Obeec Dudi 1
1
1Duut man beeye obeec dudi mo Cølöman.#1:1 Duut man løny ki man tïme ni gööra Cølömanni wala göör kaper Cøloman.
Nyakøø Paaga Omëëye
2Beerra man ööï ni nuumï dhaa ki yi nuum dhøk marï,
kiper mëër marï cïpö ki met ec mo kaala køøŋ nyïïomøki.
3Maar riia mana näk iï wïïrö, ŋwäänynye ec døøye mo met,
ni wïny nyeŋ marï caala maaw mo ŋwäänynye met mo oøøc piny ni muulö.
Kiper manøgønø, nyïïakuue mëër ki ïïni.
4Nyïï aani buutï, nøø putø aay ennø na aciel!
Beerra man ö nyeya mara ni kïth aani yi øtø mare.
Wa kanynyø kiperï ni yïthwa omïnnö;
mëër marï pwøcwa pwøø ni kaala køøŋ nyïïomøki.
Wui, mëër mar nyïïakuue ki ïïni kee kare møn!
5Wui, u na nyïïakuk Jerucalem,
aani, aana dhaanhø maa cøl, 'ba kïta mïërö,
naa cøl kaamar oduŋkaare mo jø Këdar,
naa mïërö kaamar abïïk gëëŋŋe mo øt Cølöman.
6A kär neetu ni nyeŋŋu you këël dëëra kiper cøl mara;
kiper aani, dëëra cuula cäŋŋi.
Nyïïmera moa näk cwøw gena gootø ki aani,
ni tïïcge aani nee pwöth jer omøki koora;
'ba aani pwöth jer omøki mara#1:6 Pwöth jer omøki manøgø wäŋŋa dëëre. kära koorø.
7Wui, ï na mëëra ki ïïni, caanï jïra,
?A kaa ŋø ni wø kwaayï dïëk moï yie?
?Na kaa ŋø ni wø wëëgï dïëk moï jwöm yie ki dhöör?
Caanï jïra, naa ba tïma kaamar dhaagø mo wïïe ee loobø kaamar kääbi,
mo cäädhö yïthakic dïëk mo nyïïawäädi moï.
Dïcwøø Paaga Omëëye
8Wui, ï na dhaagø mo mïërö døc dï mään,
ni näk mo kar kwaath kuyï,
løp køør tiet dïëk,
ni wëëgï nyïï atëëe moï caam deŋ oduŋkaare mo dïkwääc dïëk.
9'Ba ki baŋa, ï no omëëya,
ï caala okweeny ma maath mo ena dï okwëëc leny ma thwönhi mo Peerø.
10Täärnyïmï nëëni ni mïërö ki jap mïërö moa näk iï twöö,
ni ö cwaagï ni bëëde ni mïërö ki tiik jëëthi moa en yie.
11'Ba waani, wa tïïö ki jap mïërö møøk jïrï
mo tïïc ka warkey ki gwel-bïrö.
Nyakøø Paaga Omëëye
12'Ba kanya bëët nyeya mara ni ena kar cam mare,
maar riia mara na näk ŋwäänynye met aput kadhø ki ŋwääö døc.
13Omëëya bëëdö jïra kaamar dwøø mo ŋwäänynye met mo okwøø yo opïr,
ni wø but yïthakic thura.
14Omëëya nëëni jïra kaamar jaath mo oŋøøk mo ŋwääö ni met
yi pwöth jer omøki mar paana cwøl ni Ayn-Gadi.
Dïcwøø Paaga Omëëye
15Omëëya, a teeŋ mïërö mo nyïëdi ni mïërï ki gø!
Wui, a teeŋ mïëya ŋø ni en jïrï en!
Nyeŋŋï nëëni ni mïërö kaamar akuuru.
Nyakøø Paaga Omëëye
16Omëëya, a teeŋ mïërö mo nyïëdi ni mïërï ki gø en!
Wui, ec mïnnö ki ï døc!
Pëëm marø otïmö ni beeye luum mo pulli.
17Ni ö jera perge leth ni tïmge ni beege cööthe mo øtø marø,
ni tïm cuge mo øtø marø na teeŋ jera perge leth møga.
Currently Selected:
Obeec Dudi 1: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
