Macaafa Moototaa Isa Lammaffaa 2

Eliyaas Gara Waaqaatti Ol Fudhatamuu Isaa

1Yeroon Waaqayyo, qilleensa jabaa keessaan Eliyaasin gara waaqaatti ol fudhatu geenyaan Eliyaasii fi Elsaa'in Giilgalii ka'anii karaa irra in adeemu turan. 2Eliyaas yommus Elsaa'iidhaan,<<Waaqayyo gara Bet'elitti waan na ergeef, hadaraa ati asuma turi!>> jedhe; Elsaa'in garuu deebisee,<<Dhugaa Waaqayyo isa jiraataa ti, du'a lubbuu keetii tis, ani si biraa hin hafu!>> jedhe; ergasii isaan walii wajjin Bet'elitti gad in bu'an. 3Yommus kutanni raajotaa warri Bet'el keessa turan gara Elsaa'i dhufanii,<<Waaqayyo, har'a gooftaa kee si duraa fudhachuuf akka jedhu beektaa?>> jedhanii in gaafatan; Elsaa'in immoo,<<Eyyee, beeka! Isin garuu waa'ee kanaa hin dubbatinaa!>> jedhe. 4Eliyaas ammas Elsaa'iidhaan,<<Waaqayyo gara Yerikootti waan na ergeef, hadaraa ati asuma turi!>> jedhe; inni garuu,<<Dhugaa Waaqayyo isa jiraataa ti, du'a lubbuu keetii tis, ani si biraa hin hafu>> jedhe; ergasii isaan walii wajjin gara Yerikoo in dhaqan. 5Yommus kutanni raajotaa warri Yerikoo keessa turan gara Elsaa'i dhaqanii,<<Waaqayyo har'a gooftaa kee si duraa fudhachuuf akka jedhu beektaa?>> jedhanii isa in gaafatan; inni immoo deebisee,<<Eyyee, beeka! Isin garuu waa'ee kanaa hin dubbatinaa!>> jedhe. 6Eliyaas ammas itti dabalee Elsaa'iidhaan,<<Waaqayyo gara Yordaanositti waan na ergeef, hadaraa ati asuma turi!>> jedhe; inni immoo deebisee,<<Dhugaa Waaqayyo isa jiraataa ti, du'a lubbuu keetii tis, ani si biraa hin hafu>> jedhe; ergasii lachanuu itti fufanii walii wajjin in adeeman.

7Isaan lachanuu Yordaanos bukkee in dhaabatan; kutata raajotaa keessaa immoo namoonni shantamni dhufanii isaan irraa fagaatanii fuullee isaanii in ijaajjan. 8Eliyaas wayyaa isaa of irraa fuudhee, dadachaasee ittiin bishaanicha in rukute; bishaanichis garasii fi garanatti hiramnaan lachanuun isaanii lafa gogaa irra adeemanii ce'an*.

9Bishaanicha erga ce'anii Eliyaas, Elsaa'iidhaan,<<Utuun si duraa hin fudhatamin, wanta ani siif gochuu danda'u anatti himadhu!>> jedhe; Elsaa'in immoo deebisee,<<Hadaraa, hafuura kee keessaa harka lama akkan argadhu anaaf godhi!>> jedhe*. 10Eliyaas immoo,<<Kana gaaffii cimaa gaafatte; haa ta'u iyyuu malee, yommuun si duraa fudhatamu yoo na argite, siif in ta'a; yoo kanaa'achii garuu siif hin ta'u>> jedheen. 11Utuu isaan walii wajjin haasa'aa adeemuutti jiranii, konkolaataan ibiddaa fardeen ibiddaa wajjin dhufanii, isaan lamaan gargar in baasan; yommus Eliyaas qilleensa jabaadhaan gara waaqaatti ol in sokke*. 12Elsaa'in isa argee,<<Yaa abbaa ko! Yaa abbaa ko! Yaa isa konkolaattota Israa'el taate, yaa isa abboota fardeenii Israa'el taate>> jedhee in iyye; ergasii Elsaa'in deebi'ee isa hin argine; gadda irraa kan ka'es uffata isaa iddoo lamatti of irratti in tarsaase*.

13Yeroo sanatti Elsaa'in wayyaa isa Eliyaas irraa bu'e sana fudhatee deebi'ee qarqara Yordaanos in dhaabate. 14Wayyicha isa Eliyaas irraa bu'e sana fuudhee,<<Gooftichi meerre ree>> Waaqayyo inni kan Eliyaas meerre ree?>> jedhee, innis immoo bishaanicha ittiin in rukute; yommuu inni bishaanicha rukutetti, bishaanichi garasii fi garanatti in hirame; Elsaa'inis in ce'e*. 15Kutanni raajotaa warri Yerikoo keessaa warri fuulleetti isa ilaalaa turan,<<Hafuura Eliyaastu isa irra buufate>> jedhan; isa simachuudhaafis dhufanii isa duratti hamma lafa ga'anitti in qoomma'an*. 16Itti fufaniis,<<Kunoo, nuyi garboonni kee namoota jajjaboo shantama of biraa qabna; hafuurri Waaqayyoo tarii gooftaa kee ol fuudhee, gaarota keessaa tokko irra yookiis dachaa keessa buuseera ta'a, dhaqanii isa haa barbaadan laataa?>> jedhanii in gaafatan.

Elsaa'in garuu deebisee,<<Waawuu! Isaan hin erginaa!>> jedhe*. 17Isaan dhowwuun hamma isa yeellaasisutti waan isa giddisiisaniif,<<Ergaa kaa!>> jedheen; isaanis namoota shantamman sana in ergan; namoonni sunis guyyaa sadii isa barbaadanii in dhaban. 18Elsaa'in Yerikoo utuu jiruu namoonni sun gara isaatti in deebi'an; inni immoo,<<Ani,<<Hin dhaqinaa!>> jedhee isinitti hin himnee ree?>> jedhe.

Elsaa'in Dinqii Hojjechuu Isaa

19Gaaf tokko namoonni mandarichaa Elsaa'iidhaan,<<Yaa gooftaa, kunoo, akkuma ati argitu, mandarichi illee iddoo ba'eessatti ijaarame; garuu bishaan isaa gadhee waan ta'eef dubartoota irraa ulfaa in baasa>> jedhan. 20Inni immoo,<<Waciitii haaraa soogidda keessa buusaatii anatti fidaa!>> jedhe; isaanis waciiticha isatti in geessan. 21Inni immoo gara burqituu bishaanichaa dhaqee soogiddicha itti darbatee,<<Waaqayyo,<<Ani bishaan kana bishaan nagaatti geddareera; egaa bishaanichi deebi'ee waa hin ajjeesu, ba'a-ulfaas dubartootatti hin fidu>> jedha>> jedhe. 22Akkuma Elsaa'in dubbate, bishaanichi hamma har'aatti iyyuu bishaan nagaa ta'ee in hafe*.

23Elsaa'in gara Bet'elitti ol ba'uudhaaf Yerikoodhaa ka'ee karaa irra adeemaa utuu jiruu, ijoolleen saafelli tokko mandaricha keessaa ba'anii,<<Namicha mataa luqqa'aa nana ol ba'i! Namicha mataa luqqa'aa nana ol ba'i!>> jedhanii itti in ga'isan. 24Inni kana irratti gara galee isaan ilaalee, maqaa Waaqayyootiin isaan in abaare; yommus amaaketi dhaltuun lama caakkaa keessaa ba'anii, ijoollota sana keessaa afurtamii lama in caccabsan. 25Elsaa'in garuu karaa isaa ittuma fufee gara tulluu Qarmelos in dhaqe; achii immoo gara Samaariyaatti in deebi'e.

Currently Selected:

Macaafa Moototaa Isa Lammaffaa 2: MacQul

Highlight

Copy