Macaafa Hisqi'el Raajichaa 31

Waa'ee Fara'oon Fakkeenyaan Dubbachuu Isaa

1Waggaa kudha tokkoffaatti, ji'a sadaffaatti, ji'icha keessaa guyyaa tokkoffaatti dubbiin Waaqayyoo gara koo dhufee,

2<<Yaa mucaa namaa!

Fara'oon mootii Gibxii fi

namoota isaa hundumaatti dubbadhu!

<<Guddinni kee maalitti fakkeeffama>>

3Kunoo! Asor dur

akka gaattiraa Liibaanon ol dheeratee,

fiixeen isaa mukkeetii gara irraa ta'ee ture,

innis damee isaa isa miidhagaadhaan

daggalaa fi gaaddisa in ta'a ture;

4bishaan isa in guddise,

tuujjubni bishaaniis isa in dheeresse;

burqaan isaa hundee isaatti naanna'ee

in yaa'a ture,

jal'isii isaas mukkeetii bakkee keessaa

hundumaatti in erge.

5Bishaan baay'ee waan argateef,

mukkeetii bakkee hundumaa

caalaa in dheerate,

baalli isaas in baay'ate,

dameen isaas in dheerate;

6simbirroonni qilleensa keessa balali'an

hundinuu baala isaa keessatti

mann'ee ijaarratan,

damee isaa jalattis

bineensi caakkaa hundinuu in horan;

sabni gurguddoonni hundinuus

gaaddisa isaa jala in taa'an.

7Hundeen isaa bishaan baay'ee bira

waan ga'eef,

guddinni isaa damee isaa isa dheeraa wajjin miidhagaa ture;

8Gaattiraan iddoo dhaabaa Waaqayyoo keessa jiru iyyuu

isatti hin akeekamu,

mukkeetiin baalli isaanii

yeroo hundaa lalisus

hamma damee isaatii hin ga'an;

madaalleenis damee isaatiin hin qixxaatu;

mukkeetii iddoo dhaabaa Waaqayyoo keessa

jiran keessaa tokko illee

miidhagummaatti kan ittiin qixxaatu hin jiru*.

9Ani damee isaa isa baay'eedhaan

isa miidhagseera;

mukkeetiin Eden

iddoo dhaabaa Waaqayyoo keessaa

hundinuu isatti in hinaafu>> jedhi!>> jedhe.#8 Uma 2:8-9

10Kanaafis Waaqayyo gooftaan,<<Waan inni ol dheeratee, fiixee isaas mataa mukkeetii gara irraa qabatee, dheerina isaatiinis of jajuuf*, 11ani immoo, isa nan gata, harka isa saba baay'ee mo'utti dabarsee isa nan kenna; innis akka hammeenya isaatti isa irratti in hojjeta; 12sabni ormii fi baay'ee gara-jabeessi muree isa in gata, dameen isaas tulloota irratti dachaa hundumaa keessattis in kufa; baalli isaas laga biyya sanaa hundumaa keessatti in caccaba, sabni lafa irra jiran hundinuus isa dhiisanii gaaddisa isaa jalaa in yaa'u*. 13Muka isa jige sana irra simbirroonni qilleensa keessa balali'an hundinuu in qubatan, bineensonni caakkaa hundinuus damee isaa gidduutti in galan; 14warri akkasii du'aaf kennamanii, boolla iddoo lafa jalaa warra du'an gidduu waan dhaqaniif, mukkeetiin bishaan biraa ol hin dheeratin! Fiixee isaaniis mataa mukkeetii gara irraa hin aansin! Mukti bishaan ba'eessa godhee argatu tokko illee akkas hin dheeratin!>> jedhe!#10 28:2-7; 29:3; Er 48:26-27; Isa 2:11-12; Dan 5:20 12 28:7

15Ammas Waaqayyo gooftaan,<<Yommuu inni iddoo lafa jalaatti gad bu'u, ani immoo bishaan isa gad fagoo duuchee isa irra nan gara galcha, burqaa isaas nan cufa, bishaan isaa inni baay'eenis in ittifama; kanaafis Liibaanon isaaf akka gadditu nan godha, mukkeetiin caakkaa hundinuus in coollagu. 16Yommuu ani warra boolla keessa buufamanii wajjin gara iddoo lafa jalaatti gad isa darbadhe, sabni lafa irraa sagalee kufaatii isaatii dhaga'anii in hollatan; yommus mukkeetiin Eden, mukkeetiin Liibaanon warri fo'amoonni hundumaa caalan, warri bishaan argatan sun, iddoo lafa jalaatti in gammadan; 17isaan warri gaaddisa isaa jala jiraachaa turan, warri saba keessatti garee isaa turan, isaa wajjin gara iddoo lafa jalaatti gad bu'anii, warra billaadhaan dhuman bira in dhaqan. 18Mukkeetii Eden keessaa ulfinaa fi guddinaan isa kamitti fakkeeffamta>> Haa ta'u iyyuu malee, atis mukkeetii Edenii wajjin gara iddoo lafa jalaatti gad in buuta; ati warra billaadhaan dhumanii wajjin warra dhagna hin qabatin gidduu in ciifta; kun Fara'oonii fi macca isaa hundumaa ti>> jedhe; Waaqayyo gooftaan kana dubbateera*.#15-18 32:17-32; Isa 14:9-11

Currently Selected:

Macaafa Hisqi'el Raajichaa 31: MacQul

Highlight

Copy

Compare