Röm 4

Nyuudhi Mar Eeberam

1?'Ba agïnaŋø noo caanø kiper kwarø ma Eeberam na kälø ree? 2Kiper onää Eeberam ojïëö ni mare beer ki køør tïïe, eni doo jïtö ki gïn mo tööde kiper gø, 'ba paa ki nyïm Jwøk. 3?Kiper agïnaŋø na caan wëël Jwøki? Wëël Jwøk aköö, ni «Eeberam ajïëy ki Jwøk ni ŋääth gø, ni ö eni ni jïëyi ya Jwøki no obëënynyö ki køør ŋäädhe mare.» 4'Ba mar ŋat wø tïïö, jape ni wø maae bäŋ wø cwøl ni muuy, 'ba beeye jape na tïnynye. 5'Ba mar ŋat wø ba tïïö, 'ba ŋäätha Jwøk ni wø jïëc jø raay ni marge beer, ŋatøgø ojïëc no obëënynyö ki køør ŋäädhe mare. 6Kaawat manøgø thuwø, Deebit wø køpa gwïëth mar ŋat wø jïëc Jwøki no obëënynyö ni tïïe tøør ree, na kööe,

7ni «Gwïëth en bäät jøøa näk raay moge owiiø, ni moa bacge orïëbö.

8Gwïëth en bäät ŋat mo bääyö mare ba kwaan Wuuö bääte.»#Dut Pwøc 32:1-2

9?Gwïëth manøgø caan kaper jøøa näk odaŋø keerge? ?Wala caan kaper jøøa näk patha odaŋø thuwø? Ø wø köö, ni Eeberam ajïëc ni mare beer ki køør ŋäädhe. 10?Eno jïëyö nidïï? ?Eni jïëc ki kanya poode ni kär daŋø, wala køør mana nø daŋi? Eni jïëc ki kanya poode ni kär daŋø, ni patha køør mana nø daŋi. 11Ena daŋ na ŋïï wala nyuudhi mar bëënynyö mana joode ki køør ŋäädhe kanya poode ni kär daŋø. Ni gïnögø tïïc kaper nee tïme na kwar jø wø jïëy ni ŋääthge bëët ni ge patha odaŋø, kiper nee ge jïëc Jwøki ni marge beer na enøgønø. 12Ni tïme na kwar jøøa näk odaŋø thuwø, na näk marge patha daŋ keere, 'ba ge caatha jöör ŋäädhe mana en jï kwarø ma Eeberam kanya poode ni eni poot kär daŋø.

Gïna Buuk Jwøki Thura Kare Ki Køør Ŋäädhe

13'Ba gïna buuk jï Eeberam ki nyïïkwaaye, ni piny doo cøøa jïge, kär öö ki køør ciik Jwøk, 'ba ööi ka køør bëënynyö man wø en ri ŋäädhe. 14'Ba ni näk jø wø bëën ciik Jwøk beege wø tïmö na lwiidhi, ŋäädhe tïmö ni bäŋ tiere, ni ö buuki ni ränynye. 15Kiper ciik Jwøk käla ajäla, 'ba kany mo bäŋ ciik Jwøk, bäŋ gïn mo caan no odhalø yie.

16Beeye tiere na tïm gïnni en no ogöök ri ŋäädhe, kiper nee buuk tïme ni bëënna met yi Jwøk, nee cööp kare na adïëri jï nyïïkwaac Eeberam bëët, ni paa jï jø wø bëën ciik Jwøk keerge, 'ba këël jø wø nywaak ŋäädhe mar Eeberam, kiper ena kwarø bëët, 17kaawat mana gööri, ni «Ïïna tïïa na kwar juurre mo thööth.»#Wïlöölö 17:15 Ni ena kwarø bëët nyïm Jwøk, ŋata ŋäädhe ni wø cïp kwøw jï jøøa näk othøw, ŋat wø wëëk jammi mo bäŋgø, tägö ni tïmge na jammi. 18'Ba eni gïn mo ba doo maara ŋääth aŋäädhe, ni eni doo tïmö na kwar juurre mo thööth, keda mana kwøŋi caan jïre, ni «Nyïïkwaayï otïmö ni thööth na yøøgønø.»#Wïlöölö 15:5 19Ŋäädhe mare käre wiiø, këël na caar dëëre na näk kare cään ki thøø kiper na näk jïre da cwiiri mo jïtö ki dïpa, wala kanya caar bwøc cïïe ma Ceera. 20Ni bäŋ ataa cwïnye mo kier wïïe kiper luumma buuk Jwøki, 'ba ena put tëënnö ki ri ŋäädhe mare kanya bëëde ni jeemma Jwøk, 21ni luum gø ee maa ki cwïnye, ni løny jï Jwøk ki man tïïc gïna buue. 22Ni beeye tiere na ö eni na jïëi ni mare beer ki køør ŋäädhe mare. 23'Ba luupögø na køp, ni «Ena jïëc ni mare beer,» kär göörö kipere keere, 24'ba göör kaperø thuwø. 'Ba øøno jïëc thuwø ni marø beer, ø na näk ojïëy ni ŋääth ŋata tïŋ Kwääyø ma Jecu maal ki yi thøø, 25ŋata wëëk thøø kiper moa dhalø, ni cäŋi tïŋ maal kiper nøø jïëc ni marø beer.

Currently Selected:

Röm 4: AnyuB

Highlight

Copy

Compare