Macaafa Ermiyaas Raajichaa 32
32
Ermiyaas Lafa Bitachuu Isaa
1Zedeqiiyaan mootichi biyya Yihudaa irratti mo'ee waggaa kurnaffaa isaatti, innis Nebukadnezaar mo'ee waggaa kudha saddeettaffaa isaatti, dubbiin Waaqayyo biraa gara ana Ermiyaas dhufe kanatti fufee jira*; 2bara sanatti loltuun mootii Baabilon Yerusaalemin yommuu marsan, ani Ermiyaas raajichi immoo kellaa mana mootii Yihudaa keessatti hidhameen jira ture*. 3Yommus Zedeqiiyaan mootiin Yihudaa inni sababii ani wanta Waaqayyo anatti mul'ise raajii dubbadheef na hidhee ture sun,<<Maaliif,<<Kunoo! Waaqayyo mandara kana harka mootii Baabilonitti dabarsee in kenna, innis ishee in qabata; 4Zedeqiiyaan mootichis harka mootii Baabilonitti dabarfamee in kennama malee, isa jalaa ba'uu hin danda'u; inni mootii Baabilon argee, isa dura dhaabatees isaa wajjin dubbachuuf jira. 5Mootii Baabilon yoo lole iyyuu isa mo'uu waan hin dandeenyeef, qabamee biyya Baabilonitti in geeffama, hamma ani isa yaadadhuttis achii ba'uu hin danda'u jedheera>> jettee raajii ana irratti dubbattee?>> naan jedhe*.#1 1:3; 52:29 2 33:1; 37:21; 38:28; 39:13-14; 2Mot 25:1 3-5 34:2-3; 2Mot 25:3-7; Er 21:7
6Dubbiin Waaqayyoo ammas gara ana Ermiyaas in dhufe; 7inni,<<Kunoo! Hanaami'el ilmi Shaalum wasiila keetii gara kee dhufee,<<Lafa koo isan Anaatotii qabu gurgurachuu nan barbaadaatii ati aantii koo taatee utuu jirtuu namni kan biraa si dursuun waan irra hin jirreef, ati isa bitadhu!>> siin jedha>> naan jedhe. 8Yommus akkuma Waaqayyo dubbatee ture Hanaami'el ilmi wasiila kootii oobdii mana hidhaa lafa eegdonni dhaabatanitti ana bira dhufee,<<Lafa koo isa Anaatot isa kutaa biyya Benyaamiin keessa jiru, namni kan biraa si dursee bitatee qabeenya isaa godhachuun waan irra hin jirreef, maaloo ati ana irraa bitadhu!>> naan jedhe; kana irrattan yaadni dubbii kanaa Waaqayyo biraa ka'uu isaa hubadhe*.#7-8 Lew 25:25; Rut 4:3-4
9Ergasii ani lafa Hanaami'el ilma wasiila kootii isa Anaatot jiru meetii Sheeqelii kudha torba miijanu kenneefii irraa nan bitadhe; 10sagalee walii galtee keenyaas waraqatatti caafee, dhuga-baatotas waammadhee isaan biratti caaffatichatti mallattoo nan godhe; ergasii meeticha madaaliidhaan nan safareef. 11Caaffata sagaleen walii galtee keenyaa fi akki inni itti hojii irra oolu irratti caafame, isa malateeffamee fi isa hin malateeffamin nan fudhadhe. 12Caaffatichas iddoo Hanaami'el ilmi wasiila kootii jirutti, iddoo warri dhuga-baatuun warri caaffatichatti milikkita godhan jiranitti, utuu Yihudoonni warri oobdii mana hidhaa lafa eegdonni jiran keessa taa'an hundinuu ilaalanii, Baaruk ilma Neriiyaa, akaakayyuu Maaseyaatti nan kenne*. 13Iddoo isaan kun hundinuu jiranitti, wanti ani Baarukitti hime kanatti fufee jira; 14innis,<<Waaqayyo gooftaan maccaa, Waaqayyo inni kan Israa'el,<<Caaffata isaan irratti waliif galan, isa malateeffamee fi isa hin malateeffamin kana fuudhii, akka inni hin badnetti qodaa suphee keessa kaa'i!>> jedha. 15Waaqayyo gooftaan maccaa, Waaqayyo inni kan Israa'el,<<Biyya kana keessatti manneen, maasii fi iddoo dhaabaa waynii yeroon itti qabaachuu danda'an dhufuuf jira>> jedha>> kan jedhuu dha*.#12 36:4-32; 43:3; 45:1 15 32:44
16Caaffaticha isa irratti waliif galle sana Baaruk ilma Neriiyaatti ergan kenne booddee Waaqayyoon kadhadhee, 17<<Yaa Waaqayyo gooftaa! Ati humna kee isa guddaadhaa fi irree keetiin waaqaa fi lafa uumteetta; wanti siif hin danda'amnes tokko illee hin jiru*. 18Ati namoota kumaatamatti lakkaa'amanitti gaarummaa kee in argisiifta; yakka abbootaas ijoollee isaaniitti in lakkoofta; ati Waaqayyo guddaadhaa fi jabaadha, maqaan kees Waaqayyo gooftaa maccaa ti*; 19akeeki ati qabdu guddaa dha, hojiin kees humna-qabeessa; ati wanta ilmaan namootaa godhan hundumaa in argita, tokkon tokkon isaaniitiifis akka gochaa isaaniif akka hojii isaaniitti in kennita*; 20ati biyya Gibxiitti milikkitaa fi dinqii gooteetta; hamma har'aatti iyyuu saba Israa'elii fi namoota warra kaan gidduutti ittuma fuftee milikkitaa fi dinqii gochaa jirta; kanaafis ammuma iyyuu maqaan kee biyya hundumaa keessatti beekamaa dha*. 21Ati harka kee ol fudhattee, irree kee isa cimaadhaan milikkitaa fi dinqii gochuudhaan, wanta nama sodaachisuunis saba kee Israa'eliin biyya Gibxii in baafte*; 22biyya isa aannanii fi damma baasu, isa abboota isaaniitiif kakuudhaan abdachiifte sana isaaniif in laatte. 23Isaan dhufanii biyyicha erga qabatanii garuu dubbii keetiif hin abboomamne, seera kee duukaas hin buune; wanta ati isaan abboomtes hin goone; kanaaf ati badiisa kana hundumaa isaanitti in fidde.#17 10:12; 32:27; Uma 18:14; Zak 8:6; Mat 19:26; Luq 1:37 18 Bau 20:5-6 19 16:17; 17:10; Rom 2:6 20 Far 78:43 21 Kes 26:8
24<<Kunoo! Inni ati,<<Mandarattii qabachuudhaaf dallaan ittiin marsan itti ijaarameera; isheen billaa, beelaa fi dha'icha irraa kan ka'e harka warra Baabilon warra ishee lolaniitti dabarfamtee in kennamti>> jette sun dhufeera; kanas ati argiteetta. 25Yaa Waaqayyo gooftaa! Mandarattiin harka warra Baabilonitti akka kennamtu utuma beektuu ati,<<Dhuga-baatota waammadhu isaan biratti meetiidhaan lafa bitadhu!>> naan jettee?>> nan jedhe.
26Ergasiis dubbiin Waaqayyoo gara ana Ermiyaas in dhufe; 27inni,<<Kunoo! Ani Waaqayyoo dha, sanyii namaa hundumaafis gooftaa dha; wanti anaaf hin danda'amne jiraa ree*>> 28Ani kunoo! Mandarattii kana harka Nebukadnezaar mootii Baabilonitti dabarsee nan kenna; innis ishee in qabata; 29loltoonni isaas mandarattiitti duulanii ibidda itti in naqu; manneen isaanii warra sabni mandarattii ana aarsuudhaaf jedhanii isaan irratti Ba'aaliif ixaana aarsanii, waaqayyolii biraatiif dhibaayyuu dhibaafatan sana hundumaa in gubu*.#27 32:17; Uma 18:14 28-29 2Mot 25:1-11
30<<Sabni mootummaa Israa'elii fi mootummaa Yihudaa jalqabumaa jalqabanii ana duratti wanta hamaa duwwaa hojjechaa turan; waan harka isaaniitiin tolfataniinis na aarsaniiru; ani Waaqayyo kana dubbadheera*. 31Mandarattiin kun yeroo ijaaramtee jalqabdee hamma ammaatti waan na dheekkamsiifteef, waan na aarsiteefis ani fuula koo duraa ishee nan balleessa*; 32sababii sabni mootummaa Israa'elii fi mootummaa Yihudaa ana aarsuudhaaf jedhanii jal'ina hojjetaniif, ani mootota isaanii fi angafoota isaanii, luboota isaanii fi raajota isaanii, warra Yihudaa fi Yerusaalem keessa jiraatan hundumaa nan balleessa. 33Utuman ammaa amma isaan gorsuu, isaan immoo dugda anatti gatan malee, gara kootti gara hin galle, adaba kootiin hin deebine, gorsa koos hin dhaggeeffanne*; 34isaan waaqayyolii tolfamoo isaanii warra ciigga'amoo mana qulqullummaa isa kan kootii keessa kaa'anii isa in xureessan*. 35Ilmaan isaanii fi intaloota isaanii ibidda keessatti gubanii Moleekiif aarsaa dhi'eessuudhaaf, dachaa Ben-Hiinom keessatti Ba'aaliif iddoowwan sagadaa ol ka'oo in ijaaran; wanta ciiggaasisaa akkasiitiin Yihudaa cubbuu in hojjechiisan; ani wanta akkasii kana akka isaan anaaf godhaniif isaan hin abboomne, kunis yaada koo keessa hin turre>> jedhe*.#30 3:25 31 2:20; 52:3; 2Mot 17:18,23; 23:27; 24:20 33 2:27; 5:3 34 7:30 35 7:31; 19:5
Waaqayyo Itti Dabalee Saba Isaa Abdachiisuu Isaa
36Kanaaf Waaqayyo inni kan Israa'el, ammas waa'ee mandarattiitiif anatti yommuu dubbate,<<Isheen isin,<<Billaadhaan, beelaan, dha'ichaanis rukutamtee harka mootii Baabilon keessa in buuti>> jettan*, 37kunoo, namoota ishee biyya ani aarii kootii fi dheekkamsa koo isa boba'aadhaan itti tamsaase hundumaa keessaa walitti nan qaba; gara iddoo kanaatti isaan nan fida, nagaadhaanis iddoo kana keessa isaan nan jiraachisa*. 38Isaan saba koo in ta'u, ani immoo Waaqayyo isaaniif nan ta'a*; 39isaan bara jireenya isaanii hundumaa ana akka sodaataniif isaanitti, isaan booddeedhaanis ijoollee isaaniitti akka toluuf, ani garaa tokkoo fi yaada tokko isaaniif nan kenna*. 40Ani kakuu bara baraa isaaniif nan gala, wanta gaarii isaaniif gochuus hin dhiisu; isaan si'achi ana irraa akka gara hin galletti garaa isaanii guutuudhaan ulfina akka anaaf kennan nan godha*. 41Ani wanta gaarii isaaniif gochuutti nan gammada; ani dhugumaan garaa koo fi yaada koo guutuudhaan biyya kana keessa jabeessee isaan nan dhaaba*.#36 32:43; 33:10-11 37 23:3,6; Kes 30:3 38 7:23 39 24:7 40 31:33 41 Amo 9:15; Sef 3:17
42<<Badiisa guddaa kana akkuman saba kanatti fide, akkasuma immoo wanta gaarii isa ani isaan abdachiise hundumaa isaaniif nan kenna*; 43biyya isin,<<Harka warra Baabilonitti kennameera, oneera, namni, horiinis keessa hin jiru>> jettan kana keessaa namni deebi'ee lafa bitachuuf jira*; 44ani saba koo biyya itti booji'amanii deebisee waanan fiduuf, yommus lafti kutaa biyya Benyaamiin keessaa, gandeen naannoo Yerusaalem jiran keessaa, mandaroota Yihudaa keessaa, mandaroota biyya gaara gubbaa keessaa, mandaroota biyya dachaa keessaa, mandaroota biyya gara mirgaa keessaas meetiitti in gurgurama; dhuga-baatonni itti in waamamu, caaffanni bittaa fi gurgurtaas caafamee in malateeffama; ani Waaqayyo kana dubbadheera>> jedhe*.#42 31:28 43 32:36 44 29:13-14; 30:3
Currently Selected:
Macaafa Ermiyaas Raajichaa 32: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
