တမၢၼ်ႇၸဝ်ႈ 1
1
1ဢူဝ်းထေႃးၽီႉလူႉ၊ လွင်ႈတၢင်းၵႃႈဢၼ်ယေႇသူႉၸႃႉႁဵတ်းလႄႈသင်ႇသွၼ်ပၼ်၊- 2တေႃႇထိုင်ႁွတ်ႈမိုဝ်ႉဝၼ်း ဢၼ်မၼ်းၸဝ်ႈဢဝ်တင်းဝီႉၺိၺ်ႇဢၼ်မူတ်းၸၢင်ႇၸဝ်ႈ သင်ႇလၢတ်ႈဝႆႉတီႈတမၢၼ်ႇၸဝ်ႈ ဢၼ်မၼ်းၸဝ်ႈလိူၵ်ႈၵဵပ်းဢဝ်ၸိူဝ်းၼၼ်ႉသေယဝ်ႉ၊ လႆႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်ၼၼ်ႈၸိုင်၊ ၵဝ်ၶႃႈၸီႇယၢင်ႇတႅမ်ႈလိၵ်ႈၽိုၼ်ဢွၼ်တၢင်းၼၼ်ႉဝႆႉၶႃႈယဝ်ႉ။- 3မၼ်းၸဝ်ႈၼၼ်ႉလႆႈၶၢမ်ႇတၢင်းတၢႆသေယဝ်ႉ၊ ၼႄပျႃးတူဝ်မၼ်းၸဝ်ႈတီႈၶဝ်ၼၼ်ႉ သီႇသိပ်းဝၼ်းတဵမ်တဵမ်လႄႈ ႁေႃးလၢတ်ႈလွင်ႈတၢင်းဢၼ်ၸၢပ်ႈသႅင်ႇၵၼ် တင်းမိူင်းၽြႃးပဵၼ်ၸဝ်ႈၸိူဝ်းၼၼ်ႉယူႇသေလႄႈ ဢဝ်တင်းသၢၵ်ႈသေႇဢၼ်မၼ်ႈဢၼ်ၶိူင်ႇၼမ်ၼႃႇ ၼႄပျႃးလွင်ႈဢၼ်မၼ်းၸဝ်ႈဢသၢၵ်ႈလိပ်းယူႇၼၼ်ႉဢေႃႈ။
4မၼ်းၸဝ်ႈၸူႉတုမ်လူၺ်ႈၵၼ်တင်းၶဝ်ၼၼ်ႉသေယဝ်ႉ၊ လွင်ႈၼင်ႇႁိုဝ်ၶဝ်တၵ်းဢမ်ႇဢွၵ်ႇသေၵႃႈၼႂ်းဝဵင်းယေႇရူႉသလႅမ်ႇ ၵႂႃႇလႄႈ တၵ်းလႆႈပႂ်ႉထႃႈၵတီႉပေႃႈၸဝ်ႈယူႇၸိုင်၊ မၼ်းၸဝ်ႈသင်ႇလၢတ်ႈဝႆႉလႄႈဝႃႈ၊ ၵတီႉၼၼ်ႉၸိုင်သူလႆႈငိၼ်းၵႃႈတီႈၵဝ်ဢေႃႈ။- 5ၵတီႉၼၼ်ႉၸမ်ႉ၊ ယူဝ်းႁၢၼ်ႇ ပၼ်ပပ်ႉတီႉၸမ်ႇၼႂ်းၼမ်ႉဢေႃႈ။ သူၸိုင်ဢမ်ႇပေႃးႁိုင်ပေႃးၼၢၼ်း တၵ်းလႆႈၶၢမ်ႇပပ်ႉတီႉၸမ်ႇၼႂ်းဝီႉၺိၺ်ႇဢၼ်မူတ်းၸၢင်ႇၸဝ်ႈဢေႃႈ၊ မီးမႃးၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။
ၸဝ်ႈယေႇသူႉလႆႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇ
6ၶဝ်ၼၼ်ႉၵေႃႈ ၸူႉၵၼ်တုမ်ၵၼ်သေယဝ်ႉ၊ လဝ်ႊထၢမ်လႄႈဝႃႈ၊ ၸဝ်ႈႁဝ်း မိူဝ်ႈလဵဝ်ၼႆႉတၵ်းၶိုၼ်းပၼ်မိူင်းတီႈၵူၼ်းမဵဝ်းဢီႉသရေႇလႃႉတင်းလၢႆၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 7မၼ်းၸဝ်ႈၵေႃႈလၢတ်ႈလႄႈဝႃႈ၊ ဢၶႂၢင်ႉဢၼ်တၵ်းလႆႈႁူႉၶိင်ႇၵႃႇလႃႉ ဢၼ်ပေႃႈၸဝ်ႈဢဝ်တၼ်းၶူဝ်းမၼ်းၸဝ်ႈ ၸီႇယၢင်ႇဝႆႉၸိူဝ်းၼၼ်ႉဢမ်ႇမီးတီႈသူ။- 8ၼႂ်းဝႃႈၼၼ်သေၵေႃႈ ယၢမ်းမိူဝ်ႈဢၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈ လူင်းမႃးၵႃႈၼိူဝ်သူၼၼ်ႉၸိုင်၊ သူတၵ်းလႆႈၶၢမ်ႇဢဝ်ႁႅင်းတၼ်းၶူဝ်းလႄႈ ပဵၼ်ၵေႃႉဢၼ်ၶၢမ်ႇသၢၵ်ႈသေႇၵဝ် ၸႃႉၸဵမ်ၵႃႈၼႂ်းဝဵင်းယေႇရူႉသလႅမ်ႇ တင်းမိူင်းယူႉတႃႉ တင်းမိူင်းသမႃႇရီႉ တေႃႇထိုင်ႁွတ်ႈတီႈသုတ်းလိၼ်မိူင်းပုၼ်ႉဢေႃႈ၊ ဝႃႈၼင်ႇၼႆသေယဝ်ႉ၊- 9ၼႂ်းမိူဝ်ႈဢၼ်ၶဝ်ၼၼ်ႉ ယင်းတိုၵ်ႉလူတူၺ်းယူႇၼၼ်ႉၸိုင်၊ မၼ်းၸဝ်ႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်ပုၼ်ႉလႄႈမွၵ်ႇၵုမ်ႈႁပ်ႉဢဝ်မၼ်းၸဝ်ႈ ႁႂ်ႈလပ်ႉတႃၶဝ်ၵႂႃႇသေဢေႃႈ။- 10ၼႂ်းမိူဝ်ႈဢၼ်မၼ်းၸဝ်ႈ ၶိုၼ်ႈၵႂႃႇၸိူဝ်ႉၼင်ႇၼၼ်ႉလႄႈ ၶဝ်ယင်းတိုၵ်ႉမုင်ႈတူၺ်းၵႃႈတီႈၵၢင်ႁၢဝ် ၸေးၸေးၸွတ်ႇၸွတ်ႇယူႇၼၼ်ႉၸိုင်၊ ၵူၼ်းသွင်ၵေႃႉၼုင်ႈမႆၶူဝ်းၼုင်ႈဢၼ်ၽိူၵ်ႇဢၼ်ၶၢဝ်ယူႇသေလႄႈ ၽုတ်းမႃးၵႃႈတီႈႁိမ်းၶဝ်လႄႈ၊- 11လၢတ်ႈဝႃႈ၊ ၵူၼ်းၵႃႇလီႉလႄးၶဝ်ဢိူၺ်း၊ ႁဵတ်းသင်လႄႈ သူၸုၵ်းယူႇသေလႄႈ လူတူၺ်းၵႃႈတီႈၵၢင်ႁၢဝ်ယူႇၼင်ႇႁိုဝ်။ ယေႇသူႉ ဢၼ်ၽၢတ်ႇယၢၼ်ၵၼ်တင်းသူသေလႄႈ ၶၢမ်ႇတၢင်းဢၼ်ဢဝ်ၶိုၼ်ႈၵႂႃႇ ၵႃႈတီႈၵၢင်ႁၢဝ်ပုၼ်ႉၼၼ်ႉၸိုင် ၸိူဝ်ႉၼင်ႇဢၼ်ၶိုၼ်ႈၵႂႃႇၵႃႈၼိူဝ်ၵၢင်ႁၢဝ်သိုဝ်ႈၼႃႈတႂ်ႈတႃသူၼႆႉၼၼ်ႉ သမ်ႉတၵ်းလူင်းမႃးထႅင်ႈၵမ်းၼိုင်ႈလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။
ၵေႃႉဢၼ်တႅၼ်းတီႈ ယူႉတႃႉဢီႉသၵႃႇရေႇဢုတ်ႈ
12မိူဝ်ႈၼၼ်ႉၶဝ်ၼၼ်ႉ လုၵ်ႉသေၵႃႈတီႈလွႆ ဢၼ်လႆႈႁွင်ႉႁဵၵ်ႈသၢၼ်ႇလုၼ်ႇ ဢၼ်ၶၢဝ်းတၢင်းၵႆယၢၼ်ၵၼ်တင်း ဝဵင်းယေႇရူႉသလႅမ်ႇ ဝၼ်းၵမ်သိၼ်ဝၼ်းၼိုင်ႈၼၼ်ႉသေလႄႈ ၶိုၼ်းမိူဝ်းၵႂႃႇၸူးၵႃႈတီႈဝဵင်းယေႇရူႉသလႅမ်ႇဢေႃႈ။- 13မိူဝ်ႈဢၼ်ႁွတ်ႈထိုင်ယဝ်ႉၸိုင်၊ ၶဝ်ၼၼ်ႉၶိုၼ်ႈၵႂႃႇၸူးၵႃႈတီႈလုၵ်းႁိူၼ်းႁၢၼ်ႉၼိူဝ်၊ တီႈဢၼ်ပေႇတရူႉ၊ ယႃႇၵုပ်ႈ၊ ယူဝ်းႁၢၼ်ႇ၊ ဢၼ်ႇတရေႇ၊ ၽီႉလိပ်ႉပူႉ၊ ထူဝ်းမႃႉ၊ ပႃႇထေႃးလမႄး၊ မၢတ်ႈထႄႇ၊ ယႃႇၵုပ်ႈလုၵ်ႈၸၢႆးဢႃႇလၽႄး၊ သီႉမုၼ်ႇၸေႇလုတ်ႉ၊ ယူႉတႃႉ ၼွင်ႉၸၢႆးယႃႇၵုပ်ႈၸိူဝ်းၼၼ်ႉ ယူႇသဝ်းၼၼ်ႉဢေႃႈ။- 14ၶဝ်တင်းသဵင်ႈတင်းလူင်ၼၼ်ႉ ၽွမ်ႉၵၼ်ၵျူဝ်းၸႃးလႄႈ ႁဵတ်းသူးတွင်းပထၼႃႇလူၺ်ႈၵၼ်တင်းမႄႈယိင်းတင်းလၢႆ ဢိၵ်ႇတင်း မႃႇရီႉမႄႈၸဝ်ႈယေႇသူႉ တင်းၼွင်ႉၸၢႆးၸဝ်ႈၸိူဝ်းၼၼ်ႉယူႇဢေႃႈ။
15မိူဝ်ႈၼၼ်ႉ ပေႇတရူႉၸင်ႇလုၵ်ႉၸုၵ်းၵႃႈၼႂ်းၵၢင်တပႄးၸဝ်ႈဢၼ်ၸူႉၵၼ်တုမ်ၵၼ်တီႈလဵဝ်ယူႇလႄႈ မီးပၢၵ်ႇပၢႆသၢဝ်းၼိုင်ႈၸမ်ၸမ်ၸိူဝ်းၼၼ်ႉသေလႄႈလၢတ်ႈဝႃႈ၊- 16ပီႈၼွင်ႉၶဝ်ဢိူၺ်း၊ တီႈၼႂ်းၵျၢမ်းလိၵ်ႈဢၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈ ဢဝ်တင်းသူပ်းတႃႇဝိတ်ႈ ပျႃႇတိၵ်ႈဝႆႉ လွင်ႈယူႉတႃႉ ၵေႃႉဢၼ်ၼႄပျႃးသဵၼ်ႈတၢင်းတီႈၶဝ်ၸိူဝ်းဢၼ် တီႉဢဝ်ယေႇသူႉၼၼ်ႉၸိုင် ယင်းဢမ်ႇပျေႉၸုမ်ႇလႄႈဢမ်ႇလႆႈယူႇ။- 17ၵေႃႉၼၼ်ႉၶၢမ်ႇတၢင်းဢၼ်ၼပ်ႉဢၢၼ်ႇ ပႃးႁူမ်ႈလူၺ်ႈၵၼ်တင်းႁဝ်းလႄႈ လႆႈဢရႃႇထမ်ႇမႃႉသြႃႇယဝ်ႉ။- 18ၵေႃႉၼၼ်ႉဢဝ်တင်းၵႃႈၶၼ် ဢၼ်လႆႈၵွပ်ႈပိူဝ်ႈဢမူႉဢၼ်ဢမ်ႇတြႃးၼၼ်ႉ သိုဝ်ႉဢဝ်လိၼ်ၵႂၢၵ်းၼိုင်ႈယဝ်ႉ၊ လူမ်ႉပၵ်းၶိတ်းတူၵ်းလႄႈ တွင်ႉတႅၵ်ႇသေယဝ်ႉ၊ သႆႈမၼ်းဢွၵ်ႇယဝ်ႉ။- 19လွင်ႈတၢင်းၼၼ်ႉၸိုင်၊ ၵူၼ်းဢၼ်ယူႇၵႃႈတီႈ ဝဵင်းယေႇရူႉသလႅမ်ႇ တင်းသဵင်ႈတင်းလူင် ႁူႉလႄႈၸွမ်းၼင်ႇၵႂၢမ်းၽႃႇသႃႇၶဝ်ႁွင်ႉႁဵၵ်ႈ ၵႂၢၵ်ႈလိၼ်ၼၼ်ႉလႄႈဝႃႈ ဢၵေးလႃႉတမႃႉဢေႃႈ။ ဢထိၵ်ႈပႄႇမၼ်းၸမ်ႉ၊ ပဵၼ်ၵႂၢၵ်ႈလိၼ်လိူတ်ႈ၊ ဝႃႈၼင်ႇၼႆဢေႃႈ။- 20ဢၼ်တႅမ်ႈဝႆႉၼႂ်းၵျၢမ်းလိၵ်ႈသႃႇလၢမ်ႇလႄႈဝႃႈၸမ်ႉ၊ ႁႂ်ႈတီႈဢၼ်မၼ်းယူႇၼၼ်ႉပဵၼ်တီႈဢၼ် ၵူၼ်းသဵတ်ႇၵူၼ်းယဵၼ်သေၵမ်းလူၺ်ႈ။ ယႃႇပေႁႂ်ႈမီးၵေႃႉဢၼ်ယူႇသေၵမ်းလူၺ်ႈ၊ ဢရႃႇမၼ်းၵေႃႈ ႁႂ်ႈပိူၼ်ႈတၢင်ႇၵေႃႉလႆႈသေၵမ်းလူၺ်ႈ၊ ဝႃႈၼင်ႇၼႆဢေႃႈ။
21ပိူဝ်ႈၼႆလႄႈ ၵႃႈၼႂ်းၶဝ်ၸိူဝ်းဢၼ် ႁဵတ်းၵေႃႉႁဵတ်းသေႈႁူမ်ႈလူၺ်ႈၵၼ်တင်းႁဝ်း ၼႂ်းၶိင်ႇၵႃႇလႃႉဢၼ်ၸဝ်ႈယေႇသူႉ ၵႂႃႇမႃးၶဝ်ႈဢွၵ်ႇလူၺ်ႈၵၼ်တင်းႁဝ်း၊- 22ၸႃႉၸဵမ်မိူဝ်ႈၶိင်ႇဢၼ် ယူဝ်းႁၢၼ်ႇပၼ်ပပ်ႉတီႉၸမ်ႇတေႃႇထိုင်ႁွတ်ႈဝၼ်းဢၼ်မၼ်းၸဝ်ႈ ၽၢတ်ႇယၢၼ်ၵၼ်တင်းႁဝ်းလႄႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်ပုၼ်ႉၼၼ်ႉ၊ သေၵေႃႉသေၵူၼ်းတၵ်းလႆႈပဵၼ်ၵေႃႉဢၼ်ၶၢမ်ႇသၢၵ်ႈသေႇ လွင်ႈဢၼ်မၼ်းၸဝ်ႈလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉ လူၺ်ႈၵၼ်တင်းႁဝ်းဢေႃႈ၊ ဝႃႈၼင်ႇၼႆဢေႃႈ။
23မိူဝ်ႈၼၼ်ႉ ၶဝ်ၼၼ်ႉဢဝ်သွင်ၵေႃႉဢၼ်ဝႃႈ ယူဝ်းသႅပ်ႈ၊ ဢၼ်လႆႈႁွင်ႉႁဵၵ်ႈ ပႃႇသပႃႉ ဢၼ်လႆႈၸိုဝ်ႈမႂ်ႇသဵင်မႂ်ႇ ယူႉသတူႉ ဢိၵ်ႇတင်းမတ်ႈထီႉၼၼ်ႉၶၢၼ်းဝႆႉလႄႈ၊- 24သူးတွင်းလႄႈဝႃႈ၊ ဢူဝ်းၸဝ်ႈၽြႃးဢၼ်ႁူႉႁၼ်ႁူဝ်ၸႂ်ၵူၼ်းတင်းသဵင်ႈတင်းလူင်တီႈၶႃႈ၊ ၼႂ်းၶဝ်သွင်ၵေႃႉၼႆႉ၊ ၶႅၼ်းတေႃႈ ၼႄပျႃးၵေႃႉဢၼ်ၸဝ်ႈႁဝ်းလိူၵ်ႈၵဵပ်းဢဝ်၊- 25ႁႂ်ႈလႆႈၶၢမ်ႇဢဝ်ဢရႃႇထမ်ႇမႃႉသြႃႇတင်းဢရႃႇတမၢၼ်ႇၸဝ်ႈတီႈဢၼ်ယူႉတႃႉလႆႈတူၵ်းၽၢတ်ႇယၢၼ် ႁႂ်ႈလႆႈၵႂႃႇၸူးၵႃႈတီႈဢၼ်မၼ်းတၵ်းယူႇၼၼ်ႉသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊- 26တူၵ်းၸႃႇၵွၵ်ႈၵၼ်လႄႈ မတ်ႈထီႉၼၼ်ႉလႆႈၸႃႇၵွၵ်ႈသေယဝ်ႉ၊ လႆႈၶဝ်ႈပႃးႁူမ်ႈလူၺ်ႈၵၼ်တင်း တမၢၼ်ႇၸဝ်ႈသိပ်းဢဵတ်းပႃးၸိူဝ်းၼၼ်ႉဢေႃႈ။
Currently Selected:
တမၢၼ်ႇၸဝ်ႈ 1: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
