တမၢၼ်ႇၸဝ်ႈ 28
28
လွင်ႈဢၼ်ႁွတ်ႈထိုင်ၵုၼ်မေးလီႉတီႉ
1မိူဝ်ႈဢၼ် လွတ်ႈဢွၵ်ႇၸိူဝ်ႉၼင်ႇၼၼ်ယဝ်ႉၼၼ်ႉၸိုင်၊ ႁဝ်းႁူႉလွင်ႈဢၼ်လႆႈႁွင်ႉႁဵၵ်ႈၸိုဝ်ႈ ၵုၼ်ၼၼ်ႉဝႃႈ ၵုၼ်မေးလီႉတီႉၼၼ်ႉဢေႃႈ။- 2ၵွပ်ႈပိူဝ်ႈဢၼ်ၽူၼ်တူၵ်းလႄႈၵတ်းၼႃႇလူင်လၢင်ၼၼ်ႉ၊ ၵူၼ်းလိူင်းတင်းလၢႆသႂ်ႇၽႆးသေယဝ်ႉ၊ ႁပ်ႉတုင်းဢဝ်ႁဝ်းလႄႈႁဵတ်းၵျေးၸူးယႂ်ႇၼႃႇတီႈႁဝ်းဢေႃႈ။
3မိူဝ်ႈဢၼ်ပေႃးလူႉ ႁုပ်ႈဢဝ်ၽိုၼ်းလႄႈ သႂ်ႇၵႃႈၼိူဝ်ၽႆးၼၼ်ႉၸိုင်၊ ငူးႁၢႆႉဢွၵ်ႇသေၵႃႈၼႂ်းဢၢႆၽႆးမႃးလႄႈ ႁွႆႈၸပ်းယူႇၵႃႈတီႈမိုဝ်းမၼ်းဢေႃႈ။- 4ၵူၼ်းလိူင်းၸိူဝ်းၼၼ်ႉႁၼ်သေယဝ်ႉ၊ ၼင်ႇၵၼ်ၵၼ်လၢတ်ႈၵၼ်လႄႈဝႃႈ၊ ၵေႃႉၼႆႉၸမ်ႉ၊ ပဵၼ်ၵူၼ်းဢၼ် ဢဝ်ဢသၢၵ်ႈပိူၼ်ႈတၢႆဢမၢၼ်ႇၶၼ်ပဵၼ်ယဝ်ႉ။ ပိၵ်ႉသမ်ႉၵၢင်းလွတ်ႈတင်းၽေးပၢင်ႇလၢႆႇသေၵေႃႈ၊ တြႃးတၢင်းဢၼ်သိုဝ်ႈတေႃႇဢမ်ႇပၼ်ဢၶႂၢင်ႉႁႂ်ႈဢသၢၵ်ႈမၼ်းလႆႈလိပ်းယူႇ၊ ဝႃႈၼင်ႇၼႆဢေႃႈ။- 5မၼ်းၵေႃႈသၼ်ႇၽႅတ်းပႅတ်ႈငူးႁၢႆႉၼၼ်ႉတူၵ်းၵႃႈၼႂ်းၽႆးလႄႈ ဢမ်ႇပဵၼ်ၽေးၵႃႈသင်သေဢိတ်း။- 6ၵမ်းဢွၼ်ၼိုင်ႈမၼ်းတၵ်းၵႂ်ႈတင်းတူဝ်တင်းၶိင်း၊ ဢမ်ႇၼၼ်ၵေႃႈ မၼ်းတၵ်းလူမ်ႉလႄႈတၢႆဝႃႈၼႆ၊ ပိၵ်ႉသမ်ႉၶဝ်ပႂ်ႉထႃႈပႂ်ႉတူၺ်းယူႇႁိုင်ၼႃႇသေၵေႃႈ၊ မိူဝ်ႈဢၼ်ဢမ်ႇႁၼ်ဢၼ်ဢမ်ႇလီသေၸိူဝ်ႉသေပိူင် ၵႃႈတီႈမၼ်းၼၼ်ႉၸိုင်၊ ၸႂ်ၶဝ်ၶၢႆႉပုတ်ႈသေလႄႈလၢတ်ႈဝႃႈ၊ ၵေႃႉၼႆႉပဵၼ်ၽြႃးဢေႃႈ၊ ဝႃႈၼင်ႇၼႆဢေႃႈ။
7ၵႃႈႁိမ်းတီႈၼၼ်ႉ မီးလိၼ်ဢၼ်ၵေႃႉဢၼ်လႆႈၸိုဝ်ႈပူႉပီႉလီႉဢၼ်ပဵၼ်ၵႄႇၵူၼ်းၼၼ်ႉပိူင်ႇဢေႃႈ။ မၼ်းၼၼ်ႉႁပ်ႉတုင်းဢဝ်ႁဝ်းလႄႈ ႁဵတ်းလဵင်ႉႁဵတ်းလူႁဝ်းလီလီငၢမ်းငၢမ်းသၢမ်ဝၼ်းဢေႃႈ။- 8ၵေႃႉဢၼ်ပဵၼ်ပေႃႈၶုၼ်ပူႉပီႉလီႉၼၼ်ႉ ပဵၼ်တၢင်းပဵၼ်ဢၼ်ၼၢဝ်ဢိၵ်ႇတင်းတွင်ႉၵႂႃႇပႃးလိူတ်ႈလႄႈ ၼွၼ်းယူႇဢေႃႈ။ ပေႃးလူႉၶဝ်ႈလႄႈသူးတွင်းသေယဝ်ႉ၊ ဢဝ်မိုဝ်းတၢင်ႇၵႃႈၼိူဝ်မၼ်းလႄႈ၊ ႁႂ်ႈတၢင်းၶႆႈတၢင်းပဵၼ်မၼ်းႁၢႆဢေႃႈ။- 9ပိူဝ်ႈဢၼ်ႁဵတ်းၸိူဝ်ႉၼင်ႇၼၼ်လႄႈ ၵူၼ်းတၢင်ႇတီႈတၢင်ႇလႅၼ်ဢၼ်မီးတၢင်းၶႆႈတၢင်းပဵၼ်ၵႃႈၼႂ်းၵုၼ်ၼၼ်ႉ ၵႃႈမီးၸိူဝ်းၼၼ်ႉဢွၼ်ၵၼ်မႃးၸူးလႄႈ လႆႈၵတ်းယဵၼ်ၶျၢမ်းသႃႇဢေႃႈ။- 10ၶဝ်ၼၼ်ႉ ႁဵတ်းလေႃးၵႃႉဝၢတ်ႈၼမ်ၼႃႇတီႈႁဝ်းလႄႈ မိူဝ်ႈဢၼ်ႁဝ်းၶီႇႁိူဝ်းသၢင်းၽေႃးဢွၵ်ႇၵႂႃႇၼၼ်ႉၸိုင်၊ ၶဝ်ဢဝ်ၶိူင်ႈပိူင်ဢၼ်ႁဝ်းလူဝ်ႇၵူႈၸိူဝ်ႉၵူႈပိူင်တၢင်ႇပၼ်ၵႃႈၼိူဝ်ႁိူဝ်းသၢင်းၽေႃးဢေႃႈ။
လွင်ႈဢၼ်ႁွတ်ႈထိုင်ဝဵင်းရူဝ်းမႃႉ
11ၼင်ႇၼၼ်လႄႈ ပူၼ်ႉသေသၢမ်လိူၼ်ယဝ်ႉ၊ ႁဝ်းသမ်ႉၶီႇႁိူဝ်းသၢင်းၽေႃး ဢႃႇလေႇၸၼ်ႇတရေႇ ဢၼ်ပႃးႁၢင်ႈရုၵ်ႈထူႉၽြႃးၽႃၽေ ဢၼ်လႆႈယူႇၶိင်ႇၵတ်းၵႃႈတီႈၵုၼ်ၼၼ်ႈၼၼ်ႉၵႂႃႇလႄႈ၊- 12မိူဝ်ႈဢၼ်သိူၵ်ႈႁွတ်ႈၵႃႈတီႈဝဵင်းသူႉရၵုတ်ႉၸိုင်၊ ယူႇသၢမ်ဝၼ်းဢေႃႈ။- 13သမ်ႉလုၵ်ႉသေၵႃႈတီႈဝဵင်းၼၼ်ႉ ၶီႇႁိူဝ်းသၢင်းၽေႃးလဵပ်ႈၵႂႃႇႁွတ်ႈထိုင်ၵႃႈတီႈဝဵင်းရေႇၵျုၼ်ႇလႄႈယူႇဝၼ်းၼိုင်ႈယဝ်ႉ၊ ပိူဝ်ႈဢၼ်လူမ်းတၢင်းၸၢၼ်းထူဝ်းမႃးယူႇလႄႈ ၼႂ်းသွင်ဝၼ်းၵူၺ်းႁွတ်ႈထိုင်ၵႃႈတီႈဝဵင်းပေႃႇတယေႃႇလီဢေႃႈ။- 14ႁဝ်းထူပ်းႁၼ်ပီႈၼွင်ႉတင်းလၢႆ ၵႃႈတီႈဝဵင်းၼၼ်ႉလႄႈ ၸွမ်းၼင်ႇဢၼ်ၶဝ်တွင်းပၢၼ်ႇလႄႈဝႃႈ၊ ယူႇၸဵတ်းဝၼ်းသေၵမ်း၊ ဝႃႈၼင်ႇၼႆၼၼ်ႉ၊ ယူႇယဝ်ႉၸင်ႇပႆတၢင်းၵႂႃႇၸူးၵႃႈတီႈဝဵင်းရူဝ်းမႃႉဢေႃႈ။- 15မိူဝ်ႈဢၼ်ပီႈၼွင်ႉဢၼ်မီးယူႇၵႃႈၼႂ်းဝဵင်းရူဝ်းမႃႉၸိူဝ်းၼၼ်ႉ ႁူႉငိၼ်းလွင်ႈဢၼ်ႁဝ်းမႃးၼၼ်ႉၸိုင်၊ ၶဝ်ဢွၼ်ၵၼ်ဢွၵ်ႇမႃးၵမ်ႈၽွင်ႈ တေႃႇထိုင်ႁွတ်ႈၵၢတ်ႇဢပ်ႉပီႉ ၵမ်ႈၽွင်ႈတေႃႇထိုင်ႁွတ်ႈ ၸရွပ်ႈသၢမ်လင် ႁႂ်ႈလႆႈႁပ်ႉႁူဝ်တၢင်းႁဝ်းဢေႃႈ။ မိူဝ်ႈဢၼ်ပေႃးလူႉ ႁၼ်ၶဝ်ၼၼ်ႉၸိုင်၊ မၼ်းယွင်ႈယေႃးၵျေးၸူးၽြႃးပဵၼ်ၸဝ်ႈလႄႈ မီးတၢင်းဢၼ်ၸႂ်သၢၵ်ႈသႃႇမႃးဢေႃႈ။
လွင်ႈသႃႇသၼႃႇၼႂ်းဝဵင်းရူဝ်းမႃႉ
16မိူဝ်ႈဢၼ်ႁဝ်းႁွတ်ႈထိုင် ၵႃႈၼႂ်းဝဵင်းရူဝ်းမႃႉၼၼ်ႉၸိုင်၊ တပ်ႉမူးၼၼ်ႉ ဢဝ်ၵူၼ်းၶၢမ်ႇတူၵ်းၵိၼ်းၸိူဝ်းၼၼ်ႉ ဢၢပ်ႈပၼ်တီႈၵႄႇၵူဝ်ႇရမ်ႇလႄႈ ပေႃးလူႉလႆႈဢၶႂၢင်ႉဢၼ်လႆႈယူႇၵမ်ႈၸႂ် လူၺ်ႈၵၼ်တင်းၵူၼ်းသိုၵ်းဢၼ်ပႂ်ႉမၼ်းၼၼ်ႉဢေႃႈ။- 17ပူၼ်ႉသေသၢမ်ဝၼ်းယဝ်ႉ၊ ပေႃးလူႉႁွင်ႉဢဝ်ၶဝ်ၸိူဝ်းဢၼ်ပဵၼ်ၵူၼ်းယႂ်ႇၵူၼ်းလူင် ၵႃႈၼႂ်းၵူၼ်းယူႉတႃႉတင်းလၢႆမႃးလႄႈ ၶဝ်ၸူႉၵၼ်တုမ်ၵၼ်သေယဝ်ႉ၊ မၼ်းၸင်ႇလၢတ်ႈလႄႈဝႃႈ၊ ပီႈၼွင်ႉၶဝ်ဢိူၺ်း၊ ပိၵ်ႉသမ်ႉၵဝ်ၶႃႈဢမ်ႇပိူင်ႈဢမ်ႇလွႆး ၵူၼ်းမဵဝ်းႁဝ်းဢိၵ်ႇတင်းထုင်းၸၢမ်ႇဢၼ်ပူႇပေႃႈႁဝ်း ၵမ်ၵျၢင်ႉၸိူဝ်းၼၼ်ႉသေၵေႃႈ၊ ၵူၼ်းဝဵင်းယေႇရူႉသလႅမ်ႇၸိူဝ်းၼၼ်ႉ ဢဝ်ၵဝ်ၶႃႈတူၵ်းၵိၼ်းသေလႄႈ ဢၢပ်ႈပၼ်ၵႃႈၼႂ်းမိုဝ်းၵူၼ်းရူဝ်းမႃႉတင်းလၢႆဢေႃႈ။- 18ၶဝ်ၸႅတ်ႈထၢမ်ၸႅတ်ႈတူၺ်းၵဝ်ၶႃႈသေယဝ်ႉ၊ ပိူဝ်ႈဢၼ်ဢမ်ႇထူပ်းဢပႅတ်ႈဢၼ်ထုၵ်ႇတၢႆသေၸိူဝ်ႉသေပိူင်လႄႈ မီးဢလူဝ်ႇၶႂ်ႈပွႆႇလွတ်ႈဢေႃႈ။- 19မိူဝ်ႈဢၼ်ၵူၼ်းယူႉတႃႉၸိူဝ်းၼၼ်ႉ ႁႄႉၶႅၼ်ဢလူဝ်ႇၼၼ်ႉၸိုင်၊ ပဵၼ်ဢၼ်ႁႂ်ႈၵဝ်ၶႃႈဝႃႈ၊ တၵ်းၶၢမ်ႇဢယူႇၶုၼ်ႁေႃၶမ်း ၵေႇသႃႇၶႃႈဢေႃႈ၊ ဝႃႈၼင်ႇၼႆဢေႃႈ။ ၼႂ်းလွင်ႈဢၼ်ဝႃႈၼင်ႇၼႆၼၼ်ႉၸမ်ႉ၊ ပိူဝ်ႈဢၼ်မီးတီႈတၢင်ႇဢပႅတ်ႈသေၸိူဝ်ႉသေပိူင် ၵႃႈၼိူဝ်ၵူၼ်းမဵဝ်းႁဝ်းလႄႈဝႃႈဢမ်ႇၸႂ်ႈ။- 20ပိူဝ်ႈၼႆလႄႈ ၵဝ်ၶႃႈႁွင်ႉသူၸဝ်ႈမႃး ႁႂ်ႈလႆႈႁၼ်လႄႈ တၵ်ႉလၢတ်ႈသူၸဝ်ႈဢေႃႈ။ ၵွပ်ႈပိူဝ်ႈလွင်ႈတၢင်းဢၼ် ၵူၼ်း ဢီႉသရေႇလႃႉတင်းလၢႆ မုင်ႈထႃႈမွင်းထႃႈယူႇၼၼ်ႉလႄႈၵဝ်ၶႃႈၸင်ႇလႆႈၶၢမ်ႇတၢင်းဢၼ်ဢဝ်တင်းၸိူၵ်ႈလဵၵ်းမတ်ႉၽုၵ်ႇၼႆႉၶႃႈယဝ်ႉ၊- 21မိူဝ်ႈဢၼ်ဝႃႈၼင်ႇၼႆၸိုင် ၶဝ်ၼၼ်ႉၵေႃႈလၢတ်ႈတီႈမၼ်းလႄႈဝႃႈ၊ ႁဝ်းၶႃႈဢမ်ႇလႆႈလိၵ်ႈၵႃႈတီႈမိူင်းယူႉတႃႉပုၼ်ႈလွင်ႈၸဝ်ႈ၊ ၼႂ်းပီႈၼွင်ႉဢၼ်လုၵ်ႉသေၵႃႈတီႈမိူင်းၼၼ်ႉမႃးၸိူဝ်းၼၼ်ႉၵေႃႈ၊ ၽူႈလႂ်သေၵေႃႉသေၵူၼ်း ဢမ်ႇလၢတ်ႈဢမ်ႇဝႃႈ လွင်ႈဢၼ်တၢင်ႇဢပႅတ်ႈတီႈၸဝ်ႈ။- 22ၼႂ်းဝႃႈၼၼ်သေၵေႃႈ ႁဝ်းၶႃႈမီးဢလူဝ်ႇၶႂ်ႈထွမ်ႇၶႂ်ႈငိၼ်းလွင်ႈဢၼ်ၸဝ်ႈထၢင်ႇၼၼ်ႉၵႃႈတီႈၸဝ်ႈဢေႃႈ။ လွင်ႈမၼ်းၸမ်ႉ လွင်ႈဢၼ်ၽႃႇသႃႇၼႆႉ ပဵၼ်ၽႃႇသႃႇဢၼ်လႆႈၶၢမ်ႇတၢင်းဢၼ်သႄႉသွမ်းတၢင်ႇဢပႅတ်ႈၵူႈတီႈၵူႈလႅၼ်ၼၼ်ႉၸိုင် ႁဝ်းၶႃႈႁူႉယူႇၶႃႈ၊ ဝႃႈၼင်ႇၼႆဢေႃႈ။
23ၼင်ႇၼၼ်လႄႈ ၶဝ်ၼၼ်ႉၶိၼ်းမိုဝ်ႉၶိၼ်းဝၼ်းဝႆႉသေယဝ်ႉ၊ မႃးၵႃႈတီႈဢၼ်မၼ်းသွၼ်ႈပိုင်ႈယူႇၼၼ်ႉၼမ်ၼႃႇဢေႃႈ။ မၼ်းၵေႃႈၸႃႉၸဵမ်ၶိင်ႇၵၢင်ၼႂ် တေႃႇထိုင်ႁွတ်ႈၶိင်ႇၵၢင်ၶမ်ႈ ၽုၺ်ႇဢွၵ်ႇၼႄပျႃးၶၢမ်ႇသၢၵ်ႈသေႇ ႁေႃးလၢတ်ႈလွင်ႈမိူင်းၽြႃးပဵၼ်ၸဝ်ႈလႄႈ ဢိင်ၵျၢမ်းပိင်းၺၢပ်ႈတီႉမူဝ်းသေႇတင်းၵျၢမ်းဢၼႃႇၵၢတ်ႈတီႉတင်းလၢႆသေလႄႈ တိုၵ်းယူင်းၸူဝ်းဢဝ်လွင်ႈတၢင်းဢၼ်ၸၢပ်ႈသႅင်ႇၵၼ်တင်းယေႇသူႉၼၼ်ႉဢေႃႈ။- 24ၵမ်ႈၽွင်ႈယုမ်ႇၵႂၢမ်းဢၼ်မၼ်း ႁေႃးလၢတ်ႈၼၼ်ႉဢေႃႈ။ ၵမ်ႈၽွင်ႈၵေႃႈဢမ်ႇယုမ်ႇ။- 25ၼင်ႇၼၼ်လႄႈ ၶဝ်ၼင်ႇၵၼ်ၵၼ်ၸႂ်သၽေႃးပိူင်ႈၵၼ်သေလႄႈဢွၵ်ႇၵႂႃႇဢေႃႈ။ ၼႂ်းမိူဝ်ႈဢၼ်ၶဝ်ယင်းတိုၵ်ႉဢွၵ်ႇၵႂႃႇယူႇၼၼ်ႉၸိုင်ပေႃးလူႉလၢတ်ႈၵႂၢမ်းၶေႃႈၼိုင်ႈလႄႈဝႃႈ၊ ဝီႉၺိၺ်ႇဢၼ်မူတ်းၸၢင်ႇၸဝ်ႈ ဢဝ်ပရေႃးၽႅတ်ႈဢီႉသႃႇယႃႉလၢတ်ႈၵႃႈတီႈပူႇပေႃႈႁဝ်းဝႆႉ သေႇၶျႃႇလီငၢမ်းလႄႈဝႃႈၼၼ်ႉၸမ်ႉ၊- 26ၵႂႃႇၵႃႈတီႈဢၼ်ၵူၼ်းမဵဝ်းၼႆႉမီးၼၼ်ႉသေလႄႈ လၢတ်ႈလႄႈဝႃႈ၊ သူငိၼ်းယူႇသေၵေႃႈတၵ်းငိၼ်း တၢင်းဢမ်ႇႁူႉဢမ်ႇၸႅင်ႈဢေႃႈ။ ႁၼ်ယူႇသေၵေႃႈ တၵ်းႁၼ်တၢင်းဢမ်ႇမၢတ်ႈဢမ်ႇတွင်းဝႆႉဢေႃႈ။- 27လွင်ႈမၼ်းၸမ်ႉ ၵွပ်ႈပိူဝ်ႈဢၼ်ၵူဝ်တႃၶဝ်တၵ်းႁၼ်၊ ႁူၶဝ်တၵ်းငိၼ်း၊ ႁူဝ်ၸႂ်ၶဝ်တၵ်းႁူႉၸႅင်ႈ၊ တၢင်းၵမ်တၢင်းၵျၢင်ႉၶဝ်တၵ်းၶၢႆႉပုတ်ႈ၊ ၵဝ်တၵ်းႁႂ်ႈတၢင်းၶႆႈတၢင်းပဵၼ်ၶဝ်ႁၢႆၼၼ်ႉလႄႈ၊ ၵူၼ်းမဵဝ်းၼႆႉ ႁူဝ်ၸႂ်ၶဝ်ၼၵ်းၼႃယူႇ၊ ႁူၶဝ်ဢမ်ႇငိၼ်းယူႇ၊ မၢၵ်ႇတႃၶဝ်လပ်းယူႇဢေႃႈ၊ ဝႃႈၼင်ႇၼႆဢေႃႈ။- 28ပိူဝ်ႈၼႆလႄႈ သူၸဝ်ႈႁူႉႁၼ်လွင်ႈဢၼ်ၵျေးၸူးတၢင်းဢၼ်ၽြႃးပဵၼ်ၸဝ်ႈၵႄႇၶျွတ်ႈဢဝ်ၼၼ်ႉ လႆႈၶၢမ်ႇတၢင်းဢၼ်ပၼ်ၵႂႃႇၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈ ၶဝ်ၵေႃႈတၵ်းထွမ်ႇဢဝ်ၼၼ်ႉတႃႉ၊ ဝႃႈၼင်ႇၼႆဢေႃႈ။
29 ပေႃးလူႉလၢတ်ႈဝႃႈ ၸိူဝ်ႉၼင်ႇၼႆသေယဝ်ႉ၊ ၵူၼ်းယူႉတႃႉၸိူဝ်းၼၼ်ႉ ဢွၵ်ႇၵႂႃႇလႄႈ မီးတၢင်းဢၼ်ၼင်ႇၵၼ်ၵၼ် တိူင်ႇပၢင်ႇလၢတ်ႈၸႃၵၼ်ၼမ်ၼႃႇဢေႃႈ။
30လိုၼ်းၼၼ်ႉၸင်ႇ၊ မၼ်းယူႇၵႃႈၼႂ်းႁိူၼ်း ဢၼ်မၼ်းၶၢတ်ႈဢဝ်ၼၼ်ႉသွင်ပီႊတဵမ်တဵမ်လႄႈ ၶၢမ်ႇၶႅၵ်ႇတီႈၶဝ်ၸိူဝ်းဢၼ်မႃးၸူးၵႃႈတီႈမၼ်း တင်းသဵင်ႈတင်းလူင်ၼၼ်ႉယူႇ၊- 31ၽူႈလႂ်ယင်းဢမ်ႇႁႄႉမၼ်းၶႅၼ်မၼ်း ႁေႃးလၢတ်ႈလွင်ႈမိူင်းၽြႃးပဵၼ်ၸဝ်ႈယူႇသေလႄႈ သင်ႇသွၼ်ၼႄပျႃးလွင်ႈတၢင်းၸိူဝ်းဢၼ်ၸၢပ်ႈသႅင်ႇၵၼ်တင်းၸဝ်ႈယေႇသူႉၶရိၸ်ႈၼၼ်ႉ ႁတ်းႁတ်းႁၢၼ်ႁၢၼ်ယူႇဢေႃႈ။
ဝုတ်ႉထူႉတမၢၼ်ႇၸဝ်ႈယဝ်ႉယဝ်ႉဢေႃႈ။
Currently Selected:
တမၢၼ်ႇၸဝ်ႈ 28: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
