Röm 15

Tïïc Gïn Mo Wëëga Yi Cöögu Mïnnö

1'Ba ø ni teek, ø doo käära jøø ni poot jägö yøø, ni ba caarø dëëtø keerø. 2'Ba ŋati man nø dïïø wär gïr ŋat mør mo ena buute caare, nee bëënynye ni tëënne. 3Kiper këël Krictø kär cädö kiper dëëre keere. Kaawat mana göörï, na «Ajøøŋ mar jøøa jøøŋ ïïni apänh bääta.»#Dut Pwøc 69:9 4Kiper gïïa kwøŋ göör nïr acääŋŋe, göör kaper nee ø pwönyge, nee ø jïtö ki ŋäädhe ki køør tëënnö ki cøm cwïny man wø joodø yïth weet Jwøk. 5'Ba Jwøk ni wø cïp tëënnö ki cøm cwïny, uuno wëëk bëëtö ki cwïny aciel ki nyeŋ Krictø Jecu, 6nou tïmu karubëët nou jiema Jwøk na näk Wää Kwääyø ma Jecu Krictø ki dwøl aciel.

Luumma Nyään Na Met Kiper Juurre

7Kiper manøgønø, pänhnhu røgu, kaawat mana ö Krictø na pänh uuni. Kanyøgønø, Jwøk ojiem. 8Kiper a cäänna uuni ni Krictø atïmö na ŋat tïïc mar jøøa näk odaŋø, ni nyootha gø ni Jwøk luumme adïëri ni wëëga gïïa buuk jï kwäre thur karge, 9nee juurre tïmge ni ge jiema Jwøk kiper met yie. Kaawat mana gööri,

ni «Ïïno pwøa dï juurre,

ni kïtha nyeŋŋï ri dudi.»#Dut Pwøc 18:49

10'Ba acäŋ caannø,

ni «Yïthu mïnge ki jiye, u na juurre.»#Tiet Ciik 32:43

11Ni cäŋi caannø,

ni «U na wïth juurre bëët, pwøyu Wuuö Jwøk;

u na dïbwör bäre, pwøyu eni.»#Dut Pwøc 117:1

12Ni cäŋ Aydheea köö,

ni «Lweet Jeci oløth,

ŋato thïïŋ na Kwääy juurre.

Ni beeye eni noo ŋääth juurre.»#Aydheea 11:10

13'Ba Jwøk ni wø cïp ŋäädhe, cwïnynyu opääŋe ki met ec mo päl ki mëër ki køør mana jïëyu, kiper nee ŋäädhe maru pälle ki køør teek Jwïëc Jwøk na en kur keere.

14'Ba uuni nø, nyïïmera, ŋääa ki cwïnya døøc nou beyø, ni jammi bëët ŋäyu, ni maara lønyø jïïu ki man pwönynyu røgu. 15'Ba luup møøk agööra baŋu naa para wïthu naa kär lwäyö, kiper met ec mana wëëk Jwøki aani, 16naa tïma naa tïnynya Krictø Jecu jï juurre, naa lama tier luumma nyään na met mar Jwøk, kiper nee juurre cïp na jëëdhi man wø jïëc Jwøki, ni wø en kur keere ki køør Jwïëc Jwøk na en kur keere. 17Kiper manøgønø, beer jïra ki nyeŋ Krictø Jecu ki man tööda kiper tïïc mara na tïïa jï Jwøk. 18Kiper aani bäŋ gïn mør mo caana, 'ba tiirra gïna tïïc Krictø ki raa nee juurre døøc mo jïëy ki køør dwøl ki tïïc, 19ki teek mar ŋïïce ki gïï mo rëëma ec, ki køør teek Jwïëc Jwøk na en kur keere. Ni køba luumma nyään na met mar Krictø dï paac bäre, ni tägi ka yi Jerucalem këël mana këët Ilirikam. 20Ni mana manynya ki cwïnya døøc, a manynya man køba luumma nyään na met kany mo nyeŋ Krictø poot kär wïnyö yie, kiper naa ba tïma naa läwa kar tïï ŋat mør. 21Kaawat mana gööri,

ni «Jøøa näk gïr gø kär kwøŋ køp jïge, oneenge,

ni ŋäyi ya jøøa näk gïr gø kärge kwøŋ wïnynyö.»#Aydheea 52:15

Pøøl Manynya Ciin Röm

22Ni man beeye tiere ni bëëda naa di gëëŋŋö ki kwöre mo thööth ki man ööa baŋu. 23'Ba kawaane nø, bäŋ kany mo tïïa yie dï mïëyi këët. 'Ba kaawat man bëëda naa manynya man ööa baŋu ki yïth cwiiyi ni thööth ii, 24yaa ŋäädhö nou neena neenø kanyo ööa naa pöötha Ecpeen, ni beeye uuni noo jieth aani kanyo nø mïn yia ki bëëtö buutu mo thiinh. 25'Ba kawaane a kwøŋa ci yi Jerucalem ki jap cane kiper jø Jwøk. 26Kiper jø Macedönia ki jø Akeea yïthge amïnnö ki man nywaakge japge ki jøøa can dï jø Jwøk yi Jerucalem. 27Geni, yïthge met ki tïïc gø, ni beeye mana dege tïïö møn. Kiper ni näk mo juurre otïmö ni ge nywaaga jöör Jwøk marge, ge dege tïnynyö thuwø ki jap piny mo wø wëëk Jwøki geni. 28Kiper manøgønø, kanyo thööra tïïc man ni peedha japa joot nyïmge, aano gää baŋu kanyo cøøa Ecpeen. 29Ni ŋääa ni kanyo pïïa buutu, päl gwïëth mar Krictø okäla.

30Nyïïmera, a kwaya uuni ki nyeŋ Kwääyø ma Jecu Krictø ki køør mëër mar Jwïëc Jwøk ki man lämu ki aani na aciel karubëët, ni kwaayu Jwøk døc kipera, 31kiper naa ba pätha ceŋ jøøa näk kär jïëy yi Judia, ni kwaayu Jwøk kiper nee gïn tïïa en kiper jø Jerucalem, nee jïëc jø Jwøki ni gïn mo beer, 32naa ööa baŋu ni yia met noo kö Jwøki, ni mïn yia buutu. 33Jwøk ni wø cïp bëët-mëër bëëde ki uuni bëët. Enøgønø.

Currently Selected:

Röm 15: AnyuB

Highlight

Copy

Compare