တမၢၼ်ႇၸဝ်ႈ 26

1မိူဝ်ႈဢၼ်ၶုၼ်ဢၵျႅပ်ႉပႃႉ လၢတ်ႈတီႈပေႃးလူႉလႄႈဝႃႈ၊ မႂ်းမီးဢၶႂၢင်ႉလၢတ်ႈပုၼ်ႈတူဝ်ၸဝ်ႈၵဝ်ႇဢေႃႈ၊ ဝႃႈၼင်ႇၼႆၼၼ်ႉၸိုင်၊ပေႃးလူႉယိုၼ်ႈမိုဝ်းလႄႈ လၢတ်ႈၵႂၢမ်းၽေႇဢပႅတ်ႈလႄႈဝႃႈၸမ်ႉ၊- 2ၶုၼ်ႁေႃၶမ်းဢၵျႅပ်ႉပႃႉတီႈၶႃႈဢိူၺ်း၊ ၵဝ်ၶႃႈၶႆႈၸႂ်လွင်ႈဢၼ်တၵ်းလႆႈလၢတ်ႈၵႂၢမ်းၽေႇဢပႅတ်ႈလူၺ်ႈလွင်ႈတၢင်း ၵႃႈဢၼ်ၵူၼ်း ယူႉတႃႉတင်းလၢႆ ႁဵတ်းဢမူႉတီႈၵဝ်ၶႃႈ ၵႃႈတီႈၽၢႆႇၼႃႈၸဝ်ႈႁဝ်းဝၼ်းမိူဝ်ႈၼႆႉၼၼ်ႉဢမ်ႇၵႃး၊- 3လွင်ႈဢၼ်ၸဝ်ႈႁဝ်းၸၢင်ႈႁူႉၸၢင်ႈမေႃထုင်းၽိင်ႈ ဢိၵ်ႇတင်းပုၵ်ႈသႃႇတီႈတွင်ႈတီႈထၢမ်တင်းလၢႆ ဢၼ်ၸၢပ်ႈသႅင်ႇၵၼ်တင်းၵူၼ်း ယူႉတႃႉၸိူဝ်းၼၼ်ႉလႄႈ ၵဝ်ၶႃႈထၢင်ႇတူဝ်ၸဝ်ႈၵဝ်ႇမီးမင်ႇၵလႃႇၶႃႈဢေႃႈ။ ပိူဝ်ႈၼႆလႄႈ ၼင်ႇႁိုဝ်ၸဝ်ႈႁဝ်းတၵ်းဢဝ်တင်းၸႂ်ဢၼ်ယိူၼ်ႉၶၢမ်ႇထွမ်ႇငိၼ်းၵႂၢမ်းၵဝ်ၶႃႈၸိုင်ၵဝ်ၶႃႈတွင်းပၢၼ်ႇၸဝ်ႈႁဝ်းတီႈၶႃႈဢေႃႈ။

4တၢင်းဢၼ်ယူႇဢၼ်သဝ်း ဢၼ်ႁဵတ်းဢၼ်သၢင်ႈ ၵဝ်ၶႃႈၸႃႉၸဵမ်မိူဝ်ႈလဵၵ်ႉမိူဝ်ႈဢွၼ်ႇ ဢၼ်မိူဝ်ႈၸႃႉမၼ်း ပဵၼ်ၵႃႈတီႈၼႂ်းၸိူဝ်ႉၶိူဝ်းၵဝ်ၶႃႈ ၵႃႈၼႂ်းဝဵင်းယေႇရူႉသလႅမ်ႇၼၼ်ႉၸိုင်၊ ၵူၼ်းယူႉတႃႉတင်းသဵင်ႈတင်းလူင်ႁူႉယူႇတီႈၶႃႈဢေႃႈ။- 5ပေႃးၶဝ်ၶႂ်ႈၶၢမ်ႇသၢၵ်ႈသေႇလွင်ႈဢၼ်ၵဝ်ၶႃႈၸွမ်းၼင်ႇ ၵိူင်းဢၼ်ၵျၢင်ႉၶႅင်ၼႃႇသေပိူၼ်ႈ ၵႃႈၼႂ်းၽႃႇသႃႇယူႉတႃႉလႄႈ ပဵၼ်ၽႃႇရီႉသႄးၼၼ်ႉၸိုင်၊ ၶဝ်ႁူႉၸႃႉၸဵမ်မိူဝ်ႈဢွၼ်တၢင်းၼၼ်ႉတီႈၶႃႈဢေႃႈ။- 6ၵွပ်ႈပိူဝ်ႈလွင်ႈတၢင်းဢၼ်မုင်ႈထႃႈမွင်းထႃႈ ဢၼ်ၽြႃးပဵၼ်ၸဝ်ႈ ဝႆႉၵတီႉတီႈပူႇပေႃႈႁဝ်းၼၼ်ႉလႄႈ ၵဝ်ၶႃႈလႆႈၶၢမ်ႇတၢင်းဢၼ်ၸီႇယၢင်ႇၸႅတ်ႈထၢမ်တေႃႈလဵဝ်ၼႆႉတီႈၶႃႈဢေႃႈ။- 7ၵူၼ်းဢီႉသရေႇလႃႉသိပ်းသွင်မဵဝ်း ၵျူဝ်းၸႃးႁဵတ်းဝၢတ်ႈၽြႃးပဵၼ်ၸဝ်ႈ ၵူႈဝၼ်းၵူႈၶိုၼ်းဢမ်ႇထၢတ်ႇလႄႈ တၵ်းလႆႈၶၢမ်ႇၵတီႉၸဝ်ႈၼၼ်ႉဝႃႈၼႆ မီးတၢင်းဢၼ်မုင်ႈထႃႈမွင်းထႃႈယူႇတီႈၶႃႈဢေႃႈ။ ၶုၼ်ႁေႃၶမ်းတီႈၶႃႈဢိူၺ်း၊ ၵူၼ်းယူႉတႃႉတင်းလၢႆဢဝ်လွင်ႈတြႃးတၢင်းဢၼ်မုင်ႈထႃႈမွင်းထႃႈၼၼ်ႉ ႁဵတ်းဢမူႉတီႈၵဝ်ၶႃႈ တီႈၶႃႈဢေႃႈ။

8ပေႃးၽြႃးပဵၼ်ၸဝ်ႈ ႁႂ်ႈၶဝ်ၸိူဝ်းဢၼ်တၢႆယဝ်ႉၼၼ်ႉ လုၵ်ႉၶိုၼ်းၸိုင်၊ ႁဵတ်းသင်လႄႈ သူၸဝ်ႈထၢင်ႇဝႃႈတီႈတၵ်းယုမ်ႇလႆႈဢမ်ႇမီး၊ ဝႃႈၼင်ႇၼႆၼင်ႇႁိုဝ်ၶႃႈ။

9ၵဝ်ၶႃႈထၢင်ႇၼႂ်းၸႂ်လႄႈဝႃႈ လီႁဵတ်းလွင်ႈတၢင်းဢၼ်ဢမ်ႇထုၵ်ႇၵၼ်တင်း ၼႃႇမႃႉၸိုဝ်ႈသဵင်ယေႇသူႉ ၵူၼ်းဝဵင်းၼႃႇၸရႅတ်ႈၼၼ်ႉၼမ်ၼႃႇ၊ ဝႃႈၼင်ႇၼႆသေယဝ်ႉ၊- 10ႁဵတ်းလွင်ႈတၢင်းၸိူဝ်းၼၼ်ႉ ၵႃႈၼႂ်းဝဵင်းယေႇရူႉသလႅမ်ႇတီႈၶႃႈဢေႃႈ။ ၵဝ်ၶႃႈလႆႈဢၶႂၢင်ႉတီႈယိတ်ႈပရေႃးႁဵၵ်ႈလူင် ၸိူဝ်းၼၼ်ႉသေယဝ်ႉ၊ ဢဝ်ၵူၼ်းမူတ်းၸၢင်ႇၼမ်ၼႃႇ ၶင်ဝႆႉၵႃႈၼႂ်းထွင်ႇတီႈၶႃႈဢေႃႈ။ မိူဝ်ႈဢၼ်ၶဝ်ၼၼ်ႉ လႆႈၶၢမ်ႇတၢင်းတၢႆၼၼ်ႉၸိုင်၊ ၵဝ်ၶႃႈႁပ်ႉတုင်းဢဝ်တီႈၶႃႈဢေႃႈ။- 11ၵဝ်ၶႃႈပၼ်တၢမ်ႇ ၵႃႈၼႂ်းၸရွပ်ႈႁေႃးတြႃးတင်းသဵင်ႈတင်းလူင် ၶိူဝ်းၶိူဝ်းယႂ်းယႂ်း ဢမ်ႇႁူႉလၢႆပွၵ်ႈၵႃႈတီႈၶဝ်လႄႈ ႁဵတ်းပႄႉႁဵတ်းၼႅင်ႇႁႂ်ႈၶဝ်သႄႉသွမ်းၽြႃးပဵၼ်ၸဝ်ႈတီႈၶႃႈဢေႃႈ။ ပႃးတင်းၸႂ်ဢၼ်မဝ်းတင်းတေႃးသႃႉ တင်းၸႂ်မႆႈၶႆႈၸႃႉဢၼ်ယႂ်ႇၼႃႇၼၼ်ႉသေလႄႈ ၼိၵ်ႈၸၢၵ်ႈငႅၼ်းသႄးၶဝ် တေႃႇထိုင်ႁွတ် တၢင်ႇဝၢၼ်ႈတၢင်ႇမိူင်းတီႈၶႃႈဢေႃႈ။

12ၼႂ်းမိူဝ်ႈဢၼ်ၵဝ်ၶႃႈ ဢဝ်တင်းဢၶႂၢင်ႉဢရႃႇဢၼ်ယိတ်ႈပရေႃးႁဵၵ်ႈလူင် တင်းလၢႆပၼ်ၼၼ်ႉၵႂႃႇၵႃႈတီႈဝဵင်းထမ်ႇမသႅတ်ႉယူႇၼၼ်ႉၸိုင်၊- 13ၶိင်ႇၵၢင်ဝၼ်းတဵင်ႈ ၵဝ်ၶႃႈလႆႈႁၼ်ဢၼ်လႅင်း ဢၼ်ၼႃႇသေဢရွင်ႇၵၢင်ဝၼ်းၼၼ်ႉ ႁိူဝ်ႈလႅင်းမႃးၵႃႈၼိူဝ်ၽႃႉၵၢင်ႁၢဝ်ႁိမ်းၵဝ်ၶႃႈ ဢိၵ်ႇတင်းၵူၼ်းၸိူဝ်းဢၼ်ၸွမ်းလူၺ်ႈၵၼ်တင်းၵဝ်ၶႃႈၼၼ်ႉ ၵႃႈၼႂ်းသဵၼ်ႈတၢင်းၼၼ်ႉတီႈၶႃႈဢေႃႈၸဝ်ႈ။- 14မိူဝ်ႈဢၼ်ၵဝ်ၶႃႈဢိၵ်ႇတင်း ၵူၼ်းတင်းသဵင်ႈတင်းလူင်ၼၼ်ႉ လူမ်ႉၵႃႈၼိူဝ်လိၼ်ၼၼ်ႉၸိုင်၊ ၵဝ်ၶႃႈလႆႈငိၼ်းသဵင်ဢၼ် ဢဝ်တင်းၽႃႇသႃႇ ႁေႇပြႄးလၢတ်ႈလႄႈဝႃႈ၊ သေႃးလူႉဢိူၺ်း၊ သေႃးလူႉဢိူၺ်း၊ ႁဵတ်းသင်လႄႈမႂ်းၼိၵ်ႈၸၢၵ်ႈငႅၼ်းသႄးၵဝ်ၼင်ႇႁိုဝ်။ ပေႃးဢဝ်တိၼ်ပိတ်ႉသႂ်ႇမႆႉလႅမ်ၸိုင် ပဵၼ်ဢၼ်ယၢပ်ႇၼႃႇလူင်လၢင်တႄႉတႄႉဢေႃႈ၊ ဝႃႈၼင်ႇၼႆတီႈၶႃႈဢေႃႈ။- 15ၵဝ်ၶႃႈၵေႃႈလဝ်ႊထၢမ်လႄႈဝႃႈ၊ ၸဝ်ႈႁဝ်းပဵၼ်ၽူႈလႂ်ၶႃႈ၊ ဝႃႈၼင်ႇၼႆသေယဝ်ႉ၊ မၼ်းၸဝ်ႈၵေႃႈလၢတ်ႈလႄႈဝႃႈ၊ ၵဝ်ၸမ်ႉ၊ ပဵၼ် ယေႇသူႉ ဢၼ်မႂ်းၼိၵ်ႈၸၢၵ်ႈငႅၼ်းသႄးၼၼ်ႉဢေႃႈ။- 16ၼႂ်းဝႃႈၼၼ်သေၵေႃႈ လုၵ်ႉလႄႈၸုၵ်းယူႇသိုဝ်ႈသိုဝ်ႈတႃႉ။- 17လွင်ႈမၼ်းၸမ်ႉ ၵဝ်ၵႄႇသႄႇၶျွတ်ႈဢဝ်မႂ်း ၵႃႈၼႂ်းမိုဝ်းၸိူဝ်ႉၶိူဝ်းယူႉတႃႉ ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆသေလႄႈ ပေႃႇမႃးၵႃႈတီႈမႂ်းႁႂ်ႈလႆႈဢဝ်မႂ်းၶၢၼ်းဝႆႉၼႂ်းဢရႃႇၶဝ်ၸိူဝ်းဢၼ် ပွင်ႁဵတ်းလႄႈၶၢမ်ႇသၢၵ်ႈသေႇလွင်ႈတၢင်းဢၼ်မႂ်းလႆႈႁၼ်ဢိၵ်ႇတင်း လွင်ႈတၢင်းဢၼ်ၵဝ်တၵ်းပေႃႇမႃးတီႈမႂ်းၵမ်းလိုၼ်းၸိူဝ်းၼၼ်ႉဢေႃႈ။- 18ၵဝ်တၵ်းပွႆႇၸႂ်ႉမႂ်းၵႂႃႇၵႃႈတီႈ ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ ႁႂ်ႈလႆႈၽုၺ်ႇမၢၵ်ႇတႃၶဝ်လွင်ႈၼင်ႇႁိုဝ် ၶဝ်တၵ်းဢွၵ်ႇသေၵႃႈၼႂ်းဢၼ်လပ်းသိင်ႇမႃးၵႃႈတီႈဢၼ်လႅင်းလႄႈ ၶၢႆႉသေၵႃႈၼႂ်းဢႃႇၼႃႇၸႃႇတၢၼ်ႇ မႃးၵႃႈတီႈၽြႃးပဵၼ်ၸဝ်ႈ ဢိၵ်ႇတင်းလွင်ႈၼင်ႇႁိုဝ် ၵွပ်ႈပိူဝ်ႈဢၼ်ယုမ်ႇမၢတ်ႈၵဝ်လႄႈ တၵ်းလႆႈၶၢမ်ႇၵျေးၸူးတၢင်းဢၼ်လွတ်ႈဢပႅတ်ႈ ဢိၵ်ႇတင်းဢမူၺ်ႇၵႃႈၼႂ်းၶဝ်ၸိူဝ်းဢၼ် ႁွတ်ႈထိုင်တၢင်းဢၼ်မူတ်းၸၢင်ႇၼၼ်ႉဢေႃႈ၊ ဝႃႈၼင်ႇၼႆတီႈၶႃႈဢေႃႈ။

19ၶုၼ်ႁေႃၶမ်းဢၵျႅပ်ႉပႃႉတီႈၶႃႈဢိူၺ်း၊ ပျႃႇတိၵ်ႈၸဝ်ႈဢၼ်ပဵၼ်မႃးၵႃႈတီႈၵၢင်ႁၢဝ်ၼၼ်ႉၸိုင်၊ ၵဝ်ၶႃႈယင်းဢမ်ႇထွမ်ႇဢဝ်လႄႈဢမ်ႇယူႇလႆႈတီႈၶႃႈ။- 20ၵူၼ်းႁဝ်းၼႆႉ တၵ်းလႆႈၶုၵ်းၸႂ်လႆႈမႆႈၸႂ်၊ တၵ်းလႆႈၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ၵိုင်ႇၵၼ်တင်းတၢင်းဢၼ်ၶုၵ်းၸႂ်လႆႈမႆႈၸႂ်လႄႈ ၶၢႆႉမႃးၸူးၵႃႈတီႈၽြႃးပဵၼ်ၸဝ်ႈဝႃႈၼႆ၊ ၵဝ်ၶႃႈႁေႃးလၢတ်ႈၵႃႈၼႂ်းဝဵင်း ထမ်ႇမသႅတ်ႉ ဢွၼ်တၢင်းသေယဝ်ႉ ႁေႃးလၢတ်ႈၵႃႈတီႈၶဝ်ၸိူဝ်းဢၼ်ယူႇၸႃႉၸဵမ်ဝဵင်းယေႇရူႉသလႅမ်ႇ တင်းမိူင်းယူႉတႃႉ ၵူႈတီႈၵူႈလႅၼ် ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ တီႈၶႃႈဢေႃႈ။

21ၵွပ်ႈပိူဝ်ႈလွင်ႈတၢင်းၼၼ်ႉလႄႈ ၵူၼ်းယူႉတႃႉတင်းလၢႆ တီႉဢဝ်ၵဝ်ၶႃႈၵႃႈၼႂ်းပိၵ်ႈမၢၼ်ႇၸဝ်ႈသေလႄႈ ၵျူဝ်းၸႃးႁႂ်ႈလႆႈဢဝ်ၵဝ်ၶႃႈတၢႆတီႈၶႃႈဢေႃႈ။- 22ၼႂ်းဝႃႈၼၼ်သေၵေႃႈ ၵဝ်ၶႃႈလႆႈၶၢမ်ႇၵျေးၸူးတၢင်းဢၼ်ၽြႃးပဵၼ်ၸဝ်ႈၸွႆႈထႅမ်မႃႉၸႃႉလႄႈ မီးယူႇတေႃႇထိုင်ႁွတ်ႈမိူဝ်ႈလဵဝ်ၼႆႉလႄႈ ၶၢမ်ႇသၢၵ်ႈသေႇတီႈၵူၼ်း ၸဵမ်လဵၵ်ႉၸဵမ်ယႂ်ႇသေလႄႈမွၵ်ႇလၢတ်ႈလွင်ႈတၢင်းဢၼ် မူဝ်းသေႇ ဢိၵ်ႇတင်းပရေႃးၽႅတ်ႈတင်းလၢႆ ႁေႃးလၢတ်ႈလႄႈဝႃႈ တၵ်းပဵၼ်မႃးဢေႃႈ၊ ဝႃႈၼင်ႇၼႆၸိူဝ်းၼၼ်ႉၵူၺ်း။- 23ဢၼ်ဝႃႈ လွင်ႈဢၼ်ၸဝ်ႈၶရိၸ်ႈတၵ်းလႆႈၶၢမ်ႇတၢႆ ဢိၵ်ႇတင်းလွင်ႈဢၼ်မၼ်းၸဝ်ႈ တၵ်းလႆႈပဵၼ်ၵေႃႉဢၼ်လုၵ်ႉၵႃႈတၢင်းတၢႆၶိုၼ်းလိပ်းဢွၼ်တၢင်းပိူၼ်ႈလႄႈ ပၼ်ဢၼ်လႅင်းတီႈၵူၼ်းမဵဝ်းယူႉတႃႉ ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။

24မိူဝ်ႈဢၼ်ပေႃးလူႉ လဝ်ႊလၢတ်ႈၵႂၢမ်းၽေႇဢပႅတ်ႈၸိူဝ်ႉၼင်ႇၼႆၼၼ်ႉၸိုင်၊ ၶုၼ်ၽိတ်ႉတူႉ ႁွင်ႉသႅၼ်ႇလႄႈဝႃႈ၊ ပေႃးလူႉဢိူၺ်း၊ မႂ်းၼႆႉပဵၼ်ၵူၼ်းယွင်ႇဢေႃႈ။ သွၼ်ဢဝ်ဢတၢတ်ႈပိင်ႇၺႃႇၼမ်ၼႃႇလႄႈ ထိုင်ပဵၼ်ၵူၼ်းယွင်ႇၵႂႃႇယဝ်ႉ၊ ဝႃႈၼင်ႇၼႆဢေႃႈ။

25 ပေႃးလူႉၵေႃႈလဝ်ႊလၢတ်ႈလႄႈဝႃႈ၊ ၶုၼ်ၽိတ်ႉတူႉဢၼ်မျၢတ်ႈၼႃႇၶႃႈဢိူၺ်း၊ ၵဝ်ၶႃႈဢမ်ႇၸႂ်ႈၵူၼ်းယွင်ႇၶႃႈ။ ၵဝ်ၶႃႈမီးတင်းႁူဝ်ၸႂ်ဢၼ်လီဢၼ်ငၢမ်းသေလႄႈ လၢတ်ႈၵႂၢမ်းဢၼ်ၵိုင်ႇၵၼ်တင်းသမ်ႇမႃႇတြႃးၶႃႈဢေႃႈ။- 26ၶုၼ်ႁေႃၶမ်းဢၵျႅပ်ႉပႃႉ ႁူႉလွင်ႈတၢင်းၸိူဝ်းၼႆႉယူႇၶႃႈဢေႃႈ။ ၵႃႈတီႈၽၢႆႇၼႃႈၶုၼ်ၼၼ်ႉ ၵဝ်ၶႃႈႁတ်းလဝ်ႊလၢတ်ႈလႅင်းလႅင်းၶႃႈဢေႃႈ။ လွင်ႈတၢင်းၸိူဝ်းၼႆႉၸိုင်၊ ၵဝ်ၶႃႈထၢင်ႇဢၼ်မၼ်းၸဝ်ႈဢမ်ႇႁူႉၼၼ်ႉ ဢမ်ႇမီးသေၸိူဝ်ႉသေပိူင်ၶႃႈဢေႃႈ။ လွင်ႈမၼ်းၸမ်ႉ လွင်ႈတၢင်းၼႆႉပဵၼ်လွင်ႈတၢင်းဢၼ် ႁဵတ်းတီႈၸွၵ်ႉတီႈၸဵင်ႇဢမ်ႇၸႂ်ႈၶႃႈ။- 27ၶုၼ်ႁေႃၶမ်းဢၵျႅပ်ႉပႃႉတီႈၶႃႈဢိူၺ်း၊ ၸဝ်ႈႁဝ်းယုမ်ႇၵျၢမ်းလိၵ်ႈ ဢၼႃႇၵၢတ်ႈတီႉယူႇတီႈၶႃႈႁိုဝ်။ လွင်ႈဢၼ်ၸဝ်ႈႁဝ်းၸၢင်ႈယုမ်ႇၼၼ်ႉၸိုင်၊ ၵဝ်ၶႃႈႁူႉယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 28ၶုၼ်ဢၵျႅပ်ႉပႃႉၵေႃႈလၢတ်ႈတီႈပေႃးလူႉလႄႈဝႃႈ၊ မႂ်းၼႆႉႁဵတ်းဢိတ်းဢွၼ်ႇၼိုင်ႈၵူၺ်းလႄႈ ၸူဝ်းဢဝ်ၵဝ်ႁႂ်ႈပဵၼ်ၶရိၸ်ႈယၢၼ်ႇဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 29ပေႃးလူႉလဝ်ႊလၢတ်ႈလႄႈဝႃႈ၊ ႁဵတ်းဢိတ်းဢွၼ်ႇၼိုင်ႈသေဢမ်ႇဝႃႈ၊ ႁဵတ်းၼမ်ၼမ်သေဢမ်ႇဝႃႈ၊ ဝႆႉသေၸိူၵ်ႈလဵၵ်းၸိူဝ်းၼႆႉၵူၺ်းလႄႈ ၼင်ႇႁိုဝ်ၸဝ်ႈႁဝ်းဢိၵ်ႇတင်း ၵူၼ်းၵႃႈဢၼ်လႆႈငိၼ်းၵႂၢမ်းၵဝ်ၶႃႈဝၼ်းမိူဝ်ႈၼႆႉတင်းသဵင်ႈတင်းလူင်ၼႆႉ တၵ်းပဵၼ်ၸိူဝ်ႉၼင်ႇဢၼ်ၵဝ်ၶႃႈပဵၼ်ၼႆႉၸိုင်၊ ၵဝ်ၶႃႈသူးတွင်းၽြႃးပဵၼ်ၸဝ်ႈယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။

30မိူဝ်ႈၼၼ်ႉ ၸႃႉၸဵမ်ၶုၼ်ႁေႃၶမ်းဢၵျႅပ်ႉပႃႉ တင်းပေႇရၼိတ်ႉ ဢိၵ်ႇတင်းၶုၼ်ၽိတ်ႉတူႉ တင်းၶဝ်ၸိူဝ်းဢၼ် ၼင်ႈယူႇလူၺ်ႈၵၼ်ၵႃႈတီႈၼၼ်ႈၸိူဝ်းၼၼ်ႉလုၵ်ႉသေလႄႈ၊- 31ၵႂႃႇတၢင်ႇတီႈသေယဝ်ႉ၊ ၼင်ႇၵၼ်ၵၼ်လၢတ်ႈၵၼ်လႄႈဝႃႈ၊ ၵေႃႉၼႆႉဢမ်ႇႁဵတ်းဢမူႉဢၼ်ထိူၵ်ႈၶၢမ်ႇတၢႆ ဢမ်ႇၼၼ်ၵေႃႈ ဢမူႉဢၼ်ထိူၵ်ႈၶၢမ်ႇတၢင်းဢၼ်တူၵ်းၵိၼ်းၼၼ်ႉၵူၺ်ႉ၊ ဝႃႈၼင်ႇၼႆဢေႃႈ။- 32ၶုၼ်ဢၵျႅပ်ႉပႃႉၵေႃႈ လၢတ်ႈတီႈၶုၼ်ၽိတ်ႉတူႉလႄႈဝႃႈ၊ သင်မၼ်းဢမ်ႇလႆႈဝႃႈ၊ တၵ်းၶၢမ်ႇဢယူႇၶုၼ်ႁေႃၶမ်းၵေႇသႃႇၶႃႈဢေႃႈ၊ ဝႃႈၼင်ႇၼႆၼၼ်ႉၸိုင် ထုၵ်ႇလီပွႆႇယဝ်ႉ၊ ဝႃႈၼင်ႇၼႆဢေႃႈ။

Popular Bible Verses from
တမၢၼ်ႇၸဝ်ႈ 26

Videos for တမၢၼ်ႇၸဝ်ႈ 26

Acts 13-28

Acts 21-28

Acts Ch. 21-28

Acts 24-26

Bible:

Shan

Version: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS