Macaafa Fakkeenyaa 7
7
Ittuma Fufee Gowwummaa Irraa Of Eeggachiisuu Isaa
1Yaa ilma ko, dubbii koo eegi,
abboommii koos garaatti qabadhu,
2abboommii koo eegi, in jiraattas;
barsiisa koos akka agartuu ija keetiitti eegi!
3Quba keetti isaan hidhadhu,
gabatee garaa keetiittis isaan caaffadhu*!
4Ogummaadhaan,<<Ati obboleettii koo ti>> jedhi,
hubannaadhaanis,<<Aantii koo>>
jedhii waami!
5Isaan dubartii ormaa irraa,
dubartii gaalamoota
afaaniin namatti kuultu irraas si eegu.#1-3 3:1-2
6Ani golgaa koo keessaa
karaa qaawwa mana kootii ala ilaalee,
7wallaalota keessaa,
dargaggoota gidduudhaa,
gurbaa qalbii hin qabne
tokko nan arge.
8Inni cinaacha karaa mana
dubartii tokkoo dhaqu irra,
gara mana isheetti fuula deebifatee,
in adeema ture.
9Yeroon isaas aduun lixxee
erga dukkanaa'e booddee,
halkan walakkaa ture.
10Yommus dubartiin tokko haxxummaadhaan,
uffata halalummaa uffatee
gad isatti baate.
11Isheen sagalee gad hin qabattu,
mata-jabeettii dhas;
isheen asii fi achi labdi malee,
mana isheetti hin argamtu.
12Takka karaa irra, takka immoo
walga'ii karaa keessa,
takkas golee karaa keessa dhaabattee in eeggatti;
13isheen qabdee, isa in dhungatti,
ija-jabinaanis isatti dubbattee,
14<<Har'a wareega koo waanan raawwadheef,
aarsaa galataa dhi'eessuun
ana irra jira*;
15kanaafan si simachuudhaaf gad ba'e,
dhimmee si barbaadee tureen si argadhe;
16ani uffata quncee talbaa
isa biyya Gibxiitti
bubburreeffamee hojjetame,
siree koo irra afeera;
17siree kootti qumbii,
sabiriidhaa fi qarafaa firfirseera;
18kottu hamma lafti bari'utti
jaalala keenya iddoodhaan in ga'anna,
halkan guutuus itti gammadaa in bulla;
19abbaan manaa koo mana hin jiru,
biyya fagoo dhaqeera;
20korojoo isaatti horii guuttatee
fudhatee ka'eera,
hamma ji'i gobbantutti
deebi'ee manatti hin galu>> in jetti.#14 Lew 7:15-16
21Isheen haasaa baay'eedhaan
karaa irraa isa in kaachifti,
itti kuuluu isheetiinis isa in giddisiifti;
22yommus inni tokkichumaan
akka sangaa qalamuuf oofamuutti,
akka bosonuu futtaasaatti adeemtuuttis,
ishee duukaa in bu'a.
23Hamma xiyyi mar'umaan ishee waraanutti,
akkuma simbirri
gara kiyyootti kaatutti,
innis akkasuma wanti kun
lubbuu isaatti akka adeemu utuu hin beekin
itti in kaata.
24Ammas yaa ilmaan ko dhaggeeffadhaa,
wantan jedhus yaadaan duukaa bu'aa!
25Garaan keessan gara karaa isheetti hin gorin,
daandii ishee irra adeemuudhaafis
karaa irraa hin kaatinaa!
26Isheen akkasitti
namoota baay'ee madeessitee kuffifteetti,
macca baay'ees ajjeefteetti.
27Karaan iddoo lafa jalaatti geessu
mana ishee keessa in ba'a,
gola mana du'aattis gad in buusa.
Currently Selected:
Macaafa Fakkeenyaa 7: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
