FULO 7

1Kaaliiqi Musera, «Ani ate Ferioonira Maganu gedeeha assoommohe; rodiikki Aarooni atera himanaancho ikke coyi'ranno. 2Ani hajajeemmohere baala Aaroonira kulisi; isino Israeele gobbasinni fultara aguranno gede Ferioonira kulona. 3Ikkollana ani Feriooni wodana dilleesseemmo; kunninni kainohunni Gibitsete gobbara aye geeshshi maalale asseennano, 4yitinannire dimacciishshanno; hakkunni gedensaanni, Gibitsete gobbara lowo qarra abbe manna'ya Israeele hakkiinni haa're fushsheemmo. 5Kunni garinni hanqunnita anga'ya aanansa kayise Israeele insa gobbanni fushsheemmo yannara, Gibitsootu ani Kaaliiqa ikkoommota affanno» yiisi. 6Musenna Aaroonino Kaaliiqi yiinonsare baala wonshitu. 7Feriooni ledo hasaabbu yannara, Musera 80 dirosiiti; Aaroonira qole 83 dirosiiti.

AAROONI SIQQO HAMASHSHO IKKITU

8Kaaliiqi Museranna Aaroonira, 9«Feriooni, ‹Ewelumma'ne afeemmo gede hanni maalale assitine leellishshe"e› yii'nero, Aarooni siqqosi Ferioonira albaanni tugona; hatte yannara siqqo hamashsho ikkitanno» yiinsa. 10Kunnira, Musenna Aarooni Feriooniwa marte Kaaliiqi hajajinonsa gede assitu; Aarooni siqqo Feriooninna ledosi gashshaano albaanni tuganno woyite hamashsho ikkitu. 11Hakkunni gedensaanni, Feriooni hayyoolenna bittannore woshshi; insano bitansanni Aarooni assi gede assitu. 12Siqquwansa uulla tuggu yannara, soorrante hamaso ikkitu; ikkollana Aarooni siqqicho egemmite guddunsa. 13Kuni duuchu ikkihu gedensaannino, Feriooni wodanasi dilleessi; Kaaliiqi coyi'rinonte gede Musenna Aarooni yitinore macciishsha giwi.

GIBITSETE TONNU MAALALETE QOOMAMI DIRRI

(Ful 7:14—11:10)

Wayi mundeete soorrami

14Hakkunni gedensaanni Kaaliiqi Muse, «Feriooni wodanasi dilleesse, ‹Manna diagureemmo› yiino. 15Kunnira soodo gutte Feriooniwa mari; wayi laga dirrinohunni xaadatto; hamashsho ikkitu siqqo anga haadhe marte wayi gama agari. 16Xaadatto woyite, ‹Ibiraawootu Magani Kaaliiqi mannisi ha're halalla magansi'rara aguratto gede kulammohera soyinoe; ati kayinni kune techo geeshsha diagurootto. 17Xa kayinni Kaaliiqi ayimma afatto; kuneeti, ani tenne siqqonni Abbayi Waa ganeemmo; wayino mundeete soorramanno. 18Giddo noo qulxu'mi baalu ree goofanno; wayino lowo geeshsha bowanno; Gibitsootu konne waa aga didandiitanno› yiino yite kuli» yiisi.

19Kaaliiqi Musera, «Aarooni Gibitsete gobbara noo wayibba, xashshuwatenna kofamma baalate aana siqqo kayisanno gede kulisi; hattenne yannara wayi baalu mundeete soorramanno; haqqunninna kinchunni seekkinoonni uduunni giddo noo wayi nafa gatikkinni mundee ikkanno» yii.

20Musenna Aaroonino, Kaaliiqi hajajinonsa gede assitu; Aaroonino Feriooninna ledosi gashshaano alba siqqo kayise Abbayi Waa gani. Wayino gudisame mundeete soorrami. 21Wayi giddo noo qulxu'mi baalu ree goofi; wayi bowino daafira, Gibitsootu agate didandiitino. Gibitsete baatto baala mundee calla ikkitu. 22Hakkunni gedensaanni, Feriooni bitaammi bitansanni hattonni assitu; isino wodanasi dilleessi; Kaaliiqi yiinonte gede, Musenna Aarooni yitinoreno macciishsha giwi. 23Yinoonni coye baala maanko yiikkinni galagale minira ha'ri. 24Gibitsootu Abbayi Waa agate dandiitinokki daafira, agganno waa afi'rate Abbayi gama bue u'mitu.

25Kaaliiqi waa mundeete soorrinkunni 7 barra ikki.

Currently Selected:

FULO 7: QulMax

Highlight

Copy