႆႇပၼ်တၢင်းၵိၼ်တၢင်းၶူပ်းဢေႃႈ။- 25ၶိင်ႇၵၢင်ဝၼ်းတဵင်ႈယူဝ်းသႅပ်ႈတၵ်းမႃး၊ ဝႃႈၼင်ႇၼႆလႄႈ ၶဝ်ဢွၼ်ၵၼ်မႄးႁႅၼ်းလၢၵ်ႈသွင်ႇဝႆႉထႃႈဢေႃႈ။ လွင်ႈမၼ်းၸမ်ႉ ၶဝ်လႆႈငိၼ်းလွင်ႈဢၼ်ၶဝ်တၵ်းလႆႈၵိၼ်တၢင်းၵိၼ်တၢင်းၶူပ်း ၵႃႈတီႈႁိူၼ်းၼၼ်ႉဢေႃႈ။
26မိူဝ်ႈဢၼ်ယူဝ်းသႅပ်ႈႁွတ်ႈမႃးၵႃႈတီႈႁိူၼ်းၼၼ်ႉၸိုင်၊ ၶဝ်ၼၼ်ႉဢွၼ်ၵၼ်ဢဝ်လၢၵ်ႈသွင်ႇဢၼ်ၶဝ်ပႃးမႃးၵႃႈၼႂ်းမိုဝ်းၶဝ် ၼၼ်ႉလႄႈ ၶဝ်ႈၵႃႈၼႂ်းႁိူၼ်းၸူးၵႃႈတီႈဢၼ် မၼ်းမီးၼၼ်ႉလႄႈ ၶုပ်ႉမူပ်ႇၵူမ်ႈၵွမ်းႁူဝ် ၵႃႈၼိူဝ်လိၼ်ၵႃႈတီႈၽၢႆႇၼႃႈမၼ်းဢေႃႈ။- 27မၼ်းတၵ်ႉလၢတ်ႈၶဝ်သေယဝ်ႉ၊ ထၢမ်လႄႈဝႃႈ၊ ပေႃႈသူဢၼ်ဝႃႈၵူၼ်းဢသၢၵ်ႈယႂ်ႇ၊ ဢၼ်သူလၢတ်ႈမိူဝ်ႈၵမ်းဢွၼ်တၢင်းၼၼ်ႉ ၼၼ်ႉ ယူႇလီၵိၼ်ဝၢၼ်ယူႇႁိုဝ်။ ဢသၢၵ်ႈယင်းလိပ်းယူႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 28ၶဝ်ၵေႃႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈႁဝ်းဢၼ်ဝႃႈပေႃႈၶႃႈၸဝ်ႈၸိူဝ်းၼႆႉၼၼ်ႉ ယူႇလီၵိၼ်ဝၢၼ်ယူႇတီႈၶႃႈဢေႃႈ။ ဢသၢၵ်ႈယင်း လိပ်းယူႇတီႈၶႃႈဢေႃႈ၊ ဝႃႈၼင်ႇၼႆသေလႄႈ ၶုပ်ႉမူပ်ႇၵူမ်ႈႁူဝ်ယူႇဢေႃႈ။- 29ၵမ်းၼၼ်ႉ မၼ်းမုင်ႈတူၺ်းလႄႈႁၼ်ပိၼ်ႇယႃႇမိၼ်ႇၼွင်ႉၸၢႆးဢွၵ်ႇမၼ်း လုၵ်ႈၸၢႆးမႄႈမၼ်းၼၼ်ႉသေယဝ်ႉ၊ ထၢမ်လႄႈဝႃႈ၊ ၵေႃႉၼႆႉၸမ်ႉ၊ ပဵၼ်ၼွင်ႉၸၢႆးသူၵေႃႉဢၼ်လဵၵ်ႉသေပိူၼ်ႈဢၼ်သူလၢတ်ႈမိူဝ်ႈၵမ်းဢွၼ်တၢင်းၼၼ်ႉႁိုဝ်။ ဝႃႈၼင်ႇၼႆသေယဝ်ႉ၊ သမ်ႉလၢတ်ႈလႄႈ ဝႃႈ၊ လုၵ်ႈၸၢႆးၵဝ်ဢိူၺ်း၊ ႁႂ်ႈၽြႃးပဵၼ်ၸဝ်ႈဢဵတ်းလူႁဵတ်းၵျေးၸူးတီႈမႂ်းသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊- 30ပိူဝ်ႈဢၼ်လႆႈႁၼ်ၼွင်ႉၸၢႆးဢွၵ်ႇမၼ်းလႄႈ မီးၸႂ်ဢၼ်ႁၵ်ႉၼႅၼ်ႈၶဵၼ်းၶွတ်ႇၸပ်းပႅၼ်းၼႃႇလူင်လၢင်လႄႈယူဝ်းသႅပ်ႈ လုၵ်ႉၵႂႃႇၶၼ်ၶၼ်ၽႂ်းၽႂ်းသေဢေႃႈ။ မၼ်းႁႃတီႈဢၼ်ၼမ်ႉတႃမၼ်းတၵ်းတူၵ်းလႄႈ ၶဝ်ႈၵႂႃႇၵႃႈၼႂ်းလုၵ်းတီႈၼွၼ်းမၼ်းသေယဝ်ႉ၊ ၼမ်ႉတႃတူၵ်းယူႇဢေႃႈ။- 31ၵမ်းၼၼ်ႉ မၼ်းသုၵ်ႈၼႃႈလႄႈဢွၵ်ႇမႃးၵႃႈၼွၵ်ႈသေယဝ်ႉ၊ ဢဝ်ဢိင်ႇတရေႇလႄႈ မီးဢမိင်ႉဝႃႈ၊ ႁႅၼ်းတမ်းပၼ်တၢင်းၵိၼ်တၢင်းၶူပ်းတႃႉ၊ ဝႃႈၼင်ႇၼႆဢေႃႈ။- 32ၶဝ်ႁႅၼ်းတမ်းပၼ်ပုၼ်ႈမၼ်းတီႈၼိုင်ႈ၊ ပုၼ်ႈပီႈၼွင်ႉမၼ်းတင်းလၢႆၼၼ်ႉတီႈၼိုင်ႈ၊ ပုၼ်ႈၵူၼ်းဢေႇၵိပ်ႉတူႉဢၼ်ၵိၼ်လူၺ်ႈၵၼ် တင်းမၼ်းၸိူဝ်းၼၼ်ႉတီႈၼိုင်ႈ၊ ႁင်းၽႂ်ႁင်းမၼ်းဢေႃႈ။ လွင်ႈမၼ်းၸမ်ႉ ၵူၼ်းဢေႇၵိပ်ႉတူႉတင်းလၢႆ ဢမ်ႇလႆႈၵိၼ်လူၺ်ႈၵၼ်တင်း ၵူၼ်းႁေႇပြႄး။ လွင်ႈတၢင်းၼၼ်ႉၸၢင်ႈပဵၼ်တီႈဢၼ်ၵူၼ်း ဢေႇၵိပ်ႉတူႉလီႁင်ႈဢဵတ်ႇသဵတ်ႇဢေႃႈ။- 33ၶဝ်ၼၼ်ႉၵေႃႈ ၸွမ်းလူၺ်ႈဢသၢၵ်ႈၸႃႉၸဵမ်ၵေႃႉယႂ်ႇဢၼ်လႆႈဢရႃႇလုၵ်ႈတူၼ်ႈတေႃႇထိုင်ႁွတ်ႈ ၵေႃႉလဵၵ်ႉၸႅၼ်ႇတၢမ်းၵၼ် ႁင်းၽႂ်ႁင်းမၼ်းလႄႈ ဢွၼ်ၵၼ်ၼင်ႈယူႇၵႃႈတီႈၽၢႆႇၼႃႈယူဝ်းသႅပ်ႈဢေႃႈ။ ၶဝ်ၵေႃႉၼိုင်ႈလႄႈၵေႃႉၼိုင်ႈ တူၺ်းၵၼ်ယူႇသေလႄႈ မီးတၢင်းဢၼ် ဢၢမ်းၼႃႇလူင်လၢင်ဢေႃႈ။- 34မၼ်းၵေႃႈဢဝ်တၢင်းၵိၼ်ဢၼ်မီးၵႃႈတီႈၽၢႆႇၼႃႈမၼ်းၼၼ်ႉ ပၼ်ၵႂႃႇပုၼ်ႈဢၼ်ၶဝ်တၵ်းၵိၼ်ႁင်းၽႂ်ႁင်းမၼ်းဢေႃႈ။ ပုၼ်ႈဢၼ်ပိၼ်ႇယႃႇမိၼ်ႇလႆႈၼၼ်ႉၸိုင်၊ ၼမ်သေပုၼ်ႈဢၼ်ပီႈဢၢႆႈမၼ်းတင်းလၢႆလႆႈၼၼ်ႉႁႃႈပုၼ်ႈဢေႃႈ။ ၶဝ်ၼၼ်ႉဢွၼ်ၵၼ်ၵိၼ်လႄႈ ႁွတ်ႈထိုင်တၢင်းဢၼ်မူၼ်ႈပျေႃႇလူၺ်ႈၵၼ်တင်းမၼ်းဢေႃႈ။
Currently Selected:
ငဝ်ႈၵမ်ႇၽႃႇ 43: CBMS
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
