ERGAA YAAQOOB 1

Nagaa

1Ani Yaaqoob hojjetaa Waaqayyoo, hojjetaa Yesus Kristos gooftichaas ta'ee, warra gosa kudha lamaanuu keessaa biyya diidaatti tamsa'anii jiraniif kana caafuu koo ti;

nagaa koo isiniif nan dhi'eessa*.#1 Mat 13:55; Mar 6:3; HoE 15:13; Gal 1:19; Yih la 1; 1Phe 1:1

Amantiin Qoramee Ilaalamee Ogummaa Biraan Ga'uu Isaa

2Yaa obboloota ko! Qoramsa garaa garaatiin ilaalamuun yommuu isinitti dhufu, gammachuu guutuutti fudhadhaa*! 3Amantiin keessan qoramee ilaalamuun isaa obsaan danda'uu akka fidu in beektu*. 4Isin warra fiixaan ba'an, warra mudaa, hir'inas hin qabne akka taataniif, obsaan danda'uun kun hojii isaa fiixaan haa baasu*!#2 Rom 5:3-5; Mat 5:11-12 3 1Phe 1:7 4 Mat 5:48

5Isin keessaa nama tokkotti ogummaan yoo hir'ate, Waaqayyo isa nama hundumaaf harka guutee fuula ifaadhaan kennu haa kadhatu! Innis in kennaaf*. 6Garuu utuu hin mamin amantiidhaan haa kadhatu; namni mamu akka dha'aa galaanaa isa qilleensaan asii fi achi oofamee darbatamuu ti*. 7Namni akkasii gooftaa biraa waa nan argadha jedhee hin eeggatin! 8Garaan nama akkasii walaallammii dha, yaadni isaas waan hundumaa qabee gad dhiisa malee, iddoo tokko hin dhaabatu.#5 Fak 2:3-6; Mat 7:7 6 Mar 11:24; 1Xim 2:8

Hiyyumnii fi Soorumni Akka Itti Ilaalamuun Ta'u Yaadachiisuu Isaa

9Obboleessi hiyyummaan gad deebi'e, Waaqayyo duratti ol qabamuu isaatiin of haa jaju*! 10Inni soorumaan ol ka'e immoo, akkuma daraaraa margaa waan darbuuf, Waaqayyo duratti gad deebifamuu isaatiin of haa jaju*! 11Biiftuun in baati, buluqni ishee irraa dhufus in guba; innis margicha in coollagsa, daraaraa isaas in harcaasa; miidhagummaan daraaraa sanaas in bada. Namni sooressis akkasuma, wanta itti dadhabu sanaa wajjin gad in bada.#9 2:5 10 1Phe 1:24; Far 90:5-6; Isa 40:6-7

Qoramni Kajeellaa Hamaa Keessaa Akka Dhufu Mul'isuu Isaa

12Namni qoramsa isatti dhufu obsaan danda'e, haa gammadu! Qoramee erga ilaalamee booddee, jireenya isa Waaqayyo warra isa jaallatan abdachiise akka gonfootti argachuuf jira*. 13Namni yommuu qoramu, qoramsi kun Waaqayyo biraa anatti dhufe hin jedhin! Waaqayyo hamaa gochuudhaaf qoramuu hin danda'u, ofii isaatiis nama tokko illee hamaadhaaf hin qoru. 14Garuu tokkon tokkon namaa kajeellaa ofii isaatii isa hamaadhaan harkifamee yommuu qabamu in qorama*. 15Kajeellaan hamaan erga iddoo ga'ee cubbuu in dhala; cubbuunis erga raawwatamee du'a in dhala*.#12 5:11; Iyo 5:17-19; 2Xim 4:8; Mul 2:10 14 Rom 7:7-8 15 Uma 3:6; Rom 7:10; 6:23

16Obboloota ko jaallatamoo, hin gowwoominaa! 17Kennaan gaariin hundinuu, kennaan guutuun hundinuus abbaa ifaa biraa ol waaqa gubaadhaa in dhufa; abbaa ifaa bira gegeddaramuun, yookiis gaaddisi gara galuun iyyuu hin jiru*. 18Nuyi uumama isaa hundumaaf angafa akka taanuuf, inni akka jaalala isaatti dubbii dhugaatiin nu dhalche*.#17 Mat 7:11; Yoh 3:27; Rom 11:29; 1Yoh 1:5 18 Yoh 1:13; 1Phe 1:23

Wanta Dhaga'an Hojii Irra Akka Oolchan Gorsuu Isaa

19Obboloota koo jaallatamoo! Namni adduma addaan dhaga'uutti ariifataa, dubbachuutti suuta jedhaa, dheekkamuuttis suuta jedhaa, ta'uun akka isa irra jiru beekaa*! 20Dheekkamsi namaa Waaqayyo duratti qajeelina namaaf hin hojjetu*. 21Kanaafis xuraa'ummaa, hammina safara dhabes hundumaa of irraa fageessaa! Dubbii lubbuu keessan fayyisuu danda'u, isa kanaaf dhaabame sanas garraamummaadhaan fudhadhaa*!#19 Fak 17:27; 29:20; Lal 5:1-2; 7:9-10 20 Fak 29:22; Efe 4:26 21 Qol 3:8; 1Phe 2:1; Ibr 13:22

22Warra dubbicha hojii irra oolchan ta'aa malee, warra dhaga'uu duwwaadhaan of gowwoomsan hin ta'inaa*! 23Namni dubbicha dhaga'ee hojii irra immoo hin oolchine, akka nama fuula isaa of-ilaalee keessatti ilaalee akka jirutti ofii isaa arguu ti. 24Ofii isaa ilaalee erga adeemee booddee, achumaan bifni isaa attam akka ture in irraanfata. 25Namni seera birmadummaa isa hir'ina hin qabne keessa lixee ilaalu, isa biraas kan hin deebine, isa dhaga'ee hojii irra kan oolchu malee, kan hin irraanfanne garuu, gocha isaatti gammaduuf jira*.#22 2:14; Mat 7:21,26; Rom 2:13 25 2:12; Rom 8:2; Yoh 13:17

26Namni, nama amantii qabu of se'ee, arraba isaatti immoo luugama hin keenye, inni of sossoba malee, amantiin isaa waa'ee hin baasuuf*. 27Waaqayyoon sodaachuun inni Waaqayyo keenyaa fi abbaa keenya duratti qullaa'ee fi xurii hin qabne garuu, ijoollota abbaa fi haadha hin qabne, dubartoota abbaan manaa irraa du'es rakkina isaanii ilaalanii gargaaruu dha; xuraa'ummaa biyya lafaa irraas of eeggachuu dha*.#26 3:2; 1Phe 3:10; Far 34:13 27 Isa 1:17

Currently Selected:

ERGAA YAAQOOB 1: MacQul

Highlight

Compare

Copy