ဢႃႇမူတ်ႉ 4
4
1ဝူဝ်းပႃႇသၢၼ်ႇ ဢၼ်ယူႇၵႃႈၼိူဝ် လွႆသမႃႇရီႉ၊ ဢၼ်ၼိၵ်ႈၸၢၵ်ႈငႅၼ်းသႄး ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉယူႇ၊ ဢၼ်တဵၵ်းၼႅၼ်ႉၵႅၼ်ႉ ၶေႃးၶဝ်ၸိူဝ်းဢၼ်ၸုတ်ႈ ဢၼ်လုတ်ႈၼၼ်ႉယူႇ၊ ဢၼ်ၸၢင်ႈလၢတ်ႈတီႈၸဝ်ႈၶဝ် တင်းလၢႆလႄႈဝႃႈ၊ ဢွၼ်ၵၼ်ဢဝ်မႃးလႄႈ သူတ်ႉၵိၼ်တႃႉႁဝ်း၊ ဝႃႈၼင်ႇၼႆယူႇၶဝ်ဢိူၺ်း၊ ဢွၼ်ၵၼ်ထွမ်ႇဢဝ်ၵႂၢမ်းၼႆႉတႃႉ။- 2ၵႃႈၼင်ႇဢၼ်ၸဝ်ႈ ထႃႇဝရႃႉၽြႃး ဢဝ်ပႃႇရမီႇတၢင်းဢၼ်မူတ်းၸၢင်ႇမၼ်းၸဝ်ႈ တိူင်ႇဝႃႈၵိၼ်ႇဝႃႈဝႆႉၼၼ်ႉ၊ တူၺ်းလူး။ ၶိင်ႇမိူဝ်ႈဢၼ် ၶဝ်တၵ်းဢဝ်တင်းဝဵတ်းသေလႄႈ တီႉၵမ်ဢဝ်သူလႄႈ ဢဝ်တင်းၶႄသေလႄႈ တီႉၵမ်ဢဝ်လုၵ်ႈသူ လၢၼ်သူၵႂႃႇၼၼ်ႉ တၵ်းႁွတ်ႈမႃးတီႈသူဢေႃႈ။- 3သူတၵ်းလႆႈဢွၵ်ႇ ၸွမ်းၵႃႈၼႂ်းႁူး တီႈဢၼ်ၵိူၼ်ႇဢၼ်လူႉသိုဝ်ႈၼႃႈသူ ႁင်းၽႂ်ႁင်းမၼ်းသေလႄႈ ဢဝ်တူဝ်ၸဝ်ႈၵဝ်ႇ ၶျႃးတူၵ်းၵႃႈၼႂ်းမိူင်းႁႃႇမုၼ်ႇဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။
ၵူၼ်းမဵဝ်းဢီႉသရေႇလႃႉဢမ်ႇၶိုၼ်းမႃးၸူးတီႈၽြႃးပဵၼ်ၸဝ်ႈ
4ဢွၼ်ၵၼ်ၵႂႃႇၵႃႈတီႈဝဵင်းပေႇသလႃႉလႄႈ ၽိတ်းပိူင်ႈတႃႉ။ ၵႃႈတီႈဝဵင်းၵီႉလႃႉၵႃႇလႃႉၵေႃႈ ဢွၼ်ၵၼ်ၵႂႃႇလႄႈ ႁဵတ်းတၢင်းဢၼ်ၽိတ်းပိူင်ႈၼမ်ၼမ်တႃႉ။ ဢွၼ်ၵၼ်ဢဝ် ယိတ်ႈဢၼ်ပုၵ်ႈၸေႃႇၵူႈၼႂ် ဢိၵ်ႇတင်း ဢုၵ်ႉၸႃႇသိပ်းပုၼ်ႈပုၼ်ႈၼိုင်ႈ ဢၼ်သၢမ်ပီႊယေႈပွၵ်ႈၼၼ်ႉမႃးတႃႉ။- 5ဢွၼ်ၵၼ်ဢဝ် ၶိူင်ႈပုၵ်ႈၸေႃႇ တၢင်းဢၼ်ယွင်ႈယေႃးၵျေးၸူးၸဝ်ႈ ဢၼ်ပႃးၸိူဝ်ႉပႅင်ႈၼၼ်ႉ တုတ်ႇၽႆးတႃႉ။ ၶိူင်ႈပုၵ်ႈၸေႃႇ ဢၼ်ယူႇဢလူဝ်ႇလူဝ်ႇလႄႈ ႁဵတ်းၸိူဝ်းၼၼ်ႉၵေႃႈ ဢွၼ်ၵၼ်မွၵ်ႇလၢတ်ႈလႄႈ ပၢဝ်ႇသေႃႇတႃႉ။ ၵူၼ်းမဵဝ်း ဢီႉသရေႇလႃႉတင်းလၢႆၶဝ်ဢိူၺ်း၊ သူၸၢင်ႈထုၵ်ႇၸႂ်ၵျိူၵ်ႈၸႂ် လွင်ႈတၢင်းဢၼ်ႁဵတ်း ၸိူဝ်ႉၼင်ႇၼၼ်ၼၼ်ႉဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။- 6ပိၵ်ႉသမ်ႉ ၵဝ်ပၼ်တၢင်းဢၼ်ၶဵဝ်ႈသူ ပဵၼ်ဢၼ်မူတ်းဢၼ်သႂ်ၵႂႃႇ ၵႃႈၼႂ်းဝၢၼ်ႈသူ ဝဵင်းသူၵႃႈမီး ဢိၵ်ႇတင်းတၢင်းဢၼ် ၶဝ်ႈၵႃႈမၢၵ်ႇပႅင်း ၵႃႈၼႂ်းတီႈဢၼ်သူယူႇသူသဝ်းၵႃႈမီးၼၼ်ႉသေၵေႃႈ၊ သူဢမ်ႇဢွၼ်ၵၼ်ၶိုၼ်းမႃးၸူး ၵႃႈတီႈၵဝ်၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။- 7ၵဝ်ႁၢမ်ႈတၢပ်ႈႁႄႉၶႅၼ်ၽူၼ်ဝႆႉ ႁႂ်ႈၽူၼ်ဢမ်ႇတူၵ်းၼႂ်းသၢမ်လိူၼ် ၸူဝ်ႈဢၼ်ဢမ်ႇပႆႇႁွတ်ႈထိုင် ၶိင်ႇမိူဝ်ႈဢၼ်ပၢတ်ႇၶဝ်ႈ ၼၼ်ႉယဝ်ႉ။ ၵဝ်ႁဵတ်းႁႂ်ႈၽူၼ်တူၵ်းသႂ်ႇၵႃႈၼိူဝ်ဝဵင်း ဝဵင်းၼိုင်ႈလႄႈ လိၼ်ၵႂၢၵ်ႈၼိုင်ႈလႆႈၶၢမ်ႇၽူၼ်လႄႈ ၵႂၢၵ်ႈၼိုင်ႈဢမ်ႇလႆႈၶၢမ်ႇၽူၼ်ၼၼ်ႉ လႆႈႁႅင်ႈႁွင်ဝႆႉဢေႃႈ။- 8ၼင်ႇၼၼ်လႄႈ ၵူၼ်းသွင်ဝဵင်းသၢမ်ဝဵင်းၸိူဝ်းၼၼ်ႉ ဢွၼ်ၵၼ်ၵႂႃႇၸူးၵႃႈတီႈဝဵင်းၼိုင်ႈ ႁႂ်ႈလႆႈၵိၼ်ၼမ်ႉလႄႈ ဢမ်ႇလႆႈဢိမ်ႇလႆႈတဵမ်။ ၵူၺ်းၵႃႈ သူဢမ်ႇဢွၼ်ၵၼ်ၶိုၼ်းမႃးၸူးၵႃႈတီႈၵဝ်၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။- 9ၵဝ်ဢဝ်ၽေးတၢင်းဢၼ်လူမ်းထူဝ်းလႄႈ တူၼ်ႈမႆႉတၢႆ၊ တၢင်းဢၼ်သႃးလႄႈ တူၼ်ႈတၢႆၼၼ်ႉ ပၼ်တၢမ်ႇတီႈသူယဝ်ႉ။ မႅင်းၵႅင်းတင်းလၢႆ ၶူပ်းၵိၼ်ႁႆႊၼႃးသူ၊ သူၼ်ဢူးယဵၼ်ႇၸပိတ်ႈသူ၊ တူၼ်ႈမၢၵ်ႇလိူဝ်ႇသၢင်းၽေႃးသူ၊ တူၼ်ႈသၢၼ်ႇလုၼ်ႇသူၸိူဝ်းၼၼ်ႉ ယဝ်ႉယဝ်ႉ။ ၵူၺ်းၵႃႈ သူဢမ်ႇဢွၼ်ၵၼ်ၶိုၼ်းမႃးၸူးၵႃႈတီႈၵဝ်၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။- 10ၵဝ်ပွႆႇၸႂ်ႉၽေးၵႃႇလႃႉႁႃႈလႅင်မိူင်း ဢၼ်မိူင်းဢေႇၵိပ်ႉတူႉလႆႈၶၢမ်ႇၼၼ်ႉ ၸူးၵႃႈတီႈသူယဝ်ႉယဝ်ႉ။ ၵဝ်ႁႂ်ႈဢဝ်မႃႉသူတင်းလၢႆ ၵႂႃႇယဝ်ႉယဝ်ႉ။ ၵဝ်ႁႂ်ႈဢၢႆမဵၼ်တူႇမဵၼ်ၼဝ်ႈၵႃႈၼႂ်းတပ်ႉသူၼၼ်ႉ မိုတ်းသႂ်ႇၵႃႈၼႂ်းၶူႈလင်သူယဝ်ႉယဝ်ႉ။ ၵူၺ်းၵႃႈ သူဢမ်ႇဢွၼ်ၵၼ်ၶိုၼ်းမႃးၸူးၵႃႈတီႈၵဝ်၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။- 11ၵဝ်ၶႂမ်ႈပိၼ်ႈသူပႅတ်ႈၵမ်ႈၽွင်ႈ မိူၼ်ၸိူဝ်ႉၼင်ႇဢၼ်ၽြႃးပဵၼ်ၸဝ်ႈ ၶႂမ်ႈပိၼ်ႈဝဵင်းသေႃးတုမ်ႇတင်းဝဵင်းၵေႃးမေႃးရႃႉ ပႅတ်ႈၼၼ်ႉလႄႈ သူပဵၼ်ၸိူဝ်ႉၼင်ႇလိုၼ်ႈၽႆး ဢၼ်ယိုတ်းဢဝ်ဢွၵ်ႇသေၵႃႈၼႂ်းၽႆးၼၼ်ႉယဝ်ႉယဝ်ႉ။ ၵူၺ်းၵႃႈ သူဢမ်ႇဢွၼ်ၵၼ်ၶိုၼ်းမႃးၸူးၵႃႈတီႈၵဝ်၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။- 12ပိူဝ်ႈၼႆလႄႈ မဵဝ်းဢီႉသရေႇလႃႉဢိူၺ်း၊ ၵဝ်တၵ်းႁဵတ်းတီႈမႂ်း မိူၼ်ၸိူဝ်ႉၼင်ႇဢၼ်ၵဝ်ႁဵတ်းမိူဝ်ႈဢွၼ်တၢင်းၼၼ်ႉဢေႃႈ။ ၵွပ်ႈပိူဝ်ႈဢၼ် ၵဝ်တၵ်းႁဵတ်းၸိူဝ်ႉၼင်ႇၼၼ် ၼၼ်ႉလႄႈ မဵဝ်းဢီႉသရေႇလႃႉဢိူၺ်း၊ ပွင်မႄးပွင်ႁႅၼ်း တူဝ်မႂ်းဝႆႉ ႁႂ်ႈမႂ်းလႆႈထူပ်းၵၼ်တင်း ၽြႃးပဵၼ်ၸဝ်ႈမႂ်းတႃႉ။- 13ၸဝ်ႈဢၼ်ႁဵတ်းလွႆတင်းလၢႆ၊ ဢၼ်ၽၢၼ်ႇသၢင်းႁဵတ်းပဵၼ်လူမ်း၊ ဢၼ်ၽုၺ်ႇဢွၵ်ႇၼႄပျႃး တၢင်းၵျၢမ်ႇတၢင်းပွင် ၸႂ်ၵူၼ်းတီႈၵူၼ်း၊ ဢၼ်ႁႂ်ႈဢၼ်လႅင်း ၶိင်ႇၵၢင်ၼႂ် ပဵၼ်ဢၼ်လပ်းသိင်ႇ၊ ဢၼ်ယဵပ်ႇၶၢမ်ႈတီႈဢၼ်သုင်လိၼ်မိူင်းတင်းလၢႆၼၼ်ႉ မီးၸိုဝ်ႈမီးသဵင် ထႃႇဝရႃႉၽြႃး ၽြႃးပဵၼ်ၸဝ်ႈ ပူဝ်ႇပႃႇၵၢင်ႁၢဝ်ဢေႃႈ။
Currently Selected:
ဢႃႇမူတ်ႉ 4: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
