ဢႃႇမူတ်ႉ 9
9
တၢင်းဢၼ်ထႃႇဝရႃႉၽြႃးၸီႇယၢင်ႇတြႃး
1လႆႈသမ်ႉ ၵဝ်ႁၼ်ၸဝ်ႈၽြႃးၸုၵ်းယူႇ ၵႃႈၼိူဝ်ယိတ်ႈပလၢင်ႇလႄႈ မီးဢမိင်ႉလႄႈဝႃႈ၊ ပေႃႉယႅၼ်ႉ ၶိုဝ်ႇၽၵ်းတူ ႁႂ်ႈသဝ်ၽၵ်းတူသၼ်ႇၶွၼ်းလႄႈ ဢဝ်ၶဝ်ၵိူၼ်ႇပင်း တူၵ်းသႂ်ႇ ၵႃႈၼိူဝ်ႁူဝ်ၵူၼ်း ၵႃႈမီးတႃႉ။ ၵဝ်တၵ်းဢဝ်လုၵ်ႈၶဝ် လၢင်းၶဝ်တၢႆ လူၺ်ႈလၢပ်ႇလူၺ်ႈလႅဝ်းဢေႃႈ။ ၵေႃႉဢၼ်ဢွၵ်ႇပၢႆႈၼၼ်ႉ ဢမ်ႇလႆႈဢွၵ်ႇပၢႆႈ။ ၵေႃႉဢၼ်လွတ်ႈဢွၵ်ႇၼၼ်ႉ ဢမ်ႇလႆႈလွတ်ႈဢွၵ်ႇ။- 2ပိၵ်ႉသမ်ႉၶဝ် ၶုတ်းၶုမ်ၶုတ်းႁူး ပွင်ႇၶဝ်ႈႁွတ်ႈထိုင်ၵႃႈၼႂ်း မိူင်းမရၼႃႉသေၵေႃႈ၊ ၶႅၼ်မိုဝ်းၵဝ် တၵ်းၼုၵ်ႈဢဝ်ၶဝ် ဢွၵ်ႇသေၵႃႈၼႂ်းၼၼ်ႉဢေႃႈ။ ပိၵ်ႉသမ်ႉၶဝ်ၶိုၼ်ႈၵႃႈၼိူဝ်ၽႃႉၵၢင်ႁၢဝ်သေၵေႃႈ၊ ၵဝ်တၵ်းၶျႃးၶဝ်တူၵ်းသေ ၵႃႈတီႈၼၼ်ႈဢေႃႈ။- 3ပိၵ်ႉသမ်ႉၶဝ်တဵတ်ႇမႅပ်ႉယူႇ ၵႃႈၼိူဝ်ပၢႆၸိၵ်းလွႆၵရမေႇလႃႉသေၵေႃႈ ၵဝ်တၵ်းႁႃလႄႈ ဢဝ်ၶဝ်ဢွၵ်ႇသေ ၵႃႈတီႈၼၼ်ႈဢေႃႈ။ ပိၵ်ႉသမ်ႉၶဝ် တဵတ်ႇမႅပ်ႉသေ မၢၵ်ႇတႃၵဝ်လႄႈ ယူႇၵႃႈတီႈ တႂ်ႈပိုၼ်ႉၼမ်ႉ သမ်ႇမုၵ်ႉတြႃႇသေၵေႃႈ၊ ၵဝ်တၵ်းသင်ႇလၢတ်ႈၼၵႃးလႄႈ ႁႂ်ႈမၼ်းၶူပ်းၶဝ်ဢေႃႈ။- 4ပိၵ်ႉသမ်ႉၶဝ်ၶၢမ်ႇတၢင်းဢၼ်သိမ်းဢဝ်ၵႂႃႇ ၵႃႈတီႈၽၢႆႇၼႃႈ ရၢၼ်ႇသူႇၶဝ် ၸိူဝ်းၼၼ်ႉသေၵေႃႈ ၵဝ်တၵ်းသင်ႇလၢတ်ႈ လၢပ်ႇလႅဝ်းၵႃႈၼႂ်းတီႈၼၼ်ႈလႄႈ ႁႂ်ႈဢဝ်ၶဝ်တၢႆဢေႃႈ။ ၵဝ်တၵ်းဢဝ်တႃၵဝ် ယႅၵ်ႉတူၺ်းၶဝ် ႁႂ်ႈလႆႈႁဵတ်းၵျေးၸူး ဢမ်ႇၸႂ်ႈ၊ ႁႂ်ႈလႆႈႁဵတ်းဢပႅတ်ႈသႂ်ႇ ၵူၺ်းဢေႃႈ။- 5ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးပဵၼ်ၸဝ်ႈ ဢၼ်တိူဝ်ႉသႂ်ႇလိၼ်မိူင်းလႄႈ လိၼ်မိူင်းပဵၼ်ၼမ်ႉၵႂႃႇလႄႈ ၶဝ်ၵႃႈဢၼ်ယူႇၵႃႈၼိူဝ်မၼ်းၼၼ်ႉ လႆႈၶၢင်းၶီၶၢင်းၽၢၼ် ယူႇၼၼ်ႉဢေႃႈ။ တၵ်းလုၵ်ႉတင်းမိူင်း ၸိူဝ်ႉၼင်ႇၼမ်ႉႁွင်ႈလူင် ၼၼ်ႉလႄႈ ၵမ်းလိုၼ်းယွမ်းတူၵ်းၵႂႃႇ မိူၼ်ၸိူဝ်ႉၼင်ႇၼမ်ႉႁွင်ႈဢေႇၵိပ်ႉတူႉၼၼ်ႉဢေႃႈ။- 6မၼ်းၸဝ်ႈႁဵတ်းလုၵ်းႁၢၼ်ႉၼိူဝ်ၸဝ်ႈ ၵႃႈၼိူဝ်ၽႃႉၵၢင်ႁၢဝ်လႄႈ တႄႇႁဵတ်းဢၼ်ဝူၼ်းၼႃႈၽႃႉၸဝ်ႈ ၵႃႈၼိူဝ်လိၼ်မိူင်းဢေႃႈ။ မၼ်းၸဝ်ႈႁွင်ႉဢဝ်ၼမ်ႉ သမ်ႇမုၵ်ႉတြႃႇလႄႈ ဢဝ်သွၼ်းလေႃႇသႂ်ႇ ၵႃႈၼိူဝ်ၼႃႈလိၼ်မိူင်းဢေႃႈ။ မၼ်းၸဝ်ႈမီးၼႃႇမႃႉၸိုဝ်ႈသဵင် ထႃႇဝရႃႉၽြႃးဢေႃႈ။- 7ၵူၼ်းမဵဝ်းဢီႉသရေႇလႃႉတင်းလၢႆၶဝ်ဢိူၺ်း၊ သူပဵၼ်ၸိူဝ်ႉၼင်ႇၵူၼ်းမဵဝ်းၵူႉသႃႉၸိူဝ်းၼၼ်ႉ တီႈၵဝ်ဢမ်ႇၸႂ်ႈႁိုဝ်။ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။ ၵဝ်ၼုၵ်ႈဢဝ်မဵဝ်းဢီႉသရေႇလႃႉ ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉ၊ ၵူၼ်းၽီႉလိတ်ႉတီႉတင်းလၢႆ ဢွၵ်ႇသေၵႃႈၼႂ်းမိူင်းၵပ်ႉတေႃးရႃႉ၊ ၵူၼ်းသူႉရီႉတင်းလၢႆ ဢွၵ်ႇသေၵႃႈၼႂ်းမိူင်းၵီႉရႃႉ မႃးယဝ်ႉဢမ်ႇၸႂ်ႈႁိုဝ်။- 8တႃၸဝ်ႈထႃႇဝရႃႉၽြႃး လူတူၺ်း သိုင်ႇၸိုင်ႈဝၢၼ်ႈမိူင်း ဢၼ်မီးဢပႅတ်ႈၼၼ်ႉလႄႈ ၵဝ်တၵ်းပႄႇမၼ်းပႅတ်ႈသေ ၵႃႈၼိူဝ်ၼႃႈလိၼ်မိူင်းဢေႃႈ။ ၼႂ်းဝႃႈၼၼ်သေၵေႃႈ ၵဝ်တၵ်းဢမ်ႇယႃႉမဵဝ်းယႃႇၵုပ်ႈပႅတ်ႈ မူတ်းမူတ်းသဵင်ႈသဵင်ႈ၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။- 9တူၺ်းလူး။ ၵဝ်တၵ်းမီးဢမိင်ႉလႄႈ ဢဝ်ၶိုင် ၶိုင်ဢဝ်မဵဝ်း ဢီႉသရေႇလႃႉ ၵႃႈၼႂ်းၵူၼ်း ၵူႈၸိူဝ်ႉၵူႈမဵဝ်း မိူၼ်ၸိူဝ်ႉၼင်ႇဢၼ်ဢဝ်ၶိုင် ၶိုင်ၶဝ်ႈသၢၼ် ၼၼ်ႉဢေႃႈ။ ဢမ်ႇလႆႈတူၵ်း ၵႃႈတီႈလိၼ်သေမဵတ်ႉ။- 10ၵူၼ်းၵဝ် ၵႃႈဢၼ်ဢပႅတ်ႈ ၼမ်ၼႃႇလႄႈ လၢတ်ႈလႄႈဝႃႈ၊ ၽေးဢူႉပၢတ်ႈၼၼ်ႉ တၵ်းဢမ်ႇၶိုတ်းႁဝ်းလႆႈ။ ဢမ်ႇႁႄႉၶႅၼ်ႁဝ်းလႆႈ၊ ဝႃႈၼင်ႇၼႆၼၼ်ႉ တၵ်းလႆႈတၢႆ လူၺ်ႈလၢပ်ႇလူၺ်ႈလႅဝ်း ဢေႃႈ။
ၶိုၼ်းမႄးၵုမ်းမႄးႁဵတ်းမိူင်းဢီႉသရေႇလႃႉ
11ၼႂ်းမိုဝ်ႉဝၼ်းၼၼ်ႉ ၵဝ်တၵ်းၶိုၼ်းမႄးၵုမ်း မႄးႁဵတ်းသုမ်ႉထဵင်တႃႇဝိတ်ႈ ဢၼ်လူမ်ႉလႄႈ မီးယူႇၼၼ်ႉလႄႈ ႁႂ်ႈတီႈဢၼ်တႅၵ်ႇဢႃႈမၼ်း ၸိူဝ်းၼၼ်ႉ ၶိုၼ်းငီႇငႅၼ်ႈၵၼ် သေလႄႈ ၶိုၼ်းတႄႇၶိုၼ်းႁဵတ်း တီႈဢၼ် ၵိူၼ်ႇပင်း လူႉလႅဝ်မၼ်း တင်းလၢႆ လႄႈ ႁႂ်ႈမၼ်းၶိုၼ်းတင်ႈသိုဝ်ႈယူႇ မိူၼ်ၸိူဝ်ႉၼင်ႇ ဢၼ်မီးမိူဝ်ႈဢွၼ်တၢင်းၼႆႉၼၼ်ႉ- 12ႁႂ်ႈၶဝ်လႆႈသိမ်းဢဝ် ၸႃႉၸဵမ်ၵူၼ်းမဵဝ်းဢေႇတုမ်ႇ ဢၼ်ၵိုတ်း ဢၼ်ၵျၢၼ်ႇဝႆႉၼၼ်ႉ ဢိၵ်ႇတင်း ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ၶၢမ်ႇတၢင်းဢၼ် ဢဝ်ၼႃႇမႃႉၸိုဝ်ႈသဵင်ၵဝ် ႁွင်ႉႁဵၵ်ႈၵႃႈမီး တင်းသဵင်ႈတင်းလူင်ၼၼ်ႉ မႃးဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး ဢၼ်ၸီႇယၢင်ႇ လွင်ႈတၢင်းၼႆႉၼၼ်ႉ မီးဢမိင်ႉဢေႃႈ။- 13ထႃႇဝရႃႉၽြႃး မီးဢမိင်ႉၸမ်ႉ၊ ၶိင်ႇမိုဝ်ႉဝၼ်း ဢၼ်ၵေႃႉဢၼ်ထိူၼ်ႇၼႃး တၵ်းၶိုတ်းၵေႃႉဢၼ် ပၢတ်ႇၶဝ်ႈလႄႈ ၵေႃႉဢၼ်ၼူတ်ႈမၢၵ်ႇၸပိတ်ႈ တၵ်းၶိုတ်းၵေႃႉဢၼ် ဝၢၼ်ႇၸိူဝ်ႉဝၢၼ်ႇၽၼ်း၊ ဢၼ်လွႆတင်းလၢႆ တၵ်းယွတ်ႇႁူဝ်ႈဢွၵ်ႇ ၼမ်ႉၸပိတ်ႈဢၼ်ဝၢၼ်လႄႈ ၵုင်းၵႃႈမီး တၵ်းၸိူမ်ႈပဵၼ်ၼမ်ႉၵႂႃႇၼၼ်ႉ တၵ်းႁွတ်ႈမႃးဢေႃႈ။- 14ၵဝ်တၵ်းဢဝ်ၵူၼ်းၵဝ် ၵူၼ်းမဵဝ်းဢီႉသရေႇလႃႉ ဢၼ်လႆႈၶၢမ်ႇ တၢင်းဢၼ်သိမ်းဢဝ်ၵႂႃႇ ၸိူဝ်းၼၼ်ႉၶိုၼ်းမႃးလႄႈ ၶဝ်ၼၼ်ႉ တၵ်းဢွၼ်ၵၼ် မႄးၵုမ်းမႄးႁဵတ်း ဝဵင်းဢၼ်လူႉလႅဝ်ၸိူဝ်းၼၼ်ႉသေလႄႈ ယူႇၵႃႈၼႂ်းဝဵင်း ၸိူဝ်းၼၼ်ႉဢေႃႈ။ ၶဝ်တၵ်းဢွၼ်ၵၼ် ၽုၵ်ႇသူၼ်ဢူးယဵၼ်ႇၸပိတ်ႈ တင်းလၢႆလႄႈ သူတ်ႉၵိၼ်ၼမ်ႉၸပိတ်ႈဢေႃႈ။ ၶဝ်တၵ်း ဢွၼ်ၵၼ်လုမ်းလႃးႁႆႊၼႃးလႄႈ ၵိၼ်မၢၵ်ႇမၼ်းႁူင်းမၼ်းဢေႃႈ။- 15ၵဝ်တၵ်း ဢဝ်ၶဝ်ၽုၵ်ႇဝႆႉ ၵႃႈၼႂ်းမိူင်းၶဝ်ၼၼ်ႉလႄႈ ၵမ်းလိုၼ်း ၶဝ်တၵ်းဢမ်ႇလႆႈၶၢမ်ႇ တၢင်းဢၼ်ၽူႈလႂ် ၼုၵ်ႈဢဝ်ၶဝ်ဢွၵ်ႇသေ ၵႃႈၼႂ်းမိူင်းၶဝ်ၼၼ်ႉ ဝႃႈၼင်ႇၼႆလႄႈ ထႃႇဝရႃႉၽြႃး ၽြႃးပဵၼ်ၸဝ်ႈမႂ်း မီးဢမိင်ႉဢေႃႈ။
ၵျၢမ်းဢၼႃႇၵၢတ်ႈတီႉဢႃႇမူတ်ႉယဝ်ႉယဝ်ႉဢေႃႈ။
Currently Selected:
ဢႃႇမူတ်ႉ 9: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
