FULO 32

CULKUNNI SEEKKINOONNI SIITO

1Muse ilaalu aana keeshshita mannu Aarooniwa shiqe, «Hakku Gibitsetenni fushshinkehu Muse maikkinoro dianfoommona, ka'e albaanni ha'ranno magano seekkinke» yitusi. 2Aaroonino, «Meenti'nenna seenni'ne maccara noota culku qalawattanna ooso'ne maccara noo bilicuwa fushshitine abbe» yiinsa. 3Mannu baalunku maccansara noota culku qalawatta fushshe Aarooniwa abbi. 4Isino qalawatta angansanni haa're giiratenni daashshe siitu misile seekkinsa. Mannu mimmitoho, «Israeele, kuni Gibitsete gobbanni fushshe abbinonke maganooti» yii.

5Hakkunni gedensaanni, Aarooni siitu misilera albaanni qole kakkalote darga seekke, «Ga'a Kaaliiqi ayyaanaati» yee lallawi. 6Layinki soodo gutte ka'e, shilqonnitanna mittimmate kakkalo shiqishshu. Mannuno ofolle itihunna agihu gedensaanni sirbaho kai.

7Kaaliiqi Musera, «Gibitsetenni fushshittohu mannikki cubbo loose aneno agurinona rakke dirri. 8Ani hajajoommonsa doogowiinni hakkawoyintenni agurte fulte, daashshine seekkinoonnita siitu misile seekkidhe magansidhino; kakkalono shiqishshe, ‹Israeele, kuni Gibitsete gobbanni fushshe abbinonke maganooti?› yitino. 9Kuni manni mokkookka ikkinota ani afoommo; 10lowo geeshsha aaramoommo daafira, konne manna huneemmona agurie; atenna ate godowa kayinni bati'ra gosa asseemmo'ne» yiisi.

11Muse kayinni Kaaliiqi Maganisira eegamanni, «Kaaliiqa'ya, jawanna wolqaataame angakkinni Gibitsetenni fushshootto mannira togo mayira hanqitto? 12Gibitsootu, ‹Ilaallate mereero shee gudansaranna baattote aaninni hunara fushshinonsa!› yitanno gede mayira assattonke? Ballo mannakki hanqite guddootina aguri. 13‹Sircho'ne gordu beeddahe gede batiseemmo; tenne kulummo'ne baatto baala sirchi'nera hegere iqqa asse eemmo› yite su'mikkinni xaarte soqqamaasinekkira Abirihaamira, Yisihaaqiranna Yaiqoobira oottonsa hexxo qaagi» yii. 14Kaaliiqino hanqosi agure, mannu goofannokki gede assi.

15Museno lamenka widoonni borreessinoonnita 2 boncoonni kinna haa're ilaalu iiminni dirri. 16Tenne bocantino kinna seekkinohunna aanansa borreessinohu Maganoho. 17Iyyaasuno mannu canco macciishshe Musera, «Qachu giddo olu luuli no» yiisi. 18Museno,

«Kuni luuli sirbunniho ikkinnina,

qeeltinori qeexaala woy,

qeelantinori wi'la di"ikkino» yii.

19Yiintenni gede qacha mare iillanni hee'renni, siitonna sirba lae lowo geeshsha aarami. Haa're abbinota lamenta boncoonni kinnano ilaalu hunda ole cancani. 20Seekkidhino siitono haa're giire, cancane bullee asse wayinni bulbule Israeelete mannira hayikkisi. 21Aaroonino, «Kuni manni ma"asseennaheeti kageeshshi cubbo loosara worte laittohu?» yee xa'mi.

22Aaroonino daware, «Mooticha'ya anera hanqitootie; kuni manni bunshe assate murci'rinoha ikkinota ati afootto. 23Insano, ‹Hakku Gibitsetenni fushshinonke manchi Muse maikkinoro dianfoommona, ka'e albaanni ha'rannoha magano seekkinke› yitinoe. 24Anino, insa giddonni culka afi'rinohu haa're anewa abbanno gede kuloommonsa; insano abbiteenna haa're giirate tugeenna tini siitu misile fultino» yee dawari.

25Muse, Aarooni manna facci asse agure diinu albaanni shollanno gede assinota afe, 26qachu furchora uurre, «Kaaliiqiha ikkinohu baalu anewa dayo!» yii. Hatto yiita Leewaawootu baalunku isiwa shiqqi yitu. 27Museno, «Israeelete Magani Kaaliiqi, ‹Baalunku bise'ne suxxitine, qachaho kawiidi furchonni ka'iidite geeshsha ha'rantinanni rodoo'ne, elo'nenna olliicho'ne shiiyye› yiino'ne» yiinsa. 28Leewaawootuno Muse yiino gede assite hakko barra 3,000 manna shitu. 29Museno Leewaawootaho, «Techo ooso'nenna roduuwa'ne shitine Kaaliiqira qeesimmatenni soqqamate ki'nenee baddinoonni daafira, Kaaliiqi maassi'rino'ne» yiinsa.

30Muse layinki barra kae mannaho, «Ki'ne lowo cubbo loossinoonnina, miteekke eegama'ya lae cubbo'ne agurannoha ikkiro, hanni ani kayinni galagale ilaala Kaaliiqiwa mareemmo» yiinsa. 31Muse galagale Kaaliiqiwa mare, «Bayisibaona, kuni manni lowo cubbo loosino; magansi'rara yee culkunni magano seekki'rino. 32Xa kayinni eeggatena konne cubbo agurinsa; agurattonsakkiha ikkiro kayinni, su'ma'ya mannikki su'ma borreessootto maxaafi giddonni hooli» yii. 33Kaaliiqi Musera, «Maxaafi'ya giddonni cubbo loossinori su'malla huneemmo. 34Xa ha'ri; konne mannano kuloommohe widira qolte haadhe massi! Kuneeti sokkaasinchi'ya albakkiinni ha'ranno; konne manna cubbinsa daafira qorichisheemmo barri kayinni daanno» yiisi.

35Aarooni siitu misile seekkannonsa gede assitino daafira, Kaaliiqi jaddote dhibbinni ganinsa.

Currently Selected:

FULO 32: QulMax

Highlight

Copy