Macaafa Ermiyaas Raajichaa 31

Israa'eloonni Booji'aman Biyyatti Deebi'uu Isaanii

1Waaqayyo dubbii isaa itti fufee,<<Ani yeroo sanatti gosa Israa'el hundumaaf Waaqayyo isaanii nan ta'a, isaanis saba koo in ta'u*.

2Sabni warri billaa jalaa ba'an,

lafa onaa keessatti

faara tolaadhaan in ilaalamu;

ani dhufee Israa'eliif

boqonnaa nan kenna>> jedha.

3Ammas Waaqayyo fagootti

anatti mul'atee,

saba kanaan,

<<Ani jaalala bara baraatiin si jaalladheera;

kanaafan gaarummaa kootiin

ofitti si dhi'eesse*;

4ani deebisee sin ijaara,

atis jabaattee in dhaabatta;

yommus yaa durbee Israa'el, dibbee kee fudhattee,

kaatee gammachuudhaan in sirbita.

5Ati deebitee gaarota Samaariyaa irra

dhaabaa waynii in dhaabbatta,

ija isaattis atumti in gammadda.

6Barri itti eegdonni

gaarota Efreem gubbaa dhaabatanii

sagalee isaanii ol fudhatanii,

<<Ka'aa, gara Xiyoonitti,

iddoo Waaqayyo keenya jirutti

ol in baanaa!>> jedhan in dhufa*.#1 7:23 3 Kes 4:37; Isa 43:4; Mil 1:2-5 6 33:10-11

7<<Sababii Yaaqoobiif gammadaa faarfadhaa!

Gurguddoota saba lafa irraa gidduuttis

sagalee keessan ol fuudhaa,

galata keessanis dhageessisaatii,

<<Yaa Waaqayyo,

hambaa saba kee Israa'el

fayyisi!>> jedhaa!

8Ani kunoo! Biyya gara bitaatii

isaan nan fida,

qarqara lafaatiis

walitti isaan nan qaba;

jaamonni, naaftoonni,

warri dadhabbii qabanii fi

warri da'uu jala ga'an hundinuu

waldaa guddaa ta'anii*,

9isa durii yaadatanii

boo'aa as in deebi'u;

ani garuu isaan jajjabeessee,

qarqara burqituu bishaanii irra

isaan nan geggeessa;

isaan karaa qajeelaa irra

in adeemu malee,

hin gufatan;

ani Israa'eliif abbaa dha,

Efreem immoo akka ilma koo

isa angafaa ti*.#7-8 Isa 35:8-10; Er 23:3 9 3:4; 31:20; Far 23:2-3; Isa 49:9-11; 2Qor 6:18

10<<Yaa saba lafa irraa dubbii koo dhaga'aa!

Saba warra biyya galaana gidduu

keessa jiran,

warra fagoottis,

<<Inni Israa'elin gargar tamsaase,

amma immoo walitti isaan in qaba;

tikseen horii isaa akka eegu,

innis akkasuma isaan in eega>> jedhaatii himaa*!

11Sanyii Yaaqoob ani nan fura,

harka warra isaan caalanii keessaas

isaan nan baasa*.

12Isaan dhufanii tulluu Xiyoon

isa ol ka'aa irratti

sagalee guddaadhaan in faarfatu,

arjummaa Waaqayyoottis in gammadu;

midhaan, daadhii waynii,

dhadhaa ejersaa,

ilmoolee bushaayee fi saawwanitti in gammadu;

isaan akka iddoo dhaabaa

isa bishaan keessa yaa'uu in ta'u,

si'achi deebi'anii yaaddoo hin qabaatan*.

13Yommus durboonni isaanii

gammadanii in sirbu,

dargaggoonni isaanii fi

jaarsoliin isaanii in gammadu;

ani Waaqayyo boo'icha isaanii

gammachuutti nan diddiira,

qooda gaddanis isaan nan jajjabeessa,

isaan nan gammachiisas;

14ani warra luboota cooma nan nyaachisa,

saba koos gaarummaa kootiin

nan quufsa>> jedhe.#10 23:3; Isa 40:11; His 34:11-16 11 Isa 43:3 12 Isa 58:11

Waaqayyo Saba Israa'eliif Araaramuu Isaa

15Waaqayyo itti fufee,

<<Sagaleen Raamaatti dhaga'ame,

sagalee boo'ichaa fi wawwaannaa guddaa ture;

Raahel ijoollee isheetiif in boosse;

ijoolleen ishee waan hin jirreef

jajjabaachuus in didde*.

16Ati garuu

dadhabbiin kee gatii siif argate,

ijoolleen kee biyya diinaatii

deebi'anii waan dhufaniif

boo'icha kee dhiisi, imimmaan kees hin dhangalaasin!

17Ati si'achi abdii qabda,

ijoolleen kee gara biyya isaaniitti in deebi'u;

kana ana Waaqayyotu dubbate*.#15 Mat 2:18; Uma 35:16-20 17 29:11

18<<Dhuguma boo'ichi namoota Efreem na bira ga'eera;

isaan,<<Ati akka nama

dibicha didaa leejjisutti

nu adabdeetta, nuyis adabamneerra;

egaa ati Waaqayyo gooftaa keenya

waan taateef,

nu deebisi, nuyis in deebina*;

19nuyi si irraa gara gallee turre,

erga ati nu adabde garuu

yaada garaa keenyaa geddarannee,

gadda irraa kan ka'es qoma keenya in rurrukutanne;

balleessaa bara dargagummaa keenyaa hojjenneef

in yeellaane, in salphannes>>

jechuu isaanii dhaga'eera.

20Efreem ilma koo isa jaallatamaa dhaa>>

Inni mucaa ana gammachiisuu dhaa>>

Deddeebisee yoon isa irratti dubbadhe iyyuu,

ani isa yaadachuu hin dhiisu;

kanaaf garaan koo isaaf in gadda,

isaafis nan oo'a;

ani Waaqayyo kana dubbadheera*.

21Yaa namoota Israa'el

warra akka durbaa,

karaa milikkiteeffadhaa,

wanta karaa argisiisu dhaabadhaa!

Karaa irra baatanis yaadaan qabaa,

gara mandaroota keessaniitti deebi'aa!

22Yaa intaloota hin amanamnee,

isin hamma yoomiitti

asii fi achi joortu>>

Ani Waaqayyo wanta haaraa

lafa irratti nan uuma;

innis isa dubartiin

dhiiratti marsituu dha>> jedhe*.#18 Faru 5:21 20 31:3,9; Isa 49:15; 63:9; Faru 3:31-32 22 Isa 48:6

23Waaqayyo gooftaan maccaa, Waaqayyo inni kan Israa'el,<<Ani biyya isaan itti booji'amanii deebisee yommuun isaan fidu, namoonni biyya Yihudaa fi mandaroota ishee keessaa,<<Yaa iddoo qajeelummaan jiraatuu, yaa tulluu qulqullummaa, Waaqayyo si haa eebbisu!>> in jedhu*; 24Yommus namoonni biyya Yihudaa fi mandaroota ishee keessa, warri qottuunii fi warri horii horsiisan hundinuu walii wajjin in jiraatu; 25ani warra dheebotan nan obaasa, warra beela'anis nan quufsa>> jedhe. 26Kana irratti ani hirriba baay'ee anatti miyaa'ee ture keessaa dammaqee asii fi achi nan ilaale.#23 Zak 8:3

27Ammas Waaqayyo itti fufee,<<Kunoo! Barri ani itti biyya Israa'elii fi biyya Yihudaa, namaa fi horiidhaan guutu in dhufa; 28akkuman akka isaan miidhaman, akka isaan buqqifaman, akka isaan diigamanii fi akka isaan badanii barbadeeffaman godhe, akkasuma amma immoo akka isaan ijaaramanii fi akka isaan dhaabaman nan godha*.#28 1:10,12; 32:42

29<<Baras namoonni isa,

<<Abboonni ija waynii dhangaggaa'aa

waan nyaataniif,

ijoollee isaanii ilkaan hadoode>>

jedhan sana in dhiisu*;

30<<Garuu namni

ija waynii dhangaggaa'aa

nyaate hundinuu,

ilkaanumti ofii isaatii in hadooda;

namni yakke hundinuu

yakkuma ofii isaatiitiif in du'a*.

31Kunoo! Barri ani itti

namoota biyya Israa'eliif,

biyya Yihudaafis

kakuu haaraa galu in dhufa*;

32innis sanyii kakuu

isa ani abboota isaanii gargaaree

biyya Gibxii yommuun baase

isaaniif dhaabnaan,

utuma ani gooftaa isaanii ta'ee jiruu,

isaan immoo kakuu koo cabsan

sanaa miti;

ani Waaqayyo kana dubbadheera*.

33Kakuun inni ani bara sana

Israa'eliif galuuf jiru

kanatti fufee jira;

ani seera koo yaada isaanii keessa nan kaa'a,

garaa isaanii keessattis nan caafa;

ani Waaqayyo isaanii nan ta'a,

isaanis saba koo in ta'u*;

34ani yakka isaanii isaaniif nan dhiisa,

cubbuu isaaniis deebi'ee

isaanitti hin lakkaa'u;

isaan hundumti isaanii

xinnaadhaa hamma isa guddaatti

ana waan beekaniif,

si'achi namni tokko illee nama biyya isaatiitiin

yookiis obboleessa isaatiin,

<<Waaqayyoon bari!>> jedhee,

gorsuu hin barbaachisu>> jedhe*.#29 His 18:2; Bau 20:5-6; Faru 5:7 30 Kes 24:16 31 Luq 22:20; Ibr 8:8 32 Ibr 8:9; Er 11:10 33 32:40; Isa 51:7; Fak 7:3; Ibr 8:10; 10:16 34 24:7; Isa 11:9; Yoh 6:45; Er 33:8; 50:20; Isa 33:24; Ibr 8:11-12; 10:17

35Inni biiftuun guyyaa akka ibsituuf,

jiinii fi urjoonni immoo halkan

akka ibsaniif abboome;

inni galaana raasee

dha'aan isaa akka huursu godhe,

maqaan isaa Waaqayyo gooftaa maccaa ti*;

36inni,<<Seerri jabaatee dhaabate kun

fuula koo duraa yoo bade duwwaa,

sanyiin Israa'el bara baraan

saba ta'uu dhiisee

fuula koo duraa in bada;

kana ana Waaqayyotu dubbate*.

37Akkuma bantiin waaqaa

safaramee beekamuu,

hundeen lafaas gad qoramee

bira ga'amuu hin dandeenye,

akkasuma anis

guutummaa sanyii Israa'el

balleessaa isaan hojjetan hundumaaf jedhee,

tuffadhee gatuu hin danda'u>> jedhe;

kana Waaqayyotu dubbate*.#35 Uma 1:16; Amo 5:8 36 33:25-26 37 Fak 30:4; Isa 40:12-16

38Waaqayyo,<<Kunoo! Yeroon itti mandarri Yerusaalem masaraa Hanaani'elii jalqabee hamma karra isa <<Karra golee>> jedhamuutti ulfina kootiif deebi'ee ijaaramu in dhufa*; 39daariin isaas karra goleetii ka'ee hamma gaara Gaarebitti in adeema, achii ka'ee immoo gara Go'aatitti in marfata. 40Dachaan reeffi itti awwaalamuu fi daaraan itti gatamu, lafti gidduu sana jiru hundinuus hamma laga Qedroonitti, karaa ba'a-biiftuu immoo hamma karra fardeeniitti kan jiru hundinuu ana Waaqayyoof kan qulqullaa'e in ta'a; mandarattiin hamma bara baraatti hin buqaatu, hin diigamtus>> jedhe*.#38 Nah 3:11 40 7:31-32; Nah 3:28; Yoe 3:17,20-21

Currently Selected:

Macaafa Ermiyaas Raajichaa 31: MacQul

Highlight

Copy

Compare