UMI QORONTOOSI 14

HAARO AFOONNA HIMANA

1Duuchunkunni roore baxillu faana hadhe. Ayyaanaamo afansha, wolunkunni roore Maganu sokka kulate hasidhe. 2Haaru afiinni coyi'rannohu Maganohooti ikkinnina dimannahooti. Go'lino coye Qullaawu Ayyaaninni coyi'ranno daafira, wolu afannohu dino. 3Maganu sokka kulannohu kayinni manna kaa'late, kaajjishatenna jawaachishate coyi'ranno. 4Haaru afiinni coyi'rannohu umosi calla dhaaphanno. Maganu sokka kulannohu kayinni, beetekiristaane dhaawanno. 5Baalunku haaru afiinni coyidhinara halcheemmo. Hakkunninni roore Maganu sokka kultinara baxeemmo. Maganu sokka kulannohu, haaru afiinni coyi'rannoha roorino. Hakkuyi ka'a kayinni, beetekiristaane dhaawantanno gede haaro afoo tirannohu hee'ra hasiissanno.

6Xa kayinni roduuwa'ya, ani ki'newa daye haaru afiinni coyi'rummoro, xawise woy egenno woy sokka woy mito roso kula hoogummo'nero, maricho kaa'leemmo'ne? 7Lubbo afi'rinokki uduunnicho, suusulle ufuunfiro woy gingilaate ganniro, hendoonnire kayinni malaatisa hoongiro ufuunfanninna gannanni hee'noonni uduunnichi qoonqo mayinni bande anfanni? 8Xurumba leellanno garinni ufuufa hoongiro, olaho ayi qixxaawanno? 9Hattonni ki'neno coyidhinanni coye xawissine kula hoogginiro, mannu hiitto asse buuxanno? Bubbete coyi'nannihu gede ikke gatanno. 10Baattote aana kiiro nookkihu duuchu afii no. Baalunkura kayinni tiro noonsa. 11Coyi'nanni hee'noonni afoo egenna hoogummoro, coyi'rannohura wosincho ikkeemmo; isino anera wosincho ikkanno. 12Ki'neno Qullaawu Ayyaani afansha afi'rate halchitini geeshsha, roorsitine ammanaasine dhaawanno afanshi bati'ranno'ne gede hasidhe.

13Kunnira, haaru afiinni coyi'ranno manchi, coyi'rannore tira dandaanno gede huuccatto assi'ro. 14Haaru afiinni huucci'rummoro, ayyaani'yanni huucci'reemmo ikkinnina wodani'yara kaa'lannori dino. 15Hatto ikkiro ma assa woyyitannoe? Ayyaani'yanni huucci'reemmo; surre'yannino huucci'reemmo; ayyaani'yanni faarsi'reemmo; surre'yannino faarsi'reemmo. 16Hatto ikka hoogiro, ati ayyaanunni Magano galatatto woyite macciishshannohu yaattore afa hoogiro, galatakki mama afe, «Hamii'ni» yaanno? 17Shiqishattoti galatu huuccatto danchate. Ikkollana wole manna didhaabbanno.

18Ani ki'ne baalunkunni roore haaru afiinni coyi'reemmohura Magano galaxxeemmo. 19Ikkollana, haaru afiinni tonne kume qaale coyi'rammontenni, beetekiristaanete giddo manna rosiisate egenninoonni afiinni onte qaale coyi'ra baxeemmo.

20Roduuwa'ya, qaaqquullu gede heda agurre. Bushu coyira kayinni qaaqquullu gedeere ikke. Hedo'nenni jajjabbu gedeere ikke. 21Qullaawa borro giddo,

«‹Haaru afiinni coyi'ranno manninna,

wole gobba manni afiinni

tenne gosara coyi'reemmo;

hatto ikkeennano dimacciishshitannoe›

yaanno Mootichu»#Isa 28:11-12 lai.

yine borreessinoonni.

22Kunni daafira, haaru afiinni coyi'ra ammantinokkirira ikkinnina, ammantinorira malaate di"ikkitino. Maganu sokka coyi'ra ammantinorira ikkinnina ammantinokkirira malaate di"ikkitino. 23Kunnira, ammanaasine gamba yiteenna mitu mitu haaru afiinni coyi'ranna, affinokkiri woy ammantinokkiri dagge la'uro, «Kuri macharaartinoreeti» diyitanno? 24Baalunku Maganu sokka kulanni hee'reenna, ammantinokkiri woy buuxxinokkiri ka'e dagguro, coyi'nanni coye macciishshite seejjantanno; so'ronsawiinnino higganno. 25Wodanaho go'le noonsa coyino xawannonsa; alba higge kumbuulte, «Halaalinta Maganu ki'ne ledo no» yite Magano magansidhanno.

MAGANO MAGANSI'RATE AMANYOOTE

26Roduuwa'ya, xa ma assino? Huuccattote gamba yitinanni woyite, ki'ne giddonni mitoho faarso noosi; woleho rosiisate elto noosi; woleho qole go'lino coye tirate elto noosi; woleho haaru afiinni coyi'rate elto noosi; woleho qole haaru afiinni coyi'noonniha tirate elto noosi. Tini baalanti elto beetekiristaane dhaabbannota ikka hasiissanno. 27Haaru afiinni coyidhannori heedhuro, lamu woy bati'riro sasu bado bado coyidhona; insa coyidhannoha wolu kayinni tirona. 28Tirannohu hoogiro kayinni, haaru afiinni coyi'rannohu beetekiristaanete giddo sammi yee, umisiranna Maganoho calla coyi'rona. 29Maganu sokka kultannori lame woy sase ikkite coyidhona; insa coyidhuha, macciishshanno manni hiince laona. 30Xaadunniwa noo manchira go'lino coyi leellisiro, balaxe coyi'ranni noohu sammi yoona. 31Duuchunku rosannonna jawaatanno gede, Maganu sokka bado bado coyidhe. 32Himanaanote ayyaanna himanaanote hajajantanno. 33Maganu keeru Maganooti ikkinnina luulu Magano di"ikkino.

Keeraanote xaadiwa baala ikkannonte gede, 34meentu beetekiristaannate sammi yoona. Seeru yaannonte gede, meentu hajajamanno gede ikkinnina coyi'rara difajjinoonni. 35Afara hasi'ranno coyi hee'riro, mine galtensa xa'mona. Meyati beetekiristaanete giddo coyi'ra seerimalete.

36Isi anfina, Maganu qaali ki'newiinni dayino? Woy ki'newa calla iillino? 37«Ani himanaanchoho» woy, «Anera ayyaanaamu afanshi nooe» yaannohu hee'riro, tini borreessoommoti Mootichu hajajo ikkitinota afona. 38Konne coye egenninokkihu, isinni diegenninoonniho.

39Kunnira roduuwa'ya, himana coyi'rate lowo geeshsha diinaggaabbe. Haaru afiinni coyi'rano hooltinoonte. 40Ikkollana baalunku coyi seerunninna amanyootunni ikkona.

Currently Selected:

UMI QORONTOOSI 14: QulMax

Highlight

Copy