Ciik Kiper Dïlämme 11

Luum Gïïa No Ocwääö Moa Waany Ki Moa Ba Waany

(Tiet Ciik 14:3-20)

1'Ba Wuuö Jwøk acäänö ki Modhe ka Aran ni kööe jïge, 2ni «Caannu jï jø Icriel ni kööu, ni ‹Moi beege teeŋ lääy moo cammu røk lääy bëët moa en wï ŋöömö. 3Lääy mano näk mo okiey moe okaaø ni rege ege pääŋŋö, ni luum man wø came ŋööe wøk ni cäŋ gø nyammø, beeye noo cammu.

4« ‹'Ba uuni, ki røk moa näk luum man wø camge ŋööge wøk ni cäŋge gø nyammø, ki røk moa näk okiey moge okaaø, dage mo kär nou cama geni. Teeŋ athïrööl, këël na bëëde ni cam ŋööe wøk dhee ni cäŋ gø nyammø, jïre bäŋ okiey mo okaaø. Ni eni beeye gïn mo ba waany kiperu. 5Teeŋ athinaak, këël na bëëde ni cam ŋööe wøk dhee ni cäŋ gø nyammø, jïre bäŋ okiey mo okaaø. Ni eni beeye gïn mo ba waany kiperu. 6Apwøø thuwø, këël na bëëde ni cam ŋööe wøk dhee ni cäŋ gø nyammø, jïre bäŋ okiey mo okaaø. Ni eni beeye gïn mo ba waany kiperu. 7Othur thuwø, këël na bëëde no okiey moe okaaø ni rege ege pääŋŋö, eni cam ba ŋöö wøk dhee ni cäŋ gø nyammø, ni eni beeye gïn mo ba waany kiperu. 8Uuni kär nou cama rïkge ni ba gutu dëëtge moa no othøw. Geni beege gïï mo ba waany kiperu.

9« ‹'Ba moi beege nou cammu røk gïï wø bëëdö yïth pïï, ni beege moa näk jïge da riith ki kwönne, ni wø bëëdö yïth näpa døøŋŋø ki yïth näm, noo cammu. 10'Ba ki røk gïï wø bëëdö yïth näpa døøŋŋø, ki yïth näm, moa näk bäŋ riith jïge ki kwönne, na en ri lwaa gïïa kwøw bëët yïth pïï, wala ri gïïa døøŋŋø na no ocwääö bëët na kwøw yïth pïï, wär bëëtge na gïï mo ec raac ki ge ki jïïu. 11'Ba kanyo bëëdu nø ni yïthu reyø ki ge, kär nou cama geni. Ni bëët dëëtge moa no othøw ni yïthu reyø ki geni. 12Gïn mo bëëdö yïth pïï jaak mo jïre bäŋ riith ki kwönne, wär bëëde na gïn mo ec raac ki gø ki jïïu.

13« ‹'Ba moi beege weny mo yïthu doo raac ki geni; gena gïï mo ec raac ki geni, ni ge ba cam; ni beeye coor, ka acuth, ko olwiith, 14ki teeŋ akän bëët, 15ki teeŋ agääe bëët, 16ki uudö, ka agïïra, ko olwiith ki teeŋge bëët, 17ki teeŋ tule bëët, ka apööra mana näk ocurrunyö, 18ka abööŋö, ki dïbëël, 19ka aliil, ko olwaarø ki teeŋge bëët, ki akwørajwöm, ka adilïga.

20« ‹'Ba twöŋi bëët moa näk jïge da bwöm, mo cäädhö ki tietge aŋween bëët, wär bëëtge na gïï mo ec raac ki geni ki jïïu. 21'Ba twöŋi moi beege moa näk løny ki man cammu geni røk moa näk jïge da bwöm bëët ni wø cäädhi ki tiel aŋween bëët, ni beege moa näk tietge okuubö ki mut ni wø päri ki piny. 22Ni geni noo cammu beege awïl#11:22 Awïl beeye oŋöömö. ki teeŋge bëët, ki bäänyö man wø räänyö ki teeŋge bëët, ka athileem ki teeŋge bëët, ka aditwiyi ki teeŋge bëët. 23'Ba twöŋi møga bëët moa näk jïge da bwöm ki tiel aŋween, wär bëëtge na gïï mo ec raac ki ge ki jïïu.

24« ‹'Ba gïï ii beege gïïo tïïc uuni nou ba waany; ŋato gut dëëtge moa no othøw, puta tïmö ni ba waany këël kanyo päth cäŋŋi. 25Ni ŋato lwør dëëtge moa no othøw, abïïe moe wär penye; 'ba eni bëëdö ni ba waany këël kanyo päth cäŋŋi.

26« ‹Ni gïïögø beege lääy bëët moa näk okiei moge okaaø ni nyootha køørge, 'ba kär pääŋŋö na bäre, wala moa näk cam ba ŋööge wøk dhøkge nee ŋiithge. Geni bëëtge ni ba waany kiperu. Ŋato gut dëëtge moa no othøw tïmö ni ba waany. 27Maya thuwø, røk lääy bëët moa näk cäädhi ka tietge aŋween bëët, mo wø cäädhi ko odhäp tietge wär bëëtge ni ba waany kiperu. Ŋato gut dëëtge moa no othøw tïmö ni ba waany këël kanyo päth cäŋŋi. 28Ni ŋato lwør dëëtge moa no othøw, abïïe moe wär penye. 'Ba eni bëëdö ni ba waany këël kanyo päth cäŋŋi. Geni wär bëëtge ni ba waany kiperu.

29« ‹'Ba røk gïï wø muuli ki piny, moo bëëdö ni ba waany kiperu beege akatajöö, ki jïïö, ka aballathuure ki teeŋge bëët, 30ki ditwat, ki ŋweec, ki digwii-döörö ki digwii-nhaadhi, ko oŋøønnø. 31Gïïögø beege gïïo bëëdö ni ba waany kiperu røk gïïa näk muulö ki piny bëët. Kanyo näk geno thøw, ŋato gut geni tïmö ni ba waany këël kanyo päth cäŋŋi. 32Gïno päth acielli bääte jaak røk gïïögø kany wø näk mo eno thøw, gïneca puta tïmö ni ba waany; nee beeye teeŋ gïn mo tïïc ka jaath, wala abïï dëël, wala pïën, wala keeca, nee gïn mo gïr tïïc jaak, wär mut piny yïth pïï. 'Ba eni bëëdö ni ba waany këël kanyo päth cäŋŋi. Køøre nø, tïmö ni waany. 33'Ba ni näk mo dak mar odhöönh mano päth acielli yie røk gïïögø, gïno en yie jaak puta tïmö ni ba waany; 'ba uuni daaøgø wär putu näk. 34Ni teeŋ gïn ma cam jaak mo pï yi daaøgø oøøc bääte tïmö ni ba waany. Ni gïn mo løny ki man maadhi mo käla yi daaøgø ba waany. 35Ni teeŋ gïrpiny jaak mano päth dëëtge moa no othøw bääte, tïmö ni ba waany. Nee pätha bäät athaanh deel wala yi këënnö, ge wär put näk. Geni ge ba waany, 'ba wär putge bëëte ni ba waany ki jïïu. 36'Ba pï jøøro#11:36 Jøøro beeye pïï mo kwönna wøk ki yïth ŋøøm. wala aguula mo yie da pïï mo gïïögø opäth yie, poot bëëdö kare ni waany. 'Ba ŋato gut dëëtge moa no othøw tïmö ni ba waany. 37'Ba ni näk mo dëëtge moa no othøw opäth bäät köödhi moa näk di piidhø, köödhi poot bëëdö ni waany. 38'Ba ni näk mo köödhi obïlö ki pïï, ni ö dëët gïïögø moa no othøw ni päth bäät köödhi moøgø, wär bëëtge ni ba waany ki jïïu.

39« ‹'Ba ki røk lääy moa näk ocïbö jïïu kiper cam, ni näk mo dagø mo othøw keere, ŋato gut dëëre mana no othøw tïmö ni ba waany këël kanyo päth cäŋŋi. 40Ni ŋato cämö ri rïŋ gø, abïïe moe wär penye; 'ba eni bëëdö ni ba waany këël kanyo päth cäŋŋi. Ni ŋato lwør rïŋ gø, abïïe moe wär penye; 'ba eni bëëdö ni ba waany këël kanyo päth cäŋŋi.

41« ‹'Ba gïï wø muuli ki yïth ŋøøm, gena gïï mo ec raac ki geni, ni paa gïï mo di camø. 42Gïn mo muuli ka bäp yie jaak, ki gïn mo muuli ka tiel aŋween, ki gïn mo tiete thööth, ni beege gïïa näk muuli ka piny bëët, kär ge cammu, kiper gena gïï mo ec raac ki geni. 43Uuni kär dëëtu tïïyu ni ec raac ki uuni ki køør gïïögø ni muuli ki piny yøø, ni ba tïïyu dëëtu ni ba waany ki køørge ki man bëëdu nou ba waany. 44Kiper bee aani na Wuuö Jwøk, Jwøk maru. Cïbu dëëtu kur keeru ni bëëdu nou ena kur keeru; kiper a ena kur keera. Ni ba tïïyu dëëtu ni ba waany ki køør gïïögø ni wø muuli ki piny yøø. 45Kiper bee aani na Wuuö Jwøk na käl uuni wøk ki yi ŋööm Ijep, naa bëëda ni aana Jwøk maru. Kiper manøgø nø, bëëdu nou ena kur keeru, kiper a ena kur keera.

46« ‹Moøgø beege ciik kiper lääy, ki weny, ki gïïa kwøw ni wø cäädhi ki yïth pïï, ki gïïa näk muuli ka yïth ŋøøm, 47ki man bëët gïna waanynyi ni you pääö ki gïna näk ba waany; ni bëët gïïa no ocwääö na kwøw moa näk di camø, ni you pääö ki moa no ocwääö na näk ba cam.› »

Currently Selected:

Ciik Kiper Dïlämme 11: AnyuB

Highlight

Copy

Compare