MACAAFA FAARFANNAA 136
136
Gaarummaa Waaqayyoo Isa Hin Sochoone Jajuu
1Waaqayyo gaarii waan ta'eef, isaaf galata galchaa!
Gaarummaan isaa bara baraan in jiraata*!
2Waaqayyo isa waaqayyolii caaluuf galata galchaa!
Gaarummaan isaa bara baraan in jiraata.
3Isaaf galata galchaa!
Gooftaa gooftotaaf galata galchaa!
Gaarummaan isaa bara baraan in jiraata.#1 106:1; 118:1
4Inni kophaa isaa dinqii gurguddaa hojjete;
gaarummaan isaa bara baraan in jiraata.
5Inni hubannaadhaan bantiiwwan waaqaa uume;
gaarummaan isaa bara baraan in jiraata*.
6Inni lafa bishaan irra diriirse;
gaarummaan isaa bara baraan in jiraata*.
7Inni ifa gurguddaa hojjete;
gaarummaan isaa bara baraan in jiraata.
8Biiftuun guyyaa aboo akka godhatuuf kaa'e;
gaarummaan isaa bara baraan in jiraata.
9Ji'i, urjoonnis
halkan aboo akka godhataniif kaa'e;
gaarummaan isaa bara baraan in jiraata*.#5 Uma 1:6-8 6 24:2 7-9 Uma 1:14-18
10Inni angafa ta'anii
warra Gibxiif kan dhalatan in dha'e;
gaarummaan isaa bara baraan in jiraata.
11Israa'elin immoo isaan gidduudhaa in baase;
gaarummaan isaa bara baraan in jiraata.
12Harka aango-qabeessaan,
irree isaa isa ol fudhateen in baase;
gaarummaan isaa bara baraan in jiraata*.
13Inni galaana diimaa iddoo lamatti gargar hire;
gaarummaan isaa bara baraan in jiraata.
14Sabni Israa'el gidduu isaa akka darban godhe;
gaarummaan isaa bara baraan in jiraata.
15Fara'oonii fi macca isaa immoo
galaana diimaa keessatti in darbate;
gaarummaan isaa bara baraan in jiraata*.#11-12 Bau 12:29-33,51 13-15 Bau 14:21-31
16Inni saba isaa lafa onaa keessa in geggeesse;
gaarummaan isaa bara baraan in jiraata*.
17Inni mootota gurguddoota in dha'e;
gaarummaan isaa bara baraan in jiraata.
18Inni mootota surra-qabeeyyii in ajjeese;
gaarummaan isaa bara baraan in jiraata.
19Sihoonin mootii Amoorotaa in qoome;
gaarummaan isaas bara baraan in jiraata.
20Oogin mootii Baashaan in ajjeese;
gaarummaan isaa bara baraan in jiraata.
21Inni biyya isaanii dhaala godhee kenne;
gaarummaan isaa bara baraan in jiraata.
22Israa'el garbicha isaatiif dhuunfaa isa godhe;
gaarummaan isaa bara baraan in jiraata*.#16 Kes 29:4-6 17-22 Lak 21:23-35; Far 135:10-12
23Yeroo gad deebii keenyaatti isatu nu yaadate;
gaarummaan isaa bara baraan in jiraata.
24Warra nu cunqursan harkaas isatu nu baase;
gaarummaan isaa bara baraan in jiraata*.
25Inni foon kan uffate hundumaa in soora;
gaarummaan isaa bara baraan in jiraata*.
26Waaqayyo, gooftaa bantii waaqaaf galata galchaa!
Gaarummaan isaa bara baraan in jiraata.#23-24 129:4 25 104:27-28; 145:15
Currently Selected:
MACAAFA FAARFANNAA 136: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
