Macaafa Ermiyaas Raajichaa 26
26
Ermiyaas Qabamee Gad Dhiifamuu Isaa
(Er 7)
1Jalqaba bara Yehoyaaqiim ilmi Yosiyaas mootii biyya Yihudaa ta'eetti, dubbiin kun Waaqayyo biraa gara Ermiyaas in dhufe*. 2Inni,<<Ka'ii oobdii mana qulqullummaa keessa dhaabadhuu wanta ani si abboomu hundumaa mandaroota Yihudaa keessaa mana qulqullummaa kana keessatti ana Waaqayyoof sagaduuf warra dhufan hundumaatti himi! Wanta ani si abboomu kana hundumaa keessaa tokko illee hin hambisin! 3Isaan dubbicha dhaga'anii karaa isaanii isa hamaa irraa yoo deebi'an, ani immoo hojii isaanii isa hamaadhaaf jedhee isan isaan adabuuf yaade nan dhiisa*; 4kanaaf ati isaanitti dubbadhuu,<<Waaqayyo akkana jedha:- Isin anaaf abboomamuu yoo diddan, abboommii koo isa ani isiniif kennes yoo eeguu dhabaattan, 5dubbii isa garboonni koo raajonni warri ani ammaa amma gara keessanitti erge isinitti himanis yoo dhaga'uu diddan*, 6akkuman Shiiloo godhe mana kanas immoo akkasuma nan godha; mandarattii kanas sabni lafa irraa hundinuu:- Akka mandarattii kanaa si haa godhu! jedhanii kan ittiin wal abaaran nan godha>> jedhi!>> jedhe*.#1 1:3 3 18:8; 36:3; 18:11 5 7:25; 25:4 6 7:14; 24:9
7Luboonnii fi raajonni, sabni hundinuus ani Ermiyaas dubbii Waaqayyoo kana guutummaatti mana qulqullummaa keessatti utuun dubbadhuu in dhaga'an; 8wanta Waaqayyo akka ani dubbadhuuf na abboome hundumaa dubbadhee akkuma ani raawwadheen, isaan na qabanii,<<Ati kana waan dubbatteef, dhugumaan ajjeefamuun si irra jira! 9Ati maaliif,<<Manni kun akka Shiiloo in ta'a, mandarri kunis ontee lafa duwwaa in taati>> jettee maqaa Waaqayyootiin raajii dubbatte?>> anaan jedhan; achumaan namoonni sun hundinuu mana qulqullummaa keessatti anatti in marsan*.#9 7:12
10Gurguddoonni Yihudaa dubbii kana yommuu dhaga'an, mana mootummaa keessaa gara mana qulqullummaatti ol ba'anii karra manichaa isa haaraa dura in taa'an. 11Yommus luboonnii fi raajonni, gurguddoota biyyaa fi namoota sana hundumaatti,<<Akkuma isin gurra keessaniin dhageessan namichi kun mandara kana irratti raajii waan dubbateef, ajjeefamuun isa irra jira>> jedhanii in dubbatan. 12Ergasii Ermiyaas immoo gurguddoota biyyaa fi namoota sana hundumaan,<<Wanta isin dhageessan kana hundumaa mana kana irratii fi mandarattii kana irratti raajii akkan dubbadhuuf Waaqayyotu na erge; 13kanaaf isin amma amala keessanii fi hojii keessan tolfadhaa, Waaqayyo gooftaa keessaniif abboomamaa, innis wanta hamaa isa isinitti fiduu yaade sana in dhiisa*. 14Ani garuu kunoo harka keessan keessan jira, waanuma isin duratti gaarii fi qajeelaa fakkaate ana irratti raawwadhaa! 15Waaqayyo dubbii kana hundumaa akkan isinitti himuuf dhugumaan waan na ergeef, isin ana yoo ajjeeftan dhiiga nama balleessaa hin qabnee dhangalaasuu keessaniif ofii keessanii fi mandarattii kana irratti, namoota ishee keessa jiraatan irrattis yakka fiduu keessan beekaa!>> isaaniin jedhe*.#13 7:3; 18:8 15 Bau 23:7; Mat 27:4,25
16Yommus gurguddoonni biyyaa fi jarri hundinuu,<<Namichi kun maqaa Waaqayyo goftaa keenyaatiin waan nutti dubbateef ajjeefamuun isa irra hin jiru!>> jedhanii, lubootaa fi raajotatti in dubbatan. 17Akkasumas immoo jaarsolii biyyaa keessaa jarreen tokko ka'anii guutummaa wal ga'ii sabaatti in dubbatan; 18isaan,<<Bara Hisqiyaas mootii Yihudaa ture keessa, Miikiyaas namni mandara Mooresheet,<<Waaqayyo gooftaan maccaa:-
Xiyoon lafa qotiisaa taatee in qotamti,
Yerusaalem lafa tuullaa
dhagaa caccabaa in taati,
tulluun manni qulqullummaa irra jirus
lafa ol jedhaa caakkaan fudhate in ta'a jedha>>
jedhee saba Yihudaatti
raajii in dubbate*.#18 Mik 1:1; 3:12
19<<Hisqiyaas mootiin Yihudaa fi sabni Yihudaa hundinuu garuu isa Miikiyaas akkas jedhee raajii dubbateef isa ajjeesaniiruu ree>> Mootichi Waaqayyoon sodaatee araara isaa hin kadhannee ree>> Waaqayyo immoo wanta hamaa isaanitti fiduuf yaade sana hin dhiifnee ree>> Nuyi garuu amma badiisa guddaa ofitti fiduuf jenna>> jedhan*. 20Bara sana keessa Uriiyaan ilmi Shemaa'iyaa namni biyya Kiriiyat-Ya'ariim akkuma Ermiyaas mandara kana irratii fi biyya kana irratti maqaa Waaqayyootiin raajii dubbatee ture; 21Yehoyaaqiim mootichi, loltoonni isaa fi gurguddoonni isaa dubbii kana yommuu dhaga'an, mootichi, Uriiyaa ajjeesuu in yaade; Uriiyaan garuu waa'ee kanaa yommuu dhaga'e sodaatee gara biyya Gibxiitti in baqate. 22Yehoyaaqiim mootichi immoo dhaqanii Uriiyaa akka fidaniif Elnaataan ilma Akborii fi namoota kan biraa gara biyya Gibxiitti in erge*. 23Isaanis Uriiyaa biyya Gibxiitii fidanii Yehoyaaqiim mootichatti in dhi'eessan; mootichi immoo billaadhaan isa ajjeesisee, reeffa isaa iddoo namni halle itti awwaalamutti in awwaalchise.#19 18:8; HoE 5:39 22 36:12,25; 2Mot 22:12
24Ani garuu sababii Ahiiqaam ilmi Shaafaan na gargaareef, ajjeefamuudhaaf harka jaraatti dabarfamee hin kennamne*.#24 2Mot 22:12; Er 15:21
Currently Selected:
Macaafa Ermiyaas Raajichaa 26: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
