Mathiew 2
2
Kanya Ö Jø Wø Kwaan Ceer Na Lïïmge Jecu
1'Ba kanya lwaarø ki Jecu yi Bethelem na en Judia yïth nïra bëët Eerati na nyeya, da jiy mo wø kwaana ceer ma aöö ki yïth mïëya en jï løø kur tuul-cäŋ, ni öge Jerucalem, ni pëëge, 2«?Na age ŋata nywöli na nyeny jø Juuth? Kiper cëënynye ajootwa ki jï løø kur tuul-cäŋ, ni beeye tiere ni öwa en nee eni wøørwa.» 3'Ba kanya ö nyeya ma Eerat na wïny gïnögø, cwïnye apädhö këël jø Jerucalem bëët.
4Køøre Eerat kwääc laam bëët ki dïpööye mo ciik Jwøk na en dï jiy, acooŋ kanya ciel ni pëëny geni ni kööe, na «?A kaa na di Krictø nywølø yie?»
5Ni caange gø jïgø, ni «Beeye Bethelem na en Judia. Kiper ogöör nyikuŋ Jwøki na ennø nø,
6«ni ‹Ï na Bethelem ni en yi ŋööm Juuda,
karï ba thiinh dï mïëc Juuda,
kiper bee ïïni noo ö dïbwödhi ki riï,
ŋato gwøk jiya ma jø Icriel.› »#Mikiya 5:2
7Kanyøgønø, jø wø kwaan ceer acwøl Eerati ka atade, ni pëëny ge døøc, na «?A yi wäne na nëën cëëyögø?» 8Ni wëëk ge wääth nee cige Bethelem, ni kööe, ni «Cou ni manynyu kar nyilaarøgø døøc. 'Ba noo jootu gø, wär caannu jïra, kiper naa ööa kuna wøøra gø thuwø.»
9'Ba kanya nø wïnyge dwør nyeya, gena put aay. Ni ö cëëya neenge ki jï løø kur tuul-cäŋ ni put ci nyïmge, ni cääthge køør gø, këël mana cuŋŋe bäät kanya en nyilaalli yie. 10'Ba kanya jootge cëëyögø, yïthge amïnnö ki mïnnö mo dwøŋ døc. 11'Ba kanya dønyge yi øtø, nyilaal ajootge ki menni ma Meeri, ni këëlge cøŋge piny ni wøørge gø. Kanyøgønø, opïri moge ajapge, ni moocge eni ki muuce, ni beege warkey, ki mädhi mo ŋwääö ni met ma teeŋi. 12'Ba kiper mana tïme ni geno kööm Jwøki ki yïth lääk, ni kärge døø baŋ Eerat, gena aay ki jöö mør ni døøge poge.
Kanya Ö Eerati Na Many Krictø Nee Nääe
13'Ba kanya nø døø jø wø kwaan ceer poge, nyïïatwiel maal mar Wuuö aö bäät Jocep ki yïth lääk ni kööe, ni «Ö maal ni lwørï nyilaal ki menni ni reŋŋï Ijep, ni bëëdï kunöce këël kanyo dee gïn caana jïrï. Kiper Eerat tïmö ni manynya kar nyilaal nee nyilaal nääe.» 14Kanyøgønø, Jocep aput ö maal ni lwør nyilaal ki mii gø ki wäär ni put aa Ijep. 15'Ba ena put bëëtö kunöce këël mana thøw Eerati. 'Ba manøgøøni tägi kaper nee luumma caan Wuue ki dhi nyikuŋ Jwøk thur kare, na køp, ni «Wääda cwöla wøk ki Ijep.»#Odheea 11:1
16'Ba kanya nø jooti Eerati ni eno cøøk jøøa kwaan ceer, wïïe ree anoode ki wëër, ni jääge ki jiy, ni ö obwöc cwøw bëët moa en Bethelem ki mïëya en deŋ paanøgø bëët ni nääi, ni beege obwöre moa näk cwiicge oriewi, ki moa käl køørge, ni cwiiri moøgø kwaane ka køør mana wïnynye dhøk jø wø kwaan ceer kanya pëëny ge. 17Kanyøgønø, gïna caan nyikuŋ Jwøki ma Jeremaya athur kare, na køp,
18ni «Dwøl awïnyö yi Reema,
ni jiy göö ko oduuru mo päl.
Ni beeye Reecal na jwöŋö kiper obwöre moe,
ni kweere ki man cïp cwïnye piny,
kiper na bäŋe nyilaal mo odööŋ.»#Jeremaya 31:15
19'Ba kanya thøw Eerati, nyïïatwiel maal mar Wuuö aö bäät Jocep ki yïth lääk kanya en Ijep, ni kööe, 20ni «Ö maal ni lwørï nyilaal ki menni ni døøï yi ŋööm Icriel, kiper jøøa many nyilaal nee 'näkge, gena thøw.» 21Ni ö Jocepi ni put ö maal ni lwør nyilaal ki mii gø ni døø yi ŋööm Icriel. 22'Ba kanya wïnynyi Jocepi ni Arkelia odööŋ Judia na kwäärö kar wänni ma Eerat, ena lwäyö ki ciin kaace. 'Ba kiper mana näk eno kööm Jwøki ki yïth lääk, ena daa Galili. 23Ni cøøe ni bëëde yi päänya cwøl ni Nadhareth, nee mana caan nyïïkuk Jwøki thur kare, na køp, ni «Eno cwøl ni nyï Nadhareth.»
Currently Selected:
Mathiew 2: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia