Röm 16

Pøøl Määtha Nyïïmëëe Röm

1A nyutha uuni cöögø ma Pibi, dhaaŋ wø tïny acooŋ Jwøk mana en yi Cencure, 2kiper nee eni pänhnhu ki nyeŋ Wuuö ki yi jöö man wø mïërö jï jø Jwøk, ni kønynyu eni ki gïno pëënynye jaak. Kiper ena kunyö ki jiy mo thööth, këël aani ki dëëra.

3Määthu Paricka#16:3 Paricka beeye nyeŋ mør kiper Paricila. Raŋ Moa Tïïc Nyïïatwieli 18:2 ka Akwila, jø wø tïïö ki aani na aciel ki nyeŋ Krictø Jecu. 4Geni, jwïëcge ataakge kiper naa kwøa, ni patha a keera ni wø pwøc Jwøk kiperge, 'ba këël acook Jwøk mo juurre bëët thuwø. 5Ni määthu acooŋ Jwøk ni wø cooŋ yi øtø marge. Määthu omëëya ma Epeeneta, ŋata kwøŋ jïëy ki Krictø yi Eecia. 6Määthu Meeri, dhaaŋŋa tïïö døc dïïu. 7Määthu Andarönika ki Junia na näk jø powa, jøøa ena øt twöc ki geni. Gena jiy mo nyeŋge lïëŋ dï nyïïatwieli, ni ge ena ri Krictø naa poodi. 8Määthu Ampalieta na näk omëëya ki nyeŋ Wuuö. 9Määthu Urbana ŋat wø tïïö ki øøni na aciel ri Krictø, ko omëëya ma Tayka. 10Määthu Apele ŋata joot na adïëri na dhaanh Krictø. Ni määthu tuuŋ Aritøbula. 11Määthu Eerödien na näk nyï powa. Ni määthu tuuŋ Narcica ni en ri Wuuö. 12Määthu Taripana ki Taripöca, määra tïïö døc ki nyeŋ Wuuö. Ni määthu omëëya ma Perca, ŋata tïïö ki tïïc mo teek ki nyeŋ Wuuö. 13Määthu Rupa, ŋata no ojier Wuue, ni määthu menni thuwø ni näk mera. 14Määthu Acinkarita ki Palejan, ki Eermec, ki Pataröba, ki Eerma ki nyïïmëëe moa en buutge. 15Määthu Pilölöga, ki Julia, ki Neeria ki coki ma dhaagø, ko Olimpa, ki jø Jwøk bëët moa en buutge. 16Ni määthu røgu ki nuum dhøk na en kur keere na näk mar Jwøk. Uuna määth acooŋe mo Krictø bëët.

17Nyïïmera, a kwaya uuni ki man gwøgu dëëtu ki jø wø käl apääk dïïu ni wø kïth dïdëët jööra pwöny uuni ki gø. Kwierru geni. 18Kiper teeŋ jøøgø nø ba tïny Kwääyø ma Krictø, 'ba ge tïnynya yïthge, ni ge maaŋŋa wïth jø wø cwïnyge cwøk ki luup mo ŋweeth. 19Teeŋ ka man bëët mwölli maru ni ŋäc jø bëëti ni mïn yia ki maru, a doo manynya man bëëdu thuwø ni wïthu leer ki man laaru gïno beer ŋäc, ni kuyu raay. 20'Ba Jwøk ni wø cïp bëët-mëër, Ceethan olaar ŋiith tietu. Met ec mar Kwääyø ma Jecu Krictø bëëde bäätu.

21Uuna määth Timöthi ni wø tïïö ki aani na aciel. Uuna määth Lucia ki Jeecan, ki Cøcipater na näk jø powa.

22A na Tercia ni göör wëëlli en, uuna määdha ki nyeŋ Wuuö.

23Uuna määth Geea, ŋati ni bëëda paare en, ni wø pänh jø acooŋ Jwøk bëët. Ni uuna määth Eracta, ŋat wø pääŋ jammi pääny, ki cöögø ma Kwarta.

[ 24Met ec mar Kwääyø ma Jecu Krictø bëëde bäätu.]#16:24 Täk luubö man tøør ki dhi Gïrïïk yïth weet Röm møøk moa cääŋŋe.

Jwøk Di Pwøø

25Pwøc en jï ŋat wø løny jïre ki man wëëk u tëënnö ki køør luumma nyään na met ni wø køba, ni beeye luum Jecu Krictø, kaawat mana nyooth ri gïna näk tiere okwøŋ kan ki kany mo bäär, 26na nyooth kawaane ni tïïi ni ŋäc wïth juurre bëët ki køør luup moa näk ogöör nyïïkuk Jwøki, ki køør dwør Jwøk ni wø bëëdö na bäre bäre, kiper nee wïth juurre wëëk jïëy ni ŋääthge. 27Ajiem en jï Jwøk na wïïe leer keere na bäre bäre ki køør Jecu Krictø. Enøgønø.

Currently Selected:

Röm 16: AnyuB

Highlight

Copy

Compare