Ciik Kiper Dïlämme 4
4
Jöör Cïp Olämme Mo Wëën Raay
1'Ba Wuuö Jwøk acäänö ki Modhe ni kööe, 2ni «Caanï jï jø Icriel ni kööï, ni ‹Ni näk da dhaanhø mo obääyö, ni bääyö manøgø ba kame, ni eni bääya røk ciik moa cem Wuuö Jwøki ni kär tïïc, gïïo cari ii wär tïïe.
3« ‹Ni näk mo dïlämi mana näk wïïe othïïmmö ki maaw obääyö, ni tïm jiyi no obääyö ki køøre, eni wär cïpe jï Wuuö Jwøk ko olämi ma rwaath mo bäŋ gïn mo ogwäyö dëëre ni beeye olämi mar wëën raay kiper raay moa baae. 4Køøre eni rwaath manøgø käle dho oduŋkaany røømmø nyïm Wuuö Jwøk, ni ö eni ni cïp cere bäät wï rwaath manøgø, ni ŋaal rwaadhøgø nyïm Wuuö Jwøk. 5Køøre nø, eni na dïlämi mana näk wïïe othïïmmö ki maaw, lwötö ri rem rwaadhøgø ni kïth gø yo oduŋkaany røømmø. 6Ni ö eni na dïlämi ni cøt lweete yi remø ni ker remø nyïm Wuuö Jwøk kwöre abïriiø, nyïm abïïna näk gëëŋi mar kanya en kur keere na pere leth. 7Ni ö dïlämi thuwø ni naaŋ remø mør dëët tuk gïn wø waaŋ gïn wø jïye ŋwääi ni met bääte na en nyïm Wuuö Jwøk yo oduŋkaany røømmø; ni ö rem rwaathi manøgø mano dööŋ ni køny gø tier gïn wø cïp olämme bääte mo wø waaŋ bäre na en dho oduŋkaany røømmø. 8Ni ö eni ni käl maaw wøk bäre mana en ri rwaadhøgø no olämi enø mar wëën raay, ni beeye räämmö na näk gïïa en ec ee rïëbö, ki dwäle bëët moa en bäät gïïa en ec, 9ki røgi karge riet na en wïth dïbule, ki maaw mana en bäätge, ki maaw mana näk cwïny okuup ree no okäl wøk ki røgi ciel, 10ni tïïe kaawat man wø käli wøk ki ri dhieŋ man wø cïp no olämi man wø duunni ki mëër; ni ö eni na dïlämi ni waaŋ gïïögø bäät gïn wø cïp olämme bääte mo wø waaŋ bäre. 11'Ba eni pïën rwaath ki rïŋŋe bäre, ki wïïe, ki tiete, ki gïïa en ec, ki weenynye moe, 12ni beeye løø rwaath bäre kuna dööŋ, kïthe wøk ŋää twïër kany mo waany, kany wø wet bur yie wøk, ni waaŋ gø ni ee cïp bäät jenni yi maac, ni waaŋe kany wø wet bur yie.
13« ‹'Ba ni näk mo dhaanh Icriel bäre obääyö, ni ge bääya røk ciik moa cem Wuuö Jwøki ni kär tïïc, këël na näk mo gïna baacge ba nëëni jï jø acooŋa, geni ajäla ena bäätge. 14'Ba kanyo tïm raayi moge ni ŋäc ni beeye gïna baacge, jø acooŋa wär lwötge røk dhäk ki rwaath, ni cïpge gø no olämi mar wëën raay, ni kïthge gø nyïm oduŋkaany røømmø. 15Ni ö jøøa døøŋŋø mo jø Icriel ni cïpge ceŋge bäät wï rwaadhøgø nyïm Wuuö Jwøk, ni ŋaal rwaath nyïm Wuuö Jwøk. 16Køøre dïlämi mana näk wïïe othïïmmö ki maaw lwötö ri rem rwaadhøgø ni kïth gø yo oduŋkaany røømmø, 17ni cøt lweete yi remø ni ker gø nyïm Wuuö Jwøk kwöre abïriiø, nyïm abïïna näk gëëŋi. 18Ni ö eni thuwø, eni na dïlämi, ni naaŋ remø mør dëët tuk gïna näk caala tharabëëta man wø waaŋ gïn wø jïye ŋwääi ni met bääte na en nyïm Wuuö Jwøk yo oduŋkaany røømmø; ni ö rem rwaathi manøgø mano dööŋ ni køny gø tier gïn wø cïp olämme bääte mo wø waaŋ bäre na en dho oduŋkaany røømmø. 19Ni ö eni ni käl maaw wøk bäre mana en ri rwaadhøgø ni waaŋ gø bäät gïn wø cïp olämme bääte. 20Ni jöö mano ö dïlämi noo tïïc rwaadhøgø ki gø, tïïe kaawat mana kwøŋ rwaath tïïc ki gø mana cïbe no olämi kiper wëën raay moe, ni tïïe ni caala gøøni. Ni manøgø tïïc dïlämi no okïdi kiperge; køøre ge di wëënnö. 21Køøre eni dëër rwaadhøgø kïthe wøk ŋää twïër ni waaŋ gø kaawat mana kwøŋ rwaath maya waaŋ; ni manøgø beeye olämi man wø cïp kiper wëën raay mar dhaanh Icriel bäre.
22« ‹'Ba ni näk mo dïbwödhi obääyö, ni bääyö manøgø ba kame, ni eni bääya røk ciik moa cem Wuuö Jwøki, Jwøk mare, na caane ni kär tïïc, eni ajäla ena bääte. 23Kanyo tïm raayi moa baae ni ŋäc, eni olämi mare mano cïbe wär cïbe na nywø ateea mo bäŋ gïn mo ogwäyö dëëre. 24Køøre eni cere wär cïp bäät wï nywø ateea manøgø, ni ŋaal gø nyïm Wuuö Jwøk kany wø ŋaal olämi man wø waaŋ bäre yie; ni manøgø beeye olämi mar wëën raay. 25Køøre dïlämi wär lwöte ri rem olämi manøgø na mar wëën raay enø, ni lwøre ka lweete ni naaŋ gø dëët tuk gïn wø cïp olämme bääte mo wø waaŋ bäre. Ni ö rem olämi manøgø mano dööŋ ni køny gø tier gïr olämme manøgø. 26Ni ö maar olämi bäre ni waaŋ gø bäät gïn wø cïp olämme bääte, ni tïïe kaawat mana waaŋ maaw mar olämi man wø duunni ki mëër. Ni manøgø tïïc dïlämi no okïdi kiper raay mo ŋatøgø; køøre eni di wëënnö.
27« ‹'Ba ni näk mo dhaanhø mo ena røk jiy jaak obääyö, ni bääyö manøgø ba kame, ni eni bääya røk ciik moa cem Wuuö Jwøki ni kär tïïc, eni ajäla ena bääte. 28Kanyo tïm raayi moa baae ni ŋäc, eni olämi mare mano cïbe kiper raay moa tïïe wär cïbe na ateea ma dhaagø mo bäŋ gïn mo ogwäyö dëëre. 29Køøre eni cere wär cïp bäät wï olämi manøgø na mar wëën raay enø, ni ŋaal olämi manøgø mar wëën raay kany wø ŋaal olämme yie mo wø waaŋ bäre. 30Køøre dïlämi wär lwöte ri rem olämi manøgø ni lwøre ka lweete, ni naaŋ gø dëët tuk gïn wø cïp olämme bääte mo wø waaŋ bäre; ni ö rem olämi manøgø mano dööŋ ni køny gø tier gïn wø cïp olämme bääte. 31Ni ö eni ni käl maar olämi wøk bäre, kaawat man wø käl maaw wøk ki ro olämi man wø duunni ki mëër. Ni ö eni na dïlämi ni waaŋ gø bäät gïn wø cïp olämme bääte na gïn wø ŋwääi ni met jï Wuuö Jwøk. Ni manøgø tïïc dïlämi no okïdi kiper ŋatøgø; køøre eni di wëënnö.
32« ‹'Ba ni näk mo olämi mano cïp ŋatøgø no olämi mar wëën raay moe beeye nyi røømmø, wär cïbe na dhaagø mo bäŋ gïn mo ogwäyö dëëre. 33Køøre eni cere wär cïp bäät wï olämi manøgø na mar wëën raay enø, ni ŋaal gø no olämi mar wëën raay, ni ŋaale kany wø ŋaal olämi man wø waaŋ bäre yie. 34Køøre dïlämi wär lwöte ri rem olämi manøgø na mar wëën raay enø, ni lwøre ka lweete ni naaŋ gø dëët tuk gïn wø cïp olämme bääte mo wø waaŋ bäre, ni ö rem olämi manøgø mano dööŋ ni køny gø tier gïn wø cïp olämme bääte. 35Ni ö dïlämi ni käl maar olämi wøk bäre kaawat man wø käl maaw wøk ki ri nyi røømmø man wø cïp no olämi man wø duunni ki mëër, ni waaŋ gïïögø bäät gïn wø cïp olämme bääte ni ee dwal bäät olämme mo wø waaŋ bäre jï Wuuö Jwøk ni wø bëëdö ni waaŋ ki maac. Ni manøgø tïïc dïlämi no okïdi kiper raay mo ŋatøgø moa tïïe; køøre eni di wëënnö.
Currently Selected:
Ciik Kiper Dïlämme 4: AnyuB
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Ethiopia
