Maak 13

Pwöc Kiper Ŋïïce Moo Nyooth Cuŋ Piny

(Mathiew 24:1-28; Luk 20:5-24)

1'Ba Jecu kanya aae ni eni cøøa wøk ki yi Øt Jwøk Mana Dwøŋ, bääŋe aciel aköö ki eni, «Dïpööy, neenï, a teeŋ kïta ŋø ni beyø yøø, ki uutögø ni beyø yøø!»

2'Ba Jecu aköö jïgø, ni «?Uutögø ni døøŋŋø yøø, ajootï? Otïmö ni bäŋ kïdi aciel kany mo dööŋ bäät watge ni ba leeŋ piny.»

3'Ba kanya ö Jecu na pï piny bäät Kïn Ølip na dïët ki nyïm Øt Jwøk Mana Dwøŋ, ena pëëny Piterri, ki Jeemeth, ki Jøøn, ki Andaru kur keerge, 4ni «?Caanï jïwa, a yi wäne noo täk gïïögø, na agïnaŋø noo näk ŋïï, kanyo ö gïïögø bëët noo täkge?»

5Ni ö Jecu ni täge ki man cään ge, ni kööe, ni «Gwøgu rou, nee bäŋe ŋat mo maaŋ wïthu. 6Jiy mo thööth oööi ki nyeŋŋa, ni köge, ni ‹Beeye aani na eni.› Ni ö geni ni maaŋge wïth jiy mo thööth. 7'Ba kanyo wïnynyu mänye ki waac mänye, kär nou bwøk. Kiper gïïögø kwøŋa tägö, 'ba cuŋŋe poodi. 8Kiper paac mør dëëre othïïŋe ri paac mør, ni ö nyeya mørri ni thïïŋ ree ri nyeya mør. Ni tïm kwör mo thööthi ni jäŋŋi, ni jït pinynyi ki meel. Ni gïïögøøni beege nyäät gïï mo leth moo tägi.

9«'Ba gwøgu rou, kiper uuno kïthge kwör løøe, ni pöötge uuni yïth uut acook lam. Ni cuŋŋu nyïm kwääri ki nyeye kiper nyeŋŋa, nou køpa gïra nyïmge. 10'Ba luumma nyään na met okwøŋ køp yïth mïëri bëët. 11'Ba kanyo makge uuni ni kïthge uuni kar løøk, kär dee gïn lääŋŋu kiper gïno caannu. 'Ba wäru caannu gïno wëëk u kanyøca, kiper paa uuni noo cäänö, 'ba beeye Jwïëc Jwøk na en kur keere. 12'Ba cöögö coki okïth yi thøø; ni ö wuue ni kïth nyaare. 'Ba obwöre rege othïïŋge ri jøøa nywøl ge, ni kïthge ge yi thøø. 13Ni ö jiyi bëët ni mänge ki uuni kiper nyeŋŋa. 'Ba ŋato jïëny gïïögø këël aŋuunne, opiem.

14«'Ba gïna näk ec raac ki gø døc na näk gïr ränynyö ojootu noo cïp kanya näk mo ba doo maara kïth yie.» Beerra man ö ŋato kwaan luubö man ni ŋäc tier gø!#13:14 Beerra man ö ŋato kwaan luubö man ni ŋäc tier gø! Luubö man ba caana Jecu, 'ba beeye Maak na göör gø. «Kanyøca nø, jø wø en Judia wär bwøkge bäät kïte. 15Ni ŋato en wï øtø, kär nee duua piny, ni døny øde kuna käde ki gïrpiny. 16Ni ö ŋato en yi pwödhö ni ba duu paac kuna lwør abïïne. 17'Ba otïmö ni leth døc jï määro yïthge da jiy, ki määro dhwödhö yïth nïröke. 18Lämu kiper nee ba täge ka arïïa. 19'Ba yïth nïrögø, piny ojïti ki teeŋ gïï mo leth mo kär kwøŋ öö këël kanya cak piny mana cwääc Jwøki, gøøc kawaane, ni bäŋgø mo cäŋ tägö këët na bäre bäre. 20'Ba onää Wuuö nïrögø käre døøc mo nøk, doo bäŋ dhaanhø mo doo piemø. 'Ba nïrögø adøøc mo nøk kiper jøøa miek na näk ee jierø. 21'Ba kanyøca ni näk da ŋat mo köö ki uuni, ni ‹Neennu, Krictø en›, wala ‹Neennu, eni ice›, kär nou jïëy ki gø. 22Kiper Kricte mo patha adïëri ki nyïïkuk Jwøk mo patha adïëri, rege othïïŋge ni tïïge ki ŋïïce ki gïï mo rëëma ec ni maaŋge wïth jøøa näk ojierø ni näk mo løny jïge. 23'Ba uuni, gwøgu rou. A caana gïï jïïu kany pootge ni poot kär tägö en.

Pwöc Kiper Ööny Wär Dhaanhø

(Mathiew 24:29-44; Luk 21:25-33)

24«'Ba ki yïth nïrögøøni noo näk køør gïïo leth yøø,

« ‹cäŋ oput tïïc ni cøl, ni ö dwääyi ni ba cïp taye,›#Aydheea 13:10

25‹ni päänh ceerri ki maal,›#Aydheea 34:4

ni ö gïïa näk jïge da teek maal ni jäŋi.

26'Ba kanyøgø nø, Wär Dhaanhø ojoot jiyi ni öö ki yïth pøøl#Daniel 7:13 ki teek mo dwøŋ ka ajiem. 27'Ba kanyøgønø, nyïïatwiet maal ojääŋŋe, ni cooŋ jiye moa näk ee jierø ni käle ka wïth tuk piny karge ŋweeni, ni ge cuuŋe ka yi piny bäre këël yi maalø bäre.

28«Ennø, kwänynyu ki pwöc dëër olaam. Kany wø tïm bääte ni løth ni jïte ki bøøge, wø ŋäyu ŋääö ni dhikøth kare acäännö. 29Kaawat manøgø thuwø, kanyo neennu gïïögø ni tägö, oŋäyu ni ööny Wär Dhaanhø kare acäännö, ni ena dhi kiir kiree. 30Adïëri møn a caana gø jïïu, ni beenhnhø man ba doo pöödhö, ni gïïögø bëët poot kär cööp karge. 31Maal ki piny opöödhi, 'ba luupa ba dak.

32«'Ba dïcäŋöca wala caannøca, bäŋ ŋat ŋäc gø, këël nyïïatwiet maal wala Wäädö. 'Ba beeye Wuuö keere. 33Gwøgu rou, ni kuru. Kiper kanyo ööe yie kuyu. 34Gïnögø caala dhaanhø mo manynya wääth. Kanyo tïŋŋe paac, jammi bëët cïbe ceŋ laage, ni ŋati man nø ki tïïe. Ni kööm ŋat wø koor dhi kiir, ni bëëde ni kurö. 35Kiper manøgønø, kuru. Kiper kanyo ö wää paaci yie kuyu, nee abøøya, wala dï wäär, wala kany wø köök gwiene, wala amöölla. 36Kiper kanymør eni laara ö bäätu ni nwän uuni ni uuno butö. 37'Ba gïn caana jïïu en, a cäänna jiy bëët, ni ‹Kuru.› »

Currently Selected:

Maak 13: AnyuB

Highlight

Copy

Compare