Macaafa Hisqi'el Raajichaa 10

Ulfinni Waaqayyo Mana Qulqullummaa Irraa Ka'uu Isaa

1Kana booddees kunoo, bantii akka waciitii isa mataa Kiruubel gara irraa jiru irratti fakkeenya teessoo dhagaa Safiiros irraa hojjetame tokko nan arge*; 2Waaqayyo yommus namicha isa uffata quncee talbaa irraa hojjetame uffatuun,<<Geengoowwan Kiruubel jala jiran gidduudhaan lixi, Kiruubel gidduudhaa barbadaa ibiddaa harka guutii hammaariitii mandarattii irratti facaasi!>> jedhe; inni immoo utuman ilaaluu ol lixe*. 3Yeroo namichi ol lixes Kiruubel gara harka mirgaa mana qulqullummaa in dhaabatu turan; duumessis oobdii isa gara keessaa keessa in guute. 4Ulfinni Waaqayyoos Kiruubel irraa ka'ee gara buusaa balbala manichaatti darbe; duumessis mana qulqullummaa in guute, oobdichis ifa ulfina Waaqayyootiin in guute*. 5Akkuma Waaqayyo inni hundumaa danda'u yommuu dubbatu sagaleen isaa dhaga'amu, akkasuma sagaleen qoochoowwan Kiruubelis hamma oobdii isa gara duubaatti in dhaga'ama ture*.#1 1:22,26; 9:3 2 9:2; Mul 8:5 4 1:28; 1Mot 8:10-11; Bau 40:34; Isa 6:4 5 Far 29:3-9

6Yeroo Waaqayyo,<<Geengoowwanii fi Kiruubel gidduudhaa ibidda fuudhi!>> jedhee, namicha isa uffata quncee talbaa irraa dha'ame uffatu sana ajaje, namichi ol lixee geengoo tokko bira in dhaabate. 7Kiruubel keessaa inni tokko hiixatee ibidda isa isaan gidduu jiru irraa waa hammaaree harka namicha isa uffata quncee talbaa irraa dha'ame uffatu irra kaa'e; innis isa fudhatee gad in ba'e. 8Qoochoowwan Kiruubel jalaanis wanti harka namaa fakkaatu tokko in mul'ate.

9Anis kunoo! Geengoo afur Kiruubel biratti nan arge; tokkon tokkon Kiruub bira geengoo tokko tokkotu jira ture; bifni geengoowwan sanaas akka dhagaa Krisoliixos in calaqqisa ture. 10Bifni arfanuu isaaniis wal fakkaata ture; geengoon tokkos akka waan isa kaan keessa lixee in fakkaata ture. 11Isaan yommuu adeeman gara Kiruubel itti gara galanii jiran arfanitti adeemu malee, of irra gara galanii hin adeeman turan; yommuu geengoon inni fuula duraa gara itti gara galee jirutti adeemu, warri kaanis utuu of irra gara hin galin gara inni adeemutti isa duukaa in adeemu turan. 12Guutummaan dhagna isaanii, dugdi isaanii, harki isaanii, qoochoowwan isaanii, akkasuma geengoowwan arfan isaanii qaban illee guutummaatti ijuma duwwaa dha. 13Geengoowwan sunis <<Bubbee>> jedhamanii waamamuu isaanii nan dhaga'e. 14Tokkon tokkon isaanii fuula afur afur qabu; fuulli inni tokkoffaan fuula Kiruub, inni lammaffaan fuula namaa, inni sadaffaan fuula leencaa, inni afuraffaan fuula joobiraa ture*.#14 1:10; Mul 4:7

15Kana booddees Kiruubel ol ka'an; isaan wanta lubbuu qaban warra ani laga Kebaar biratti argee ture sanaa dha. 16Yommuu Kiruubel adeemuudhaaf ka'an geengoowwanis isaan bukkee in adeemu; yommuu Kiruubel lafaa ol ka'uudhaaf qoochoowwan isaanii diriirsan, geengoowwanis isaan biraa hin hafne. 17Hafuurri wanta lubbuu qaban sanaa isaan keessa waan jiruuf, yommuu isaan dhaabatan isaan kunis in dhaabatu, yommuu isaan ol ka'anis, isaan kunis isaanii wajjin ol in ka'u turan.

18Kana booddees ulfinni Waaqayyoo buusaa balbala manichaa irraa ka'ee, Kiruubel irra in dhaabate. 19Kiruubelis utuman isaan ilaaluu qoochoowwan isaanii diriirsanii adeemuudhaaf yommuu ol ka'an, geengoowwan isaanii isaan bukkee in adeemu turan; isaan balbala karra mana Waaqayyoo isa gara ba'a-biiftuutti ba'u bira in dhaabatan; ulfinni Waaqayyoo isa kan Israa'elis isaan gara irraadhaan ture*.#18-19 11:22-23; 43:1-7

20Wanti lubbuu qaban warri ani laga Kebaaritti teessoo Waaqayyoo jalatti arge, isaan kana turan; anis akka isaan Kiruubel ta'an nan bare. 21Tokkon tokkon isaaniis fuula afur afurii fi qoochoowwan afur afur qabu turan, qoochoowwan isaanii jalaanis wanta harka namaa fakkaatutu ture. 22Fuulli isaaniis fuula warra ani laga Kebaar biratti arge ture; tokkon tokkon isaaniis qajeelanii gara fuula duraatti in adeemu turan.

Currently Selected:

Macaafa Hisqi'el Raajichaa 10: MacQul

Highlight

Copy

Compare