Mathiew 27

Kanya Kïth Jecu Nyïm Paylat

(Maak 15:1; Luk 23:1-2; Jøøn 18:28-32)

1'Ba na tïme na amöölla, kwääc laam bëët, ki jaae, dhøkge adwalge nee Jecu 'näkge. 2Ni twöcge eni ni bwøthge gø wøk, ni kïthge gø baŋ kwäärö ma Paylat.

Luum Thøw Juudac

(Moa Tïïc Nyïïatwieli 1:18-19)

3'Ba Juudac, ŋata cïp Jecu ceŋ nyïïmän, kanya joot gø ni Jecu oŋøl yi thøø, wïïe acäŋ caarrø ni dwøk gweta näk pïëradäk baŋ kwääc laam ki jaae. 4Ni kööe, ni «Aana bääyö kiper na cïba ŋat mo bäŋ gïn mo ee baaø ceŋ nyïïmän.»

'Ba adwøkge, ni «?Jïwa dee ŋø? Manøgø ena jïrï keerï.»

5Ni ö Juudaci ni leeŋ gweta näk pïëradäk piny yi Øt Jwøk Mana Dwøŋ, ni aae. Ni cøøe ni lïër dëëre.

6'Ba kwääc laam gwetøgø alwørge, ni köge, ni «Ba beer ki man kïth gweti kar kän mar Øt Jwøk, kiper gena gwet remø.» 7Kiper manøgønø, gena cuuŋö ni ŋeewge pwödhö mar dïcwäc dääe ki gwetøge, nee juurre wø koony yie. 8Kiper manøgønø, pwöthögø atïmö ni cwøl ni Pwöth Remø, këël dïcäŋi en. 9Kanyøgø gïna caan nyikuŋ Jwøki ma Jeremaya athur kare, na køp, ni «Geni gweta näk pïëradäk alwørge, ni beeye gweta ö jø Icrielli na jïëcge bäät gø ni beeye gät dhaanhø, 10ni ŋeewge pwödhö mar dïcwäc dääe ki gwetøgø, kaawat mana caani ya Wuuö Jwøki jïra.»#Dhekaraya 11:12-13; Jeremaya 32:6-9

Kanya Ö Paylati Na Pëëny Jecu Kar Løøk

(Maak 15:2-5; Luk 23:3-5; Jøøn 18:33-38)

11'Ba Jecu akäl nyïm kwäärö ma Paylat. Ni ö kwäärö ni pëëny gø, ni «?Bee ïïni na nyeny jø Juuth?»

Ni dwøgi ya Jecu jïgø, na «Acaanï na kare.»

12'Ba na ö kwääc laam ki jaae na kïthge bääte ki luup, eni bäŋ gïn mo ee dwøgø. 13Kanyøgø Paylat aköö jïgø, na «?Aŋø, gïï ni thööth ni kïthge bäätï ii ba wïnyi jïrï?» 14'Ba bäŋ gïn mo odwøk Jecu jïgø, këël luubö aciel røk moa caan dëëre. Kanyøgø nø, kwäärö yie athäŋŋö døc.

Kanya Ö Paylati Na Ŋøl Thøø Bäät Jecu

(Maak 15:6-15; Luk 23:13-25; Jøøn 18:39—19:16)

15'Ba kany wø tïme na kar ajwöm-cam mar cäŋ Cäŋa Pööth Thøøe Yie, kwäärö dhaanhø aciel wø päde pädö jï lwaak dëët jøøa no otwöö, ni beeye ŋat wø manyge jaak. 16'Ba kar kaagø da nyen mo raac døc øt twöc mo cwøl ni Baraba. 17'Ba kanya rööp lwaaki kanya ciel, Paylat apëëö, na «?Aŋa ni manynyu nee päda jïïu, Baraba, wala Jecu na cwøl ni Krictø?» 18Kiper ajoode ni kwääc laam ki jaae, marge keec na kälge Jecu baŋe.

19'Ba kanya bëët Paylati no opï piny bäät køøm løøk, cïïe aöön baŋe ki dwøl ni kööe, ni «Kär dee gïn tïïyï ki ŋatøgø ni mare beer enø. Kiper gïï mo leth døc ajwøra yawïtïni ki yïth lääk kipere.»

20'Ba kanyøgøøni kwääc laam ki jaae, yïth jiy acoonge ki man kwacge kwäärö nee Baraba pät, nee tïme ni 'näka Jecu.

21Køøre kwäärö acäŋ köö ki lwaak, na «?Aŋa dï jøøi na ariiø ii ni manynyu nee päda jïïu?»

Ni köge, ni «Baraba.»

22Ni kö Paylati jïge, na «?Agïnaŋø nø, noo tïïa ki Jecu na cwøl ni Krictø?»

Ni jølge gø bëët, ni «Eni gur bäät jaadha no odëëdö.»

23Ni dwøgi ya Paylati jïge, na «?Aŋø, agïnaŋø na raac ni ee tïïö?»

'Ba kaagønø, lwaak aput rëëdö døc ni kaala mana dïkwøŋ, ni «Eni gur bäät jaadha no odëëdö!»

24'Ba na jooti ya Paylati ni bäŋ gïn løny ki tïïc jïre këët, ni dïŋaŋ manynya man täge, ena lwötö ki pïï ni lwøk ceŋŋe nyïm lwaak, ni kööe, ni «Kara tïme ni bäär ki rem ŋatøgø. Manøgø ena jïïu keeru nø.»

25Ni dwøgi ya jiyi bëët jïre, ni «Remme ena bäätwa ki nyïïwa.»

26Kanyøgø Baraba apän geni, ni wëëk Jecu pwöt ka alaŋŋa, ni cïp gø nee gur bäät jaadha no odëëdö.

Kanya Ö Jø Tøŋŋi Na Buuge Jecu

(Maak 15:16-20; Jøøn 19:2-3)

27'Ba kanyøgø jø tøŋ mo kwäärö, Jecu akälge ni kïthge gø kany wø bëët jø tøŋŋi yie, ni cooŋge jø tøŋ bëët nyïme. 28Ni kälge abïïe moe wøk, ni kïthge abïï mo kwaar dëëre, 29ni cwääge ka adun koodhi ni kïthge gø wïïe, ni moocge cer cwïïe ko otöök, ni këëlge cøŋge piny nyïme, ni buuge gø, ni köge, ni «Dëël jööt nø, nyeny jø Juuth!» 30Ni ŋuutge bäät gø ki laaw, ni lwørge otöök ni gøøcge gø ki wïïe. 31'Ba na nø buuge gø, abïïnögø akälge wøk dëër gø, ni dwøkge abïïe moe dëëre. Ni bwøthge gø wøk kuna guri bäät jaadha no odëëdö.

Kanya Gur Jecu Bäät Jaadha No Odëëdö

(Maak 15:21-32; Luk 23:26-43; Jøøn 19:17-27)

32'Ba kanya cääthge jöö, gena røømmø ki ŋat mør ma nyï Cayriin, mo nyeŋŋe Cayman. Nyenøgø amakge ki teek, nee jaadha no odëëdö mar Jecu kääre. 33'Ba kanya pïïcge kany mo cwøl ni Gølgøtha, na näk tiere beeye ni Kar Cuu Wïc, 34Jecu amoocge ki køøŋ nyïïomøki mo orwöbö ki gïn mo keec nee maadhe. 'Ba na bel gø, ena kweer ki man maath gø. 35'Ba kanya nø gurge gø bäät jaadha no odëëdö, abïïe moe apääŋge yïthakicge ki køør ŋïïce mo wø tïïc ki ri kwääk ki baw. 36Køøre gena pï piny ni ge køya eni kaace. 37'Ba løø kur wï Jecu maal agöönge ki luubö mo ege kïth bääte, mo kwaan, ni «Ŋati en beeye Jecu nyeny jø Juuth.» 38'Ba kar kaagø da kuuwe ariiø mo ogurö ki eni na aciel, ni dhaanhø aciel ena bäät cwïïe, ni maya ena bäät caame. 39'Ba jø wø pöödhi ki kaace wïthge wø kenyge kenyø, ni ge buua gø, 40ni köge, ni «Ï na doo nyak Øt Jwøk Mana Dwøŋ ni cäŋi gø geerrø ki nïne adäk, køny riï nø. Ö piny ki bäät jaadha no odëëdö, ni näk mo ïïna O Jwøk møn.»

41Ni buui ya kwääc laam thuwø ki dïpööye mo ciik Jwøk ki jaae, ni köge, 42ni «Eni wø kønya jø møøk, 'ba dëëre ba maar køny. Ni näk mo ena nyeny jø Icriel, eni ö piny ki bäät jaadha no odëëdö ennø, nee wa jïëcwa ki eni. 43Eni kee Wuuö Jwøk ee ŋäädhö. ?Aŋø, Wuuö Jwøk ba køny eni ŋø, nee Wuuö Jwøk yie met ki eni? Kiper ena köö, ni ‹Aana O Jwøk.› » 44Ni ö kuuwe moa no ogurö ki eni na aciel ni buuge eni na ennønø thuwø.

Kanya Thøw Jecu

(Maak 15:33-41; Luk 23:44-49; Jøøn 19:28-30)

45'Ba kanya tïme na caae apaar kurriiø ki dïcäŋ, piny atïmö na muudhö bäre këël caae adäk ka abøøya.#27:45 Caae apaar kurriiø beeye caae abïciel ki dïcäŋ, ni caae adäk beeye caae abïŋween ka abøøya ki kwäänö mar Ithiöpia. 46'Ba kanya tïme na kar caae adäk, Jecu aköök ki dwøl mo päl, ni «?Elöi, Elöi, lama cabakthani?» na näk tiere beeye, ni «?Jwøa, Jwøa, aŋø ni weyï aani en?»#Dut Pwøc 22:1

47'Ba jø møøk røk jøøa cuŋŋö kaace, na wïnyge gøøni, gena köö, ni «Ŋati cwøla Ilaaja.»

48Ni ö dhaanhe acielli dïge ni put reeŋø, ni lwöte ki lïïpa ni cøt gø yi køøŋ nyïïomøki mo wac, ni coom gø wï otöök, ni rwaak gø baŋ gø nee maadhe. 49'Ba jiy møga aköö, ni «Weyï, nee neenø nee Ilaaja ööa kuna køny eni.»

50Ni cäŋ Jecu köögö ki dwøl mo päl, ni jwïëe ka aŋuudi.

51'Ba kanyøgø abïïna näk ogëëŋö mar Øt Jwøk Mana Dwøŋ aput jeeø ki dïëre, ni tägi ka maal ni këët piny. Ni ö pinynyi ni jäŋ ree, ni kaaŋ kïte. 52Ni ö bwörri thuwø ni japge rege, ni ö jø Jwøki mo thööth moa no othøw ni tïŋi maal. 53Ni öge wøk ki yïth bwör køør duun Jecu wøk ki yi thøø, ni cige paana en kur keere na näk mar Jwøk, ni beeye Jerucalem, ni neeni ya jiyi mo thööth.

54'Ba kanya ö kwääy jø tøŋ man wø käär jiy ma dïpa ki jøøa en buute, ni beege jøøa koor Jecu, na neenge dïjäŋ piny ki gïïa tägö bëët, gena lwäyö døc, ni köge, na «Adïëri møn, ŋati en beeye O Jwøk.»

55'Ba kaace thuwø da mään mo thööth mo nëënö ka kany mo bäär, ni beege jøøa läm køør Jecu ki Galili, na tïny eni. 56'Ba Meeri Magdalin, ki Meeri mii Jeemeth ki Jocep, ki mii wäät Dhebedi ena dï mään moøgø.

Kanya Pïël Jecu Yi Bwörö

(Maak 15:42-47; Luk 23:50-56; Jøøn 19:38-42)

57'Ba kanya tïme na abøøya, nyen mør mo okwär ma nyï Arimathia mo nyeŋŋe Jocep aöö, ŋat ma bääŋ Jecu thuwø, 58ni ci baŋ Paylat ni kwac dëër Jecu. Kanyøgø Paylat acïpö ki dwøl nee dëër Jecu mëëk eni. 59Ni ö eni ni lwør dëër Jecu, ni bøøny gø ka abïï koony mo tøŋ ma lïïna, 60ni pïël gø yi bwörö mare kiree mo poot nyään, mo ee nø løøt yi kïdi. Ni ŋïël kïdi mør mo dwøŋ døc dhi bwörö manøgø, ni aae. 61'Ba Meeri Magdalin ki Meeri maya, ge ena kaace, ni geno pï piny ni ge dïët ki bwörö manøgø.

Kanya Ö Paylati Na Cïp Jø Tøŋ Nee Bwörö Koorge

62'Ba kanya tïme na aruunnø, cäŋa en køør cäŋ jiiŋ røk, kwääc laam ki jø Paricith, gena ci baŋ Paylat, 63ni köge, ni «Kwäärö, wïthwa aparwa ki luum dïcuuy manøgø, kanya poode ni kwøw ena köö, ni ‹Køør nïne adäk, a cäŋa ö maal ki yi thøø.› 64Kiper manøgø nø, cïpï ki dwøl nee bwörö mare koor këël mano këët ri dää nïne, kiper nee bääge ba öge kuna kwalge dëëre, ni caange gø jï jiy, ni ‹Ena tïŋ maal ki yi thøø.› Køøre nø, cwøk mano ööi cään tïmö ni kadha rääö mare ki mana dïkwøŋ.»

65Ni dwøgi ya Paylati jïge, ni «Kädu ki jø tøŋ mo kurö. Cou ni dëëtu dhi bwörö kaawat mana ŋäyu.» 66Kanyøgø gena aay ni dëëtge dhi bwörö manøgø, ni moocge dëër kïnnögø ki ŋïï. Ni wecge jø tøŋ ni kurö.

Currently Selected:

Mathiew 27: AnyuB

Highlight

Compare

Copy