ငဝ်ႈၵမ်ႇၽႃႇ 27
27
ဢီႉၸၢၵ်ႈပၼ်တၢင်းလီတီႈယႃႇၵုပ်ႈ
1ဝၢႆးၼၼ်ႉဢီႉၸၢၵ်ႈၼၼ်ႉထဝ်ႈၼႃႇလႄႈတႃမူဝ်းထၼ်ႈပေႃးဢမ်ႇႁၼ်လႆႈသေယဝ်ႉ၊ ႁွင်ႉဢဝ်လုၵ်ႈၸၢႆးမၼ်းၵေႃႉယႂ်ႇ ဢေးသေႃးၼၼ်ႉလႄႈဝႃႈ၊ လုၵ်ႈၸၢႆးၵဝ်ဢိူၺ်း၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈဢိူဝ်လႄႈဝႃႈ၊ ၵဝ်ၶႃႈမီးယူႇၶႃႈဢေႃႈ၊ ဝႃႈၼင်ႇၼႆဢေႃႈ။- 2ပေႃႈမၼ်းၵေႃႈလၢတ်ႈလႄႈဝႃႈ၊ တေႃႈလဵဝ်ၼႆႉၵဝ်ထဝ်ႈၼႃႇယဝ်ႉ။ တၵ်းတၢႆဝၼ်းလႂ်ဢမ်ႇႁူႉ။- 3ၼင်ႇႁိုဝ်ဝီႉၺိၺ်ႇၵဝ် တၵ်းပၼ်တၢင်းလီတီႈမႂ်းၸူဝ်ႈဢၼ်ၵဝ်ဢမ်ႇပႆႇတၢႆၼႆႉၸိုင်၊ ဢဝ်လၢၵ်ႈၼၢၵ်ႈမႂ်းဢၼ်ဝႃႈပိုၼ်ဢိၵ်ႇတင်း ၵၢင်ႇမႂ်းၼၼ်ႉၵႂႃႇၵႃႈတီႈထိူၼ်ႇပုၼ်ႉလႄႈ ႁႃဢဝ်ႁႂ်ႈလႆႈၼိူဝ်ႉတူဝ်ထိူၼ်ႇပုၼ်ႈၵဝ်သေယဝ်ႉ၊- 4ႁုင်ၽၵ်းၼိူဝ်ႉဢၼ်ဝၢၼ်ဝၢၼ်ဢၼ်ၵဝ်ယၢမ်ႈမၵ်ႉၼၼ်ႉသေလႄႈ ဢဝ်မႃးၵႃႈတီႈၵဝ်ႁႂ်ႈၵဝ်လႆႈၵိၼ်တႃႉ၊ ဝႃႈၼင်ႇၼႆဢေႃႈ။
5 ရေႇပႅၵ်ႉၵႃႉငိၼ်း ၵႂၢမ်းဢၼ်ဢီႉၸၢၵ်ႈလၢတ်ႈတီႈလုၵ်ႈၸၢႆးမၼ်းဢေးသေႃး ၸိူဝ်ႉၼင်ႇၼၼ်ၼၼ်ႉလႄႈ ၼႂ်းမိူဝ်ႈဢၼ် ဢေးသေႃးယင်းတိုၵ်ႉၵႂႃႇၵႃႈတီႈထိူၼ်ႇလႄႈ ႁႃႁႂ်ႈလႆႈဢဝ်ၼိူဝ်ႉတူဝ်ထိူၼ်ႇမႃးယူႇၼၼ်ႉၸိုင်၊- 6ရေႇပႅၵ်ႉၵႃႉႁွင်ႉဢဝ်လုၵ်ႈၸၢႆးမၼ်းယႃႇၵုပ်ႈလႄႈဝႃႈ၊ တူၺ်းလူး၊ ၵဝ်လႆႈငိၼ်းပေႃႈမႂ်းလၢတ်ႈတီႈပီႈဢၢႆႈမႂ်းဢေးသေႃးၼၼ်ႉလႄႈဝႃႈ၊- 7လွင်ႈၼင်ႇႁိုဝ်ၵဝ်တၵ်းလႆႈၵိၼ်လႄႈပၼ်တၢင်းလီတီႈမႂ်းၵႃႈတီႈၽၢႆႇၼႃႈထႃႇဝရႃႉၽြႃး ၸူဝ်ႈဢၼ်ၵဝ် ဢမ်ႇပႆႇတၢႆၼႆႉၸိုင်၊ ဢဝ်ၼိူဝ်ႉတူဝ်ထိူၼ်ႇမႃးလႄႈ ႁုင်ၽၵ်းၼိူဝ်ႉဢၼ်ဝၢၼ်ဝၢၼ်ပုၼ်ႈၵဝ်တႃႉ၊ ဝႃႈၼင်ႇၼႆဢေႃႈ။- 8ပိူဝ်ႈၼႆလႄႈ လုၵ်ႈၸၢႆးၵဝ်ဢိူၺ်း၊ ထွမ်ႇဢဝ်ၵႂၢမ်းဢၼ်ၵဝ်သင်ႇလၢတ်ႈဝႆႉၼႆႉတႃႉ။- 9တေႃႈလဵဝ်ၼႆႉ ၵႂႃႇၵႃႈတီႈၽုင်ပႄႉပုၼ်ႉလႄႈ ဢဝ်ပႄႉဢွၼ်ႇဢၼ်လီသွင်တူဝ်မႃးတီႈၵဝ်တႃႉ။ ၵဝ်တၵ်းဢဝ်လႄႈ ႁုင်ၽၵ်းၼိူဝ်ႉဢၼ်ဝၢၼ်ဝၢၼ်ဢၼ်ပေႃႈမႂ်းၸၢင်ႈမၵ်ႉၼၼ်ႉဢေႃႈ။- 10လွင်ႈၼင်ႇႁိုဝ်မၼ်းတၵ်းပၼ်တၢင်းလီတီႈမႂ်းၸူဝ်ႈဢၼ်မၼ်းဢမ်ႇပႆႇတၢႆၼႆႉၸိုင်၊ မႂ်းတၵ်းလႆႈဢဝ်တၢင်းၵိၼ်တၢင်းၶူပ်းၼၼ်ႉ ၵႂႃႇသူင်ႇၵႃႈတီႈပေႃႈမႂ်းပုၼ်ႈဢၼ် မၼ်းတၵ်းၵိၼ်တၵ်းၶူပ်းဢေႃႈ၊ ဝႃႈၼင်ႇၼႆဢေႃႈ။- 11ယႃႇၵုပ်ႈၵေႃႈလၢတ်ႈတီႈမႄႈမၼ်းရေႇပႅၵ်ႉၵႃႉလႄႈဝႃႈ၊ တူၺ်းလူး၊ ပီႈဢၢႆႈၵဝ်ၶႃႈဢေးသေႃးၼၼ်ႉ ပဵၼ်ၵေႃႉဢၼ်မီးၶူၼ်ၶႃႈဢေႃႈ။ ၵဝ်ၶႃႈၸမ်ႉ၊ ပဵၼ်ၵေႃႉဢၼ်မိုၼ်ႈလီၶျေႃးလီၶႃႈဢေႃႈ။- 12ပေႃႈၵဝ်ၶႃႈၸၢင်ႈၶႄးတၵ်းလုပ်ႈၵမ်းတူၺ်းၵဝ်ၶႃႈဢေႃႈ။ ပေႃးပဵၼ်ၸိူဝ်ႉၼင်ႇၼၼ်ၸိုင်၊ ၵဝ်ၶႃႈတၵ်းပဵၼ်ၸိူဝ်ႉၼင်ႇ ၵေႃႉဢၼ်ၸၢင်ႈပႅတ်ႉ ၸၢင်ႈလႅၼ်ၼၼ်ႉတီႈမၼ်းသေယဝ်ႉ၊ ၵဝ်ၶႃႈၵေႃႈယင်းဢမ်ႇလႆႈမင်ႇၵလႃႇလႄႈ တၵ်းလႆႈဢႃႉမင်ႇၵလႃႇ တၢင်းဢၼ်ၵိၼ်ႇဢၼ်ဝႃႈၶႃႈဢေႃႈ၊ ဝႃႈၼင်ႇၼႆဢေႃႈ။- 13မႄႈမၼ်းၵေႃႈလၢတ်ႈလႄႈဝႃႈ၊ လုၵ်ႈၸၢႆးၵဝ်ဢိူၺ်း၊ ႁႂ်ႈဢႃႉမင်ႇၵလႃႇတၢင်းဢၼ်ၵိၼ်ႇဢၼ်ဝႃႈဢၼ်မႂ်းလႆႈၶၢမ်ႇၼၼ်ႉ ႁွတ်ႈထိုင် ၵႃႈၼိူဝ်ၵဝ်တႃႉ။ ၵူၺ်းၵႃႈ ထွမ်ႇဢဝ်ၵႂၢမ်းၵဝ်လႄႈ ဢဝ်ပႄႉဢွၼ်ႇမႃးတီႈၵဝ်တႃႉ၊ ဝႃႈၼင်ႇၼႆသေယဝ်ႉ၊- 14မၼ်းၵႂႃႇလႄႈဢဝ်ပႄႉဢွၼ်ႇမႃးၵႃႈတီႈမႄႈမၼ်းလႄႈ မႄႈမၼ်းၵေႃႈႁုင်ၽၵ်းၼိူဝ်ႉဢၼ်ဝၢၼ်ဝၢၼ် ဢၼ်ပေႃႈမၼ်းၸၢင်ႈမၵ်ႉၼၼ်ႉဢေႃႈ။
15မိူဝ်ႈၼၼ်ႉရေႇပႅၵ်ႉၵႃႉဢဝ်ၶူဝ်းၼုင်ႈဢေးသေႃး လုၵ်ႈၸၢႆးၵေႃႉယႂ်ႇ ဢၼ်လီၼႃႇလူင်လၢင် ဢၼ်မီးၵႃႈၼႂ်းႁိူၼ်းတီႈမၼ်းၼၼ်ႉ ႁႂ်ႈလုၵ်ႈၸၢႆးၵေႃႉလဵၵ်ႉယႃႇၵုပ်ႈၼုင်ႈလႄႈ၊- 16ဢဝ်ၼင်ပႄႉဢွၼ်ႇႁေႃႇသႂ်ႇၵႃႈတီႈမိုဝ်းမၼ်း ဢိၵ်ႇတင်းၶေႃးမၼ်း တီႈဢၼ်မိုၼ်ႈၶျေႃးၼၼ်ႉသေယဝ်ႉ၊- 17ဢဝ်ၽၵ်းၼိူဝ်ႉဢၼ်ဝၢၼ်ဝၢၼ် ဢိၵ်ႇတင်းၶဝ်ႈမုၼ်းဢၼ်မၼ်းႁုင်ၼၼ်ႉ ဢၢပ်ႈပၼ်ၵႃႈၼႂ်းမိုဝ်းလုၵ်ႈၸၢႆးမၼ်းယႃႇၵုပ်ႈၼၼ်ႉဢေႃႈ။
18 ယႃႇၵုပ်ႈၵေႃႈၵႂႃႇၵႃႈတီႈပေႃႈမၼ်းလႄႈႁွင်ႉဝႃႈ၊ ပေႃႈဢိူၺ်း၊ ဝႃႈၼင်ႇၼႆဢေႃႈ။ မၼ်းၵေႃႈဢိူဝ်လႄႈဝႃႈ၊ လုၵ်ႈၸၢႆးၵဝ်ဢိူၺ်း၊ၵဝ်မီးယူႇဢေႃႈ။ မႂ်းပဵၼ်ၽူႈလႂ်၊ ဝႃႈၼင်ႇၼႆဢေႃႈ။- 19ယႃႇၵုပ်ႈၵေႃႈလၢတ်ႈတီႈပေႃႈမၼ်းလႄႈဝႃႈ၊ ၵဝ်ၶႃႈၸမ်ႉ၊ ပဵၼ်ဢေးသေႃးလုၵ်ႈၸၢႆးပေႃႈႁဝ်းၵေႃႉယႂ်ႇၶႃႈဢေႃႈ။ ၵဝ်ၶႃႈႁဵတ်းၸွမ်း ၵႃႈၼင်ႇဢၼ်ပေႃႈႁဝ်းသင်ႇလၢတ်ႈဝႆႉၼၼ်ႉၶႃႈယဝ်ႉ။ လုၵ်ႉလႄႈၼင်ႈသေၵမ်း။ ၼင်ႇႁိုဝ်ဝီႉၺိၺ်ႇပေႃႈႁဝ်း တၵ်းပၼ်တၢင်းလီတီႈၵဝ်ၶႃႈၸိုင်၊ ၵိၼ်ၽၵ်းၼိူဝ်ႉတူဝ်ထိူၼ်ႇၵဝ်ၶႃႈၼႆႉသေၵမ်း၊ ဝႃႈၼင်ႇၼႆဢေႃႈ။- 20ဢီႉၸၢၵ်ႈၵေႃႈ၊ ထၢမ်တီႈလုၵ်ႈၸၢႆးမၼ်းလႄႈဝႃႈ၊ လုၵ်ႈၸၢႆးၵဝ်ဢိူၺ်း၊ လွင်ႈဢၼ်မႂ်းၸဵဝ်းထူပ်းႁၼ်ထၢၼ်ႇၼႆႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈ ၶိုၼ်းလၢတ်ႈလႄႈဝႃႈ၊ ပိူဝ်ႈဢၼ်ထႃႇဝရႃႉၽြႃး၊ၽြႃးပဵၼ်ၸဝ်ႈပေႃႈႁဝ်းၼၼ်ႉ ပၼ်ဢၶႂၢင်ႉ တီႈၵဝ်ၶႃႈလႄႈ ၵဝ်ၶႃႈၸဵဝ်းထူပ်းၶႃႈဢေႃႈ၊ ဝႃႈၼင်ႇၼႆဢေႃႈ။- 21ဢီႉၸၢၵ်ႈၵေႃႈလၢတ်ႈတီႈယႃႇၵုပ်ႈလႄႈဝႃႈ၊ လုၵ်ႈၸၢႆးၵဝ်ဢိူၺ်း၊ လွင်ႈၼင်ႇႁိုဝ် ၵဝ်တၵ်းလႆႈလုပ်ႈၵမ်းတူၺ်းမႂ်းလႄႈႁူႉလွင်ႈဢၼ် မႂ်းၸႂ်ႈ လုၵ်ႈၸၢႆးၵဝ်ဢေးသေႃးတႄႉတႄႉႁိုဝ်။ ဢမ်ႇၸႂ်ႈႁိုဝ်ၼၼ်ႉၸိုင်၊ သုတ်ႉမႃးၵႃႈတီႈႁိမ်းၵဝ်ၼႆႉလူး၊ မိူဝ်ႈဢၼ်ဝႃႈၼင်ႇၼႆၸိုင်၊- 22ယႃႇၵုပ်ႈသုတ်ႉၸမ်ၵႃႈတီႈႁိမ်းပေႃႈမၼ်းၼၼ်ႉလႄႈ ပေႃႈမၼ်းၵေႃႈလုပ်ႈၵမ်းတူၺ်းလႄႈဝႃႈ၊ သဵင်မၼ်းၸမ်ႉ၊ ပဵၼ်သဵင်ယႃႇၵုပ်ႈဢေႃႈ။ မိုဝ်းမၼ်းၸမ်ႉ၊ ပဵၼ်မိုဝ်းဢေးသေႃးဢေႃႈ၊ ဝႃႈၼင်ႇၼႆဢေႃႈ။- 23ပိူဝ်ႈဢၼ်မိုဝ်းမၼ်းပႃးတင်းၶူၼ်မိူၼ်ၸိူဝ်ႉၼင်ႇ မိုဝ်းပီႈဢၢႆႈမၼ်းဢေးသေႃးၼၼ်ႉလႄႈ ပေႃႈမၼ်းယင်းဢမ်ႇႁူႉသၢႆငၢႆလွင်ႈဢၼ်မၼ်းပဵၼ်ယႃႇၵုပ်ႈၼၼ်ႉလႄႈ ပၼ်တၢင်းလီတီႈမၼ်းဢေႃႈ။- 24ၵူၺ်းၵႃႈ ပေႃႈမၼ်းသမ်ႉၶိုၼ်းထၢမ်ထႅင်ႈလႄႈဝႃႈ၊ မႂ်းပဵၼ်လုၵ်ႈၸၢႆးၵဝ်ဢေးသေႃးဢမၢၼ်ႇၶၼ်ပဵၼ်ႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊မၼ်းၵေႃႈလၢတ်ႈလႄႈဝႃႈ၊ ၸႂ်ႈၶႃႈယဝ်ႉ၊ ဝႃႈၼင်ႇၼႆဢေႃႈ။- 25ပေႃႈမၼ်းၵေႃႈလၢတ်ႈလႄႈဝႃႈ၊ ဢဝ်မႃးတမ်းပၼ်ၵႃႈတီႈႁိမ်းၵဝ်ၼႆႉတႃႉ။ ၼင်ႇႁိုဝ်ဝီႉၺိၺ်ႇၵဝ်တၵ်းပၼ်တၢင်းလီတီႈမႂ်းၸိုင်၊ၵဝ်တၵ်းၵိၼ်ၽၵ်းၼိူဝ်ႉတူဝ်ထိူၼ်ႇ လုၵ်ႈၸၢႆးၵဝ်ဢေႃႈ၊ ဝႃႈၼင်ႇၼႆသေယဝ်ႉ၊ ယႃႇၵုပ်ႈဢဝ်တမ်းပၼ်ၵႃႈတီႈႁိမ်းပေႃႈမၼ်းလႄႈ ပေႃႈမၼ်းၵေႃႈၵိၼ်ဢေႃႈ။ ၼမ်ႉၸပိတ်ႈၵေႃႈ ဢဝ်မႃးပၼ်လႄႈ ပေႃႈမၼ်းၵိၼ်ဢေႃႈ။- 26လိုၼ်းၼၼ်ႉပေႃႈမၼ်းဢီႉၸၢၵ်ႈၵေႃႈလၢတ်ႈလႄႈဝႃႈ၊ လုၵ်ႈၸၢႆးၵဝ်ဢိူၺ်း၊ သုတ်ႉမႃးလႄႈၼူမ်ၵဝ်တႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 27ယႃႇၵုပ်ႈသုတ်ႉၸူးလႄႈၼူမ်ပေႃႈမၼ်းဢေႃႈ။ ပေႃႈမၼ်းၵေႃႈၶၢမ်ႇဢဝ်ဢၢႆၶူဝ်းၼုင်ႈမၼ်းသေလႄႈ ပၼ်တၢင်းလီတီႈမၼ်း လႄႈဝႃႈ၊ တူၺ်းလူး၊ ဢၢႆႁွမ်လုၵ်ႈၸၢႆးၵဝ်ၼႆႉမိူၼ်ၸိူဝ်ႉၼင်ႇ ဢၢႆႁွမ်တူင်ႈၼႃး ဢၼ်ထႃႇဝရႃႉၽြႃးပၼ်တၢင်းလီၼၼ်ႉဢေႃႈ။- 28ပိူဝ်ႈၼႆလႄႈ ႁႂ်ႈၽြႃးပဵၼ်ၸဝ်ႈပၼ်ၼမ်ႉၼၢႆးၵႃႈတီႈၽႃႉၵၢင်ႁၢဝ်၊ ၶွၼ်ႇၼမ်ႉမၼ်းလိၼ်၊ ၶဝ်ႈပိူၵ်ႇ၊ ၶဝ်ႈသၢၼ် တင်းၼမ်ႉၸပိတ်ႈ ၼမ်ၼႃႇတီႈမႂ်းသေၵမ်းလူၺ်ႈ။- 29ႁႂ်ႈၸိူဝ်ႉၶိူဝ်းၵူၼ်းတင်းလၢႆ လႆႈၶၢမ်ႇႁဵတ်းၶႃႈတီႈမႂ်းလႄႈ ႁႂ်ႈမဵဝ်းၵူၼ်းတင်းလၢႆ လႆႈၵူမ်ႈႁူဝ်ၵွမ်းႁူဝ် ၵႃႈတီႈၽၢႆႇၼႃႈမႂ်းသေၵမ်းလူၺ်ႈ။ ႁႂ်ႈမႂ်းလႆႈပဵၼ်ၸဝ်ႈတီႈပီႈတီႈၼွင်ႉမႂ်းလႄႈ ႁႂ်ႈလုၵ်ႈၸၢႆးမႄႈမႂ်းတင်းလၢႆ လႆႈၵူမ်ႈႁူဝ်ၵွမ်းႁူဝ် ၵႃႈတီႈၽၢႆႇၼႃႈမႂ်းသေၵမ်းလူၺ်ႈ။ ႁႂ်ႈၶဝ်ၸိူဝ်းဢၼ်ၵိၼ်ႇဝႃႈမႂ်း တင်းသဵင်ႈတင်းလူင်ၼၼ်ႉ လႆႈၶၢမ်ႇတၢင်းၵိၼ်ႇတၢင်းဝႃႈသေၵမ်းလူၺ်ႈ။ ႁႂ်ႈၶဝ်ၸိူဝ်းဢၼ်ပၼ်တၢင်းလီတီႈမႂ်းတင်းသဵင်ႈတင်းလူင် ၼၼ်ႉ လႆႈၶၢမ်ႇတၢင်းလီသေၵမ်းလူၺ်ႈ၊ ဝႃႈၼင်ႇၼႆဢေႃႈ။
30ၼင်ႇၼၼ်လႄႈဢီႉၸၢၵ်ႈပၼ်တၢင်းလီမင်ႇၵလႃႇတီႈယႃႇၵုပ်ႈယဝ်ႉတူဝ်ႈယဝ်ႉလႄႈ၊ ၼႂ်းမိူဝ်ႈဢၼ်ယႃႇၵုပ်ႈယင်းတိုၵ်ႉဢွၵ်ႇသေၵႃႈတီႈပေႃႈမၼ်းဢီႉၸၢၵ်ႈၼၼ်ႉယူႇၼၼ်ႉၸိုင်၊ ပီႈဢၢႆႈမၼ်းဢေးသေႃးလုၵ်ႉသေၵႃႈတီႈဢၼ်မၼ်းႁဵတ်းမူးသိူဝ်းၼၼ်ႉလႄႈႁွတ်ႈ မႃးၵမ်းလဵဝ်ဢေႃႈ။- 31မၼ်းၵေႃႈႁုင်ၽၵ်းၼိူဝ်ႉဢၼ်ဝၢၼ်ဝၢၼ်လႄႈဢဝ်မႃးတီႈပေႃႈမၼ်းသေယဝ်ႉ၊ လၢတ်ႈတီႈပေႃႈမၼ်းလႄႈဝႃႈ၊ ၼင်ႇႁိုဝ် ဝီႉၺိၺ်ႇပေႃႈႁဝ်းတၵ်းပၼ်တၢင်းလီတီႈၵဝ်ၶႃႈၸိုင်၊ လုၵ်ႉလႄႈၵိၼ်ၽၵ်းၼိူဝ်ႉတူဝ်ထိူၼ်ႇလုၵ်ႈၸၢႆးပေႃႈႁဝ်းၼႆႉသေၵမ်း၊ ဝႃႈၼင်ႇၼႆဢေႃႈ။- 32ပေႃႈမၼ်းဢီႉၸၢၵ်ႈၵေႃႈထၢမ်တီႈမၼ်းလႄႈဝႃႈ၊ မႂ်းပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈလၢတ်ႈလႄႈဝႃႈ၊ ၵဝ်ၶႃႈပဵၼ်ဢေးသေႃး လုၵ်ႈၸၢႆးပေႃႈႁဝ်းၵေႃႉယႂ်ႇၶႃႈဢေႃႈ၊ ဝႃႈၼင်ႇၼႆသေယဝ်ႉ၊- 33ဢီႉၸၢၵ်ႈၼၼ်ႉ သၼ်ႇသၼ်ႇသၢႆသၢႆၼႃႇလူင်လၢင်ယူႇသေလႄႈဝႃႈ၊ ၵေႃႉဢၼ်လႆႈၼိူဝ်ႉတူဝ်ထိူၼ်ႇလႄႈ ဢဝ်မႃးၸူးၵႃႈတီႈ ၵဝ်သေယဝ်ႉ၊ ၵဝ်ၵိၼ်ထၼ်ႈပေႃးမူတ်းပေႃးသဵင်ႈၸဵမ်မိူဝ်ႈၸူဝ်ႈဢၼ်မႂ်းဢမ်ႇပႆႇႁွတ်ႈမႃးၼၼ်ႉလႄႈ လႆႈပၼ်တၢင်းလီတီႈမၼ်းမႅၼ်ႈၼၼ်ႉပဵၼ်ၽူႈလႂ်။ မၼ်းၼၼ်ႉတၵ်းလႆႈၶၢမ်ႇတၢင်းလီမင်ႇၵလႃႇဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။- 34ဢေးသေႃးၼၼ်ႉ မိူဝ်ႈဢၼ်လႆႈငိၼ်းၵႂၢမ်းဢၼ်ပေႃႈမၼ်းလၢတ်ႈၸိူဝ်ႉၼင်ႇၼၼ်ၼၼ်ႉၸိုင်၊ ႁဵတ်းတင်းသဵင်ဢၼ်ႁႅင်းယႂ်ႇၼႃႇႁွင်ႉႁႆႈလႄႈဝႃႈ၊ ဢူဝ်းပေႃႈ၊ တီႈၵဝ်ၶႃႈၵေႃႈပၼ်တၢင်းလီသေၵမ်းၶႃႈ၊ ပၼ်သေၵမ်းၶႃႈ၊ ဝႃႈၼင်ႇၼႆသေယဝ်ႉ၊- 35ပေႃႈမၼ်းၵေႃႈလၢတ်ႈလႄႈဝႃႈ၊ ၼွင်ႉၸၢႆးမႂ်းႁဵတ်းတင်းပရီႉယႄႇသေလႄႈမႃးဢဝ်တၢင်းလီမင်ႇၵလႃႇမႂ်းၵႂႃႇယဝ်ႉ၊ ဝႃႈၼင်ႇၼႆဢေႃႈ။- 36မၼ်းၼၼ်ႉလၢတ်ႈလႄႈဝႃႈ၊ မၼ်းၼၼ်ႉၸိုင် ထုၵ်ႇလီႁွင်ႉႁဵၵ်ႈၸိုဝ်ႈယႃႇၵုပ်ႈယဝ်ႉဢမ်ႇၸႂ်ႈၶႃႈႁိုဝ်။ မၼ်းပႅတ်ႉလႅၼ်ၵဝ်ၶႃႈ သွင်ပွၵ်ႈလႄႈပႄႉၼႅင်ႇၶႃႈယဝ်ႉ။ မိူဝ်ႈဢွၼ်တၢင်းၼၼ်ႉ မၼ်းဢဝ်ဢရႃႇလုၵ်ႈတူၼ်ႈၵႂႃႇၶႃႈယဝ်ႉ။ တေႃႈလဵဝ်ၼႆႉၵေႃႈ မၼ်းသမ်ႉဢဝ်တၢင်းလီမင်ႇၵလႃႇၵဝ်ၶႃႈၵႂႃႇၶႃႈယဝ်ႉ၊ ဝႃႈၼင်ႇၼႆသေယဝ်ႉ၊ သမ်ႉထၢမ်လႄႈဝႃႈ၊ ဢမ်ႇႁႂ်ႈတၢင်းလီမင်ႇၵလႃႇၵိုတ်းဝႆႉပုၼ်ႈၵဝ်ၶႃႈသေပႃးၶႃႈႁိုဝ်။ ဝႃႈၼင်ႇၼႆဢေႃႈ။- 37ဢီႉၸၢၵ်ႈၵေႃႈၶိုၼ်းလၢတ်ႈတီႈဢေးသေႃးလႄႈဝႃႈ၊ တူၺ်းလူး၊ ၵဝ်လႆႈႁႂ်ႈမၼ်းပဵၼ်ၸဝ်ႈမႂ်းယဝ်ႉ။ ၵဝ်လႆႈႁႂ်ႈပီႈၼွင်ႉမၼ်း တင်းသဵင်ႈတင်းလူင် ၶၢမ်ႇႁဵတ်းၶႃႈတီႈမၼ်းယဝ်ႉ။ လႆႈဢဝ်တင်းၶဝ်ႈပိူၵ်ႇၶဝ်ႈသၢၼ် ဢိၵ်ႇတင်းၼမ်ႉၸပိတ်ႈၵမ်ႉထွၵ်ႈၸွႆႈထႅမ်မၼ်းယဝ်ႉ။ ပိူဝ်ႈၼႆလႄႈ လုၵ်ႈၸၢႆးၵဝ်ဢိူၺ်း၊ တီႈမႂ်းၼႆႉ တၵ်းႁဵတ်းၸိူဝ်ႉၼင်ႇႁိုဝ်လႆႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 38ဢေးသေႃးၵေႃႈ လၢတ်ႈတီႈပေႃႈမၼ်းလႄႈဝႃႈ၊ ဢူဝ်းပေႃႈ၊ တၢင်းလီမင်ႇၵလႃႇဢမ်ႇၵိုတ်းသေၸိူဝ်ႉသေပိူင်ၶႃႈႁိုဝ်။ ဢူဝ်းပေႃႈ၊ တီႈၵဝ်ၶႃႈၵေႃႈပၼ်တၢင်းလီသေၵမ်းၶႃႈ၊ ပၼ်သေၵမ်းၶႃႈ၊ ဝႃႈၼင်ႇၼႆသေလႄႈသမ်ႉႁွင်ႉသႅၼ်ႇထႅင်ႈလႄႈႁႆႈဢေႃႈ။- 39ပေႃႈမၼ်းဢီႉၸၢၵ်ႈ သမ်ႉၶိုၼ်းလၢတ်ႈလႄႈဝႃႈ၊ တူၺ်းလူး၊ တီႈယူႇမႂ်းတၵ်းလႆႈမီးၵႃႈတီႈဢၼ်ၵႆၵၼ်တင်းၶွၼ်ႇၼမ်ႉမၼ်းလိၼ် ဢိၵ်ႇတင်း ၼမ်ႉၼၢႆး ၵႃႈတီႈၼိူဝ်ၽႃႉၵၢင်ႁၢဝ်ဢေႃႈ။- 40တၵ်းလႆႈဢဝ်တင်းလၢပ်ႇတင်းလႅဝ်းသေလႄႈ လဵင်ႉဢသၢၵ်ႈမႂ်းဢေႃႈ။ တၵ်းလႆႈၶၢမ်ႇႁဵတ်းၶႃႈတီႈၼွင်ႉၸၢႆးမႂ်းဢေႃႈ။ ၵမ်းလိုၼ်းမိူဝ်ႈဢၼ်မႂ်းသမ်ႉၶိုၼ်းပႄႉၼႅင်ႇမၼ်းၼၼ်ႉၸိုင်၊ မႂ်းတၵ်းႁၵ်းပႅတ်ႈၵၢၼ်းဢၼ်မၼ်းတၢင်ႇၼၼ်ႉသေ ၵႃႈတီႈၶေႃးမႂ်းဢေႃႈ၊ ဝႃႈၼင်ႇၼႆဢေႃႈ။
ယႃႇၵုပ်ႈပၢႆႈၵႂႃႇၸူးလႃႇပၢၼ်ႇ
41ၵွပ်ႈပိူဝ်ႈတၢင်းလီမင်ႇၵလႃႇဢၼ်ပေႃႈမၼ်းပၼ်တီႈယႃႇၵုပ်ႈၼၼ်ႉလႄႈ၊ ဢေးသေႃးၸင်းယႃႇၵုပ်ႈလႄႈ လၢတ်ႈၼႂ်းၸႂ်လႄႈဝႃႈ၊ ၶိင်ႇၵႃႇလႃႉဢၼ်တၵ်းလႆႈမႆႈၸႂ်ထိုင်ၸႂ် ၵွပ်ႈပိူဝ်ႈပေႃႈၵဝ်ၼၼ်ႉ၊ ၸမ်တၵ်းႁွတ်ႈထိုင်ယဝ်ႉ။ မိူဝ်ႈၼၼ်ႉၸိုင်၊ ၵဝ်တၵ်းဢဝ်ၼွင်ႉၸၢႆးၵဝ်ယႃႇၵုပ်ႈတၢႆပႅတ်ႈဢေႃႈ၊ ဝႃႈၼင်ႇၼႆဢေႃႈ။
42ၵႂၢမ်းဢၼ်ဢေးသေႃးလုၵ်ႈၸၢႆးၵေႃႉယႂ်ႇလၢတ်ႈၼၼ်ႉ ႁွတ်ႈထိုင်ၵႃႈတီႈႁူမႄႈမၼ်းရေႇပႅၵ်ႉၵႃႉၼၼ်ႉလႄႈ၊ ရေႇပႅၵ်ႉၵႃႉၼၼ်ႉ ႁွင်ႉဢဝ်ယႃႇၵုပ်ႈ လုၵ်ႈၸၢႆး ၵေႃႉလဵၵ်ႉလႄႈဝႃႈ၊ တူၺ်းလူး၊ ပီႈဢၢႆႈမႂ်းဢေးသေႃးၼၼ်ႉ ၵျၢမ်ႇပွင်တၵ်းဢဝ်မႂ်းတၢႆသေယဝ်ႉ၊ ပေႇၸႂ်မၼ်းၵႃႈၼႂ်း ဢမူႉမႂ်း ၼၼ်ႉဢေႃႈ။- 43ပိူဝ်ႈၼႆလႄႈ လုၵ်ႈၸၢႆးၵဝ်ဢိူၺ်း၊ ထွမ်ႇဢဝ်ၵႂၢမ်းၵဝ်သေၵမ်းတႃႉ။ လုၵ်ႉလႄႈပၢႆႈၵႂႃႇၸူးၵႃႈတီႈဝဵင်းၶႃႇရၢၼ်ႇတီႈဢၼ် ပီႈၸၢႆးၵဝ်လႃႇပၢၼ်ႇ ယူႇၼၼ်ႉသေၵမ်းတႃႉ။- 44ၵိုတ်းသဝ်းယူႇၵႃႈတီႈမၼ်းၼၼ်ႉ ၵမ်းဢွၼ်ႇၼိုင်ႈ တေႃႇထိုင်ႁွတ်ႈၸႂ်ပီႈဢၢႆႈမႂ်းပေႇယဝ်ႉၼၼ်ႉသေၵမ်းတႃႉ။- 45မိူဝ်ႈဢၼ်ပီႈဢၢႆႈမႂ်း ပေႇၸႂ်လႄႈလိုမ်းလွင်ႈဢၼ်မႂ်းႁဵတ်းတီႈမၼ်းၼၼ်ႉယဝ်ႉၼၼ်ႉၸိုင်၊ ၵဝ်တၵ်းပွႆႇၸႂ်ႉၵႂႃႇလႄႈ ဢဝ်မႂ်းမႃးသေၵႃႈတီႈၼၼ်ႈဢေႃႈ။ ၼႂ်းဝၼ်းလဵဝ်ၵူၺ်းႁဵတ်းသင်လႄႈ ၵဝ်တၵ်းလႆႈသုမ်းလုၵ်ႈၸၢႆးၵဝ်တင်းသွင်ၵေႃႉၼႆႉ ၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။
46ၵမ်းၼၼ်ႉ ရေႇပႅၵ်ႉၵႃႉလၢတ်ႈတီႈဢီႉၸၢၵ်ႈလႄႈဝႃႈ၊ ၵဝ်ၶႃႈငိၼ်းမိူဝ်ႇငိၼ်းၸၢၼ်ႈဢသၢၵ်ႈတူဝ်ၸဝ်ႈၵဝ်ႇ ၵွပ်ႈပိူဝ်ႈလုၵ်ႈယိင်း ၵူၼ်းႁေႇသႃႉၸိူဝ်းၼႆႉ ၼႃႇလူင်လၢင်ဢေႃႈ။ ပေႃးယႃႇၵုပ်ႈပဵၼ်ႁိူၼ်းပဵၼ်ယေး လူၺ်ႈၵၼ်တင်းလုၵ်ႈယိင်းၵူၼ်းႁေႇသႃႉ ဢၼ်မိူၼ်ၸိူဝ်ႉၼင်ႇၶဝ် ဢၼ်ပဵၼ်လုၵ်ႈယိင်းၵူၼ်းမိူင်းၼႆႉၸိူဝ်းၼႆႉၸိုင်၊ ၵဝ်ၶႃႈဢသၢၵ်ႈလိပ်းယူႇလႄႈ တၵ်းမီးဢၵျူဝ်းၵႃႈသင်ၶႃႈ၊ ဝႃႈၼင်ႇၼႆဢေႃႈ။
Currently Selected:
ငဝ်ႈၵမ်ႇၽႃႇ 27: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
