1 ERGAA PHETHROS 4

Akka Jaalala Waaqayyootti Akka Jiraatan Gorsuu Isaa

1Kristos namummaa fooniitiin erga dhiphatee, isinis immoo akkuma isaa yaaduudhaan, akka nama lolaaf mi'a hidhatetti taa'aa! Namni namummaa fooniitiin dhiphatu cubbuutti of kennuu dhiiseera*. 2Egaa foon akka uffattanitti bara si'achi itti jiraattanitti akka jaalala Waaqayyootti malee, akka hawwa namaatti jiraachuun keessan haa hafu! 3Wanta warri saba Waaqayyoo hin ta'in hojjechuu jaallatan hojjechuudhaan, yeroon isin dabarsitan in ga'a. Bara sanatti gad-dhiisatti, hawwa keessan raawwachuutti, machiitti, gar-malee nyaachuutti, gar-malee dhuguutti, waaqayyolii tolfamaniif sagaduu keessattis karaa baay'ee seera Waaqayyoo irra daddarbuutti jiraachaa turtan*. 4Isa isin amma isaanitti dabalamtanii lolaa jireenya ittisa hin qabneetiin fudhatamuu dhiiftan in dinqifatu, maqaa keessanis in balleessu. 5Isaan immoo waan godhan sababii isaa wajjin isa warra jiranii fi warra du'anitti faraduuf qophaa'etti himuuf jiru*. 6Kanaaf warra du'aniif iyyuu wangeelli in lallabame; warri du'an sun sababii nama ta'aniif fooniin du'uun yoo itti faradame illee, hafuuraan jireenya Waaqayyo kennuufitti in jiraatu*.#1 2Qor 5:14-15; Rom 6:6-7 3 Efe 2:2-3; Tit 3:3 5 2Xim 4:1 6 3:19

Kennaa Waaqayyootiin Akka Hojjetan Gorsuu Isaa

7Dhumni waan hundumaa dhi'aateera; egaa warra of qaban, kadhata gochuufis warra eeggatan ta'aa*! 8Baay'inni cubbuu akka deebi'ee hin argamne kan godhu jaalala waan ta'eef, hundumaa dura immoo jaalala ho'aa waliif qabaadhaa*! 9Wal simachuu keessatti namoonni guungummii malee keessummoota simachuu haa jaallatan*! 10Akka hojii adeemsiftuu gaggaariin kennaa Waaqayyoo isa garaa garaa hojii irra oolchanitti, namni adduma addaan kennaa ayyaanaa isa argate, warra kaaniifis akka waa'ee baasutti ittiin haa hojjetu. 11Inni dubbatu, isa Waaqayyo jedhe haa dubbatu; inni waa hojjetus, humna Waaqayyo isaaf kenneen haa hojjetu; Waaqayyo waan hundumaan karaa Yesus Kristos ulfina haa argatu! Isaaf ulfinnii fi aangoon baraa hamma bara baraatti haa ta'u! Ameen*.#7 1Qor 10:11; 1Yoh 2:18 8 1:22; Fak 10:12; Yaq 5:20 9 Ibr 13:2 11 Rom 12:7; 1Phe 5:11

Kristosiif Dhiphachuutti Akka Gammadan Gorsuu Isaa

12Michoota ko, wanti akka ibiddaa gubu isin qoruudhaaf yommuu isin irra bu'u, waan takkaa ta'ee hin beekne waan isin irra bu'e fakkaatee, isin hin dinqifachiisin*! 13Kristos ulfina isaatiin yommuu mul'atu, gammaddanii akka ililchitanitti, hammuma dhiphina isaa keessaa hirmaattuu taatan, isinis hammasuma gammadaa*! 14Maqaa Kristosiif jettanii yommuu arrabsamtan, isin warra gammadanii dha; hafuurri ulfinaa inni kan Waaqayyoo isin irra in boqota*. 15Garuu isin keessaa tokko iyyuu nama gumaa yookiis hattuu, nama hamaa hojjete yookiis nama namatti darbe ta'e hin dhiphatin! 16Kristiiyaana ta'uu isaatiif yoo dhiphate garuu hin yeella'in! Maqaa Kristosiin waamamee isa hojjete sanaan Waaqayyoof ulfina haa kennu*!#12 1:6-7; Yaq 1:12 13 Rom 8:17; Yaq 1:2 14 2:20; Mat 5:10-11; HoE 5:41 16 HoE 11:26; Filp 1:20

17Yeroon firdiin kennamu ga'eera; firdiin kunis warra mana Waaqayyoo keessaatti in jalqabama; erga dura nutti in jalqabama ta'ee, dhumni warra wangeela Waaqayyoo amanuu didanii maal haa ta'u ree*? 18Caaffanni qulqullaa'aan, ?Namni qajeelaan fayyuun rakkinaan erga ta'ee, namni Waaqayyo malee jiraatuuf namni cubbamaan attam ta'uuf jira ree?? jedha*. 19Kanaafis warri akka jaalala Waaqayyootti dhiphatan iyyuu, gaarii hojjechuudhaan lubbuu isaanii uumaa isaanii isa amanamaatti hadaraa haa kennatan*!#17 Er 25:29; His 9:6; 2Tas 1:8 18 Fak 11:31 19 Far 31:5; Luq 23:46

Currently Selected:

1 ERGAA PHETHROS 4: MacQul

Highlight

Compare

Copy