UMI QORONTOOSI 16

YERUSAALAMETE AMMANAANORA FUSHSHINOONNI WOXE

1Ammanaanote kaa'linanni woxe, Galatiyu ammanaanora kulummo garinni fushshe. 2Ani dayummohu gedensaanni fushshate kachaachammannikki gede, Sambatu Barra mittu mittunku noosi woxi aaninni afi'ri bikkinni kayise oona. 3Ani dayemmo woyite, doortinoonni manni gamba assinoonni woxe haa're Yerusaalame ha'ranno gede ani hirsiishshu borro eemmona. 4Ane ha'ra hasiissannota ikkituro, miilaambe ledo ha'neemmo.

HA'RATE ASSINOONNI QIXXAAWO

5Meqedooniyu widoonni saeemmo daafira, hakkaanni hige ki'newa dayemmona. 6Ha'reemmowa baala doogote sinqe kaa'litinannie gede, wole agurranna konne hawado nafa daye ki'newa keeshshummokkinni digateemmo. 7Xa sa"anni muddame hee're keere haa'rammo'nera dibaxoommo. Mootichu yiiro, ki'ne ledo seeda yanna keeshshammora hedoommo. 8Phenxeqosxete Ayyaani geeshsha kayinni Efesooni keeshsheemmo. 9Gibbannori kiiro haammatturono, jawaata looso loosate doogo fa'nante nooe.

10Ximootewoosi anente gede Mootichu looso loosannoha ikkino daafira, dayiha ikkiro ruxxi yiikkinni ki'ne ledo hee'ranno gede asse. 11Kunnira ayino mishoonkesi. Roduuwu ledo anewa galagale daanno gede agare noommona, doogote mitii'mannokki gede kaa'lesi.

12Rodiinke Aphiloosi wolu roduuwi ledo daye ki'ne la"anno gede lowo geeshsha huuccoommo. Isi kayinni xa daara horonta dihasi'rino. Kunni ka'a injiisiro daanno.

GUMULOTE SEEJJONNA KEERE

13Baqqi yitinoonnire ikke; ammanatenni uurre; jawaatte; kaajje. 14Baalanka coye baxillunni asse.

15Roduuwa'ya, Isxifaanoosi mini manni Akayu gobbara umi ammanaano ikkinotanna Maganu mannira soqqamate umonsa sayise uyinoha ikkinota affinoonni. 16Hattoo manniranna ledonsa daafurtannorira baalaho hajajantinanni gede qaagiisseemmo'ne. 17Ki'newa hooginore wonshitino daafira, Isxifaanoosi, Fardonaaxoosinna Akayiqoosi daanni hagiidhoommo. 18Insa anenna ki'ne wodana fooliishshiishshino. Togoo manna egenna hasiissanno.

19Issiyaho noo ammanaano, keere dhaantino'ne. Aqiilanna Phirisqillano minensa noo beetekiristaane ledo Mootichu su'minni lowo keere sokkino'ne. 20Hakko noo ammanaano baala keere dhaantino'ne. Qullaawa sunqamanni mimmito keere haadhe.

21Konne keere, ani Phaawuloosi anga'yanni borreessoommo'ne. 22Mooticha baxannokkihu hee'riro, rumaminoha ikko. Maaranaata - Mootichanke rakke amo! 23Mootichinke Yesuusi elto ki'ne ledo heedho. 24Baxilli'ya, Yesuusi Kiristoosinni ki'ne baalunku ledo hee'ro. Hamii'ni!

Currently Selected:

UMI QORONTOOSI 16: QulMax

Highlight

Copy