UMI QORONTOOSI 15
15
KIRISTOOSITA REYOTENNI KA"ASI
1Roduuwa'ya, ani kuloommo'neha, ki'ne adhitinihanna addaxxitiniha Dancha Duduwo qaagiisseemmo'ne. 2Kuloommo'neha Dancha Duduwo seekkitine cu'midhiniro, gattinanni. Hakkuyi ka'a kayinni ammana'ne haafaho.
3Ani adhoommoha qara coye ki'nera sayisoommo. Hakkuno qullaawa borro giddo Kiristoosi ninke cubbi daafira ree, 4waamame, qullaawa borro giddo yinoonninte gede sayikki barra reyotenni kaino.#Far 16:8-10; Mat 12:40; Soq 2:24-32 lai. 5Pheexiroosira leellihu gedensaanni, tonaa lame rosaanosirano leellino.#Mat 28:16-17; Maq 16:14; Luq 24:34,36; Yoh 20:19 lai. 6Hakkunni gedensaannino onte xibbe roortino rosaanora mitte hige leellino. Insa giddonni haammatu xaa geeshsha lubbotenni no. Mitu mitu kayinni reyitino. 7Hakkunni gedensaanni Yaiqoobira leellino; hakkiinni aanche soqqamaasine baalantera leellino.
8Wo'munkura gedensaanni barrimale ilamoommohura anerano leellinoe. #1Qor 9:1; Gal 1:16; Soq 9:3-6 lai. 9Ani soqqamaasine duuchantera woriidiho. Maganu beetekiristaane qarrisanni hee'roommo daafira, soqqamaasincho ikke woshshamate di"ikkoommoho. #Soq 8:3 lai. 10Ikkollana Maganu eltonni xa noommo gedeeha ikkoommo. Uyinoe elto mullawa digattino. Insa baalunkunni roore daafure loosoommo. Ikkollana, konne duucha assitinoti, Maganu eltooti ikkinnina ane di"ikkoommo. 11Anino insano kulleemmoti mitte sokkaati. Ki'ne ammantinoonnitino iseeti.
MANNU REYOTENNI KA"ANNO GARA
12Kiristoosi reyotenni kainota rosiinsanna, ki'ne giddonni mitu mitu, «Reyotenni ka"a dino» hiitto yitanno? 13Reyotenni ka"a nookkiha ikkiro, Kiristoosino reyotenni dikaino yaateyya. 14Kiristoosi reyotenni kainokkiha ikkiro, ninke kulleemmorinna ki'ne amma'na haafaho yaate. 15Qoleno Maganu, «Kiristoosi reyotenni kayisino» yine farci'neemmo coyira, Maganoho kaphu naqaashshe ikkineemmo yaate. Reyino manni ka"annokkiha ikkiro, Maganu Kiristoosino reyotenni dikayisino yaate. 16Reyino manni ka"annokkiha ikkiro, Kiristoosino dikaino yaate. 17Kiristoosi reyotenni kainokkiha ikkiro, ammana'ne haafaho yaate; xaa geeshsha cubbu giddo heedhinoonni yaate. 18Kiristoosi ammante heedhe reyitinori, ba'ino yaate. 19Kiristoosa hexxinoommohu tenne gobba heeshsho callate ikkiro, ninke wolu manni baalunkunni roore mararsineemmoreeti.
20Ikkollana, Kiristoosi reyitinorira reyotenni ka"ate umiha ikke, halaalinta reyotenni kaino. 21Reyo dagginohu mittu manchi Addaami widoonni ikkitinonte gede, reyotenni ka"ano dagginohu mittu manchi Kiristoosi widoonniiti. 22Addaaminni kainohunni mannu baalu reyannonte gede, Kiristoosi widoonni mannu baalu heeshsho afi'ranno. 23Kuni ikkannohuno bado badosinniiti: Umiha ikke Kiristoosi ka"anno; isi daanno woyite isire ikkitinori ka'anno. 24Kiristoosi roorroota, gashshaanonna wolqaataamma baala hune gashshoote Magano Annaho aanno yannara, goofimarcho ikkanno. 25Maganu baarigaarrasi baala angasira qola geeshsha, Kiristoosi mooha hasiissanno. 26Goofimarchoho ba"anno diini reyote. 27Qullaawa borro, «Maganu baalankare angasira qolino» yaanno. «Baalunkuri angasira higino» yinanni woyite, baalankare angasira qolinoha Magano Anna dikarsanno. 28Baalunkuri Kiristoosi angara higihu gedensaanni kayinni, Maganu wo'munkurira guuta ikkanno gede, Beettu qole, baalankare angasira qolisi Magani angara higanno.
29Reyotenni ka"a nookkiha ikkiro, reyino manni daafira yite cuuantannori ma assitannoyya? Reyitinori horonta ka'annokkiha ikkiro, mannu insa daafira mayira cuuamannoyya? 30Ninkeno wo'ma woyite qarraataame heeshsho hee'neemmohu mayiraatiyya? 31Roduuwa'ya, ane barru baala reyo agarte nooe. Konne coye kuleemmo'nehu, Mootichinke Yesuusi Kiristoosinni ki'ne addinta hawaqi'reemmo daafiraati. 32Mannu hedo garinni, Efesooni moyichu ledo sharrama'ya ma leddinoe? Reyino manni ka"annokkiha ikkiro,
«Ga'a reyineemmo daafira,
into ango»
yinannihu garaati!
33So'rantinoonte! Bushu jaaloomi dancha amanyoote hunanno. 34Wodana assidhe; cubbono loossinoonte. Ki'ne giddo mitu mitu Magano affinokkiri no. Konne yeemmohuno saalfachishammo'nera yeeti.
REYOTENNI KA"ANNO MANNINATE
35Mittu manchi, «Mannu reyotenni hiitto ikke ka"anno? Reyotenni ka"anno woyite hiittoo manninati hee'rannosi?» yee xa'ma dandaanno. 36Ati gowwu! Wixi'ratto gidi reya hoogiro heeshsho afi'rannoni? 37Qamade woy wole gide wixi'rittoro, gedensaanni wo'ma biso afidhino mu'ro ikkannohe. 38Maganu kayinni hakko wixira hasi'rino biso aanno. Mittu mittunku wixira hasiisino biso aanno.
39Maala afi'rino kalaqami baalu mittu daniha di"ikkino. Mannu mittu gari maala afi'rino. Saadate wolu garihu, ceate wolu garihu, qulxu'mehono wolu garihu noonsa.
40Qoleno gordu widi bisinna baattote widi bisi no. Ikkollana gordu widi gaamaarre addite; baattote widi gaamaarre qolte addite. 41Arrishshote biinfilli addiho; aganu biinfillino addiho. Beeddahete biinfilli addiho; mitte beeddakko biinfilli woletewiinni baxxanno.
42Reyotenni ka"anno mannitino tenne labbanno. Winxi bisi ba"annoho; reyotenni ka"annohu hee'rannoho. 43Shollinyunni winxoonnihu ayirrinyunni ka"anno; wolqiweelo winxoonnihu wolqaataamo ikke ka"anno. 44Kalaqamu biso winxeenna, ayyaanaamo biso uddi're ka"anno. Kalaqamu bisino no; ayyaanaamu bisino no. 45Kunnira Maganu qaali, «Umi manchi Addaami lubbotenni hee'ranno kalaqama ikkino» yaanno. Gedensiidi Addaami kayinni heeshsho aanno Ayyaana ikkino.#Kal 2:7 lai. 46Balaxe dayinohu kalaqamu biso uddi'rinoho ikkinnina ayyaanaamo di"ikkino. Ayyaanaamu dayinohu gedensaanniiti. 47Umi Addaami baattote bushshinni kalaqamino; layinki Addaami gordunni dayinoho. 48Baattote aaniri, baattote bushshinni kalaqaminoha labbanno; gordunniri gordunni dayinoha labbanno. 49Baattote manchi dana uddi'nummonte gede, gordunnihu danano uddi'neemmo.
50Roduuwa'ya, ani kuleemmo'neti, maalunna mundee Maganu Gashshoote diragidhanno. Reyannohu reyannokkiha diragi'ranno. 51-52Mitto go'le noo halaale kuleemmo'nena macciishshe: Ninke baalunku direyineemmo; goofimarchu xurumba ufuunfanni woyite, baalunku mitte hinge illete lipheessi giddo soorrammeemmo. Xurumba ufuunfanni woyite, reyitinori ba"annokki biso uddidhe ka'anno. Ninkeno soorrammeemmo. 53Ba"annohu ba"annokkiha uddi'ranno; reyannohu reyannokkiha uddi'ranno. 54Ba"annohu ba"annokkiha uddi'ranno woyitenna reyannohu reyannokkiha uddi'ranno woyite,
«Reyo qeelletenni egemmantu.
55Tee reyo, qeellekki hiikko no?
Tee reyo, gawajjattati wolqakki hiikko no?»#Hos 13:14 lai.
yine borreessinoonni coyi wo'manno. 56Reyote urde cubboho; cubbu wolqano seeraho. 57Mootichinke Yesuusi Kiristoosi widoonni qeelle uyinonke Maganira galatu iillosi. 58Kunnira ki'ne ayirradda roduuwa'ya, Mootichaho soqqantinanni daafurtinoonni daafuri mullawa gatannokkita affinoonnina, Mootichu looso wo'manka woyite agurtinikkinni kaajjitine loosate hixamanye!
Currently Selected:
UMI QORONTOOSI 15: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
