LEEWAAWOOTA 8
8
QEESIMMATE BUURAMA SEERA
(Ful 29:1-39)
1Kaaliiqi Musera, 2«Aarooninna labballi oososi Xaadu Dukkani xullichira massitine, qeesimmate uddano, buurranni zayite, cubbu kakkalora booto, 2 ge'rechu goconna shiishinokki tima aanaho worroonni masoowe haadhine abbe; 3manna baalano Xaadu Dukkani xullichira gamba asse» yii.
4Museno Kaaliiqi hajajinosi gede assi. Mannu Dukkanu xullichira gamba yeenna, 5«Kaaliiqi hajajino hajajo tenneeti» yiinsa. 6Museno Aarooninna oososi alba qole shiqqi asse, hayishshidhanno gede assinsa. 7Aaroonira qeesimmate qamisenna kaabba uddisiise, halloho hiito qodhisiisi; hakkunni aanano, Efuudi yinannita gagasu uddano lede, goondoonni hiito hallisira usuri. 8Hatti Efuudi yinanni uddano gagasoho kiise afidhinote. Kaaliiqi hedo egensiisannore Uriiminna Tumiimi yinannire hattenne kiisera wori. 9Kaaliiqi hajajinosinte gede, Muse Aarooni Kaaliiqira aamaminoha ikkasi egensiisannoha culku irra aanaho worroonniha xaanxoonni koffiya umoho worisi.
10Museno buurranni zayite haa're, Dukkanu giddo noore baala buuri. Kunni garinni baalanka Maganoho baxxinoha assi. 11Shiima zayite haa're kakkallanni darga 7 hige wixi; Maganoho qullaawa assate uduunnu baalu aananna uduunne hayishshinannitera lekkaame gawate aana wixi. 12Maganoho baxxinoha ikkanno gede Aarooni umirano zayite duni. 13Kaaliiqi hajajinosi garinni, Muse Aarooni ooso alba qole shiqqi asse, qeesimmate qamiseno uddisiise, hiito hallinsara qodhisiise, addi koffiya umoho worinsa.
14Hakkunni gedensaanni, Muse cubbu kakkalora middicha haa're abbeenna, Aarooninna oososi angansa bootu umi aana wortu. 15Muse middicha gorre, kakkallanni dargi Maganoho baxxinoha ikkanno gede, shiima mundee qubbichunni haa're kakkallanni darga shoolente maddera noo buuddara buuri; gattino mundee kakkallanni dargira woroonni duni. Kunni garinni kakkallanni darga keereense Maganoho baxxinoha assi. 16Qoleno godowiru cooma, mulenna aanasi noo cooma, hattono qaccete afale haa're kakkallanni darga shilqishi. 17Kaaliiqi hajajinosinte gede, Muse gatino maala, gogunna helleete ledo qachaho gobbaanni fushshe giiri.
18Muse shilqote kakkalora ikkannoha ge'rechu goco shiqisheenna, Aarooninna oososi angansa gocu umi aana wortu. 19Muse goco gorre, mundee kakkallanni darga shoolunku midaadira wixi. 20-21Kaaliiqi hajajinosinte gede, ge'rechu maala danu danunkunni babbade, godowirenna badhiidi daduwe hayishshihu gedensaanni umo, coomanna maala baala mitteenni kakkallanni darga masse shilqishi. Tenne kakkalo foolino Kaaliiqira tashshi yaannoha ikkanno.
22Muse layinkimeeshsho qeesimmate buurranni seerira ikkannoha wole ge'rechu goco shiqisheenna, Aarooninna oososi angansa gocu umi aana wortu. 23Muse goco gorrihu gedensaanni shiima mundee haa're, Aaroonita qiniiticho macca qaccera, qiniiticho angasi qubbichi lowiidihuranna qiniiticho lekkasi qubbichi lowiidihura kisiisi. 24Aarooni ooso alba qole shiqqi asse, shiima mundee haa're qiniiticho maccansa qacce, qiniiticho angansa qubbicho lowiidihanna qiniiticho lekkansa qubbicho lowiidiha kisiisi. Gattino mundee, kakkallanni darga shoolunku midaadira wixi. 25Farru cooma, godowiru cooma, qaccete afale, mule, aanasi noo coomanna qiniiticho haye haa're, 26Kaaliiqira shiqinshannita shiishshukkinni ganne saffu aana worroonni timma sasunku garite giddonni mitto mitto haa're, coomunna hayu aana wori. 27Tenne sagale baala masse Aarooninna oososi anga wori; insano qolte Kaaliiqira addi fushshaate assite shiqishshu. 28Hakkunni gedensaanni, Muse sagale angansanni haa're, Kaaliiqira kakkallanni darga shilqote fushshaati aana masse shilqishi. Kuni fushshaati qeesimmate buurama seerira ikkannoho. Isino Kaaliiqira tashshi yaannoho. 29Kaaliiqi hajajinosinte gede, Muse umisi qeechasi ikkinoha rachote maala haa're, Kaaliiqira addi fushshaate asse shiqishi.
30Qoleno Muse shiima buurranni zayitenna kakkallanni darga noota shiima mundee haa're, Aarooninna oososi aana, qoleno uddanonsa aana wixi; hatto assatenni Muse insanna uddanonsa Kaaliiqira baxxitinore assi.
31Muse Aarooniranna oososira, «Maala Xaadu Dukkani nafara gaffe; hakkiicho, ‹Aarooninna oososi itto?› yine hajanjoonnie garinni, qeesimmate kakkalora saffeho worre shiqinshoonni timi ledo itte. 32Gatino maalanna tima giirre; 33qeesimmate buuramate seeri wo'ma geeshsha 7 barra hakko Xaadu Dukkani nafara keeshshe. 34Cubbo'ne agursiisate Kaaliiqi hajajinore techo wonshinoommo; 35Kaaliiqi hajajinore baala wonshitinanni, 7 barranna 7 hashsha wo'ma Dukkanu nafara keeshshe. Hatto assa hoogginiro kayinni reyitinanni. Tini baala Kaaliiqi hajajinoe hajajooti» yii. 36Aarooninna oososi, Kaaliiqi Muse widoonni qole hajajinore baala wonshitu.
Currently Selected:
LEEWAAWOOTA 8: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
